Mɨlʉmlʉ 21 - Kálar Nzyɛ̌m : Ejwán é Sáá

Pɔ̂l lɨ́ etô Yerʉ́zalɛm

¹ Jɔʼ bɨ́h á bɔ́ʼa e bé yɨ́, bɨ̌h bé á si tô ɨ́ sitíma, tó pyâl ɨ́ Kôs. Ɨ́ mɛ́n tɨ̂, bɨ̌h ntɔ̂ʼ pyâl Róde. Eduho bɨ́h á ka duho tɨ̂ʼ yɨ́, bɨ̌h nzě tó pyâl Pátara.

² Bɨ̌h nzě kœ̌b sitíma swîh yé á be lɨ́ edǐ tô Fénikia yɨ́. Bɨ̌h nzě kalwo tɨ̂, ntɔ̂ʼ tô e tyen dóló,

³ tó pyâl bǎʼ e tíhé Swiprʉ̂s. Bɨ̌h ntɔ̂ʼ cɨɨ ɨ́ páʼ mbó émyɛ̌l ɨ́ tíhé waá, ntɔ̂ʼ ntaa, tô nko dí etô sí Sirî yɨ́. Bɨ̌h nzě tó kumo lɨ́ ebʉ́m é Tîr, ebě, yé á jɨ ó, sitíma súlɨɨ mimbeʼ tɨ̂.

⁴ Bɨ̌h bé á si kœb ompʉ́n mé Tî Yésʉs tɨ̂. Nó ó bɨ́h le onɔ́ɔ́, bé á jâ tɨ̂ʼ sóno ntinɨ̂. Bʉr nzě lɛ́ɛ e Pɔ̂l ɨ́ nkul Sísǐm mé Nzyɛ̌m ó, nye ayɨ́ tô Yerʉ́zalɛm.

⁵ Damá jóʼo nó, ɨ́ jɔʼ sóno ntinɨ̂ bɨ́h le onɔ́ɔ́, bé á di nyá, á be, nye mû sí laa yɨ́, bɨ̌h nzě laa, tô. Ompʉ́n bɨ́bɛ̂h nzě tó lîʼle bɨ́h, táare e bʉbá bɔ́ɔ́, kumo e bwán bɔ́ɔ́, tó pyâl ɨ́ jɔʼ bɨ́h á sil entaa nkana yɨ́. Bɨ̌h nzě bɨʼ mébóó sí lɨ́ ebʉ́m é mâŋ, lɨ́ ejɨʼla e Nzyɛ̌m.

⁶ Bɨ̌h nzě jɨjána, bâʼ jána e bâ, bâʼ jána e bâ. Bɨ̌h nzě tó nî ɨ́ sitíma tʉ́ŋlʉ̌, bɨ́ɛ nzě swîʼ yɔ́ɔ́, tóŋɔɔ kwá nyɔ́ɔ́. Bɨ̌h ntɔ̂ʼ tô e tyen yɨ́h dóló mâŋ e mâŋ.

⁷ Bɨ̌h nzě duhǒ Tîr, báʼǎ kalwo ɨ́ sitíma yaá, bɨ̌h nzě tó pyâl lɨ́ ebʉ́m é Tolemayɨ́da ɨ́ gúmó bɨ́h á sîl tyen mâŋ e mâŋ yɨ́. Bɨ̌h nzě sulo, lɨ́ ebára e bɨ́ɔɔ́ bɨ́ná dí tɨ̂ʼ bá. Bɨ̌h le onɔ́ɔ́ nzě lɛŋ élú égwár tɨ̂.

⁸ Ádwií ɨ́ mɛ́n tɨ̂ʼ nɛ́ɛ: bɨ̌h nzě mɔa, pyâl Kesáre. Tɨ̂ʼ ó bɨ́h á sul ɨ́ mbɛ̌r mé Philippe yɨ́. Philippe á be ó mʉr ngwár ɨ́ sɔ́má bʉ̂r nzaangbá bé á pɛ́hɔɔ ɨ́ Yerʉ́zalɛm bá. Nye ntémé á be ó, lɛ́ɛ pô. Bɨ̌h bé á jâ ó, ɨ́ mbɛ̌r wé.

⁹ Nye á be ó e bibíŋ méséhe binâ. Byé á bɨbe ó, lɨ́ egwîh mílɔ̌b mé Nzyɛ̌m.

¹⁰ Bɨ̌h bé á si di tɨ̂ʼ melû ɨ́ buo buo. Nyʉ́ʉ́ ngwíha milɔ̌b ntɔ̂ʼ pyâl tɨ̂, duhǒ sí Yʉ́da. Díé lé, lé á be ó Agábus.

¹¹ Nye ntɔ̂ʼ nzě gúmó bɨ́h á be yɨ́, nʉa káná mé Pɔ̂l, nzě kâʼ nyé mʉr tɨ̂ʼ mebô e mekʉ̌. Nye ó: «Paá bee gá mpʉ̌ Sísǐm dí elɛ́ɛ yɨ́: mʉr dí e kaná nyâʼ nyá, oYúden ó Yerʉ́zalɛm, bé ókâʼ nyé ó mpʉ. Bé ókâʼ nyé, ntɔ̂ʼ bɛ́mɔɔ nyé kwá bʉr o bíkûl.»

¹² Jɔʼ bɨ́h á sil ejôʼlo mekǎn maá yɨ́, bɨ̌h bʉr o tɨ̂, ndu e baá ó Kesáre ntɔ̂ʼ jɨʼla e Pɔ̂l ó, nye ayɨ́ kǎ tô Yerʉ́zalɛm.

¹³ Nyɨɛ nzě yala ó: «Bɨ̌n jɨ, le esáa étyeʼ mé nkul ɨ́ yé? Ebě, ɨ́ wâm pâʼ, me mû ó kʉmsá. Abě njɨ, kɛ́ʼá ménkara wé omér. Me ɨ́ cǎr ntémé ó, me dwêʼ ɨ́ Yerʉ́zalɛm lɨ́ esú é díé mé Tî Yésʉs.»

¹⁴ Mpʉ nyé á be abe e nkul ejóʼo bɨ́h yɨ́, bɨ̌h ntɔ̂ʼ di ɨ́ jolaaa. Bɨ̌h á jaa ka yala epíhe ó, njɨ: «Gwɨ́má mé Tî Yésʉs, yé syɛ́yɨɨ bé.»

¹⁵ Bwá mélû, mé osí laa nɛ́ɛ: bɨ̌h nzě komlǒ tyen lɨ́ etô Yerʉ́zalɛm.

¹⁶ Bʉr o mílʉ́mlʉ́ bé á duhǒ Kesáre bá, bê nzě tô e bɨ̌h ɨ́ nko nyʉ́ʉ́ mʉ̂r á jala le etira bɨ́h ntɔ́ɔ ɨ́ mbɛ̌r wé nyá, á be yɨ́. Díé é mʉ̂r waá, lé ó Násɔn, nyʉ́ʉ́ mʉ̂r Swiprʉ̂s, á be ɨ́ sɔ́má ómpʉ́n bé ésôʼ nyá.

Pɔ̂l lɨ́ etó beě Jacques

¹⁷ Jɔʼ bɨ́h á pyâl Yerʉ́zalɛm yɨ́, bɨ́ɔɔ́ bɨ́ná, bê nzě nʉa bɨ́h e bisʉhʉʉ.

¹⁸ Ɨ́ mɛ́n tɨ̂, bɨ̌h e boo Pɔ̂l, bê nzě tô mbɛ̌r mé Jacques, kœbɔɔ ótyɛ̂b bé ésôʼ ó Mbɛ̌r-Nzyɛ̌m ntémé tɨ̂.

¹⁹ Pɔ̂l nzě bára e bê. Nye nzě lɛ́ɛ̌ lɔ́ɔ, dumo e bisyɛ́ɛlǎ Nzyɛ̌m á sâ e nzɨ̌ syɛ́ɛ́ yé yɨ́. Bisyɛ́ɛla byaá, byé á be ó páʼ bʉr o dí abe óYúden bá. Nye á lɛ́ɛ byé ó gúgwár.

²⁰ Jɔʼ bé á sil ejôʼlo sá nyé á lɛ́ɛ bé yɨ́, bé ntɔ̂ʼ gúmlǒ Nzyɛ̌m. Bê nzě lɛ́ɛ e Pɔ̂l ó: «Mɨ́ɔɔ́ wɨ́h ɛ́, go mʉr tɨ̂, gʉ́ beě bím ótɔ́ɔ́sin bé óYúden mû sí dyɛ̂ʼwo e Yésʉs-Krîst yɨ́. Bɨ́bɛ̂h ntémé, bé lɨ́ egbâ nkûl ɨ́ dwííí lɨ́ ebaʼle métié mé Moyɨ̂z.

²¹ Sâ gwár, bé jóʼó ɨ́ páʼ gô ó, go lɨ́ elɛ̂ʼle óYúden bɨ́bɛ̂h mû mingbɛhá míngbɛhá ɨ́ bikúl bíswîh bá ó, bé bénaa metum maá. Bé jóʼó ntémé ó, gǒ lɛ́ɛ́ ó, bé ajala le ekǎ tíʼe bwán bɔ́ɔ́ mpʉ́n; ó bé ayɨ́ kǎ dû métum mé óYúden.

²² Nó ó, mɨná sâʼ gá nyá? Ebě, bé ójʉ̂ʼra yɨ́ɛ ó, go mû ó wâ.

²³ Sáʼ mpʉ bɨ́h múo lɛ́ɛ gó yɨ̂: bɨ̌h bé e bʉrʉ̂m onâ bé á boo ntaa minkâl bá wâ.

²⁴ Ntáʼ gâ. Bɨ̌n le onɔ́ɔ́ tô pubɔɔ. Gó ojána métɔ́ɔ́ mɨ́n le onɔ́ɔ́ lɨ́ esú ó, bé cɨ́aa milʉ́ myɔ́ɔ́. Nó ó bʉ̂r bɨ́bɛ̂h ngá gʉ́a ó, sá yɨ́yɛ̂h bé dí elɛ́ɛ, dumo e go yɨ́, yé abě tyeetye. Bé ogʉ́a ó, go ntémé, go lɨ́ ebaʼle métié gá mɨ́ná.

²⁵ Bʉr o dí abe óYúden, baá mû sí bûʼla bá, bɨ̌h bé á si cɛma bé mekaná, lɨ́ elɛ́ɛ bé mitíʼá mî: ó bé syɛ̂hlaa tír nyɨnyɛ̂h á baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá. Bé sá ade ntémé metié, nkʉ̂ otír bé á dwe mitû bá. Bé ayɨ́ sâ bímolá.»

²⁶ Nó ó Pɔ̂l á nʉa bʉrʉ̂m onâ baá. Ɨ́ mɛ́n tɨ̂, bé le onɔ́ɔ́ nzě tó nî e bé gúmó bé á pubɔɔ bigwǐh yɨ́. Bê nzě kǎ tó nî mpáh Nzyɛ̌m tʉ́ŋlʉ̌, le elɛ́ɛ ópara jɔʼ mélú mé épubɔɔ ngá síe yɨ́, le elɛ́ɛ bé ntémé ó, jɔʼ yaá ó nyé ókǎ dwě ndwéá lɨ́ esú é mʉ̂r nyɨnyɛ̂h ɨ́ sɔ́má yɔ́ɔ́ yɨ́.

Pɔ̂l, nyɨ́ mɛ́rɔɔ ɨ́ mpáh Nzyɛ̌m tʉ́ŋlʉ̌

²⁷ Nó ɨ́ jɔʼ mímóhó nzaangbá myaá, myé á be, myé mû sí laa yɨ́, ɨ́ jɔʼ óYúden ó sí Azía, bé á bee Pɔ̂l ɨ́ mpáh Nzyɛ̌m tʉ́ŋlʉ̌ yɨ́, bê nzě tíne éntumo e bʉ̂r ó, bé mɛ́rɨɨ nye. Nye ntémé ntɔ̂ʼ mɛ́rɔɔ.

²⁸ Bê nzě bʉ̂ bítím. Bé ó: «Ywííí! Bʉr o b'Ɨ́zraɛ̂l ɔɔ́! Kɛmɨɨ gá bɨ̌h ɔ̌! Paá nzě bee gá mʉr dí elɛ́ɛ̌ lɔ́ɔ ɨ́ gúmó yɨ́yɛ̂h ó, bé síaa kúl gá yɨ́ná, le ebene métié gá mɨ́ná ti e mpáh Nzyɛ̌m nyɨ̂ʼ nyá ɛ́! Ɨ́ báánâ, nyɨ́ bánǎ níŋle ntémé bʉr o dí abe óYúden bá ɨ́ mpáh Nzyɛ̌m tʉ́ŋlʉ̌! Nyɨ́ lœ̌ʼ gúmó dí ti yɨ́ ɔ̌!»

²⁹ (Bé á lɨlɛ́ɛ nó ó, ebě, bé á si bee Trofímos mʉr Éfɛsɔs bé e Pɔ̂l ɨ́ nkana. Bé á jwɨʼ ó, Pɔ̂l á si níŋle nye ɨ́ mpáh Nzyɛ̌m tʉ́ŋlʉ̌.)

³⁰ Nkana yɨ́yɛ̂h, yé á be ó, yé mû ɨ́ gbǎ gbǎ. Bʉr nzě dua ɨ́ bigúmó bíbyɛ̂h e mikám. Mɛ́rɔɔ̌ Pɔ̂l, tô le edulɔɔ nyé sí e sí, pɛʼɔɔ nyé ɨ́ mpáh Nzyɛ̌m tʉ́ŋlʉ̌, diblɔɔ ntɔ̂ʼ mebê me tɨ̂.

³¹ Bé á be ó lɨ́ esáa éjʉ̂ Pɔ̂l. Nó ɨ́ jɔ̌ʼ lɔ́ɔ, wé á to pyâl ɨ́ megwǎl me njwɨ́ɨ bisója nɨ́nɨ́ɨ́ ó, Yerʉ́zalɛm yɨ́yɛ̂h, yé mû ó áleŋéleŋé yɨ́,

³² tyé e tyé yaá, nye ntɔ̂ʼ kpâhwǎ nʉa ókapitɛ̂n ti e byúú bísója, tóŋɔɔ míkám nko éntumo e bʉ̂r, lé á be yɨ́. Jɔʼ bʉ̂r baá, bé á bee bisója ndu e njwɨ́ɨ nɨ́nɨ́ɨ́ wɔ́ɔ́ yɨ́, bé ntɔ̂ʼ gwâʼ ébî Pɔ̂l.

³³ Nó njwɨ́ɨ bisója á sîhlě bǎʼ e Pɔ̂l, nzě mɛ̂r nyê, nye ntɔ̂ʼ dwe nkûl ó, bé káʼaa nye e mikʉ̂kɔ̌b mimbá. Nó nyé á dî mbi mʉ̂r nyé á be wɨ́, ndu e sá nyé á pʉgʉ sâ yɨ́.

³⁴ Bâʼ bʉ̂r ó sɔ́má yaá, lɛ́ɛ wɔ́ɔ́ mbi; bʉ́ʉ́ bʉ̂r, lɛ́ɛ wɔ́ɔ́. Mpʉ njwɨ́ɨ bisója waá á be abe e nkul ejóʼǒ mpǎŋ sɔ̂ʼ ɨ́ lɔ̌b óleŋéleŋé waá yɨ́, nó nyé á lɛ́ɛ ó, bé tôʼ e Pɔ̂l ɨ́ kóʼ bísója tʉ́ŋlʉ̌.

³⁵ Jɔʼ bé e Pɔ̂l, bé á pyâl lɨ́ ebɨ́r é mbɛ̌r bísója kʉ́ yɨ́, ebúʼ, lé ntɔ̂ʼ bére éntumo e bʉ̂r ɨ́ miléme. Jɔʼ bísója, byé á bee mpʉ bʉ̂r baá, bé á kpɛl esâ Pɔ̂l jélé yɨ́, byé ntɔ̂ʼ kɛl nyé ɨ́ mebɛʼ mɔ́ɔ́.

³⁶ Ebě, bʉr o b'á dudû nye píhe bá, bé á lɨ̂lɛɛ ó: “Jʉ́ʼóó gá nye.”

Nkar mé Pɔ̂l

³⁷ Mpʉ bé á gwa níŋle Pɔ̂l ɨ́ kóʼ bísója yɨ́, nó ó nyé á lɛ́ɛ e njwɨ́ɨ bisójǎ nɨ́nɨ́ɨ́ waá ó: «Nzê mě e nkul elɛ́ɛ gó yʉ́ʉ́ sɔ̂ʼ ɛ̌?» Nó ó njwɨ́ɨ bisója waá á dî e né ó: «Nzê gʉ́ gʉ́ǎ lwǐb grɛ̂k ɛ̌?»

³⁸ Ntʉ gó dí mʉr Egɨ̂ptɛn á sâ ó, bʉr sâʼ bintʉ̌, tô e binzilngǎn otɔ́ɔ́sin onâ ɨ́ lʉá tʉ́ŋlʉ̌ nyá ɛ́?

³⁹ Nó ó, Pɔ̂l á yala ó: «Mɛm, me ó Yúden. Me á byɛ̂l ó, Tarsôs ɨ́ sí Silisía. Nkana yâm mé á duho tɨ̂ʼ yɨ́, yé e kûm ɨ́ buo buo. Me lɨ́ ejɨʼla e go ó, go kámaa ó, me lwíbɨɨ e bʉr.»

⁴⁰ Nó ó njwɨ́ɨ bisójǎ nɨ́nɨ́ɨ́ á kam. Pɔ̂l nzě tyɛ̂b lɨ́ ebɨ́r kʉ́, nzě peble bʉ̂r mbô. Jɔʼ bʉ̂r bɨ́bɛ̂h, bé á be, bé mû ɨ́ myǒŋ yɨ́, Pɔ̂l nzě lwib e bé ɨ́ lwǐb aramyɛ̂n.