Mataos 4 - Kálar Nzyɛ̌m : Ejwán é Sáá

Mebʉ́blá mé Yésʉs

¹ Sísǐm mé Nzyɛ̌m ntɔ̂ʼ tô e Yésʉs ɨ́ lʉá. Nye á tô e né gʉ̂ʼ ó, sɔ́ŋ meleme tó bóblo nyê.

² Nye nzě di gʉ̂ʼ melû mekám ménâ, abe e mede. Píe jɔʼ yaá ó nzâ nzě mɛ̂r nyê.

³ Mbôblobʉr ntɔ̂ʼ pyâl gúmó Yésʉs á be yɨ́. Nye e né ó: «Yé bé go ó Mwân mé Nzyɛ̌m nó, lɛ́yɨ́ɨ́ mékóʼ mâʼ ó, mé líŋaa mede.»

⁴ Yésʉs ntɔ̂ʼ lɛ́ɛ ó: «Yê cɛmá ɨ́ Mekaná mé Nzyɛ̌m ó: Mʉr, nyé abe e nkul etiʼě njɨ ɨ́ lɔ̌b méde mé omér. Nyě tiʼé ó, lɨ́ ekǎn lɨ́lɛ̂h dí epyâl ɨ́ num mé Nzyɛ̌m lɨ́. »

⁵ Sɔ́ŋ meleme nzě nʉa nyê, nzě tô e né Yerʉ́zalɛm, nkana dí ti yɨ́. Nye nzě tyêl nyé ɨ́ mié mpáh Nzyɛ̌m kʉ́.

⁶ Nye e né ó: «Yé bé go ó Mwân mé Nzyɛ̌m nó, lyáháa, ebě, yê cɛmá ó: Ebě, nye ódwe bééngeles bé nkul ekamle e go ɨ́ menzɨ̌ mô mɨ́mɛ̂h. Bé ónkɛ́ɛ gó ɨ́ mebó mɔ́ɔ́, lɨ́ esú ó kʉ̌ gô, wé ayɨ́ bɨm ébɔ̌ʼ lɨ́ ekóʼ. »

⁷ Yésʉs nzě yala. Nye e né ó: «Heʼé! Ebě, yê cɛmá ntémé ó: “Ayɨ́ bóblǒ Dâ, dí Nzyɛ̌m gǒ nyá.”»

⁸ Sɔ́ŋ meleme ntɔ̂ʼ báʼǎ nzě nʉa nyê, tô e né ɨ́ nkɛ̌l ecwɨ̂ʼ lé á be ɨ́ buú jaa kʉ́ lɨ́. Nye nzě lɛ̂ʼle nyé mesí mé sí mɨ́mɛ̂h, le okúm le ogbaa o mésí maá.

⁹ Nye e né ó: «Gó ókúrwo sí, píʼe mpóm ɨ́ mpǒm nyǎm, dwe mé kûm nó, me ódwe gó bisá bîʼ bíbyɛ̂h.»

¹⁰ Yésʉs ntɔ̂ʼ yala e né ó: «Sátan, duhaa mé ɨ́ mîh. Ebě, yê cɛmá ntémé ó: “Dwéʼ Dâ, dí Nzyɛ̌m gǒ nyá, kûm. Go e dwé dúu, njɨ nye omér.”»

¹¹ Píe tɨ̂ʼ ó sɔ́ŋ meleme á líʼe nye, tô yɨ́. Beéngeles nzě pyâl, bé ntɔ̂ʼ séa e Yésʉs.

Metááré mé syɛ́ɛ́ mé Yésʉs

¹² Yésʉs nzě jóʼǒ mpʉ bé á gbâ Yʉánɛs ɨ́ mbʉʼ yɨ́. Nye nzě báʼǎ tô ɨ́ sí Galilê.

¹³ Nó nyé á duhǒ Nazarɛ̂t, ntɔ̂ʼ tó dǐ Kapernáʉm ɨ́ nkpâh mâŋ. Yé ó ɨ́ sí Zabulôn, bé e Nɛftalî.

¹⁴ Yé á syɛ́ɛ nó ó, nye lóŋlaa lɔ́ɔ́ mé ngwíha milɔ̌b Ésayie. Nye á boo lɛ́ɛ ó:

¹⁵ “Bʉr ó Zabulôn, bʉr ó Nɛftalî, bɨ̌n ó dí nko mâŋ dí yɨ́. Bɨ̌n ó dí ɨ́ mipɨ̌n mí díbé Yɔrdên. Bʉr ó Galilê, ɨ́ nko bʉ̂r o bíkûl e biloo dí edi yɨ́!

¹⁶ Kúl bʉ̂r yé á be lɨ́ entima lɨ́ edúrʉ́ʉ́ yɨ́, yɨ́ beě myɛ́n ɨ́ bwaʼbwaʼ. Bʉr bé á be lɨ́ edi ɨ́ nkom nkom bá, bɨ́ beě myɛ́n lɨ́ epan ɨ́ sí yɔ́ɔ́!”

¹⁷ Táare ɨ́ jɔʼ yaá, Yésʉs nzě nyɛl étúno ó: «Túmáá gá mikoo e mebébe mɨ́n. Bɨ̌n a dwírá míléme, ebě, Dâ mû ó kúno etyêl Mpóʼo nyé ɨ́ sɔ́má yɨ́n.»

Ompʉ́n bé ésôʼ onâ

¹⁸ Ɨ́ lʉ́ʉ́ dʉ́o, mpʉ̌ Yésʉs á be ɨ́ nkpâh máŋ mé Galilê yɨ́, nye nzě bee bʉ̂r obá. Bé á be ó Simon, bé dí ejébě Pétrus nyá, bé e mɨ́ɔɔ́ wé, André. Bé á be ó lɨ́ eguho méntám mɔ́ɔ́ ɨ́ mâŋ maá le edulo mê, ebě, bé á be ó ogwih o méntâm.

¹⁹ Nye ntɔ̂ʼ lɛ́ɛ e bé ó: «Dúʼóó gá me; me ósâ ó, bɨ̌n díʼee odul o bʉ̂r.»

²⁰ Tyé e tyé yaá, bé ntɔ̂ʼ bîr méntám mɔ́ɔ́, dúŋɔɔ nyê.

²¹ Nye nzě laa náǎ, ntɔ̂ʼ bee bwán mé Zebedê obá, Jacques, bé e mɨ́ɔɔ́ wé, Yʉánɛs. Bé á be ó ɨ́ byɛ̂l, bé e sɔ́ŋ wɔ́ɔ́ Zebedê, lɨ́ ekomlo méntâm. Nye ntɔ̂ʼ jébe bê.

²² Tyé e tyé yaá, bé ntɔ̂ʼ mɔa, líʼɔɔ byɛ̂l wɔ́ɔ́ le sɔ́ŋ wɔ́ɔ́, ntɔ̂ʼ dúŋɔɔ nyê.

Yésʉs lɨ́ etiʼ mímbêl

²³ Nó ó Yésʉs á to le etye ɨ́ bigúmó bí sí Galilê bíbyɛ̂h, tô le edwe bʉ̂r milɛ́ʼlá ɨ́ mempáh mínjɨʼla, le etúnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, le etiʼ bʉ̂r o b'á bíle mekpaa mɨ́mɛ̂h bá. Nye á si tiʼ bʉr o bídyɛ̂m bíbyɛ̂h tʉ́ŋlʉ̌ kúl bʉ̂r yé.

²⁴ Nó ó kûm nyé á nze myaŋla ɨ́ sí Sirî yɨ́yɛ̂h yɨ́. Bê nzě nze le mimbêl kwá nyé: baá bé á be lɨ́ ejaʼra le meswie le mekpaa mimbi mimbi bá, bʉr o méleme, mé á nzɨnzamra bá, baá bé á sîsile bʉ̂ʼ bá, le mimbʉ́mbʉ́ʼ. Nye nzě tiʼ bê.

²⁵ Mentumo me bʉ̂r, mé á be ó lɨ́ edûdu nyé duhǒ sí Galilê, bʉ́ʉ́ duhǒ sí Dekapôl, bâʼ duhǒ Yerʉ́zalɛm le sí Yʉ́da. Bʉ́ʉ́ duhǒ pɨ̌n díbé Yɔrdên kɔ́m nkɛ́ɛ́.