Mɨlʉmlʉ 18 - Kálar Nzyɛ̌m : Ejwán é Sáá

¹ Píe tɨ̂, Pɔ̂l nzě duhǒ Atɛ̂n, tô Kórɨnt.

² Nye nzě bɔma e Yúden, díé lé Akílas. Nye á byɛ̂l ó, ɨ́ sí Pɔ́ŋtos. Nye alúno duhǒ sí Italî, bé e mʉmá wé, Prǐska, ebě, Kɛ́ɛza Klodíʉs á lɛ́ɛ ó, oYúden bɨ́bɛ̂h, bé pɔ́ʼaǎ Rôm. Nó ó, Pɔ̂l á nze to syɛŋa e bê.

³ Bé á lɨlar ó, mimbɛ̌r míkán. Mpʉ Pɔ̂l, bé e boo nɔ́ɔ́, bé á be le esú é syɛ́ɛ́ egwár yɨ́, nye nzě di ɨ́ mbɛ̌r wɔ́ɔ́. Bé e boo nɔ́ɔ́, bé á séa ntémé ó, gúmo gwár.

⁴ Nó ó, ɨ́ móhó sábat wɨ́wɛ̂h, Pɔ̂l á be ó lɨ́ elɛ̂ʼle bʉ̂r ɨ́ mpáh minjɨʼla tʉ́ŋlʉ̌, le esáa édulo óYúden le bʉr o Grɛ̂s.

⁵ Jɔ̌ʼ Silâs bé e Timotɛ̂, bé á ka pyâl, duhǒ sí Masedónia yɨ́, Pɔ̂l ntɔ̂ʼ lɛ̌ŋ jɔʼ yɨ́yɛ̂h njɨ lɨ́ elɛ̂ʼle mílɔ̌b mé Nzyɛ̌m, lɨ́ eboʼlo kwá oYúden ó, Yésʉs ó dí kwahaá Mʉ̌r Nzyɛ̌m á lœm múló mé jwɨ́ɨ nyá.

⁶ Bʉr oYúden bɨ́ɛ, bé á be lɨ́ epére mékǎn e né, le elwɨ́ɔɔ nyê. Nye nzě kuro pím mikán myé. Nye ó: «Bɨ́n ódîm nó, yé óbe ó lɔ̌b wɨ́n bʉr o tɨ̂. Mɛm, mé abe e lɔ̌b tɨ̂. Táare ɨ́ báánâ, me múo nzě tô kwá bʉr o bíkúl bíswîh.»

⁷ Nó nyé á pɔʼǎ gúmo yaá, nzě tô mbɛ̌r mé nyʉ́ʉ́ mʉ̂r bé á jɨjébe “Títwios Yʉstʉ̂s” nyá. Nye á boo be ó lɨ́ egúmlǒ Nzyɛ̌m ɨ́ yébé óYúden. Mbɛ̌r wé, wé á be ó, bǎʼ e mpáh minjɨʼla oYúden.

⁸ Nó ó, Kríspʉs, njwɨ́ɨ mpáh minjɨʼla oYúden á nze dyɛ̂ʼwo e Tî Yésʉs, bé e mbɛ̌r bʉ̂r wé wɨ́wɛ̂h. Bʉr ó Kórɨnt o b'á jʉjóʼo Pɔ̂l bá, bé á si bûʼla ntémé ɨ́ buo buo, le eduŋɔɔ.

⁹ Ɨ́ gúú pum nɛ́ɛ: Pɔ̂l nzě jɨm bílíma, Tî Yésʉs lɨ́ elɛ́ɛ e né ó: «Ajóʼo bʉ́á. Tóʼ e lwǐb dóló. Adiblě num.

¹⁰ Ebě, mɨná e go ó dí. Abe e mʉr dí e nkul emɛ̂r gó ó, nye sá ó go sá ébébe, ebě, mé e bʉr ɨ́ buo buo ɨ́ nkanǎ nɨ̌.»

¹¹ Pɔ̂l ntɔ̂ʼ di ɨ́ Kórɨnt mbû ntinɨ̂ e pêh, lɨ́ elɨlɛ̂ʼle bʉ̂r lɔ́ɔ́ mé Nzyɛ̌m.

¹² Sâ gwár, jɔ̌ʼ Galíɔŋ á be ngóvina bʉ̂r ó Rôm ɨ́ sí Akayɨ̂ yɨ́, oYúden, bé á si syɛŋa lɨ́ elwímla e Pɔ̂l. Bé á si tô ntémé e né ɨ́ mpáh milɔ̌b.

¹³ Bé ó: «Mʉr nyâ, nyě duló bʉ̂r ó, bé dwêʼ Nzyɛ̌m kûm, abe yɨ́ɛ mpʉ métié mé Moyɨ̂z dí elɛ́ɛ yɨ́.»

¹⁴ Tó kœb ó, ɨ́ jɔ̌ʼ Pɔ̂l á be lɨ́ edǐ lwib yɨ́, Galíɔŋ, nye le oYúden ó: «OYúden ɛ̌, yé bé bɨ̂n nze pur nyé ó, ɨ́ lɔ̌b syɛ́ɛla yé á be onzyɛ́h ónzyɛ́h, nkʉ̂ yaá yé á gbah etié yɨ́ nó, mpa mɨ́ kam ó, me jôʼlaa bɨ̌n.

¹⁵ Mpʉ yé mû lɔ̌b mégô, dumo e milɛ́ʼlá, ndu e míe, ndu e metié mɨ́n yɨ́, byé kǎ dwɛ̂ʼ náǎ ó, bɨ̌n bʉr o tɨ̂. Mé abe e nkul etíʼe mílɔ̌b mi dí nó mí.»

¹⁶ Nó ó nyé á nze so bé ɨ́ mpáh milɔ̌b nyé.

¹⁷ Bʉr o nkɔ́m nyé bɨ́bɛ̂h ntɔ̂ʼ mɛ̂r Sostɛ̂n, njwɨ́ɨ mpáh minjɨʼla oYúden, bíŋɔɔ nyé gúmó tîʼ milɔ̌b á be ndîndǐl yɨ́. Galíɔŋ nyɨɛ á bé anʉǎ syɛ́ɛla yaá, gbâ yé ɨ́ nkɔb.

Pɔ̂l lɨ́ ebáʼǎ tô Antiôs

¹⁸ Pɔ̂l á si di tɨ̂ʼ ɨ́ Kórɨnt bá ɨ́ bea bea. Nye nzě jána e bɨ́ɔɔ́ bɨ́ná, ntɔ̂ʼ tô ɨ́ sitíma tʉ́ŋlʉ̌, tô sí Sirî, bé e boo Prǐska, le Akílas. Nye dína apǎ tô, nye á si cɨa lʉ̂ ɨ́ Kɛŋkrɛyâs, ebě, nye á si ntaa minkâl ɨ́ páʼ mé Nzyɛ̌m.

¹⁹ Bê nzě pyâl Éfɛsɔs. Pɔ̂l nzě líʼě Prǐska, bé le Akílas tɨ̂, nyɨɛ nzě tô ɨ́ mpáh minjɨʼla oYúden tʉ́ŋlʉ̌, nye nzě nyɛl édwe bé milɛ́ʼlá.

²⁰ Jɔʼ bé á dî e né ó, nye díʼee tɨ̂ʼ melû ɨ́ bea bea yɨ́, nye á bé akam.

²¹ Nó nyé á mɔa ɨ́ sɔ́má yɔ́ɔ́. Nye ó: Nzyɛ̌m ókpɛl nó, me óbáʼǎ nze.» Nó nyé á tô ɨ́ sitíma tʉ́ŋlʉ̌, pɔʼǎ Éfɛsɔs.

²² Ɨ́ jɔʼ nyé á sulo ɨ́ sitíma Kesáre yɨ́, nye á si tô Yerʉ́zalɛm, lɨ́ etó bára e bʉr ó Mbɛ̌r-Nzyɛ̌m bé á be tɨ̂ʼ bá. Nó nyé á ka tô Antiôs.

Tyen lɛ̂l mé Pɔ̂l

²³ Nye nzě jâ bwá mélú gʉ̂ʼ, ntɔ̂ʼ mɔa, tô ɨ́ sí Galásia, ndu e yaá Frigía, lɨ́ etô le elɨl ómpʉ́n mé Yésʉs bɨ́bɛ̂h búʼó.

²⁴ Nyʉ́ʉ́ Yúden á be ó gʉ̂ʼ Éfɛsɔs, díé lé Ápolos. Nye á byɛ̂l ó, Alɛksandrî, nye ntɔ̂ʼ kǎ tó dǐ Éfɛsɔs. Nye á be ó mʉr á be le ocwóó ɨ́ lwǐb, le egʉ́a Mékaná mé Nzyɛ̌m nyá.

²⁵ Nye á si bu lɛ́ɔɔ ɨ́ lɔ̌b mé Tî Yésʉs. Nye ntémé á si sâ sɨ́n lɨ́ edû mílɔ̌b mé Nzyɛ̌m. Nye á be lɨ́ elwib, le elɛ̂ʼlě lɔ́ɔ́ dí edumo e Yésʉs wɨ́, lɨ́ otîtyěl. Nzamedwah e mpʉ nyé á jaa duŋɔɔ ó, njɨ ndubó mé Yʉánɛs wé omér yɨ́.

²⁶ Nye nzě táare élwib ɨ́ mpáh minjɨʼla oYúden tʉ́ŋlʉ̌ ɨ́ kpɛŋlɛm, abáawo mʉ̂r. Jɔ̌ʼ Prǐska, bé le Akílas, bé á jóʼo nye yɨ́, bê nzě nʉa nyê, ntɔ̂ʼ kʉ́ gwá tɨ́ɔɔ nyé nzɨ̌ mé Nzyɛ̌m.

²⁷ Píe tɨ̂, Ápolos nzě tíʼe ɨ́ lémé wé ó, nyě laá ó, tô sí Akayɨ̂. Bɨ́ɔɔ́ bɨ́ná le okɛ́l bɨ́ná nzě gbâ nyé nkul ɨ́ léme, ntɔ̂ʼ cɛma ómpʉ́n ó sí yaá ó, bé nʉ́aa nye mbɨ̂mbɨá. Jɔʼ nyé á pyâl gʉ̂ʼ yɨ́, nye nzě gbâ bʉ̂r ó b'á dyêʼ koo e Nzyɛ̌m ɨ́ mpam nyé bá nkul ɨ́ miléme.

²⁸ Ápolos, bé le oYúden, bé á si pére mekǎn ɨ́ hwɨ́m, nyɨɛ lɨ́ entaǎ lɔ̌b. Nye á si lɛ̂ʼle bʉr mpʉ yé dí cɛmá ɨ́ Mekaná mé Nzyɛ̌m yɨ́ ó, Yésʉs ó dí Mʉ̌r Nzyɛ̌m á lœm múló mé jwɨ́ɨ nyá.