Mataos 26 - Kálar Nzyɛ̌m : Ejwán é Sáá

Bʉm éswie mé Yésʉs

¹ Jɔ̌ʼ Yésʉs á sil elwib bilwǐb bínɨ̌ bíbyɛ̂h yɨ́, nye nzě lɛ́ɛ le ompʉ́n bé ó:

² «Bɨ̌n bé lɨ́ egʉ́a ó, nzɔɔ Páska, nyɨ́ kǎ lîʼ mélú mébá ó, nye bwálɔɔ. Nó ó Mwân mé Mʉr ónzě bɛ́mɔɔ, ó bé bómlaa nye ɨ́ kolôs kʉ́.»

³ Ojwɨ́ɨ o mpáh Nzyɛ̌m le otɔ́má bʉ̂r o b'Ɨ́zraɛ̂l, bê nzě syɛŋa lɨ́ ebɛhɛɛ mé Kayɨáfa, njwɨ́ɨ opara.

⁴ Bé á komlo tɨ̂ʼ ó mpʉ bé jálá le emɛ̂r Yésʉs ɨ́ nzɨ̌ mikóo, bé nkʉ̂ jʉ̂ nyé yɨ́.

⁵ Sâ gwár, bé á be yɨ́ɛ ó, lɨ́ elɛ́ɛla páʼ nyɔ́ɔ́ ó: «Mɨná bé ayɨ́ pǎ mɛ̂r gá nye ɨ́ jɔʼ nzɔ́ɔ. Minzɨnzɨ mi bʉ̂r, myé ámû sâ bíntʉ̌.»

Mʉmá lɨ́ elœ̌m Yésʉs lɔbína ɨ́ lʉ̂

⁶ Ɨ́ mpʉ̌ Yésʉs á bě Bétanî, ɨ́ mbɛ̌r mé Simon, mʉr á bíle nzǎm nyá yɨ́,

⁷ nyʉ́ʉ́ mʉ́má nzě nî. Nye á bě e ntǎʼ albâr, lwɨ́ŋlá le lɔbína yé á be ɨ́ buo día yɨ́. Nye nzě sʉ̌ Yésʉs lɔbína yaá ɨ́ lʉ̂, jɔʼ nyé á be, nye dína lɨ́ ede yɨ́.

⁸ Mpʉ ómpʉ́n bé, bé á bee syɛ́ɛla yaá yɨ́, bê kʉ́ nzě bene. Bé ó: «Wáǎ nyɔm nyé bá sǎm dimé lɔbína yɨ̂, mbi wɨ̂ʼ yɨ́?

⁹ Yê kʉ jala ó, bɛ́ma ó bɛ́máa e tâŋ mɔnɨ́ ɨ́ buo buo, kab míndyêbndyéb!»

¹⁰ Yésʉs ntɔ̂ʼ gʉ́ǎ sá bé á lwibla páʼ nyɔ́ɔ́ yɨ́. Nye ntɔ̂ʼ dî e bé ó: «Bɨ̌n bá ntɨ́ʼ mʉ́má nyâʼ ɨ́ yé? Nyɨ́ sâ mé sá dí ɨ́ buú mbɨa yɨ́.

¹¹ Ebě, bɨ̌n e baántéʼenteʼe o bʉ̂r ó dí ɨ́ jɔʼ yɨ́yɛ̂h. Mɨná bɨɛ bé ákóʼó di gá jɔʼ yɨ́yɛ̂h.

¹² Jɔʼ nyê sʉ mé múló ménɨ̌ ɨ́ nyʉ̂l yɨ́, nye sá nó ó ɨ́ lɔ̌b dɨlá yâm.

¹³ Mě lɛ́ɛ́ bɨ́n lɨ́ otyeetye ó, súm yɨ́yɛ̂h bé ngá túnǒ Mbɨambɨa Lɔ́ɔ́ wɨ̂ʼ ɨ́ sí yɨ̂ʼ yɨ́yɛ̂h yɨ́, syɛ́ɛla mʉ́má nyâʼ sá yɨ́, yé ólɛ́ɔɔ ntémé. Bʉr, bé ósímsa nyé tɨ̂.»

Yʉ́das lɨ́ ekpɛl ébɛ́mǎ Yésʉs kwá ojwɨ́ɨ o mpáh Nzyɛ̌m

¹⁴ Nó ó, nyʉ́ʉ́ mpʉ́n ɨ́ sɔ́má bʉ̂r kám le obá á be e díe ó, Yʉ́das Iskariôt nyá, á nze tô kwá ojwɨ́ɨ o mpáh Nzyɛ̌m.

¹⁵ Nye ó: «Bɨ̌n bé ódwe mé yé, mé bɛ́má bɨ́n Yésʉs nó?» Bé ntɔ̂ʼ kɛʼ nyé minzaŋ mí mɔnɨ́ mekám mélɛ̂l.

¹⁶ Táare ɨ́ jɔʼ yaá, nye ntɔ̂ʼ sáǎ mpǎŋ jɔʼ ébɛ́ma nyê.

Nkomló méde mé Páska

¹⁷ Ɨ́ móhó ésóʼ é nzɔ́ɔ bé á de biblêr bi dí abe e levure bí nyɨ́, ompʉ́n mé Yésʉs nzě sîhlě bǎʼ e né, bê nzě lɛ́ɛ ó: «Mede mé Páska gó ngá de má, gǒ kpɛ̌l ó, bɨ̌h jámaa go mǎ wó?»

¹⁸ Nye nzě yala e bé ó: «Tóʼ gá ɨ́ nkana kwá nyʉ́ʉ́ mʉ̂r. Bɨ̌n a lɛ́ɛ́ e né ó: “Lɛ̂ʼla lɛ́ɛ́ ó, jɔʼ yé, yé mû ó kúno epyâl. Nó ó, bé le ompʉ́n bé, bé ónzě bwal nzɔ́ɔ Páska ó kwá nyǒ.”»

¹⁹ Ompʉ́n bé ntɔ̂ʼ sâ mpʉ̌ Yésʉs á lɛ́ɛ bé yɨ́. Bê nzě jâm méde mé Páska.

²⁰ Ɨ́ bíí kʉ̌ʼ nɛ́ɛ: Yésʉs, bé le ompʉ́n kám le obá bê nzě diŋɔɔ sí.

²¹ Jɔʼ bé á be, bé mû lɨ́ ede yɨ́, Yésʉs ntɔ̂ʼ lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, mʉr ngwár ɨ́ sɔ́má yɨ́n óbɛ́ma mê.»

²² Nyʉ̂l ntɔ̂ʼ tyɛʼ bê. Bê nzě gɔ́na le edî nyé mʉr ngúngwár ó: «Dâ ɛ̌, yé abe mê, yé abe nó?»

²³ Nye ntɔ̂ʼ yala e bé ó: «Yé ó mʉr bɨ́h e nê twǎr épulo ɨ́ sʉ́á gwár nyá. Nyɨɛ ó ngá bɛ́ma mê.

²⁴ Yé ó nó. Mwân mé Mʉr ódwě mpʉ yé á boo be cɛmá ɨ́ lɔ̌b wé yɨ́. Sâ gwár, nkoó, nye ó e mʉr ngá bɛ́ma Mwân mé Mʉr nyá! Yé á gwa mbɨa mʉr waá ó, mpa nye á bé abyɛ̂l!»

²⁵ Nó ó, Yʉ́das, mʉr á be lɨ́ edǐ bɛ́ma nyé nyá, á nze lɛ́ɛ e né ó: «Lɛ̂ʼla, abe mɛ̂m da! Yé abe nó?» Nye ntɔ̂ʼ yala e né ó: «Yé ó gó mʉr tɨ̂ʼ dí sí lɛ́ɛ̌ nɨ̌.»

Mede Tî Yésʉs lɨ́ edwe ómpʉ́n bé má

²⁶ Ɨ́ mpʉ bé á be, bé mû lɨ́ ede yɨ́, Yésʉs ntɔ̂ʼ nʉǎ blêr, dwě Nzyɛ̌m nzyǒo, pɛ̂ʼ yé bipêh, dwe ómpʉ́n byǎ. Nye ó: «Nʉaa gâ. Bɨ̌n a dê. Nyʉ̂l nyǎm ó nyɨ̂.»

²⁷ Píe tɨ̂, nye ntɔ̂ʼ nʉǎ bélé ményoʼ mé rezɛ̂ŋ, dwě Nzyɛ̌m nzyǒo, ntɔ̂ʼ dwe bé yǎ. Nye ó: «Déʼ gâ, bɨ̌n óbɛ̂h!»

²⁸ Ebě, metié mâm ó mâ, metié mû lɨ́ eswɨɨ lɨ́ esú ó, Nzyɛ̌m tyélɨɨ saá páʼ nyɔ́ɔ́ le bʉr ɨ́ buo buo má. Nyě tyél nyé ó, nye nkʉ̂ pɛʼ bé bibaa bí ébébe byɔ́ɔ́.

²⁹ Me lɨ́ elɛ́ɛ bɨ́n ó, me ákǎ báʼǎ de ményoʼ mâ, táare ɨ́ báánâ, tó pyâl ɨ́ jɔʼ mɨ́ná ngá kǎ de gá maá medwân ɨ́ sí mé Sɔ́ŋ wǎm yɨ́.

³⁰ Bê nzě dyɛɛ méjéme méswɨ̂ʼlʉ. Bê nzě mɔǎ sûm yaá, tóŋɔɔ lɨ́ Ecwɨ́ʼ lé ólivier.

³¹ Yésʉs nzě lɛ́ɛ e bé ó: «Me óbe ɨ́ pum wɨ̂ʼ mûh ó, ebɔ̌ʼ lé óbɨma bɨ́n bɨ́bɛ̂h ɨ́ miléme lɨ́, ebě, yê cɛmá ó: Me ójʉ̂ pála binteme; ekul e bínteme laá, lé omyamǎ dwǐʼ e dwǐʼ.

³² Sâ gwár, ɨ́ jɔʼ mé ngá pah yɨ́, me ósámle, tó bóno bɨ́n ɨ́ sí Galilê.»

³³ Pétrus, nye e né ó: «Damá jóʼǒ lɔ̌b gô, wé óbɨma bʉ̂r bɨ́bɛ̂h ɨ́ miléme le esâ ó, bé sâʼ ebébe, mɛm, me ákóʼó bɨm ébɔ̌ʼ.»

³⁴ Nó ó Yésʉs á lɛ́ɛ e né ó: «Me lɨ́ elɛ́ɛ gó lɨ́ otyeetye ó, gua, ɨ́ pum wɨ̂, njʉ́m kúo apǎ kwâʼ, go ókɛ́la mé nzɔʼ lɛ̂l.»

³⁵ Pétrus ntɔ̂ʼ lɛ́ɛ e né ó: «Yé damá pyâl mé ó, mɨná e go dwêʼ sɔ́má, me ányamlě kɛ́la gô.» Bʉ́ʉ́ bɨ́bɛ̂h ntémé, bé á lwib ó nó.

Yésʉs lɨ́ ejɨʼla ɨ́ Gétsémane

³⁶ Píe tɨ̂, Yésʉs nzě tô le ompʉ́n bé gúmó dí ejébɔɔ ó, «Gétsémane» yɨ́. Yésʉs, nye e bé ó: «Diʼee gá wâʼ sí, jɔʼ mé dína lɨ́ etó jɨʼla e Nzyɛ̌m yɨ́!»

³⁷ Nó nyé á nze jébe Pétrus ndu e bwán mé Zebedê obá, bé e boo nɔ́ɔ́ ntɔ̂ʼ tô. Nyʉ̂l mé Yésʉs ntɔ̂ʼ tyɛʼ. Nye nzě syɛ̌l bá.

³⁸ Nye ó: «Lémé wâm, wê le ebúʼ, mpʉ̌ sá lɛ́ɛ́, me ópuro e tɨ̂. Diʼee gá wâʼ lɨ́ emo e me. Diʼee gá ɨ́ doho.»

³⁹ Nye nzě bá tô dóló, ntɔ̂ʼ kúrwo sí, píʼe mpóm ɨ́ bibwǎh, nzě jɨʼla e Nzyɛ̌m. Nye e né ó: «Dâ ɛ̌, yé óbána nó, sáʼ ó me l'ayɨ́ bɔma e mitúú mî. Sâ gwár, yé díʼee, abě mpʉ mé dí ekpɛl yɨ́, njɨ mpʉ gó dí ekpɛl yɨ́.»

⁴⁰ Nye nzě gbɔlwa sí, tô nko ómpʉ́n bé, bé á be yɨ́, tó kœb bé ɨ́ bijô. Nye e Pétrus ó: «Nzê yé abána gó lɨ́ edi ɨ́ doho tâŋ ewala egwár e me ɛ̌?

⁴¹ Diʼee gá ɨ́ mpʉ̂n. Jɨʼlaa gâ, bɨ̌n ámû jaá bóblɔɔ, bɨ̌n ntɔ̂ʼ duma. Sísǐm mʉ̂r, wé damá gwɨ̂m ésâ bísyɛ́ɛla bimpâ, bipúno bíɛ, byé ɨ́ tyɛʼ.»

⁴² Nye ntɔ̂ʼ báʼǎ tô ɨ́ jɔʼ mbá, tó jɨʼla e Nzyɛ̌m. Nye e né ó: «Dâ ɛ̌, yé óbe, abána ó, mitúú mîʼ láŋaa me, me l'abɔma e myé nó, sáʼ mpʉ̌ gwɨ́má yô dí yɨ́.»

⁴³ Nye nzě báʼǎ búla, tó kœb bé ɨ́ bijô, ebě, mîh, mé á be ɨ́ buú ntie bê.

⁴⁴ Jɔʼ yaá ó nyé á líʼe bê, nzě báʼǎ tó jɨʼla ɨ́ jɔʼ lɛ̂l, lɨ̂lɛɛ̌ njɨ mekǎn mempwár.

⁴⁵ Nó nyé á ka tô nko ómpʉ́n bé, bé á be yɨ́. Nye ó: «Nzê bɨ̌n bɨɛ bé ójaá kǎ didi ó, njɨ ɨ́ bijô le egbala ɨ́ jɔʼ yɨ́yɛ̂h ɛ̌? Jɔʼ, yé múo nzě kúnwo. Mwân mé Mʉr, nyɨ́ bɛ́mɔɔ kwá osyɛ̂l o mísyóm.

⁴⁶ Gbɔlwaa gá sí. Ncʉ̂ʼ gâ. Jwɛ́ʼɛ́ɛ́ gâ. Mʉr bɛ́má mé nyá ó dí enzě nɨ̌!»

Yésʉs, nyɨ́ mɛ́rɔɔ

⁴⁷ Yésʉs dína lɨ́ elwib nó nɛ́ɛ: Yʉ́das nzě pyâl le entumo e bʉ̂r. (Yʉ́das á be ó mʉr ngwár lɨ́ ompʉ́n kám le obá mé Yésʉs.) Bʉr o b'á nze bá, bé á nze ó, bâʼ, le opasoŋ; bʉ́ʉ́, e mimbɨ́ŋ. Ojwɨ́ɨ o mpáh Nzyɛ̌m le otɔ́má bʉ̂r o b'Ɨ́zraɛ̂l ó b'á lómo bê.

⁴⁸ Yʉ́das, mʉr á bɛ́ma Yésʉs nyá, á si boo tɨ́e bʉr baá ó: «Bɨ̌n bé ódweʼe nyé ó, mbi wɨ̂: mʉr bɨ́n ngá bee mé lɨ́ edû koo ékœ́h lé nyá, nye ó nɨ̌. Mɛ́rɨ́ɨ́ gá nye.»

⁴⁹ Lě Yʉ́das á kʉ pyâl, le nyé á sîhle ntémé bǎʼ e Yésʉs, ntɔ̂ʼ lɛ́ɛ ó: «Lɛ̂ʼla, me lɨ́ ebâʼ e go!» Nye ntɔ̂ʼ dû koo ékœ́h lé ɨ́ swííá.

⁵⁰ Nó ó Yésʉs á nze yala e né ó: «Só wǎm, sá gô nze sá yɨ́, kaá sâ yê.» Bʉr baá ntɔ̂ʼ sîhlě nkǒ Yésʉs á be yɨ́, mɛ́rɔɔ nyê.

⁵¹ Nyʉ́ʉ́ mʉ̂r á be bé e boo Yésʉs sɔ́má nyá, nzě gœ̂m pɛl yé lɨ́ ebɔ́m, tíʼe syɛ̂l mesâ mé njwɨ́ɨ opara egwǎl ɨ́ pyâ.

⁵² Yésʉs ntɔ̂ʼ lɛ́ɛ e né ó: «Swamaǎ pɛl yô lɨ́ ebɔ́m, ebě, baá bɨ́bɛ̂h dí elwímla le opasoŋ bá, bé ójʉ́ŋɔɔ ntémé ó, le opasoŋ.

⁵³ Nzê go bé agʉ́a ó, mé jɨʼla e Sɔ́ŋ wǎm nó, nye ólómlo mé beéngeles otɔ́ɔ́sin kám le obá ɛ̌?

⁵⁴ Syɛ́ɛla yɨ̂, yɨ́ lóŋlǎ sá dí micɛmá ɨ́ Mekaná mé Nzyɛ̌m yɨ́. Yê cɛmá ó, yé ɨ́ jala le esyɛ́ɛ nó.»

⁵⁵ Jɔʼ yaá ó Yésʉs á nze lɛ́ɛ le sɔ́má bʉ̂r yaá ó: «Bɨ́n pa nze mɛ́r mé le opasoŋ le mimbɨ́ŋ nó, nzê bɨ̂n jóʼó ó, me ó nzilngǎn? Me á bɨbe ó, dʉ́ó lɨ́lɛ̂h ndîndǐl tʉ́ŋlʉ̌ mpáh Nzyɛ̌m, lɨ́ elɛ̂ʼle bʉ̂r. Bɨ̌n bé á bé amɛ̂r mê.

⁵⁶ Nó ó, syɛ́ɛla yɨ̂, yê ka syɛ́ɛ́ ó mpʉ ógwíha o mílɔ̌b bé á cɛma ó, yé díraa yɨ́.» Píe tɨ̂, ompʉ́n bɨ́bɛ̂h, bé ntɔ̂ʼ líʼe nyê, sîl ékpɛ́ɔɔ.

Yésʉs ɨ́ mpǒm bʉ̌m nɨ́nɨ́ɨ́

⁵⁷ Bʉr o b'á mɛ̂r Yésʉs bá, bê nzě tóŋɔɔ e né kwá mé Kayɨáfa, njwɨ́ɨ opara. Bʉ́ʉ́ ólɛ̂ʼla o métié le otɔ́má bʉ̂r o b'Ɨ́zraɛ̂l, bé ntɔ̂ʼ gwɨ̂hlǎ sûm yaá.

⁵⁸ Pétrus á be ó lɨ́ edû nyé ká ká píhe, nze ɨ́ nze nze, ntɔ̂ʼ nî tʉ́ŋlʉ̌ ebɛhɛɛ mé njwɨ́ɨ opara, ntɔ̂ʼ di sí bǎʼ e bisója gúmo gwár, lɨ́ esáa ébeě mpʉ yé ngá sûʼla yɨ́.

⁵⁹ Ojwɨ́ɨ o mpáh Nzyɛ̌m le bʉ́ʉ́ bʉ̂r ó bʉ̌m nɨ́nɨ́ɨ́, bé á be ó lɨ́ esáa ékǎn bé búʼó Yésʉs lɔ̌b e tɨ̂ʼ lɨ́, bé nkʉ̂ jʉ̂ nyê.

⁶⁰ Sâ gwár, bé á bé akœb lê. Bʉ́ʉ́ bʉ̂r ɨ́ buo buo, bé á si nze lɨ́ elɨlaʼ nyé milɔ̌b. Píe tɨ̂ʼ ó bé á ka kœb bʉr obá bé á lɨ̂lɛɛ ó:

⁶¹ «Nye á lɛ́ɛ ó, nye ógbɛ́ɛ mpáh Nzyɛ̌m, ntɔ̂ʼ sumo nyaá swîh njɨ ɨ́ melú mélɛ̂l.»

⁶² Nó ó njwɨ́ɨ opara á nze mɔa sí, dî e né ó: «Gó ayala? Wáǎ mbǐ purá bʉ̂r bâʼ dí epur gó wɨ̂?»

⁶³ Yésʉs á jaa di ó, njɨ ɨ́ mes. Nó ó njwɨ́ɨ opara á nze lɛ́ɛ e né ó: «Me lɨ́ entɛŋ gó minkâl ɨ́ díé mé Nzyɛ̌m dí kublakúbla nyá ó, go lɛ́yɨɨ bɨ̌h, nkʉ̂ go ó dí Mʉ̌r Nzyɛ̌m á lœm múló mé jwɨ́ɨ nyá, mʉr dí Mwân mé Nzyɛ̌m nyá?»

⁶⁴ Yésʉs ntɔ̂ʼ yala e né ó: «Yé ó go mʉr tɨ̂ʼ dí sí lɛ́ɛ̌ nɨ̌. Me lɨ́ elɛ́ɛ bɨ́n, táare ɨ́ báánâ, bɨ̌n bé óbee Mwân mé Mʉr, ndîndǐl ɨ́ páʼ mbó éjʉ́m mé Nzyɛ̌m nkul nyɨnyɛ̂h. Bɨ̌n bé óbee nyé lɨ́ enze, témé dwiné.»

⁶⁵ Nó ó njwɨ́ɨ opara á nze nya kán wé. Nye e né ó: «Nyɨ́ sâ Nzyɛ̌m nkěh! Mɨná bé akǎ báʼǎ sáa gá bʉr o ká nwâhle nyé bá! Bɨ̌n bɨ́ jóʼo ɨ́ báánâʼ mpʉ nyé dí esâ Nzyɛ̌m nkěh yɨ́.

⁶⁶ Bɨ̌n nyɨɛ́ pahlě lɔ̌b wɨ̂ʼ nyá?» Nó ó bʉ̂r, bé á lɛ́ɛ ó: «Nye ɨ́ jala le ejʉ́ŋɔɔ.»

⁶⁷ Nó ó bʉ́ʉ́ bʉ̂r ɨ́ sɔ́má yɔ́ɔ́ bé á nze syɛɛ nye metyéelé ɨ́ mîh le etû nyé bikúra. Bʉ́ʉ́, bé á ŋmɨŋmɛ̂h ó nye mempɛ̂h.

⁶⁸ Bé e né ó: «Krîst, twóóláá bɨ́h díé é mʉ̂r ŋmɛ́h gó nyá.»

Pétrus lɨ́ ekɛ́lǎ Yésʉs

⁶⁹ Pétrus dína ndîndǐl ɨ́ kʉ̌l lɨ́ ebɛhɛɛ nɛ́ɛ: nyʉ́ʉ́ mʉ́má á séa e njwɨ́ɨ opara nyá, nzě pyâl gúmó nyé á be yɨ́, nzě lɛ́ɛ ó: «Go, go ntémé, go á be ó, bɨ̌n e Yésʉs, mʉr Galilê.»

⁷⁰ Pétrus ntɔ̂ʼ kɛ́la tɨ̂ʼ ɨ́ mpǒm bʉr bɨ́bɛ̂h. Nye e né ó: «Mé agʉ́ǎ sá gó dí ekpɛl élɛ́ɛ yɨ́.»

⁷¹ Mpʉ nyé á be, nye mû lɨ́ etô lɨ́ ebé é kóʼ mbɛ̌r mé pára waá yɨ́, nyʉ́ʉ́ syɛ̂l mesâ ntémé á baʼa bee nye nyá, ntɔ̂ʼ lɛ́ɛ e baá bé e boo nɔ́ɔ́ bé á be bá ó: «Mʉr nyâ, bé e boo Yésʉs mʉr Nazarɛ̂t ó b'á bɨbe.»

⁷² Nye ntémé ntɔ̂ʼ báʼǎ kɛ́la le entaa mínkâl. Nye e né ó: «Mé agʉ́a mʉ̂r nɨ̌.»

⁷³ Abea nɛ́ɛ: bʉr o b'á be tɨ̂ʼ bá, ntɔ̂ʼ báʼǎ lɛ́ɔɔ̌ Pétrus ó: «Yê tyeetye ó, go ó mʉr sɔ́má yɔ́ɔ́, ebě, etyél lô, lé lɨ́ egwîh mbi mʉ̂r gô.»

⁷⁴ Nó ó Pétrus á nze baʼa kɛ́la. Nye e bé ó: «Nzyɛ̌m ntɨ́ʼɨɨ me, yé bé mě lɛ́ɛ́ ó bibɛr nó! Mé abá gʉ́a mʉ̂r waá!» Tyé e tyé yaá, njʉ́m kúo nzě kwâʼ.

⁷⁵ Jɔʼ yaá ó Pétrus á símsa sá Yésʉs á lɛ́ɛ e né ó: «Njʉ́m kúo dína apǎ kwâʼ, go ókɛ́la mé nzɔʼ lɛ̂l» yɨ́. Nye nzě tô kʉ̌l, ntɔ̂ʼ gɔ́na le ejɨ ɨ́ buo buo.