Mɨlʉmlʉ 11 - Kálar Nzyɛ̌m : Ejwán é Sáá

Lɔ́ɔ́ mé Pétrus ɨ́ sɔ́má óbûʼla

¹ Bʉr o mílʉ́mlʉ́ ti e bɨ́ɔɔ́ bé á bě sí Yʉ́da bá, bê nzě jóʼǒ lɔ́ɔ ó, bʉr o dí abe óYúden bá, bé ntémé, bé á si bûʼla lɔ́ɔ́ mé Nzyɛ̌m.

² Jɔ̌ʼ Pétrus á búla, pyâl ɨ́ Yerʉ́zalɛm yɨ́, obûʼla bé á boo tíʼɔɔ mpʉ́n bá, bê nzě lwib e né ɨ́ bébe bébe.

³ Bé e né ó: «Go bé ó sí kʉ́ bánǎ nî ɨ́ mbɛ̌r bʉ̂r o dí abě tíʼá mpʉ́n bá, go ntémé sí bánǎ pûhla mébô, de e bé gúmo gwár!»

⁴ Pétrus nzě táare égwá lɛ́ɛ bé mbɨ̂mbɨá lɔ́ɔ́ tɨ̂, lɨ́ edû mpʉ yé á syɛ́ɛ yɨ́. Nye ó:

⁵ «Me á be ó ɨ́ Yópe. Me á be ó lɨ́ ejɨʼla e Nzyɛ̌m. Jɔʼ yaá ó mé á bee esimá. Lé á be ó, yʉ́ʉ́ sɔ̂ʼ lɨ́ eduho ɨ́ jʉ́o kʉ́, sulo sí ɨ́ nteeen. Yé á be ó mpʉ sána ndɔ́má, tyeelá ɨ́ medumo menâ. Yé á duho ó, ɨ́ jʉ́o kʉ́, nzě sulo gúmó mé á be yɨ́.

⁶ Me á si gwa siŋle yé tʉ́ŋlʉ̌, nzě bee ótír, baá o dí e metɔrʉ menâ bá bɨ́bɛ̂h, le otír ó ményan, le bisâ bi dí ejaŋla sí e sí bí, ndu e binʉ̌n.

⁷ Me nzě jóʼo twíí. Nye e me ó: “Pétrus, gbɔlwaa sí. Jʉ́ʼóo. Go e dê.”

⁸ Nó ó mé á yala e né ó: “Dâ ɛ̌, kʉ́ kâr káráa, ebě, sá dí tilá yɨ́, yé apǎ nî ɨ́ num wâm dʉ́o egwár.”

⁹ Me nzě báʼǎ jóʼo twíí ɨ́ jɔʼ mbá, lɨ́ eduho ɨ́ jʉ́o kʉ́, lɨ́ elɛ́ɛ ó: “Sá Nzyɛ̌m mû sí pubo yɨ́, anyamlě lɛ́ɛ ó, yé ó tilá.”

¹⁰ Sâ yaá, yé á pyâl me nó ó, nzɔʼ lɛ̂l. Píe tɨ̂, sɨ́ǎ yaá, yé ntɔ̂ʼ búla, bisâ byaá bíbyɛ̂h ntɔ̂ʼ dâʼrɔɔ ɨ́ jʉ́o kʉ́.

¹¹ Jɔʼ gwár e gwár yaá, bʉrʉ̂m olɛ̂l, bê nzě pyâl ɨ́ mbɛ̌r mé á be wɨ́. Bé á duho ó, ɨ́ Kesáre, lɨ́ enzě sáa mê.

¹² Nó ó Sísǐm mé Nzyɛ̌m, wé á lɛ́ɛ e me ó, bɨ̌h le onɔ́ɔ́ tôʼ. Wé á lɛ́ɛ ó, me ayɨ́ líʼa lɨ́ etô. Bɨ́ɔɔ́ ósaman bâ, bé ntémé, bé á si tô ɨ́ sɔ́má tyen yâm ɨ́ Kesáre. Bɨ̌h le onɔ́ɔ́ ó b'á to nî mbɛ̌r mé nyʉ́ʉ́ mʉ̂r.

¹³ Nye nzě lɛ́ɛ e bɨ̌h mpʉ nyé á bee éngeles ɨ́ mbɛ̌r wé yɨ́. Nyě kǎ twɨra ó, éngeles lɨ́ etyɛ̂b tîtyěl ɨ́ míh mé. Éngeles waá nzě lɛ́ɛ e né ó: “Lómáá bʉ̂r Yópe, bé tô jébě Simon, waá dí e lʉ́ʉ́ díe ó, Pétrus nyá.

¹⁴ Nye ólɛ́ɛ gó milɔ̌b gó ótiʼe e tɨ̂ʼ mí. Abě njɨ go omér. Mbɛ̌r bʉ̂r gô wɨ́wɛ̂h, wé ótiʼe ntémé.”

¹⁵ Le mé á nʉa lwǐb, lě Sísǐm mé Nzyɛ̌m ntɔ̂ʼ á sulo ɨ́ sɔ́má yɔ́ɔ́ yɨ́yɛ̂h. Yé á be ó jwɨʼ gwár mpʉ wé á nyɛɛ sulo bʉr ɨ́ metááré yɨ́.

¹⁶ Nó ó, me nzě símsa mékǎn Tî Yésʉs á lɛ́ɛ mɨná gá má. Nye á lɛ́ɛ ó: “Yʉánɛs á dudu bʉr ó e medíbé. Bɨ̌n bɨɛ, bé ókǎ duŋɔɔ ó e Sísǐm mé Nzyɛ̌m.”

¹⁷ Tó kœb ó, Nzyɛ̌m á si dwe bé ntémé sâ gwár nyé á nyɛɛ dwe mɨná gá ɨ́ jɔʼ mɨ́ná bé á dyɛ̂ʼwo gá e Tî Yésʉs-Krîst yɨ́. Nó mɛm, me á be wáǎ mbi mʉ̂r lɨ́ ebeně gwɨ́má mé Nzyɛ̌m?»

¹⁸ Jɔʼ bé á sil ejóʼo milɔ̌b myaá yɨ́, miléme nzě sula bé sí. Bê nzě dwě Nzyɛ̌m kûm. Bé ó: «Yé ó nó: Nzyɛ̌m, nyɨ́ bánǎ toŋlo ntémé baá o dí abe óYúden bá. Nyɨ́ dib bé nzɨ̌ etúmo míkoo e misyóm myɔ́ɔ́, le edwira míléme, ó bé bíʼee ntémé twiʼ!»

Mbɛ̌r-Nzyɛ̌m ɨ́ Antiôs

¹⁹ Jɔ̌ʼ Étiene á jʉ́ŋɔɔ yɨ́, bʉr nzě tíble óbûʼla ɨ́ dwíííá. Yé ó b'á sâ ó, obûʼla, bé gbɛ́haa. Bâʼ bʉ̂r ó sɔ́má yɔ́ɔ́, bé á si tô tyé sí Fénikia, le tíhé Swiprʉ̂s, ndu e Antiôs. Ɨ́ jɔʼ bé á bʉbɔma e bʉ́ʉ́ bʉ̂r yɨ́, bʉ̂r baá bé abe óYúden nó, bé l'adwe bé milɛ́ʼlá ɨ́ milɔ̌b mé Nzyɛ̌m.

²⁰ Tó kœb ó, yé á be ó e bʉ́ʉ́ óbûʼla, bé á duho ɨ́ tíhé Swiprʉ̂s ndu e Sirénia bá. Bɨ́ɛ ntɔ̂ʼ tóŋɔɔ̌ Antiôs, bê nzě tó bɔma e bʉr o dí abe óYúden bá. Bê nzě túno bé ntémé lɔ́ɔ dí edumo e Tî Yésʉs wɨ́.

²¹ Nkul mé Tî Yésʉs á be ó e bê. Bʉr, bé á si bu dwira miléme, dyɛ̂ʼwɔɔ e né.

²² Bʉr ó Mbɛ̌r-Nzyɛ̌m Yerʉ́zalɛm nzě jóʼǒ lɔ́ɔ waá, bé ntɔ̂ʼ lómǒ Banabâs Antiôs.

²³ Jɔʼ nyé á pyâl gʉ̂ʼ yɨ́, nye nzě bee bíjwɨʼ byé á lɛ̂ʼle ó, Nzyɛ̌m á be ɨ́ buú cwɨ́a le obûʼla bí. Nye ntɔ̂ʼ soho, nzě tɨ́e bé ó, bé díʼee twíí mpâ ɨ́ mpúhlá nyɔ́ɔ́ e Yésʉs.

²⁴ Banabâs á be ó mbɨambɨa mʉr, lwɨ́ŋlá e Sísǐm mé Nzyɛ̌m ndu e búʼó. Bʉr ɨ́ buo buo, bé á si dyɛ̂ʼwo e Tî Yésʉs.

²⁵ Nó ó Banabâs á mɔa, tô Tarsôs, lɨ́ etó sáǎ Saʉ̂l.

²⁶ Jɔʼ nyé á bee nye yɨ́, nye ntɔ̂ʼ búla e né, bé e nɔ́ɔ́ nzě tô Antiôs. Bê nzě séa nzyɛ́ŋá ɨ́ Mbɛ̌r-Nzyɛ̌m tɨ̂ mbû ntinɨ̂. Ɨ́ jɔʼ yaá yɨ́yɛ̂h, bé á bɨbe lɨ́ edwe bʉ̂r ɨ́ buo buo milɛ́ʼlá. Tɨ̂ʼ Antiôs ó bé á nyɛɛ jébe ompʉ́n mé Yésʉs “okrǐsten” yɨ́.

²⁷ Jɔʼ yaá ó ógwíha o mílɔ̌b, bé á duhǒ Yerʉ́zalɛm, tô Antiôs yɨ́.

²⁸ Nyʉ́ʉ́ mʉ̂r á be ó ɨ́ sɔ́má yɔ́ɔ́, díé lé, Agábus. Nye á si mɔa, nzě lɛ́ɛ bʉ̂r ɨ́ nkul Sísǐm mé Nzyɛ̌m ó, nza ɨ́ bwaʼ bwaʼ mû ó kúno enyaŋla ɨ́ melû maá ɨ́ sí yɨ́yɛ̂h. Nza nyaá á ka nyaŋla ó, ɨ́ jɔ̌ʼ Klodíʉs á be kɛ́ɛza yɨ́.

²⁹ Ompʉ́n, bé bʉr o tɨ̂, bé á tíʼe ó, mʉr nyɨnyɛ̂h ɨ́ sɔ́má yɔ́ɔ́ ótyen óbûʼla bé á di ɨ́ sí Yʉ́da bá bisâ, ó mʉr nyɨnyɛ̂h súʼaa bé, dû mébi mé.

³⁰ Nó ntémé ó bé á sâ yɨ́. Bê nzě nʉa míngúlá myaá, tímlɔɔ̌ Banabâs, bé e Saʉ̂l. Bɨ́ɛ ntɔ̂ʼ tóŋɔɔ e myê, tó dweŋɔɔ ótyɛ̂b bé ésôʼ ó Mbɛ̌r-Nzyɛ̌m.