Mataos 23 - Kálar Nzyɛ̌m : Ejwán é Sáá

Yésʉs lɨ́ enkáŋla le olɛ̂ʼla o métié, bé le oFarizyɛ̂n

¹ Nó ó Yésʉs á nze lwib e mentumo me bʉ̂r, bé le ompʉ́n bé ó:

² «Olɛ̂ʼla o métié, bé le oFarizyɛ̂n, bé ó dí elɛ̂ʼle, píe koo mé Moyɨ̂z.

³ Sáʼ gá mpʉ bé dí elɛ́ɛ bɨ́n yɨ́. Baʼlaa gá milɛ́ʼlá myaá. Sâ gwár, adû gá bisyɛ́ɛla byɔ́ɔ́, ebě, bé lɨ́ elɛ́ɛ ó, lɛ́yɨ́ɨ, asâ.

⁴ Bé lɨ́ ekâʼ mímbeʼ médile, gbáŋɔɔ bʉ̂r myǎ ɨ́ mikoo. Sâ gwár, bé bʉr o tɨ̂, bé agwɨ̂m ékúna e myê, damá jóʼo ó e diné gwár.

⁵ Bé lɨ́ esâ bísyɛ́ɛla byɔ́ɔ́ bíbyɛ̂h ó, bʉr béyɨɨ byê. Nó ntémé ó bé dí eběʼ pɔ̌b métié mé Nzyɛ̌m yɔ́ɔ́ yɨ́, le edyɛɛ médumo míkán myɔ́ɔ́.

⁶ Bé buú kpɛl ó, bidiá bí ésôʼ ɨ́ bidína le bidiá bí ésôʼ bi dí ɨ́ mempáh mínjɨʼla bí.

⁷ Bé kpɨkpɛl ntémé ó, bʉr bɨ́baraa e bé le dúu ɨ́ buo buo ɨ́ bipátele le ejɨjébe bé ó: “Lɛ̂ʼlǎ nɨ́nɨ́ɨ́”.

⁸ Mʉr ngwár ɨ́ sɔ́má yɨ́n sá abá bîr ó, bé jébaa nye “Rabbi”, ebě, lɛ̂ʼla wɨ́n, nye ó ngwár. Bɨ̌n bɨ́bɛ̂h, bé ó bɨ́ɔɔ́ e bɨ́ɔɔ́.

⁹ Ajébe gá ntémé nyʉ́ʉ́ mʉ̂r ó: “Sɔ́ŋ wǎm”, ebě, sɔ́ŋ wɨ́n, nye ó ngwár, njɨ waá dí ɨ́ jʉ́o kʉ́ nyá.

¹⁰ Abîr gá ó, bé jébaa bɨ̌n “Ojwɨ́ɨ”, ebě, njwɨ́ɨ wɨ́n, nye ó njɨ ngwár: Mʉ̌r Nzyɛ̌m á lœm múló mé jwɨ́ɨ nyá.

¹¹ Mʉr dí elaa bʉ́ʉ́ ɨ́ mpwaʼ dǐ nyá, nye ɨ́ jala le ebe bɨ́n ó, syɛ̂l mesâ.

¹² Mʉr nkɛ́ɛ́ nyʉ̂l nyá, ósulɔɔ sí. Waá súl nyʉ̂l sí nyá, óbɨ́rɔɔ kʉ́.

^13-14 «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ ela bʉ̂r nzɨ̌ dí etô ɨ́ Mpóʼo mé Dâ nyɨ́. Bɨ̌n bʉr o tɨ̂, bɨ̌n bé adyɛ̂l tɨ̂. Bɨ̌n bé abîr ntémé ó, baá o dí esuo édyɛ̂l tɨ̂ʼ bá, bé dyɛ́lɨɨ.

¹⁵ «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ entaa mâŋ, laa ɨ́ sí yɨ́yɛ̂h, bɨ̌n nkʉ̂ dulǒ damá jóʼo mʉ̂r ngwár. Tó kœb ó, ɨ́ jɔʼ mʉ̂r waá mû sí nî ɨ́ búʼó yɨ́n yɨ́, bɨ̌n bɨ́ dwir nyé mʉr dí ejala le etô ɨ́ bɨ́ siʼe nyá, ntaa bɨ́n bʉr o tɨ̂ʼ nzɔʼ bá.

¹⁶ «Nkoó, nye ó e bɨ̌n, baántím dí etɨ́e bʉ́ʉ́ báántím bá! Bɨ̌n bɨɛ lɨ́lɛ́ɛ́ ó: mʉ̂r gbá díé é mpáh Nzyɛ̌m ɨ́ minkâl nó, minkâl myaá, myé abe e lɔ̌b. Nyé ká gbâ díé é gʉ̂l dí ɨ́ mpáh Nzyɛ̌m yɨ́ ɨ́ minkâl nɛ́ɛ: minkâl myaá, myé ó myaá nyé jálá le elóŋlo mí.

¹⁷ Bɨ̌n bigʉ̌ bi dí baántím bá! Yé yɨ́ɛ dí entaa yɨ́? Nzê gʉ̂l ɛ̌? Nzê mpáh Nzyɛ̌m dí esâ ó, gʉ̂l yaá, yé díʼee sá dí ti yɨ́ ɛ́?

¹⁸ Bɨ̌n bé lɨ́ elɛ́ɛ ntémé ó: “Mʉ̂r gbá díé lé alatâr ɨ́ minkâl nó, minkâl myaá, myé abe e lɔ̌b. Nyé ká gbâ díé é ndwéá dí kɛlá tɨ̂ʼ kʉ́ wɨ́ ɨ́ minkâl nɛ́ɛ: minkâl myaá, myé ó myaá nyé jálá le elóŋlo mí.”

¹⁹ Bɨ̌n baántím bâ! Yê yé ɛ́? Yé yɨ́ɛ dí entaa yɨ́? Nzê ndwéá ɛ̌? Nzê alatâr dí esâ ó, ndwéá waá díʼee sá dí ti yɨ́ ɛ́?

²⁰ Mʉr nyɨnyɛ̂h dí ekáale le alatâr nyá, nyě káálé ó, le alatâr waá ndu e sá yɨ́yɛ̂h dí kɛlá tɨ̂ʼ kʉ́ yɨ́.

²¹ Mʉr nyɨnyɛ̂h dí egbâ díé é mpáh Nzyɛ̌m ɨ́ minkâl nyá, nyě gbá ɨ́ minkâl ntémé ó díé mé Nzyɛ̌m, mʉr pá di tɨ̂ʼ tʉ́ŋlʉ̌ nyá.

²² Mʉr nyɨnyɛ̂h dí egbâ díé é jʉ́o ɨ́ minkâl nyá, nyě gbá ɨ́ minkâl ntémé ó díé é mécwɨ́ɨ́ mé jwɨ́ɨ dí gʉ̂ʼ má, bé e Nzyɛ̌m, mʉr pá di tɨ̂ʼ nyá.

²³ «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ edwě Nzyɛ̌m nkɔb kám: ká étyéelé, mpumó ájɨ́mɨ́ le ntáma. Tyé yaá yɨ́yɛ̂h, bɨ̌n bé lɨ́ epyêh métié me dí ɨ́ bwaʼ má. Mé ó dí: edû kʉ̌ tyen dí tîtyěl wɨ́, ecwɨ́a e bʉr, le edira ménkɛ̌ʼ mɨ́n. Yé á gwa jala ɨ́ páʼ wɨ́n ó, bɨ̌n lóŋlaa bisyɛ́ɛla bíbyɛ̂h: le byaá bɨ́n dí asâ, le byaá bɨ́n dí esɨsâ bí.

²⁴ Baántím o dí etɨ́e bʉ́ʉ́ báántím nzɨ̌ bâ! Bɨ̌n bé lɨ́ esyɛ̂l óncwii ɨ́ menyoʼ ó, bɨ̌n bé ámû jaá mine bê. Sâ gwár, bɨ̌n bɨɛ lɨ́ emine óchameau ontinɨ̂ ɨ́ jɔʼ bɨ́n dí ebɛble yɨ́!

²⁵ «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ esohlo bísʉ́á le bikɔ̂b nko míkoo. Tó kœb ó, bɨ̌n bí kaale bísʉ́á byaá e bisá bɨ́n á pa dɛn bí, mpʉ bɨ́n dí, agʉ́a émâr míléme yɨ́.

²⁶ Baántím bé óFarizyɛ̂n! Tááráá ényɛɛ́ sohlo gá sá ésôʼ ó, mǒ béle, tó pyâl ɨ́ jɔ̌ʼ kʉ̌l ngá di, yé mû ɨ́ púúm yɨ́.

²⁷ «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n nwɨɨla ó e mesoo me dí kɔ́ná, mindubá le epɛ́m má. Mé lɨ́ enyɨ̂n ɨ́ mbɨa mbɨa ɨ́ páʼ kʉ̌l. Tó kœb ó, mé e bidwehé bi bʉ̂r tɨ̂ʼ tʉ́ŋlʉ̌ ndu e mimbi bílœ̌ʼ mímyɛ̂h.

²⁸ Bɨ̌n bʉr o tɨ̂ʼ, ɨ́ míh mé bʉ̂r, bɨ̌n nyɨ́n ó mpʉ ótîtyěl o bʉ̂r. Tó kœb ó, milémé mín, myê njɨ ó, bɨ̌n sâʼ mikóo le entaa métié mé Nzyɛ̌m.

²⁹ «Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ ekɔ̂n mésoo ógwíha o mílɔ̌b bé á debe tɨ̂ʼ má, le egbâ ójɔɔ́ ɨ́ mesoo mé ótîtyěl o bʉ̂r.

³⁰ Bɨ̌n lɛ́ɛ́ ntémé ó: “Yé bé bɨ̌h bé á be ó ɨ́ jɔʼ bímpám bíh, byé á be yɨ́ nó, mpa bɨ̌h bé á bé anʉa ntœ́b ɨ́ bisyɛ́ɛla byɔ́ɔ́, ɨ́ jɔʼ bé á jʉ̂jʉ ogwíha o mílɔ̌b mé Nzyɛ̌m yɨ́.”

³¹ Nó bɨ̌n bɨɛ mû ó lɨ́ eboʼlo bɨ́n bʉr o tɨ̂ʼ ó, bɨ̌n ó dí bwán bʉ̂r o b'á jʉ̂ ogwíha o mílɔ̌b mé Nzyɛ̌m bá.

³² Yé bé nó wá, tóʼ gá dóló le elóŋlo mísyóm bímpám bín, byé á boo sɨ̂sa mí!

³³ Bɨ̌n, kúl ónyʉ́a! Bɨ̌n, bigúrokɔɔ bî! Nzê yé óbána bɨ́n ó, bɨ̌n kɨ́ŋɨɨ tíʼá mílɔ̌b ngá tyen bʉ̂r ɨ́ bɨ́ siʼe wɨ́ ɛ́?

³⁴ Sá tɨ̂ʼ ó mé dí elómlo bɨ́n ogwíha o mílɔ̌b, ndu e mipɨpɨ́ʼ mí bʉ̂r le olɛ̂ʼla yɨ́. Bâʼ bʉ̂r, bɨ̌n bé ójʉ̂ ó jʉ́ʼóo. Bʉ́ʉ́, bɨ̌n bé óbomlo ɨ́ bikolôs. Bʉ́ʉ́ ntémé, bɨ̌n bé óŋmɛ̂h míngáhá ɨ́ mempáh mínjɨʼla mɨ́n. Bɨ̌n bé ótíble bé bínkana e bínkana byɛ̂h.

³⁵ Bɨ̌n bé ótô le esâ nó, tó pyâl ɨ́ jɔʼ métié mɨ́mɛ̂h me bʉ̂r o b'á dwe, akúnwo e mpɨŋ bá, mé óswɨɨ ɨ́ milʉ́ mín, táare ɨ́ metié mé Ábɛl, tó pyâl ɨ́ maá mé Zacharie, mwân mé Barákia, waá bɨ́n á jʉ̂ páʼ mpáh Nzyɛ̌m le alatâr nyá.

³⁶ Mě lɛ́ɛ́ bɨ́n lɨ́ otyeetye ó, sâ yaá yɨ́yɛ̂h, yé óswɨɨ ó, ɨ́ milʉ́ mí bʉ̂r ó myǎ wɨ̂!

³⁷ «Yerʉ́zalɛm, Yerʉ́zalɛm, gua mʉr dí ejʉ̂ ógwíha o mílɔ̌b le elúmo baá Nzyɛ̌m dí elómlo gó bá mekóʼ nyá! Nzɔʼ ntíá mé á be lɨ́ egwɨ̂m ésyɛŋ bwán bô mpʉ ábyɛɛ́-kúo dí esyɛŋ bwán bé sí mempabaá mé yɨ́? Bɨ̌n bɨɛ bɨbené benáa!

³⁸ Jwɛ́ʼɛ́ɛ́ gâ, mbɛ̌r wɨ́n, wé ólîʼ gumo.

³⁹ Ebě, me lɨ́ elɛ́ɛ bɨ́n ó: bɨ̌n bé ákóʼó kǎ báʼǎ bee mê, tó pyâl ɨ́ jɔʼ bɨ́n ngá lɛ́ɛ ó: “Mɨná gúmlaa gá waá dí enze e díé mé Dâ nyá!”»