Mɨlʉmlʉ 1 - Kálar Nzyɛ̌m : Ejwán é Sáá

Yésʉs lɨ́ ekɛʼ bʉ̂r o mílʉ́mlʉ́ bé Sísǐm mé Nzyɛ̌m

¹ Théophile, mɨ́ɔɔ́ wǎm! Ɨ́ mekaná mé ésôʼ mé á nyɛɛ cɛma go má, me á si lɛ́ɛ sá yɨ́yɛ̂h Yésʉs á sâ, le elɛ̂ʼle, duho ɨ́ menyɛ̌l,

² tó pyâl pyáláa ɨ́ móhó nyé á bɨ́nɔɔ ɨ́ jʉ́o kʉ́ wɨ́. Nye dína apǎ bɨ́nɔɔ ɨ́ jʉ́o kʉ́, nye á si líʼe bʉr o mílʉ́mlʉ́ bé, nyé á twâr bá, etié e nzɨ̌ Sísǐm mé Nzyɛ̌m.

³ Jɔʼ nyé á sil esia e mitúú, ntɔ̂ʼ dwe yɨ́, nye nzě pah, duho lɨ́ odwe, nzě lɛ̂ʼle bʉ̂r o mílʉ́mlʉ́ bé nyʉ̂l nyé e nzɨ̌ bijwɨʼ ɨ́ buo buo, ó bé gʉ́ŋaa tyeetye ó, nye á kʉ be ó kublakúbla. Ɨ́ melû mekám ménâ maá, bé e boo nɔ́ɔ́ ó b'á bɨbe. Nye á lɨlɛ́ɛ bé ó, milɔ̌b mi Mpóʼo mé Nzyɛ̌m.

⁴ Ɨ́ gúú móhó bé e boo nɔ́ɔ́, bé á be lɨ́ ede wɨ́, nye e bé ó: «Aduho gá Yerʉ́zalɛm, tô lɨ́ ejaa. Bɨ̌n a bónó sá Sɔ́ŋ wǎm á kɛʼ bɨ̌n yɨ́: yé ó sá mé á lɛ́ɛ bɨ̌n yɨ́.

⁵ Ebě, Yʉánɛs nyɨɛ á dudu bʉr ó e medíbé. Yɨ́ kǎ lîʼ njɨ bwá mélû abuo, bɨ̌n bé ókǎ duŋɔɔ ó e Sísǐm mé Nzyɛ̌m.»

Yésʉs lɨ́ ebɨ́nɔɔ kʉ́

⁶ Nó ɨ́ jɔʼ bé á be, bé mû bé omér yɨ́, bé ntɔ̂ʼ dî e Yésʉs ó: «Dâ ɛ̌, nzê ɨ́ jɔʼ yɨ̂ʼ ó gó ngá báʼǎ tyêl sí Ɨ́zraɛ̂l ɛ̌?»

⁷ Yésʉs ntɔ̂ʼ yala e bé ó: «Bɨ̌n bé ajala le egʉ́a bíjɔʼ le mimbû Sɔ́ŋ wǎm ngá sâ bísyɛ́ɛla byé bí. Ebě, Sɔ́ŋ wǎm mʉr tɨ̂ʼ ó b'á tyêl bijɔʼ byaá e nkul jwɨ́ɨ́ yé nye mʉr tɨ̂.

⁸ Bɨ̌n bé óbi nkûl ɨ́ jɔ̌ʼ Sísǐm mé Nzyɛ̌m ngá sulo bɨ́n ɨ́ menyʉ̂l yɨ́. Nó ó bɨ́n ngá boʼlo mílɔ̌b myâm, táare ɨ́ Yerʉ́zalɛm, le ɨ́ mekwár mé sí Yʉ́da mɨ́mɛ̂h, ndu e maá mé sí Samarî, tó pyâl ɨ́ medumo mé sí mɨ́mɛ̂h yɨ́.»

⁹ Jɔ̌ʼ Yésʉs á sil elɛ́ɛ milɔ̌b myaá yɨ́, nye nzě bɨ́nɔɔ ɨ́ jʉ́o kʉ́ ɨ́ míh mɔ́ɔ́. Píe tɨ̂, dwiné nzě búblo nyê. Nye ntɔ̂ʼ dîm bé ɨ́ mîh.

¹⁰ Bé dína mîh lɨ́ edwɛ̂ʼ kʉ́, lɨ́ ebeě mpʉ̌ Yésʉs á bɨ́nɔɔ kʉ́ yɨ́ nɛ́ɛ: bé kǎ twɨra ó, bʉr obá, bé ɨ́ mempah me nyʉ̂l e mikán ɨ́ pan pan.

¹¹ Bʉr baá ntɔ̂ʼ lɛ́ɛ e bé ó: «Bʉr ó Galilê, bɨ̌n di náǎ lɨ́ edwɛ̂ʼ jʉ́o kʉ́ ɨ́ di di di ɨ́ yé? Yésʉs, mʉr pɛʼɔɔ ɨ́ sɔ́má yɨ́n nyá, óbáʼǎ nze ó, mbi ngwár e ngwár bɨ̂n bee nyé lɨ́ ebɨ́nɔɔ ɨ́ jʉ́o kʉ́ nɨ̌.»

¹² Bʉr o mílʉ́mlʉ́ bé, bé ntɔ̂ʼ nyɛl ékɔ́a écwɨ̂ʼ bé jɨ́jébé ó, “Ecwɨ́ʼ lé ólivier” lɨ́, nzě tóŋɔɔ̌ Yerʉ́zalɛm. Tyen yɔ́ɔ́ yaá, yé á be ó kúnókúno e kíloméra ngwár, bím tyen mʉ̂r dí e nkul etye ɨ́ dʉ́ó é sábat yɨ́.

¹³ Jɔʼ bé á pyâl gʉ̂ʼ yɨ́, bê nzě bére ɨ́ ntɔ́ɔ tólóm mbɛ̌r bé á boo didi tɨ̂ʼ nyɨ́. Bé á be ó: Pétrus, Yʉánɛs, Jacques ti e André, Philippe ti e Thomas, Barthélemy ti e Matthieu, Jacques, mwân mé Alfê, Simon “Kɔmlʉ kwár” ti e Yʉ̂d, mwân mé Jacques.

¹⁴ Bɨ́bɛ̂h, bé á sisyɛŋa léme ngwár ó, bé tirwo ó e syɛ́ɛ́ mínjɨʼla. Tɨ̂ʼ ntémé, yé á be ó le obûʼla o bʉ́bá, le nyɔ̌ŋ mé Yésʉs, Maria, ti e bɨ́ɔɔ́ le okɛ́l mé Yésʉs.

¹⁵ Ɨ́ tíl mélû yaá mpʉ óbûʼla nter e mekám mébá, bé á syɛŋa yɨ́, Pétrus nzě mɔa sí, tyɛ̂b témé entumo e bʉ̂r énɨ̌ memɛ̌n. Nye ó:

¹⁶ «Bɨ́ɔɔ́ bâm! Okɛ́l bâm! Yé á jala ó, sá Sísǐm mé Nzyɛ̌m wé á lɛ́ɛ ɨ́ nzɨ̌ mé David yɨ́, yé díraa. Yé á be cɛmá ó, ɨ́ lɔ̌b mé Yʉ́das, mʉr á to le etɨ́e bʉr nzɨ̌ etó mɛ̂r Yésʉs nyá.

¹⁷ Nye ntémé á be ó mʉr ngwár ɨ́ sɔ́má gá yɨ́ná. Nye ntémé á si bi nkɔb ɨ́ syɛ́ɛ́ gá yɨ́ná yɨ̂.»

¹⁸ (Náǎ yé ó, ɨ́ mɔnɨ́ Yʉ́das waá á bi tâŋ myɛ́na duho ɨ́ bɨ́blǎ syɛ́ɛla yé yɨ́, nye á be ó sí tó bwâm pemé. Ɨ́ pemé gwár yaá, nye nzě jéʼe éduma sí mbûmbǔr, mo wé ntɔ̂ʼ bʉ̂l, bisá bí mo bíbyɛ̂h kʉ̌l e kʉ̌l ɨ́ lwɨ́ʼlɨ́ lwɨ́ʼlɨ́ sí e sí.

¹⁹ Bʉr ó Yerʉ́zalɛm bɨ́bɛ̂h, bé á si jóʼo lɔ́ɔ́ éswie laá. Nó ó bé á ka jwɨr pemé yaá ɨ́ lwǐb yɔ́ɔ́: “Akɛ́ldáma”. Díe laá, lé páʼlɔ́ɔ́ ó, “Pemé métié”.)

²⁰ Pétrus nzě lɛ́ɛ ntémé ó: «Ebě, yê cɛmá lɨ́ oSâm mé David ó: “Mbɛ̌r wé, wé líʼɨɨ gumo. Mʉ̌r sá akǎ báʼǎ di tɨ̂.” Yé ntémé, yê cɛmá ó: “Nyʉ́ʉ́ mʉ̂r, nye nʉ́aa dǐ tyɛ̂b esôʼ yé.”

^21-22 Nó yé jala ó, nyʉ́ʉ́ mʉ̂r ɨ́ sɔ́má gá yɨ́ná bâʼraa e bɨ̌h, bʉr o mílʉ́mlʉ́ mé Yésʉs. Nye ntémé tôʼ le ebʉboʼlo ó, Tî Yésʉs, nyɨ́ pah, duho lɨ́ odwe. Mʉr waá, nye ɨ́ jala le ebe mʉ̂r sɔ́má yé á dudû Tî Yésʉs nyá. Nye díʼee mʉr á tiʼe e mɨná gâ, táare ɨ́ jɔ̌ʼ Yʉánɛs á du Yésʉs ɨ́ díbé Yɔrdên, tó kumo ɨ́ jɔʼ nyé á bɨ́nɔɔ ɨ́ sɔ́má gá yɨ́ná yɨ́ nyá.»

²³ Bê nzě pɛ̂h bʉ̂r obá: nyâ, díé lé Yóseb, waá bé á jwɨr Barsabâs nyá. (Lʉ́ʉ́ díé lé, lé ó Yʉstʉ̂s.) Nyʉ́ʉ́, lé díe, Mathias.

²⁴ Nó ó bʉ̂r ó gwɨ́hlá bɨ́bɛ̂h, bé á jɨʼla e Nzyɛ̌m, lɛ́ɔɔ ó: «Dâ ɛ̌, go ó dí egʉ́a mílémé mí bʉ̂r bɨ́bɛ̂h. Lɛ́ʼláá bɨ́h ɨ́ sɔ́má bʉ̂r obá bâ, waá gó á pɛ̂h nyá.

²⁵ Ebě, nye ɨ́ jala le enʉǎ dǐ Yʉ́das á dímle lɨ́ etó kœ̌b dǐ yé á jʉ́ʼa e nyɨɛ yɨ́. Nyɨ́haá ó ngá tô e syɛ́ɛ́ lʉ́mlʉ́ dóló.»

²⁶ Nó bé á nze do ebya, lɨ́ epɛ̂h nyʉ́ʉ́ mʉ̂r ɨ́ sɔ́má bʉ̂r obá baá. Ebya nzě twâr Mathias. Nó ó bé á ka nze láa nye mʉr jálá le ebâʼra e sɔ́má bʉ̂r o mílʉ́mlʉ́ kám e ngwár nyá yɨ́.