Markus 7 - Kálar Nzyɛ̌m : Ejwán é Sáá

OFarizyɛ̂n le metum me myâ

¹ OFarizyɛ̂n le bʉ́ʉ́ ólɛ̂ʼla o métié bé á duhǒ Yerʉ́zalɛm bá, nzě swálɔɔ̌ gúmó Yésʉs á be yɨ́.

² Nó ó bé á nze bee bʉ́ʉ́ ómpʉ́n bé lɨ́ ede e mebô “e mpir”, ebě, bé á bé ajwɨɨ mé mpʉ métum mé yébé óYúden dí elɛ̂ʼle yɨ́.

³ Tó kœb ó, oFarizyɛ̂n ndu e bʉ́ʉ́ óYúden bɨ́bɛ̂h, bé abe lɨ́ ede, apǎ nyɛɛ́ jwɨɨ mébô mbɨ̂mbɨá. Bé sá nó ó, lɨ́ okán bé dí ekánwo métum me myâ bímpám byɔ́ɔ́, byé á líʼe má.

⁴ Jɔʼ bé búlá lɨ́ ebɨ̌m é pátele lɨ́ etó bwâm bísɔ̂ʼ yɨ́, bé abe e nkul ede, apǎ jwɨɨ mébô. OFarizyɛ̂n bɨɛ, bé lɨ́ ebaʼle mʉ́ʉ́ métum meswîh mpʉ maá me dí elɛ̂ʼlě mpʉ mʉ̂r jálá le esohlo mémpéle, mikâʼ, le mempɨ̌ bínkóho mbɨ̂mbɨá yɨ́.

⁵ Nó óFarizyɛ̂n, le olɛ̂ʼla o métié bé á nze dî e Yésʉs ó: «Ompʉ́n bô, bé lɨ́ ebene ébaʼle bíti bímpám gá bíná, byé á líʼe bí ɨ́ yé? Bɨ́ɛ̌ kǎ de méde e mebô e mpir ɨ́ yé?»

⁶ Nó ó Yésʉs á yala e bé ó: «Ngwíha milɔ̌b Ésayie á si gwa kʉ lwib ɨ́ jɔʼ nyé á lɛ́ɛ ó: bɨ̌n bé ó bʉr o míkóo yɨ́. Sâ yaá ó nyé á cɛma ɨ́ lɔ̌b wɨ́n yɨ́. Yê cɛmá ɨ́ Mekaná mé Nzyɛ̌m ó: “Kúl yɨ̂, yé jaá dwé mé kûm ó, njɨ ɨ́ bikonó bí nǔm kʉ̌l. Tó kœb ó, milémé myɔ́ɔ́, myé ɨ́ buú cɛra e me.

⁷ Júú bé dí edwe mé yɨ́, yé ó kwahaá tʉ̂toʼó, ebě, milɛ́ʼlá bé dí edwe bʉ̂r mí, myé jaá duho ó, njɨ ɨ́ metié me bʉ̂r.”

⁸ Bɨ̌n bé lɨ́ ebene métié mé Nzyɛ̌m, bɨbaʼlě sɔ̂ʼ njɨ metum me bʉ̂r.»

⁹ Nó ó Yésʉs á baʼa lɛ́ɛ bé ó: «Bɨ̌n bé ɨ́ buú bene métié mé Nzyɛ̌m. Bɨ̌n jaá bɨbaʼlě sɔ̂ʼ ó, njɨ metum mɨ́n.

¹⁰ Moyɨ̂z á lɛ́ɛ ó: “Dwéʼ sʉ́ŋ e nyʉ̌ŋ dúu.” Nye á lɛ́ɛ ntémé ó: “Mʉ̂r lwɨ́ɨ́ sɔ́ŋ, nkʉ̂ nyɔ̌ŋ nó, mʉr tɨ̂ʼ, nye ɨ́ jala le ejʉ́ŋɔɔ.”

¹¹ Nó bɨ̌n bɨɛ̌ lɨ́lɛ́ʼlé ó, mʉ̂r ólɛ́ɛ e sɔ́ŋ e nyɔ̌ŋ wé ó: “Nkɔb bisá byâm mé á gwa súʼo bɨ̌n e né nyɨ́, nye mû ó kɔrbâŋ.” (Nó yé lɛ́ʼlé ó, “mindwéá mí mpáh Nzyɛ̌m.”)

¹² Nyé ólwǐb mbi waá nó, bɨ̌n bé akpɛl ó, nye súʼaa sɔ́ŋ e nyɔ̌ŋ ɨ́ nzɨ̌ mebi mé maá.

¹³ Mbǐ lɛ́ʼlá nɨ̌ ó dí egbah métié mé Nzyɛ̌m. Bɨ̌n gbɨgbah mé ó, ɨ́ nzɨ̌ milɛ́ʼlá bɨ́n dí edweela mí. Bɨ̌n bé lɨ́ esâ myúú mísyóm mbi waá ɨ́ buo buo.»

Bisá dí ebɛ̂ʼ páʼ mʉr, bé e Nzyɛ̌m bí

¹⁴ Nó ó Yésʉs á baʼa jébe entumo e bʉ̂r. Nye e lé ó: «Jóʼláá gá me, bɨ̌n óbɛ̂h. Bɨ̌n a jóʼló sá mé múo nzě lɛ́ɛ bɨ́n yɨ̂.

^15-16 Sá dí eduhǒ kʉ̌l, nî mʉ̂r ɨ́ nyʉ̂l yɨ́, yé abe e nkul ebɛ̂ʼ páʼ mʉr, bé e Nzyɛ̌m. Yaá dí esâ ó, mʉr, bé e Nzyɛ̌m bɔ́ʼaa yɨ́, yé ó sá dí eduho ɨ́ lémé mʉ̂r tʉ́ŋlʉ̌, pyâl kʉ̌l yɨ́.»

¹⁷ Nó ɨ́ jɔ̌ʼ Yésʉs á duhǒ gúmó bʉ̂r, bé á be yɨ́, nye nzě tó nî mbɛ̌r. Nó ó ómpʉ́n bé, bé á nze dî e né ó, nye pâʼlaa bé kɨkɛna yaá yɨ́.

¹⁸ Nó nyé á lɛ́ɛ e bé ó: «Nzê bɨ̌n dína ó bigʉʼlʉgʉ́ ɛ̌? Nzê bɨ̌n bé agʉ́a ó, ntʉ̌ sá dí eduhǒ kʉ̌l, nî ɨ́ nyʉ̂l mʉr yɨ́, dí elœʼ nyé ɨ́ míh mé Nzyɛ̌m ɛ̌?

¹⁹ Ebě, yé anî nyé ɨ́ léme tʉ́ŋlʉ̌. Yé ní ó ɨ́ mo, kǎ pyâl kʉ̌l.» (Ɨ́ lɔ́ɔ waá, Yésʉs á kpɛl elɛ́ɛ ó, mede mɨ́mɛ̂h, mé mû ó, bɛ̌m deŋɔɔ.)

²⁰ Nó nyé á baʼa lɛ́ɛ e bé ó: «Sá dí eduho ɨ́ nyʉ̂l mʉr yɨ́, yé ó dí ebɛ̂ʼ páʼ mʉr, bé e Nzyɛ̌m.

²¹ Ebě, bibébebébe bíjwɨʼ, byé duho ó ɨ́ lémé mʉ̂r. Byé ó dí: bimolá, díbe, ejwɨ́ɨ́ é bʉ̂r,

²² medyɛ̂n, nzɔ́ɔ́ bísâ, ebébe é léme, mikóo, bimolá nzam le ekomo, nzwíí nkěh, nkɛ́á nyʉ̂l, sɔ́ɔlʉ pɨ̂ʼ.

²³ Bisá bínɨ̌ bíbyɛ̂h, byê duho ó ɨ́ nyʉ̂l mʉr tʉ́ŋlʉ̌, ntɔ̂ʼ sâ ó, nye bɔ́ʼaa e Nzyɛ̌m.»

Mʉmá bikûl lɨ́ ebúʼlǎ Yésʉs

²⁴ Nó ó Yésʉs á nze duhǒ gúmo yaá, nzě tô sí dí bǎʼ e Tîr yɨ́, nzě nî ɨ́ gúú mbɛ̌r. Nye á bé akpɛl ó, mʉr gʉ́ŋaa ó, nye á be ó tɨ̂ʼ tʉ́ŋlʉ̌. Sâ gwár, nye á bé abe e nkul eswab.

²⁵ Nó ó, yé á be ó e mʉma á be e mâ eséhe lé nyá. Mwân wé waá á be ó lɨ́ ejaʼra e sísǐm mélwaʼwo. Nó ó, mʉmá waá ntémé á nze jóʼǒ lɔ́ɔ́ dí edumo e Yésʉs wɨ́. Njóʼá nyé á kʉ jóʼo wé yɨ́, nye ntɔ̂ʼ nzě pyâl gúmó Yésʉs á be yɨ́, nzě bɨʼ mébóó sí ɨ́ mpǒm nyé.

²⁶ Nye á be ó mʉmá bikûl biswîh. Nye á duho ó, nkanǎ Fénikia, ɨ́ sí Sirî. Nye á nze ó, nzě jɨʼla e Yésʉs ó, nye sôʼ eleme lé á be ɨ́ mwân wé lɨ́ yɨ́.

²⁷ Nó ó Yésʉs á nze lɛ́ɛ e né ó: «Bírɨ́ɨ́ bwá ó mbɛ̌r, bé páa nyɛɛ́ de, díle, ebě, yé asiŋa ó, mede me jálá le edweŋɔɔ bwân má, mé dwéŋɔɔ bwá bé ómpyê.»

²⁸ Nó nyé á yala e né ó: «Dâ ɛ̌, yé ó nó. Damá jóʼo nó, ompyé dí ɨ́ téble sí bá, bé dé ó, bitwǐʼ méde bwân dí ekuhlo sí bí.»

²⁹ Nó ó Yésʉs á lɛ́ɛ e né ó: «Ɨ́ yalá yô nɨ̌, búláa. Tóʼ kwár nyǒ. Eleme dí lɨ́ eséhe lô lɨ́, lɨ́ duho!»

³⁰ Nó ó mʉ́má á búla, tô mbɛ̌r wé, tó kœb mwân wé, nye mu ó mbɨ́mbɨá, njáʼ sí ɨ́ joó, eleme lɨ́ɛ, lé osí duho.

Yésʉs lɨ́ etǐʼ ngʉʼ, nye ntémé ánya-emúmó

³¹ Nó ó Yésʉs á baʼa duhǒ sí Tîr, ntɔ̂ʼ tó cɨɨ yaá Sidɔ̂n, nzě báʼǎ sulo lɨ́ ebʉ́m é máŋ mé Galilê, lɨ́ etó ntaǎ sí Dekapôl.

³² Nó ó bé á nze nye e mʉr á be ngʉʼ, báʼǎ be le emúmó nyá. Bê nzě jɨʼla e Yésʉs ó, nye kɛ́lɨɨ nye mebó mé ɨ́ nyʉ̂l, lɨ́ etiʼ nyê.

³³ Nó ó Yésʉs á nze tô e mbêl waá gúmó bʉ́ʉ́ bʉ̂r, bé á be abe yɨ́, ntɔ̂ʼ gbâ nyé mpiné tʉ́ŋlʉ̌ megwǎl, nzě nʉa métyéelé mé, swóolo ɨ́ jɨ́m yé.

³⁴ Nye ntɔ̂ʼ dwɛ̂ʼ kʉ́, sulǎ swɨ̂h, nzě lɛ́ɛ e mʉr waá ó: «Effata.» (Díe laá, lé lɨ́ etyɛn ó: «Bɔ́áa.»)

³⁵ Tyé e tyé yaá, megwǎl me mʉ̂r waá ntɔ̂ʼ bɔ́a. Jɨ̂m yé ntémé, nzě kɔa. Nye ntɔ̂ʼ táare élwǐb mbɨ̂mbɨá.

³⁶ Yésʉs nzě gbâ bé mpéné ó, bé l'alɛ́ɛ mʉ̂r swîh lɔ́ɔ waá. Damá jóʼo nó, bím nyɨɛ á lɛ́ɛ ó, bé ayɨ́ lɛ́ɛ yɨ́, bím yaá ntémé ó bé á to le elɨ̂lɛɛ̌ lɔ́ɔ waá yɨ́.

³⁷ Bé á be ɨ́ buú kâm bísyɛ́ɛla byaá ɨ́ buo buo. Bé ó: «Sá yɨ́yɛ̂h nyé dí esâ yɨ́, yé ɨ́ mbɨa. Damá jóʼo míngʉʼ, myé lɨ́ ebánǎ jóʼo. Bʉr o b'á be baányâ-emúmó bá, bé mû ó lɨ́ elwib.»