Mataos 3 - Kálar Nzyɛ̌m : Ejwán é Sáá

Túnó mé Yʉánɛs Ndubʉr

¹ Ɨ́ melû maá, Yʉánɛs Ndubʉr nzě pyâl le elɛ́ɛ̌ lɔ́ɔ́ mé Nzyɛ̌m ɨ́ lʉá dí ɨ́ sí Yʉ́da wɨ́.

² Nye á lɨlɛ́ɛ ó: «Túmáá gá mikoo e mebébe mɨ́n. Bɨ̌n a dwírá míléme, ebě, Dâ mû ó kúno etyêl Mpóʼo nyé ɨ́ sɔ́má gá yɨ́ná.

³ Mʉr á lwibɔɔ ɨ́ lɔ̌b wé ɨ́ mekaná me ngwíha milɔ̌b mé Nzyɛ̌m Ésayie nyá, á be ó Yʉánɛs waá. Ésayie á boo cɛma ó: “Twíí, nye lɨ́ etúno ɨ́ tʉ́ŋlʉ̌ lʉá ó: «Komlaá gá nzɨ̌ mé Dâ Nzyɛ̌m. Jyɛŋlaá gá nzɨ̌ nyé lɨ́ epélé.»”»

⁴ Kán Yʉánɛs á bubwâr wɨ́, wé á be ó tiá e myě mé chameau. Kaná nyé á tityeele lɨ́ odyɛ́m nyá, á be ó sɛ́á e kʉ́r tír. Nye á dɨde ó, océmebiká le egbɔ́ʼ.

⁵ Nó ó bʉ̂r ó Yerʉ́zalɛm, le baá ó sí Yʉ́da ti e baá ó sí díbé Yɔrdên, bɨ́bɛ̂h, bé á nzě gúmó nyé á be yɨ́,

⁶ bé ntɔ̂ʼ gwîh mísyóm myɔ́ɔ́, Yʉánɛs nzě du bé ɨ́ díbé Yɔrdên.

⁷ Nó ó óFarizyɛ̂n le oSadwisyɛ̂n ɨ́ buo buo bé á nze, ó Yʉánɛs dúʼoo bé ɨ́ díbé yɨ́. Nye nzě lɛ́ɛ e bé ó: «Bɨ̌n bwá ó méjwɨ̂l bâ, nzé á pʉgʉ cɨ̂l bɨ̌n ó, bɨ̌n bé e nkul ekɨ̂ŋ nkpáa mé Nzyɛ̌m ɨ́ jɔʼ nyé ngá lɛ̂ʼle bɨ́n nyǎ yɨ́ ɛ́?

⁸ Gúmáá gá mimpaŋ mi mpúmó mi dí ejala e miléme mû sí dwira mí.

⁹ Ayɨ́ jwɨʼ gá ɨ́ milémé mín ó: “Ɨ́ páʼ gá wɨ́ná, mɨná gá bɨɛ, bé e sɔ́ŋ ó, Abraham,” ebě, mě lɛ́ɛ́ bɨ́n ó, Nzyɛ̌m óbɛ̌m liŋ mékóʼ mâʼ bwá mé Abraham!

¹⁰ Num nzwɨ́ɨ, wé mû ó ɨ́ cǎr lɨ́ etíʼe míkaalé bílɨ́ nko ménzuʼ. Nye ócwɛ̌l lɨ́ yɨ́yɛ̂h dí agúmo mímpǎŋ mi mpúmó yɨ́, guho yé lɨ́ ebéʼé é siʼe.

¹¹ Mɛ̌m du bɨ́n ó e medíbé, lɨ́ elɛ̂ʼle ó, bɨ̌n bɨ́ túmo míkoo e misyóm mín, le edwira míléme. Sâ gwár, mʉr dí ebɔma mé píe koo nyá, nyě e jwɨ́ɨ, laa mê. Mɛm, mé abě tyé mʉ̂r dí ó, me pɛ́ʼɛɛ nye osípah ɨ́ mekʉ̌ nyá. Nyɨɛ, nye ódu bɨ́n ó e Sísǐm mé Nzyɛ̌m le siʼe.

¹² Nyě e pyɛba ɨ́ mebô. Nyɨ́ gwámle ébɛhɛɛ lé, lwâl mpúmó. Nye ókomo mílɔ́lá ɨ́ nkuna. Sâ gwár, nye ódîʼ mpʉ́n ɨ́ siʼe dí adímedime yɨ́.»

Ndubó mé Yésʉs

¹³ Nó ó Yésʉs á nkɛ́ɛ ɨ́ sí Galilê, tô díbé Yɔrdên kwá mé Yʉánɛs, lɨ́ esáa ó, Yʉánɛs dúʼoo nye.

¹⁴ Sâ gwár, Yʉánɛs á si nyɛɛ bene. Nye e né ó: «Yé jala ó, gua dúʼoo me, abe ó, gua ntâʼ ó me dúʼoo go.»

¹⁵ Yésʉs nzě yala e né ó: «Bírɨ́ɨ, yé syɛ́yɨɨ nó, ebě, yé jala ó, mɨná lóŋlaa bisyɛ́ɛla bi dí ejala le esyɛ́ɛ bí, bíbyɛ̂h.» Yʉánɛs ntɔ̂ʼ kam.

¹⁶ Mpʉ̌ Yésʉs á sil eduŋɔɔ yɨ́, le nyé á pʉʼa ɨ́ medíbé, lě jʉ́o á bɔ́a. Nye ntɔ̂ʼ beě Sísǐm mé Nzyɛ̌m lɨ́ esulo ɨ́ báaa mpʉ épɨbaa, nzě berwo nyé ɨ́ nyʉ̂l.

¹⁷ Píe tɨ̂, nyě kǎ jóʼo ó, etyêl nzě duho ɨ́ jʉ́o kʉ́, lɨ́ elɛ́ɛ ó: «Nyâ, nye ó mwân wǎm mé dí ɨ́ buú kpɛl nyá. Sʉhʉʉ yâm yɨ́yɛ̂h, yé e né.»