Mataos 7 - Kálar Nzyɛ̌m : Ejwán é SááAdwe gá bʉ́ʉ́ bʉ̂r mebě ( Luc 6.37-38 , 41-42 ) 1 «Adwe gá bʉr mebě ebě, bɨ̌n ntémé ámû jaá dweŋɔɔ mê. 2 Mbi bɨ́n dí edwe bʉ̂r mebě wɨ́, mbi ngwár e ngwár waá ntémé ó Nzyɛ̌m ngá dwe bɨ́n mǎ wɨ́. Bím mébě gó ngá dwe bʉ̂r má, bím yaá ntémé ó bé ngá dwe gó yɨ́. 3 Gǒ jaá bɨbee ó, njɨ mpǔm dí mɨ́ɔɔ́ gǒ ɨ́ dîh yɨ́, kâr éjʉ̂ʼrǎ mbʉ́ŋʉʉ̌ ntinɨ̂ dí ɨ́ lô dîh wɨ́, ɨ́ yé? 4 Gǒ e nkul elɛ́ɛ mɨ́ʉ̌ nyá ó: “Paá nze. Me pɛ́ʼɛɛ go mpǔm dí go ɨ́ dîh yɨ́,” tó kœb ó, gua, go mʉr tɨ̂, gó e mbʉ́ŋʉʉ tʉ́ŋlʉ̌ dîh? 5 Ányâ-mikóo, tááráá épɛ̌ʼ mbʉ́ŋʉʉ dí ɨ́ díh lô wɨ́. Jɔʼ yaá ó gó ngá gwá bee, ntɔ̂ʼ pɛ̌ʼ mpǔm dí mɨ́ɔɔ́ gǒ ɨ́ díh lé yɨ́. 6 «Adwe gá ompyê sá dí ti yɨ́. Bé ámû jaá dwira, lʉ̂ le enya bɨ́n. Adwe gá onkʉ̌ mindwê mi dí ɨ́ buo día mí. Bé ámû jaá tyéele myê.» Jɨʼlaa gá e Nzyɛ̌m ( Luc 11.9-13 ) 7 «Gwámáá gâ, bɨ̌n nkʉ̂ bi. Sáŋáá gâ, bɨ̌n nkʉ̂ bee. Kwáʼláá gá ebê, lé nkʉ̂ dibɔɔ bɨ́n. 8 Ebě, mʉr nyɨnyɛ̂h dí egwâm nyá, óbi. Mʉr dí esáa nyá, óbee. Ebê, lé ódibɔɔ lɨ́ esú é mʉ̂r dí ekwâʼle nyá. 9 Wáa mʉ̂r dí ɨ́ sɔ́má yɨ́n, mwân wé gwám nyé blêr nɛ́ɛ: nyě kǎ dwe nyé mekóʼ? 10 Nzê nye ódwe nyé nyʉ́a ɨ́ jɔʼ nyê jáʼ sû yɨ́ ɛ́? 11 Bím bíbɨ́bla bi bʉ̂r bɨ́n dí nɨ̌, bɨ̌n pǎ nyɛɛ́ dwe bwán bɨ́n bisá bímpâ, á dwɛʼra e Sɔ́ŋ wɨ́n dí ɨ́ jʉ́o kʉ́ nyá! Nye ódwe bʉ̂r o dí egwâm nyé bá, laa náǎ. 12 «Mbi bɨ́n dí ekpɛl ó bʉr sâʼ bɨ̌n wɨ́, sáʼ gá bé ntémé nó. Nó ó dí cɛmá ɨ́ mekaná métié, le maá ógwíha o mílɔ̌b mé Nzyɛ̌m yɨ́.» Mebé mébá ( Luc 13.24 ) 13 «Níʼéé gá lɨ́ ebê dí ɨ́ twâʼwo lɨ́, ebě, nzɨ̌ dí ɨ́ bwaʼ le akɔbla nyɨ́, nyě tó ó, nko éswie. Nó bʉr o dí ecɨɨ tɨ̂ʼ bá, bé ɨ́ buo. 14 Tó kœb ó, nzɨ̌ dí etô nkǒ twiʼ nyɨ́, nye ɨ́ kɔbla. Ebé é tɨ̂, lé ɨ́ twâʼwo. Bʉr o dí ecɨɨ ɨ́ nzɨ̌ nyaá bá, bé abuo.» Bé kʉ́ gwá dweʼě lɨ́ ó ɨ́ mpumó nyé ( Luc 6.43-44 ) 15 «Bɨ̌n a báʼ ógwíha o mílɔ̌b o bíbɛr, ebě, bé nzɨ́nzé ɨ́ sɔ́má yɨ́n ó e njwɨr ɨ́ tala tala, nwɨɨla e binteme. Tó kœb ó, ɨ́ milémé myɔ́ɔ́ tʉ́ŋlʉ̌, bé ó mpʉ ónkœœ dí ekpɛl édɛn bínteme bá. 16 Bɨ̌n bé ódweʼe bé ó ɨ́ bisyɛ́ɛla byɔ́ɔ́. Mʉr nyé abe lɨ́ emwâʼ mpúmó sɔɔ́ lɨ́ esyɛh, nkʉ̂ mpumó nwâʼ lɨ́ esɨ́ǎ. 17 Mpǎŋ lɨ́, yé gúmó ó mpumó mpâ. Bǒl lɨ́ gúmó ó, mpumó dí ɨ́ bébe nyɨ́. 18 Mpǎŋ lɨ́, yé ágúmó bébebébe mpumó. Bǒl lɨ́ agúmo mpúmó dí ɨ́ mbɨa nyɨ́. 19 Lɨ́ yɨ́yɛ̂h dí agúmo mímpǎŋ mi mpúmó yɨ́, yé lɨ́ ecwɛlɔɔ, guhɔɔ lɨ́ ebéʼé é siʼe. 20 Nó bɨ̌n bé ódweʼe ógwíha o mílɔ̌b ó bíbɛr ó ɨ́ bisyɛ́ɛla byɔ́ɔ́.» Elɛ́ɛ le esâ ( Luc 13.25-27 ) 21 «Ntʉ mʉ̂r nyɨnyɛ̂h ngá lɛ́ɛ ó: “Dâ ɔ́, Dâ ɔ́!” nyá, ngá nî ɨ́ Mpóʼo mé Dâ Nzyɛ̌m, njɨ waá nyɨnyɛ̂h dí esâ gwɨ́má mé Sɔ́ŋ wǎm dí ɨ́ jʉ́o kʉ́ nyá. 22 Ebě, ɨ́ móhó étíʼ é mílɔ̌b, bʉr ɨ́ buo buo, bé ólɛ́ɛ e me ó: “Dâ ɔ́, Dâ ɔ́, paá bee ɔ̌! Bɨ̌h bé á si gwîh milɔ̌b mé Nzyɛ̌m ɨ́ díé lô. Ɨ́ díé lô, bɨ̌h bé á si so meleme! Ɨ́ díé lô, bɨ̌h bé á be ó sí sâ mésimá ɨ́ buo buo!” 23 Nó me óyala e bé ó: “Ajóʼo! Mé agʉ́a bɨ́n. Pʉʼaa gá me ɨ́ mîh, bɨ̌n baányâ-ebébe bâ!”» Kɨkɛna ménzumó mebá ( Luc 6.46-49 ) 24 «Nó ó, mʉr nyɨnyɛ̂h dí ejóʼǒ lwǐb mê lwǐb e bɨ̌n yɨ́, le esâ mpʉ mê lɛ́ɛ́ yɨ́ nyá, nyě nwɨɨlá ó e twóó mʉrʉ̂m á sumo mbɛ̌r, tyêl wé lɨ́ ekóʼ nyá. 25 Mpíé nzě nwɨ́ɨ, mpɨɨ mamle, onkúo kwoolo, nkaŋa ɨ́ mbɛ̌r waá. Sâ gwár, mbɛ̌r l'abîʼ, ebě, bipǎb, byé á be ó tyélá lɨ́ ekóʼ. 26 Mʉr nyɨnyɛ̂h mû sí jóʼǒ lwǐb yɨ̂, asâ mpʉ mê lɛ́ɛ́ yɨ́ nyá, nwɨɨla ó e gʉʼlʉgʉ́ yé á sumo mbɛ̌r kʉ́ epum lé ósɨ́ǎ yɨ́. 27 Mpíé nzě nwɨ́ɨ, mpɨɨ mamle, onkúo kwoolo, bê nzě nkaŋa ɨ́ mbɛ̌r waá, mbɛ̌r nzě bîʼ ɨ́ kum, wɨ́wɛ̂h lɨ́ ebîʼ ɨ́ jɔʼ gwár.» Nkul jwɨ́ɨ mé Yésʉs 28 Jɔ̌ʼ Yésʉs á sil edwe mentumo me bʉ̂r milɛ́ʼlá myaá yɨ́, lwǐb yé, yé á be ɨ́ buú mɛ̂r bé ɨ́ miléme. 29 Ebě, nye á bé adwe bé milɛ́ʼlá mpʉ ólɛ̂ʼla o métié bɔ́ɔ́. Nye á lɨlɛ̂ʼle bé ó e nkul jwɨ́ɨ. |