Mɨlʉmlʉ 22 - Kálar Nzyɛ̌m : Ejwán é Sáá

¹ Pɔ̂l, nye ó: «Bɨ́ɔɔ́ bâm le osɔ́ŋ bâm, jóʼlááá gá nkar mé múo nzě kar ɨ́ báánâʼ ɨ́ lɔ̌b wâm ɨ́ míh mɨ́n nyɨ̂!»

² Mpʉ bé á jóʼo nye lɨ́ elwib e bé ɨ́ lwǐb aramyɛ̂n yɨ́, bé ntɔ̂ʼ di ɨ́ jolaaa. Nó ó, Pɔ̂l á nze lɛ́ɛ e bé ó:

³ «Me ó Yúden. Me á byɛ̂l ó, Tarsôs ɨ́ sí Silisía. Me á ka bwaʼ yɨ́ɛ ó wâ. Lɛ̂ʼla wǎm á be ó Gamalyɛ̂l. Nye ó b'á lɛ̂ʼle me mpʉ mé dúʼoo metié bímpám gá bíná yɨ́. Me á si gbâ nyʉ̂l nyǎm lɨ́ edwě Nzyɛ̌m kûm jwɨʼ gwár mpʉ bɨ́n ntémé dí esâ ɨ́ báánâʼ yɨ́.

⁴ Me á si tíble, jʉ̂ bʉ̂r o b'á dudû nzɨ̌ mé Krîst bá. Me á si bî bʉbá e bʉrʉ̂m, tyen bé ɨ́ mbɛ̌r mímbʉʼ.

⁵ Njwɨ́ɨ mpáh Nzyɛ̌m, ndu e sɔ́má ótɔ́má bʉ̂r, bé e nkul eboʼlo ó, sá mé dí elɛ́ɛ yɨ́, yé ó tyeetye. Bé á si cɛma me mekaná, ntɔ̂ʼ tímle mé mǎ ó, me tô dwe bɨ́ɔɔ́ gá bɨ́ná, oYúden dí ɨ́ Damâs bá. Jwɨʼ yâm, yé á be ó, me tô mɛ̂r óbûʼla bé á be gʉ̂ʼ bá, búla e bé mikɛ́ʼá, tô e bé Yerʉ́zalɛm lɨ́ esú ó, bé dwéŋɔɔ bintɨ́ʼá.»

Ndwirá léme mé Pɔ̂l

⁶ «Yé á be ó, me dímé nzɨ́ e nzɨ̌, ɨ́ jɔʼ mé á be, me mû lɨ́ ekúnwo e Damâs yɨ́, yé mû témé móhó nɛ́ɛ: mimbah, myé ntɔ̂ʼ pan métwɨrâ, duho ɨ́ njʉl wé á be ɨ́ jʉ́o kʉ́ wɨ́. Myê nzě kʉn ɨ́ gúmó mé á be yɨ́.

⁷ Nó ó mé á duma sí, nzě jóʼo twíí lɨ́ elɛ́ɛ e me ó: “Saʉ̂l, Saʉ̂l, go bá pʉgʉ́ tíble mé mpʉ́nʉ̌ ɨ́ yé?”

⁸ Me ntɔ̂ʼ dî e né ó: “Dâ ɛ̌! Gua, go nzé?” Twíí nyaá ntɔ̂ʼ yala ó: “Mɛm, me ó Yésʉs, mʉr Nazarɛ̂t, gó dí etíble nyá.”

⁹ Bʉr o bɨ́h le onɔ́ɔ́ bé á be bá, bé á si kʉ bee mimbah myaá. Sâ gwár, bé á bé ajóʼo yɨ́ɛ twíí mé mʉ̂r á lwib e me nyá.

¹⁰ Nó mé á ka dî ó: “Dâ ɛ̌, me ɨ́ jala le esâ nyá?” Nó ó, Tî Yésʉs á lɛ́ɛ e me ó: “Gbɔlwaa sí. Tóʼ Damâs. Go ólɛ́ɔɔ̌ sá yɨ́yɛ̂h Nzyɛ̌m á tíʼe ɨ́ lémé wé ó, go sâʼ yɨ́ gʉ̂.”

¹¹ Ɨ́ mpʉ mé á be, me mû ántím ɨ́ lɔ̌b njʉl wé á be ɨ́ buú pan wɨ́ yɨ́, nó ó bʉ̂r ó njoo yâm bé á mɛ̂r me ɨ́ mbô, tóŋɔɔ e me Damâs yɨ́.

¹² «Nyʉ́ʉ́ mʉ̂r á be ó gʉ̂, díé lé Ananías. Nye nzě bee mê. Nye á be lɨ́ edwáawǒ Nzyɛ̌m le egwá baʼle métié gá mɨ́ná. OYúden bé á bě Damâs bá, bé á be lɨ́ ebuú sêʼle nyê.

¹³ Nye nzě pyâl kwá nyǎm, nzě tyɛ̂b bǎʼ e me. Nye e me ó: “Saʉ̂l, mɨ́ɔɔ́ wǎm, míh mô, mé bɔ́aa! Go e bée!” Ɨ́ tyé e tyé yaá, míh mâm nzě bɔ́a. Me ntɔ̂ʼ bee nyê.

¹⁴ Nó nyé á lɛ́ɛ e me ó: “Nzyɛ̌m bimpám bíná á boo twâr go ó, go gʉ́ŋaa gwɨ́má yé, ó go béyɨɨ waá dí Tîtyěl Mʉr nyá, ó go jóʼaa nye lɨ́ elwib e num wé nye mʉr tɨ̂.

¹⁵ Ebě, go óbʉboʼlǒ lɔ̌b wé, lɨ́ elɛ́ɛ ɨ́ míh mé bʉ̂r bɨ́bɛ̂h, sá gó á bee le ejóʼo yɨ́.

¹⁶ Nó ó, gǒ kǎ bóno yé ɨ́ báánâ? Gbɔlwaa sí. Go e dúŋɔɔ, jwɨɔɔ ɨ́ páʼ bísyɛ́ɛla bí ébébe byô, lɨ́ ekɛn díé mé Yésʉs.”»

Syɛ́ɛ́ mé Pɔ̂l kwá bʉr o dí abe óYúden bá

¹⁷ «Jɔʼ mé á búlǎ Yerʉ́zalɛm yɨ́, nó ó, ɨ́ mpʉ mé á jɨjɨʼla ɨ́ mpáh Nzyɛ̌m tʉ́ŋlʉ̌ yɨ́, me nzě bee ésimá.

¹⁸ Me á bee ó Tî Yésʉs. Nó nyé á lɛ́ɛ e me ó: “Sáʼ kám e kám, go kpâhwa pʉʼa ɨ́ Yerʉ́zalɛm, ebě, bʉr o tɨ̂, bé ákǎm sá gó ngá lɛ́ɛ bé, dumo e me yɨ́.”

¹⁹ Nó ó mé á lɛ́ɛ e né ó: “Dâ ɛ̌, bé lɨ́ egʉ́a ó, me á si tô ɨ́ mempáh mínjɨʼla mé óYúden, ndu e ntémé ó, me á si gbâ bʉr bô ɨ́ mbʉʼ, le ebî baá bé á dyɛ̂ʼwo e go bá.

²⁰ Jɔʼ bé á jʉ̂ Étiene, mboʼlo gǒ yɨ́, me á be ó tɨ̂. Bʉr o b'á jʉ̂ nye bá, me á si kʉ kam syɛ́ɛla yɔ́ɔ́ yaá. Me ntémé ó b'á baʼle mikán myɔ́ɔ́.”

²¹ Nó ó Tî Yésʉs á ka lɛ́ɛ e me ó: “Tóʼ, ebě, me múo nzě tyen gó lɨ́ ejaa, ɨ́ nko bʉ̂r o dí abe óYúden bá di yɨ́.”»

Pɔ̂l, bé e njwɨ́ɨ bisója mʉr Rôm

²² Bʉr, bé á be lɨ́ ejôʼlǒ Pɔ̂l, tó pyâl ɨ́ jɔʼ nyé á lɛ́ɛ milɔ̌b myaá mímyɛ̂h yɨ́. Nó bé á taare ebɨ̂n mecwíí kʉ́. Bé ó: «Pɛʼɛɛ gá mbi mʉ̂r nɨ̌ ɨ́ sí yɨ̂. Nye ɨ́ jala le edwe. Nyé ajala le ekǎ tiʼe.»

²³ Bê nzě bɨ̂n métwíí mɔ́ɔ́ nó, e nkul, le eguhɔɔ míkán myɔ́ɔ́ sí e sí, le enʉŋɔɔ pím, lɨ́ʼɔɔ nyé kʉ́ e kʉ́.

²⁴ Nó ó njwɨ́ɨ bisója á lɛ́ɛ ó, bé níŋlaa Pɔ̂l ɨ́ kóʼ bísója tʉ́ŋlʉ̌, ŋmɛ́hɔɔ nyé mingáhá, lɨ́ esâ ó, nye nkʉ̂ gʉ́ǎ sá bʉ̂r bé á bɨbɨ̂n mecwíí kʉ́ ɨ́ lɔ̌b wé yɨ́.

²⁵ Jɔʼ bé á sil ekâʼ nye e mikǒl ó, bé bí ó nye yɨ́, Pɔ̂l nzě lɛ́ɛ e kapitɛ̂n á be náǎ nyá ó: «Nzê gǒ e nkul eŋmɛ̂h mʉ̂r Rôm mingáhá, nye dína apǎ nʉa mébě ɛ̌?»

²⁶ Ejóʼo nyé á jóʼo nó yɨ́, kapitɛ̂n waá ntɔ̂ʼ lɛ́ɛ e waá nɨ́nɨ́ɨ́ ó: «Go ósâ nyá? Mʉr nyâ, nye ó mʉr Rôm.»

²⁷ Nó ó, njwɨ́ɨ bisójǎ nɨ́nɨ́ɨ́ á nze bǎʼ e Pɔ̂l, ntɔ̂ʼ dî e né ó: «Lɛ́yɨ́ɨ́ mê: go ó mʉr Rôm ɨ́?» Nó ó, Pɔ̂l nzě kam ó: «Eee!»

²⁸ Nó njwɨ́ɨ̌ nɨ́nɨ́ɨ́ nyɨɛ á ka lɛ́ɛ ó: «Mɛm á bwâm lɨ́ edi mʉ̂r Rôm ó, bwámáa, e tâŋ mɔnɨ́ ɨ́ buo buo.» Nó ó, Pɔ̂l á yala e né ó: «Mɛm, me mʉr Rôm ó, ɨ́ mebyɛ́l mâm.»

²⁹ Tyé e tyé yaá, bʉr o b'á gwa bî nye lɨ́ esú ó, nye lwíbɨɨ bá, bé ntɔ̂ʼ tuŋlo ményʉ̂l. Njwɨ́ɨ̌ nɨ́nɨ́ɨ́ mʉr tɨ̂, nye nzě jóʼo bʉ́á ɨ́ jɔʼ nyé á gʉ́a ó, Pɔ̂l á byɛ̂l ó, mʉr Rôm, bê bánǎ káʼɔɔ nyé e mikʉ̂kɔ̌b yɨ́.

Pɔ̂l ɨ́ mpǒm bʉ̌m nɨ́nɨ́ɨ́

³⁰ Njwɨ́ɨ bisója waá á be ó sí tíʼe ɨ́ lémé wé ó, nyě kpɛ̌l ó, egʉ́ǎ sá óYúden bé á pʉgʉ nwâhle Pɔ̂l yɨ́. Sá tɨ̂ʼ ó bé á tii nye mikʉ̂kɔ̌b ɨ́ mɛ́n tɨ̂ʼ yɨ́. Bê nzě lɛ́ɛ le ojwɨ́ɨ ó mpáh Nzyɛ̌m ndu e bʉr ó bʉ̌m nɨ́nɨ́ɨ́ bɨ́bɛ̂h ó, bé gwɨ̂hlaa. Nye nzě tô e Pɔ̂l ɨ́ gúmó bé á be yɨ́, nzě tyêl nyé tɨ̂, ó nye káraa lɔ̌b wé.