Mɨlʉmlʉ 10 - Kálar Nzyɛ̌m : Ejwán é SááPétrus, bé e Corneille 1 Ɨ́ Kesáre, yé á be ó e nyʉ́ʉ́ mʉ̂r, díé lé Corneille. Nye á be ó kapitɛ̂n mʉr Rôm. Nye ó b'á be njwɨ́ɨ ɨ́ sɔ́má dɔ̂m bé dí ejébe ó: “Sɔ́má Bʉ̂r ó Italî” yɨ́. 2 Bé e mbɛ̌r bʉ̂r wé wɨ́wɛ̂h, bé á be ó otîtyěl o bʉ̂r. Bé ntémé bé á be lɨ́ edwáawǒ Nzyɛ̌m. Nye á be lɨ́ ebuú súʼo báántéʼenteʼe o bʉ̂r óYúden, le ejɨʼla e Nzyɛ̌m ɨ́ bijɔʼ ɨ́ buo buo. 3 Píe témé móhó, yé mû kúnókúno e mewala melɛ̂l nɛ́ɛ: nye ntɔ̂ʼ bee ésimá. Nye á bee ó, éngeles mé Nzyɛ̌m lɨ́ enî ɨ́ mbɛ̌r wé. Éngeles waá nzě lɛ́ɛ e né ó: «Corneille!» 4 Nye nzě dwɛ̂ʼ éngeles e bʉ́á. Nye e né ó: «Dâ ɛ̌, yê nyá?» Éngeles ntɔ̂ʼ yala e né ó: «Nzyɛ̌m, nyɨ́ yala gó mbɨ̂mbɨá. Nye mû ó sí toŋlo gó ɨ́ lɔ̌b mínjɨʼla myô le mingúlá gó dí edwidwe báántéʼenteʼe o bʉ̂r mí. 5 Lómáá bʉ̂r Yópe ɨ́ báánâ. Bé tô jébě Simon, waá dí e lʉ́ʉ́ díe ó, “Pétrus” nyá. 6 Nyě di ó, mbɛ̌r mé Simon, syɛ̂l bikʉ́r bí ótír. Mbɛ̌r wé, wé ó ɨ́ nkpâh mâŋ.» 7 Jɔʼ éngeles á laa, tô yɨ́, Corneille ntɔ̂ʼ jébe ósyɛ̂l o mésá bé obá, ndu e yʉ́ʉ́ sója ɨ́ bisója byé á sɨséa e né bí. Sója yaá ntémé á be lɨ́ edwáawǒ Nzyɛ̌m. 8 Nye ntɔ̂ʼ lɛ́ɛ bé sá yɨ́yɛ̂h yé á pyâl nye yɨ́. Píe tɨ̂, nye nzě lómo bé Yópe. 9 Ɨ́ gúú mɛ́n, bé dína nzɨ́ e nzɨ̌, bé mû lɨ́ ekúnwo e Yópe nɛ́ɛ: Pétrus nzě bére kʉ́ mié, lɨ́ etó jɨʼla e Nzyɛ̌m gʉ̂. Yé á be ó, yé mû kúnókúno e témé móhó. 10 Nye nzě jóʼo nzâ. Nye á be ó lɨ́ egwɨ̂m éde. Jɔʼ bʉ̂r ó mbɛ̌r, bé á be, bé dína lɨ́ ejâm nyé mede yɨ́, nye nzě bee ésimá. 11 Nye dína lɨ́ edwɛ̂ʼ kʉ́, nyé ká bee nɛ́ɛ: jʉ́o lɨ́ ebɔ́a, yʉ́ʉ́ sɔ̂ʼ mpʉ sána ndɔ́má ɨ́ bwaʼ bwaʼ lɨ́ eduho ɨ́ jʉ́o kʉ́, sulo sí, ɨ́ nteeen. Yé á be ó tyeelá ɨ́ medumo menâ. Yé á be ó lɨ́ edulwa, sulo sí. 12 Ɨ́ sɨ́ǎ yaá tʉ́ŋlʉ̌, yé á be ó, le otír mimbi mímyɛ̂h: le baá dí e metɔrʉ menâ bá, le sá yɨ́yɛ̂h dí ejaŋla sí e sí yɨ́, ti e binʉ̌n. 13 Nyʉ́ʉ́ twíí ntɔ̂ʼ lɛ́ɛ e né ó: «Pétrus, gbɔlwaa si. Jʉ́ʼóo. Go e dê!» 14 Nó ó Pétrus á yala e né ó: «Dâ ɛ̌, kʉ́ kâr káráa, ebě, mimbi bísá bíbyɛ̂h bi dí mitilá bí, mé apǎ de byê.» 15 Nye nzě báʼǎ jóʼo twíí ɨ́ jɔʼ mbá lɨ́ elɛ́ɛ e né ó: «Sá Nzyɛ̌m mû sí pubo yɨ́, anyamlě bee yé ó, yé ó tilá.» 16 Sâ yaá, yé á pyâl nye nó ó, nzɔʼ lɛ̂l. Píe tɨ̂, ɨ́ tyé e tyé yaá, sɨ́ǎ yaá ntɔ̂ʼ búla, bɨ́nɔɔ ɨ́ jʉ́o kʉ́. 17 Pétrus dína lɨ́ edî ɨ́ nye mʉr tɨ̂ʼ ó, “Lɨ̂ʼ ésimá, lé kpɛl élɛ́ɛ wâʼ yé ɛ́?” nɛ́ɛ: bʉr ó Corneille á lómo bá, bé ntɔ̂ʼ pyâl lɨ́ ebé é mbɛ̌r mé Simon, bé osí pǎ dî nkǒ páʼ mbɛ̌r waá, wé á be yɨ́. 18 Bé ntɔ̂ʼ jébe, le edíŋɔɔ ó: «Nzê yé e nyʉ́ʉ́ mʉ̂r dí edi wâʼ ɨ́ mbɛ̌r wɨ̂, díé lé Simon, waá dí e lʉ́ʉ́ díe ó, “Pétrus” nyá ɛ́?» 19 Pétrus, nye dína lɨ́ epahle ésimá nyé á bee lɨ́ nɛ́ɛ: Sísǐm mé Nzyɛ̌m ntɔ̂ʼ lɛ́ɛ e né ó: «Gó dí edǐ nɨ̌, bʉr olɛ̂l, bé ó wâʼ lɨ́ esáa gô. 20 Gbɔlwaa sí, go e súlo. Bɨ̌n le onɔ́ɔ́ e tô. Gǒ sá ó, alíʼa lɨ́ etô, ebě, mé o lómó bê.» 21 Nó ó Pétrus á sulo sí, nzě lɛ́ɛ e bʉr baá ó: «Me ó dí mʉr bɨ́n dí esáa nyá. Bɨ̂n nze sáá mé ɨ́ yé ɛ́?» 22 Bé ntɔ̂ʼ yala ó: «Kapitɛ̂n Corneille ô lómó bɨ́h. Nye ó tîtyěl mʉr, dí ebuú dwáawǒ Nzyɛ̌m nyá. OYúden bɨ́bɛ̂h, bé lɨ́ esêʼle nyê. Nyʉ́ʉ́ éngeles dí ti nyá, á tɨ́e nye ó, nye báŋlaa go, go tô pyâl kwá nyé, nye jôʼlaa sá gó ngá lɛ́ɛ nyé yɨ́.» 23 Pétrus nzě níŋle bé mbɛ̌r, nzě tira bé ntɔ́ɔ ɨ́ mbɛ̌r mé Simon. Ɨ́ mɛ́n tɨ̂, bé e boo nɔ́ɔ́ nzě tô, bé e bʉ́ʉ́ óbûʼla ó Yópe. 24 Ɨ́ móhó wé á ka bɔma wɨ́, bê nzě pyâl Kesáre. Corneille á be ó lɨ́ ebóno bê, bé e mimbyɛ́l myé le osó bé nyé á báŋle bá. 25 Lě Pétrus á nî mbɛ̌r, le ntɔ̂ʼ Corneille á to bɔma e né, nzě bɨʼ mébóó sí, buú jɔr nyʉ̂l e né. 26 Pétrus nzě gbɛl nyé sí. Nye e né ó: «Gbɔlwáa, ebě, me ntémé, me ó mʉr mpʉ gô.» 27 Bé e Corneille nzě lwibla. Jɔʼ bé á to nî mbɛ̌r yɨ́, Pétrus á kœb ó, bʉr ɨ́ buo buo, bé osí swâl tɨ̂. 28 Nye e bé ó: «Bɨ̌n bé lɨ́ ekʉ́ gʉ́a ó, yé ajala ó, mʉr kúl óYúden tíʼaa ɨ́ mpúhlá e mʉr kúl swîh, nkʉ̂ sîhlě síhláǎ bǎʼ e né. Damá jóʼo nó, Nzyɛ̌m á tɨ́e me ó, mʉr, nyé abě sá mélwaʼwo, nkʉ̂ ntɔ̂ʼ sá mpîr, duho ɨ́ mebyɛ́l mé. 29 Sá tɨ̂ʼ ó mé á be alíʼa lɨ́ enze ɨ́ jɔʼ mé á jóʼo mpáŋla nyɨ́n yɨ́. Nó ntémé ó mé dí ekpɛl égʉ́ǎ sá bɨ̂n pʉgʉ báŋlé mé e tɨ̂ʼ yɨ́.» 30 Nó ó Corneille á yala e né ó: «Yé mû mûh ó melú ménâ, ɨ́ mbi éwala wɨ̂, me á be ó ɨ́ mbɛ̌r wɨ̂, lɨ́ esâ mínjɨʼla, myaá sɨ́sáŋɔ́ɔ́ ɨ́ mewala melɛ̂l mí. Nyʉ́ʉ́ mʉ̂r nzě nyɨ̂n mé metwɨrâ, e mikán ɨ́ nyʉ̂l ɨ́ nkaaá, nzě tyɛ̂b mé ɨ́ mpǒm. 31 Nye e me ó: “Corneille! Nzyɛ̌m, nyɨ́ yala mínjɨʼla myô. Nye mû ó lɨ́ etoŋlo gó ɨ́ lɔ̌b míngúlá gó dí edwidwe báántéʼenteʼe o bʉ̂r mí. 32 Ɨ́ báánâ, lómáá bʉ̂r Yópe. Bé tô jébě Simon, waá dí e lʉ́ʉ́ díe ó, Pétrus nyá. Nyě dǐ ó, ɨ́ mbɛ̌r mé Simon, mʉr dí eséa bíkʉ́r bí ótír nyá. Mbɛ̌r wé, wé ó, ɨ́ nkpâh mâŋ.” 33 Nó ó mé á kpahwa lómo bʉr ɨ́ sɔ́ɔlʉ gô yɨ́. Go bé ɨ́ kʉ́ gwá sâ, lɨ́ esí bánǎ nze. Bɨ̌h bɨ́bɛ̂h mû ó sí swâl wâʼ báánâʼ ɨ́ míh mé Nzyɛ̌m lɨ́ enzě jóʼǒ sá yɨ́yɛ̂h Dâ Nzyɛ̌m lɛ́ɛ́, go ntáa nzě kala bɨ́h yɨ́.» Pétrus lɨ́ elɛ́ɛ mílɔ́ɔ ɨ́ mbɛ̌r mé Corneille 34 Nó ó Pétrus á nze nʉa lwǐb. Nye ó: «Mɨ́ kʉ́ gʉ́ǎ tyeetye ɨ́ báánâʼ ó, Nzyɛ̌m, nye ágbá mbɔ́ʼ páʼ bʉ̂r e bʉr. 35 Ɨ́ bikúl bíbyɛ̂h, Nzyɛ̌m beě mbɨ̂mbɨá ó, mʉr nyɨnyɛ̂h dí edwáawo nyê, le esâ sá dí tîtyěl yɨ́ nyá. 36 Bɨ̌n bé lɨ́ egʉ́ǎ lɔ́ɔ́ Nzyɛ̌m á lɛ́ɛ bʉr o b'Ɨ́zraɛ̂l wɨ́. Mbɨambɨa Lɔ́ɔ waá, wé ó waá mépyɛbla bʉ̂r dí ebi ɨ́ nzɨ̌ mé Yésʉs-Krîst, dí Njwɨ́ɨbʉr bɨ́bɛ̂h nyá wɨ́. 37 Bɨ̌n bʉr o tɨ̂, bɨ̌n bé lɨ́ egʉ́ǎ sá yé á syɛ́ɛ ɨ́ sí Yʉ́da yɨ́yɛ̂h yɨ́. Yé á táare ó, ɨ́ sí Galilê, píě ndubó Yʉánɛs á du bʉr wɨ́. 38 Bɨ̌n bé lɨ́ egʉ́a ntémé mpʉ̌ Nzyɛ̌m á lœm Yésʉs, mʉr Nazarɛ̂t, Sísǐm wé, le edwe nyé ánɨ̂nɨ̂n nkul yɨ́. Bɨ̌n bé lɨ́ egʉ́a ntémé mpʉ̌ Yésʉs á tye mésí e mésí, lɨ́ etô le esâ émbɨa, le etiʼ baá bɨ́bɛ̂h bé á jɨjaʼra e mpél mé sɔ́ŋ meleme bá yɨ́, ebě, bé e Nzyɛ̌m ó b'á be. 39 Bɨ̌h bɨɛ ó dí kwahaá oboʼlo o tɨ̂, bʉr o dí ekʉ́ gʉ́a bísyɛ́ɛla bíbyɛ̂h nyé á sâ ɨ́ sí bʉ̂r óYúden ndu e Yerʉ́zalɛm bí bá. Bé á si bomlo nye e binzâŋ, bɨ́nɔɔ nyé ɨ́ kolôs kʉ́, jʉ́ŋɔɔ nyê. 40 Sâ gwár, Nzyɛ̌m á si pɛh nye ɨ́ móhó lɛ̂l, nyé osí dwe. Nye nzě sâ ó, bʉr báʼa bee nyê. 41 Abe yɨ́ɛ bʉr bɨ́bɛ̂h. Nye á jaa pyâl ó, njɨ kwá nyɨ́h, bʉ̌r Nzyɛ̌m á boo twâr bá. Bɨ̌h bɨɛ ó dí oboʼlo bé, ebě, bɨ̌h le onɔ́ɔ́ ó b'á pûhla mebô lɨ́ ede méde le menyoʼ píe jɔ̌ʼ Nzyɛ̌m á pɛh nye, dwih nyé lɨ́ odwe yɨ́. 42 Nye á si lɛ́ɛ e bɨ̌h ó, bɨ̌h tôʼ le etúnǒ Mbɨambɨa Lɔ́ɔ́ wé, ó: Yésʉs ó dí mʉ̌r Nzyɛ̌m á tyêl ɨ́ dǐ tîʼ milɔ̌b, waá ngá tíʼe míkublakúbla le odwe milɔ̌b nyá. 43 Ogwíha o mílɔ̌b bɨ́bɛ̂h, bé á si lwib, dumo e né. Bé á lɛ́ɛ ó, mʉr nyɨnyɛ̂h ódyêʼ koo e né nyá, Nzyɛ̌m ópɛʼ bíbaa nyé dí eniʼe ɨ́ lɔ̌b mísyóm myé bí. Nye ósâ nó ó, ɨ́ lɔ̌b mé Yésʉs.» Bʉr o dí abe óYúden bá lɨ́ ebǐ Sísǐm mé Nzyɛ̌m 44 Pétrus dína apǎ sîl élwib nó nɛ́ɛ: Sísǐm mé Nzyɛ̌m ntɔ̂ʼ sulo ɨ́ mʉr nyɨnyɛ̂h á jóʼo lɔ́ɔ́ wé nyá. 45 Obûʼla bé e boo Pétrus bé á nze, baá bé á tíʼɔɔ mpʉ́n bá, bé á si bu kâm lɨ́ ebánǎ beě Sísǐm mé Nzyɛ̌m lɨ́ edweŋɔɔ ntémé bʉr o b'á be abyɛ̂l oYúden bá. 46 Ebě, bé jóʼó nɛ́ɛ: bɨ́ɛ ntémé mû lɨ́ egúmlo mpwâʼ kûm mé Nzyɛ̌m ɨ́ bilwǐb bí ayogoyogo. Nó ó Pétrus á ka dî ó: 47 «Nzê mʉr, nyě e nkul ekǎ kamle bʉ̂r bâʼ lɨ́ eduŋɔɔ ɨ́ medíbé ɛ́? Ebě, bé mû ó sí bǐ Sísǐm mé Nzyɛ̌m ntémé, jwɨʼ gwár e gwár e mɨná gâ.» 48 Nó nyé á dwe nkul ó, bé dúŋɔɔ ɨ́ díé mé Yésʉs-Krîst. Nó ó bé á nze jɨʼla e Pétrus ó, bé e boo nɔ́ɔ́ jâʼ mʉ́ʉ́ mélû tɨ̂. |