Mɨlʉmlʉ 16 - Kálar Nzyɛ̌m : Ejwán é Sáá

Timotɛ̂ lɨ́ enî ɨ́ sɔ́má tyen mé Pɔ̂l, bé e Silâs

¹ Pɔ̂l nzě pyâl Dɛ́rbe, ndu e Lístra. Nyʉ́ʉ́ mpʉ́n mé Tî Yésʉs á be ó gʉ̂, díé lé Timotɛ̂. Nyɔ̌ŋ á be ó silě Yúden. Nye á be ntémé ó, nye mû krǐsten. Sɔ́ŋ wé nyɨɛ á be ó mʉr Grɛ̂s.

² Obûʼla bé á bě Lístra, ndu e Ikóniʉm bá, bé á be lɨ́ ebuú sêʼle nyê.

³ Pɔ̂l á kpɛl ó, bé le onɔ́ɔ́, bé tôʼ. Nó nyé á nʉa nye, tíʼe nyé mpʉ́n, ebě, oYúden bé á be tɨ̂ʼ ɨ́ sí yaá bá, bɨ́bɛ̂h, bé á be lɨ́ ekʉ́ gʉ́a ó, sɔ́ŋ á be ó mʉr Grɛ̂s.

⁴ Ɨ́ binkana bíbyɛ̂h bé á lɨlaa bí, bé á be lɨ́ etô le elɛ́ɛ óbûʼlǎ mpʉ bʉ̂r o mílʉ́mlʉ́ le otyɛ̂b bé ésôʼ ó Mbɛ̌r-Nzyɛ̌m Yerʉ́zalɛm, bé á nʉa mitíʼá yɨ́. Bé ntémé, bé á si kʉ gwa pihle bé egwǎl ó, bé bâʼlaa mitíʼá myaá.

⁵ Nó ó bʉ̂r ó Mbɛ̌r-Nzyɛ̌m, bé á nʉa pîm ɨ́ búʼó yɨ́, ɨ́ bigúmo ɨ́ buo buo. Tâŋ obûʼla ntémé nzě bubuǒ dʉ́ó lɨ́lɛ̂h.

Pɔ̂l lɨ́ ebee nyʉ́ʉ́ mʉ̂r Masedónia lɨ́ esimá tʉ́ŋlʉ̌

⁶ Sísǐm mé Nzyɛ̌m, wé á si kamle bé lɨ́ elɛ́ɛ̌ lɔ́ɔ́ mé Yésʉs ɨ́ sí Azía. Nó ó bé á to laa sí Frigía, ndu e yaá Galásia.

⁷ Jɔʼ bé á be, bé mû lɨ́ ekúnwo e sí Misía yɨ́, bê nzě sáa étô sí Bitinî. Sâ gwár, Sísǐm mé Yésʉs, wé á bé akam.

⁸ Jɔʼ bé á laǎ sí Misía yɨ́, bê nzě tô Troâs, gúmó bísitíma dí epîpyal, le enkɛ́ɛ yɨ́.

⁹ Ɨ́ pum nɛ́ɛ: Pɔ̂l nzě jɨ̌m líma, bee nyʉ́ʉ́ mʉ̂r Masedónia lɨ́ etyɛ̂b tîtyěl, le ejɨʼla e né ó: “Ntáʼ kâʼ Masedónia. Go e súʼó bɨ́h.”

¹⁰ Nó ó, jɔ̌ʼ Pɔ̂l á sil ebee esimá laá yɨ́, bɨ̌h nzě sáa étô sí Masedónia, ebě, bɨ̌h bé á si bee ó, Nzyɛ̌m á jébe bɨ̌h ó, bɨ̌h tôʼ túnǒ Mbɨambɨa Lɔ́ɔ ɨ́ sí yaá.

Lidía, nyɨ́ bûʼlǎ Mbɨambɨa Lɔ́ɔ

¹¹ Nó ó bɨ́h á duhǒ Troâs, kalwo ɨ́ sitíma, ntɔ̂ʼ tô ɨ́ nzɨ̌ dí etô ɨ́ tíhé Samótras nyɨ́. Bɨ̌h nzě jâ tɨ̂ʼ elû egwár. Ɨ́ mɛ́n tɨ̂ʼ ó bɨ́h á pyâl Néapɔlis.

¹² Jɔʼ bɨ́h á duho tɨ̂ʼ yɨ́, bɨ̌h ntɔ̂ʼ tó pyâl Fílipi, nkana ésôʼ ɨ́ sí Masedónia, sí Rôm á jwɨjwɨ́ɨ yɨ́. Bɨ̌h ntɔ̂ʼ di tɨ̂ʼ ɨ́ nkana yaá melû ɨ́ buo buo.

¹³ Ɨ́ móhó sábat, bɨ̌h nzě pyâl ɨ́ nkana, nzě tô ɨ́ pɨ̌n díbé, gúmó bɨ́h á jwɨʼ ó, bɨ̌h bé e nkul ekœ̌b súm óYúden bé á gwɨ̂gwɨhla lɨ́ ejɨʼla e Nzyɛ̌m yɨ́. Bɨ̌h ntɔ̂ʼ di tɨ̂ʼ sí, nzě gɔ́na le elwib e bʉbá bé á syɛŋa tɨ̂ʼ bá.

¹⁴ Ɨ́ tɨ̂ʼ ɨ́ sɔ́má bʉ́bá yaá, yé á be ó e mʉmá á be e díe ó, Lidía, waá á duhǒ Teatîr nyá. Nye á bɨbɛ́ma ó, mikán mí kaá e kaá. Nye á bɨbe ó, lɨ́ egúmlǒ Nzyɛ̌m. Nye nzě jóʼo bɨ́h, Dâ Nzyɛ̌m nzě tyɛ̂b nyé ɨ́ léme ó, nye gwâ jôʼlǒ sá Pɔ̂l á lwilwib yɨ́.

¹⁵ Nye nzě duŋɔɔ, bé e mbɛ̌r bʉ̂r wé ntémé. Nó nyé á jébe bɨ̌h. Nye e bɨ̌h ó: «Yé bé bɨ̌n bɨ́ gwá kʉ́ bee ó, me mû ó lɨ́ ekʉ́ dyɛ̂ʼwo e Tî Yésʉs nó, ntaá di gá ɨ́ mbɛ̌r wâm.» Nó nyé á tíne bɨ̌h ó, bɨ̌h kámaa.

Mbɔʼlʉ mbɛ̌r mímbʉʼ ɨ́ Fílipi

¹⁶ Gúú móhó, bɨ̌h nzě tô gúmó bé á boo sɨsâ minjɨʼla yɨ́, mâ túʼǎ éséhe nzě bɔma e bɨ̌h tɨ̂. Nye á be ó e yamá: kúʼ mpwâm. Yamá yaá, yé ó b'á tɨ̂tɨe nye bisyɛ́ɛla ngá syɛ́ɛ ɨ́ melú ngá nze má bí. Nye á be lɨ́ ebuú nʉa bímɔnɨ́ e nzɨ̌ yamá nɨ̌, bimɔnɨ́ byaá jaá ntɨntaǎ njɨ ɨ́ mebó mé ójwɨ́ɨ́ bé.

¹⁷ Nye nzě táare édû bɨ́h e Pɔ̂l píhe koo, le tím ɨ́ num. Nye á lɨlɛ́ɛ ó: «Bʉr bâ, bé ó osyɛ̂l o mésâ mé Nzyɛ̌m dí Lʉ́ bísá bíbyɛ̂h nyá. Bé ó dí etúno édib e nzɨ́ é twiʼ.»

¹⁸ Mâ túʼǎ éséhe waá á be lɨ́ esâ nó mimóhó mímyɛ̂h. Ɨ́ móhó épíhe, Pɔ̂l nzě dwira, dwɛ̂ʼ píhe, nye nzě lɛ́ɛ le eleme lé laá ó: «Ɨ́ díé mé Yésʉs-Krîst, mě lɛ́ɛ́ gó ó, duhaa nyé ɨ́ nyʉ̂l! Eleme laá kʉ́ jaá duho mâ mʉmá waá ɨ́ nyʉ̂l, duháa.»

¹⁹ Mpʉ ójwɨ́ɨ bé, bé á bee ó, píe syɛ́ɛlǎ nɨ̌, bé ákǎ báʼǎ bi bímɔnɨ́ biswîh, cɨɨ e nzɨ̌ mâ mʉmá nɨ̌ yɨ́, bé ntɔ̂ʼ mɛ̂r Pɔ̂l, bé e Silâs. Bê nzě tô le edulo bé sí e sí, tô e bé ɨ́ mpǒm minjwɨ́ɨbʉr myé á didi lɨ́ ebɨ̌m é pátele mí.

²⁰ Bɨ́ɛ nzě tô e bé kwá minjwɨ́ɨbʉr mi bʉ̂r ó Rôm. Bé e myé ó: «Bʉr bâʼ, bé ó oYúden. Bé lɨ́ ebuú sâ bíntʉ̌ ɨ́ nkana gá yɨ́ná,

²¹ le elɛ̂ʼle métum me dí ebenɔɔ ɨ́ sí gá yɨ́ná má, mɨná gá bʉr ó Rôm, ó mɨná kámaa gá mé, le esâ mê.»

²² Entumo e bʉ̂r ntɔ̂ʼ dwira e bʉr o mílʉ́mlʉ́. Mingóvina myaá, myê nzě pɛ̌ʼ Pɔ̂l bé e Silâs mikán ɨ́ menyʉ̂l, le edwe nkûl ó, bé ŋmɛ́hɛɛ bé mingáhá.

²³ Jɔʼ bé á sîl eŋmɛ̂h bé mingáhá ɨ́ ŋmɛ̂h ŋmɛ̂h yɨ́, bê nzě gbâ bé ɨ́ mbʉʼ. Nó bé á lɛ́ɛ e ndwéela mimbʉʼ ó, nye gwâ baʼle bê.

²⁴ Jɔʼ nyé á jóʼo lɔ́ɔ waá yɨ́, nye nzě tô e bé ɨ́ mâ ntɔ́ɔ á be témé mbɛ̌r mímbʉʼ waá tʉ́ŋlʉ̌ nyá, gbâ bé mimboʼó ɨ́ mekʉ̌.

²⁵ Kúnókúno e témé pum nɛ́ɛ: Pɔ̂l, bé e Silâs nzě jɨʼla e Nzyɛ̌m, le edyɛɛ méjéme lɨ́ esú lé égúmlǒ Nzyɛ̌m. Myúú mímbʉʼ, myé á be ó lɨ́ ejôʼlo bê.

²⁶ Tyé e tyé yaá, sí nzě kubla ɨ́ buo buo. Medwii mé mbɛ̌r mímbʉʼ nzě pɨ̂ʼla. Mebé mɨ́mɛ̂h ntɔ̂ʼ diba ɨ́ jɔʼ gwár yaá. Mikʉ̂kɔ̌b le mimboʼó mímbʉʼ mímyɛ̂h, myé ntɔ̂ʼ tua.

²⁷ Jɔʼ ndwéela mimbʉʼ á jɨma ɨ́ jô yɨ́, nyě kǎ bee ó, mebê mé mbɛ̌r mímbʉʼ, mé mû mimběʼ. Nye nzě gœ̂m pâsoŋ wé ɨ́ pɔ̌b, nzě sáa ó, nyě jʉ́ ó nyʉ̂l nyé, ebě, nye á jwɨʼ ó, mimbʉʼ, myé á si kpɛ́ɛ.

²⁸ Nó ó, Pɔ̂l á bɨ̂n twíí kʉ́ e nkul nyé nyɨnyɛ̂h. Nye e né ó: «Ayɨ́ jʉ̂ nyʉ̂l nyǒ. Bɨ̌h bɨ́bɛ̂h dína ó wâ.»

²⁹ Nó ó ndwéela mimbʉʼ á tumo meláma, nzě kpâhwǎ tô kám ɨ́ mâ ntɔ́ɔ waá tʉ́ŋlʉ̌, le ejóʼo bʉ́á. Nye nzě bɨʼ mébóó sí ɨ́ míh mé Pɔ̂l, bé e Silâs.

³⁰ Nye nzě pyêl bé kʉ̌l. Nye ó: «Odâ, me ɨ́ jala le esâ nyá, lɨ́ esú ó me bíʼee twiʼ?»

³¹ Nó bé á yala e né ó: «Dyɛ́ʼwáá e Tî Yésʉs, go nkʉ̂ bǐ twiʼ, bɨ̌n e mbɛ̌r bʉ̂r gô wɨ́wɛ̂h!»

³² Pɔ̂l, bé e Silâs, nzě túnǒ lɔ́ɔ́ dí edumo e Tî Yésʉs wɨ́, kwá ndwéela mimbʉʼ, bé e bʉr bɨ́bɛ̂h bé á bě mbɛ̌r wé bá.

³³ Nye nzě nʉa bé lɨ́ ewala laá ɨ́ pum. Nye nzě jwɨɨ bé mepɨ́ɨ́. Adeʼ, nye nzě duŋɔɔ, bé e mbɛ̌r bʉ̂r wé wɨ́wɛ̂h.

³⁴ Nye nzě báʼǎ tô e Pɔ̂l, bé e Silâs, ɨ́ mbɛ̌r wé, nzě dwe bé mede. Lémé mʉ̂r waá, wé á si lóno ɨ́ bisʉhʉʉ, ebě, bé e mbɛ̌r bʉ̂r wé wɨ́wɛ̂h, bé á si dyêʼ koo e Nzyɛ̌m.

³⁵ Jɔ̌ʼ mɛ́n wé á lɔ́ma yɨ́, minjwɨ́ɨbʉr mí Rôm nzě lómo bʉ̂r ó, bé tô lɛ́ɛ e ndwéela mimbʉʼ ó, nye bírɨɨ bʉr baá.

³⁶ Nye nzě lɛ́ɛ̌ Pɔ̂l mpáŋla nyaá. Nye e né ó: «Mingóvina, mí ntɨh twíí ó, bɨ̌n bírɔɔ. Nó ó, bɨ̌n mû ó e nkul ekǎ pyâl kʉ̌l, tô ɨ́ mepyɛbla tʉ́ŋlʉ̌.»

³⁷ Pɔ̂l ntɔ̂ʼ yala e bʉr baá ó: «Bé á si bî bɨ̌h témé bʉr, lɔ̌b wɨ́h apǎ tíʼɔɔ. Bɨ̌h bɨɛ yɨ́ɛ ntémé bʉr ó Rôm. Bê báná nzě gbâ bɨ́h ntémé ɨ́ mbʉʼ. Tó kœb ó, ɨ́ báánâ, bé kǎ dǐ kpɛl épɛʼ bɨ́h tɨ̂ʼ ó mesǒ. Yʉ́ʉ́ sɔ̂ʼ, yé abe nó. Bé bʉr o tɨ̂ʼ ntáa nzě pɛʼ bɨ́h wâʼ ɨ́ kpɛŋlɛm.»

³⁸ Nó minjwɨ́ɨbʉr myé á tyeŋɔɔ ɨ́ lʉ́mlʉ́ waá mí, myê sí kǎ búla, tó lɛ́ɛ mínjwɨ́ɨbʉr mí Rôm yalá yɔ́ɔ́ yaá. Nó ó bé á twɨra, lɨ́ ejóʼo ó, Pɔ̂l, bé e Silâs, bé á be ó bʉr ó Rôm.

³⁹ Nó bé á tô, tó jɨʼla e bê. Bé ntɔ̂ʼ kǎ pyêl bé ɨ́ mbɛ̌r mímbʉʼ, lîʼle bé nkana, le ejɨʼla e bé ó, bé pʉ́ʼaa ɨ́ nkana.

⁴⁰ Jɔ̌ʼ Pɔ̂l, bé e Silâs, bé á pʉʼa ɨ́ mbʉʼ yɨ́, bê nzě tô mbɛ̌r mé Lidía. Jɔʼ bé á sil ebee bɨ́ɔɔ́ bɨ́ná, le egbâ bé pîm ɨ́ miléme yɨ́, bê nzě mɔa tɨ̂, tóŋɔɔ.