Markus 6 - Kálar Nzyɛ̌m : Ejwán é Sáá

Yésʉs e dyɛɛ́ yé, bʉr ó Nazarɛ̂t

¹ Nó ó Yésʉs á duhǒ gúmó nyé á be yɨ́, nzě tô ɨ́ kwár nyé á bwaʼ nyɨ́. Ompʉ́n bé, nzě dû nyê.

² Jɔ̌ʼ móhó sábat, wé á pyâl yɨ́, nye ntɔ̂ʼ táare édwe bʉ̂r milɛ́ʼlá ɨ́ mpáh minjɨʼla. Bʉr ɨ́ buo buo bé á jóʼo sá nyé á lɨlɛ́ɛ yɨ́ bá, bé á be ɨ́ buú kâm, le elɛ́ɔɔ ó: «Wɨ̂ʼ mbǐ sɔ̂ʼ, wé duho nyé nkoó? Nye á nʉa wɨ̂ʼ ócwóó le mâʼ mésimá ménɨ́nɨ́ɨ́ nyé dí esâ mâʼ wó?

³ Ntʉ nyé dí wâʼ kábína nyá ɛ́? Ntʉ mwân mé Maria nyâʼ ɛ̌? Mɨ́ɔɔ́ mé Jacques, Yóse, Yʉ̂d ndu e Simon ɛ̌? Ntʉ ókɛ́l bé dí wâʼ ɨ́ sɔ́má gá yɨ́ná yɨ̂ʼ bâʼ ɛ̌?» Syɛ́ɛla yaá nzě bɨm bé ebɔ̌ʼ ɨ́ miléme, ntɔ̂ʼ benɔɔ nyê.

⁴ Nó ó Yésʉs á nze lɛ́ɛ e bé ó: «Bé jaá bene édwáawo ngwíha milɔ̌b mé Nzyɛ̌m ó, njɨ ɨ́ sí yé, le témé dyɛɛ́ yé, le ɨ́ mbɛ̌r bʉ̂r wé tʉ́ŋlʉ̌.»

⁵ Yésʉs á bé asâ mésimá gúmo yaá. Nye á jaa kɛl myúú mímbêl ó, njɨ mebô ɨ́ nyʉ̂l, le etiʼ myê.

⁶ Yésʉs á si kâm lɨ́ ebeě mpʉ bé á be adyɛ̂ʼwo e nye yɨ́. Píe tɨ̂, nye nzě ja nzɨ́, ntɔ̂ʼ tô le edwe bʉ̂r milɛ́ʼlá ɨ́ mekwár mé ngʉ́rá waá wɨ́wɛ̂h.

Yésʉs lɨ́ elómo ómpʉ́n bé

⁷ Nó nyé á nze jébe ompʉ́n bé kám le obá, nzě lómo bé, obá óbá, nyé osí dwe bé nkul ó, bé sôʼ mimbɨ́a mísísǐm ɨ bʉr.

⁸ Nye á dwe bé mpéné ó: «Bɨ̌n tó náǎ ó, abe e mimbeʼ, njɨ súmu ɨ́ mbô. Abe e blêr, abe e myah, abe e mɔnɨ́ ɨ́ mpɨ́ʼ.

⁹ Abwâr gá mintɔra mi kʉ́ mímbá. Tóʼ gá njɨ le osípah ɨ́ mekʉ̌.»

¹⁰ Nye ó: «Mbɛ̌r wɨ́wɛ̂h bɨ́n ngá nî wɨ́, diʼee gá tɨ̂, tó pyâl ɨ́ jɔʼ bɨ́n ngá mɔa, laa nyɨ́haá kwár yɨ́.

¹¹ Gúmó yɨ́yɛ̂h bʉ̂r, bé óbene bɨ́n, nkʉ̂ akpɛl éjôʼlo bɨ́n yɨ́, pɔʼá bɨ́n ngá pʉʼa tɨ̂ʼ wɨ́, bɨ̌n e kúró pím ónara bɨ́n ɨ́ mebo nyɨ́. Syɛ́ɛla yaá, yé ónwâhle bé ó, bé mû ó ɨ́ mebyaʼ.»

¹² Nó ó ómpʉ́n bé, bé á nze tô, tô le etúno, le elɛ́ɛ bʉ̂r ó, bé túmaa mikoo e mebébe mɔ́ɔ́ le edwira míléme.

¹³ Nó ó bé á nze so meleme ɨ́ bʉr ɨ́ buo buo, le elœm mímbêl múlo, le etiʼ myê.

Eswie mé Yʉánɛs Ndubʉr

¹⁴ Nó ó ngóvina Erôd á nze jóʼo lɔ́ɔ́ dí edumo e Yésʉs wɨ́, ebě, kûm nyé á be ɨ́ buú myaŋla. Bʉ́ʉ́ bʉ̂r, bé á lɨ̂lɛɛ ó: «Yʉánɛs Ndubʉr, nyɨ́ pah ɨ́ soo. Sâ yaá ó nyé dí esâ mésimá nó yɨ́.»

¹⁵ Bâʼ, bé ó: «Yé ó Elie.» Bʉ́ʉ́, bé ó: «Yé ó ngwíha milɔ̌b mé Nzyɛ̌m mpʉ baá o mélú mé épíhe.»

¹⁶ Jɔ̌ʼ Erôd á jóʼo lɔ́ɔ waá yɨ́, nye ó: «Yʉánɛs Ndubʉr ó nɨ̌, mʉr mé á tíʼe lʉ̂ nyá. Nyɨ́ pah ɨ́ soo.»

¹⁷ Náǎ yé ó, Erôd mʉr tɨ̂ʼ ó b'á lómo bʉr ó, bé tôʼ mɛ̂r Yʉánɛs. Bé e káʼ nyé menkara, bé e gbá nyé ɨ́ mbʉʼ. Erôd á sâ nó ó ɨ́ lɔ̌b mé Erodiâd. Erodiâd á nyɛɛ bâ ó, Philippe, mɨ́ɔɔ́ mé Erôd. Erôd nzě dɛn nyé nyǎ, bâ ntémé nye.

¹⁸ Nó ó Yʉánɛs á lɛ́ɛ le Erôd ó: «Yê mpéné ó, mʉr abâ myáá mɨ́ɔɔ́!»

¹⁹ Erodiâd nzě sâ nyé otié. Nye nzě sáa ménzɨ̌ mé éjʉ̂ nyê. Sâ gwár, yé á bé abána.

²⁰ Ebě, Erôd á be ó lɨ́ ekpɛ́ɛ̌ Yʉánɛs. Nye á be lɨ́ egʉ́a ɨ́ páʼ mé Yʉánɛs ó, nye ó ti, nye ntémé tîtyěl mʉr ɨ́ míh mé Nzyɛ̌m. Nó ó nyé á kɨkamle e twiʼ yé yɨ́. Jɔʼ nyé á jóʼo nye lɨ́ elwib yɨ́, lwǐb yaá, yé á be ɨ́ buú séa nyé ɨ́ léme. Nye á bɨbe ó lɨ́ ekpɛl éjôʼlo nyê.

²¹ Nó Erodiâd á nze bee mbɨambɨa jɔʼ dʉ́ó Erôd á tyêl nzɔɔ ebyɛ́l lé yɨ́. Erôd á be ó sí báŋle bʉ̂r onɨ́nɨ́ɨ́ bé, bé le ojwɨ́ɨ o bísója, ndu e minjwɨ́ʼ mí bʉ̂r ó Galilê.

²² Nó ó sile mé Erodiâd, wé mʉr tɨ̂, wé á lʉ́o nyʉ̂l ɨ́ duo nzɔ́ɔ, nzě gɔ́na le ebwal. Erôd, bé e bʉr o b'á be lɨ́ ede bá, nzě kpɛlɔɔ lɨ́ ebeě mbi nyé á bubwal wɨ́. Nó ó Erôd á lɛ́ɛ e sile wé ó: «Twáráá sá yɨ́yɛ̂h gó ókpɛl yɨ́. Me ódwe gó yǎ.»

²³ Nye ntɔ̂ʼ ntaa mínkâl. Nye e né ó: «Me ódwe gó sá yɨ́yɛ̂h gó ógwâm yɨ́, yé damá be nkɔ̂b mpwár ɨ́ menkɔb mebá ɨ́ sí mé dí ejwɨ́ɨ yɨ̂, me ókʉ́ bánǎ dwe gó yǎ.»

²⁴ Nó ó sile waá, wé á tô kʉ̌l, ntɔ̂ʼ tó dî e nyɔ̌ŋ ó: «Me twáraa yé ɛ́?» Nó ó nyɔ́ŋ á nze yala ó: «Lʉ́ mé Yʉánɛs Ndubʉr!»

²⁵ Abe e minděʼ, nye ntɔ̂ʼ tô kwá mé Erôd, tó lɛ́ɛ e né ó: «Mě jaá kpɛl ó, go dwêʼ me sɔ̂ʼ ɨ́ báánâʼ ó, njɨ lʉ́ mé Yʉánɛs Ndubʉr kɛlá ɨ́ mpyáa.»

²⁶ Njóʼá njwɨ́ɨ á jóʼo yalá yaá yɨ́, nye kʉ́ nzě tyɛʼ nyʉ̂l, nyʉ̂l ntɔ̂ʼ di nyé ɨ́ twíaaa. Sâ gwár, nye á bé akpɛl éníme nyé wǎ ɨ́ lɔ̌b mínkâl nyé á pa ntaa mí le bʉr o nyé á báŋle bá.

²⁷ Nó ɨ́ tyé e tyé yaá, nye ntɔ̂ʼ lómo mʉ̂r á tîtiʼe bʉr milʉ̂ nyá. Nye e né ó: «Ntáʼ mé e lʉ́ mé Yʉánɛs Ndubʉr!»

²⁸ Nye nzě tô mbɛ̌r mímbʉʼ, tó tíʼě Yʉánɛs lʉ̂, nzě búla e wé ɨ́ mpyáa, dwe éséhe laá, lɨ́ɛ kǎ tô e wé, tó tímle nyɔ́ŋ.

²⁹ Jɔʼ ómpʉ́n mé Yʉánɛs bé á jóʼo lɔ́ɔ waá yɨ́, bé ntɔ̂ʼ nʉǎ múú wé, tó dɨlɔɔ wê.

Yésʉs lɨ́ edwe bʉ̂r ɨ́ buo buo mede

³⁰ Bʉr ó Yésʉs á lómo bá, ɨ́ jɔʼ bé á búla yɨ́, bé ntɔ̂ʼ lɛ́ɛ nyé sá yɨ́yɛ̂h bé á sâ le elɛ̂ʼle yɨ́.

³¹ Nye ntɔ̂ʼ lɛ́ɛ bé ó: «Ntáʼ gá lɨ́ empah. Mɨná tô gbala gá tîtííǎ ɨ́ mâ lʉ̌n, súm bʉ̂r dí abe yɨ́!» (Nye á lwib nó ó, ebě, bʉr ɨ́ buo buo, bé á be ó, bâʼ lɨ́ enze, bʉ́ʉ́ lɨ́ ebúla, abírɔɔ bé epʉ́la ó, bé dêʼ.)

³² Nó ó bé á nze kalwo ɨ́ byɛ̂l, tóŋɔɔ̌ gúmó bʉ̂r, bé á be abe yɨ́, ó bé díʼee gʉ̂ʼ bé omér.

³³ Nó bʉr ɨ́ buo buo, bé á si bee bé lɨ́ etô, bê nzě dweʼe bê, nzě duho ɨ́ binkana bíbyɛ̂h e mikám, ntɔ̂ʼ nyɛɛ́ tó pyâl ɨ́ gúmó Yésʉs, bé le ompʉ́n bé, bé á be ó, bé tô yɨ́.

³⁴ Jɔ̌ʼ Yésʉs á sulo ɨ́ byɛ̂l, nzě bee éntumo e bʉ̂r laá yɨ́, nye ntɔ̂ʼ jɨ̂ʼ bé nkoó, ebě, nye á si bee ó, bé á kʉ be ó mpʉ bínteme bi dí, abe e mbɔʼlʉ bí. Nó nyé á nyɛl edwe bé milɛ́ʼlá ɨ́ milɔ̌b ɨ́ buo buo.

³⁵ Jɔʼ dʉ́ó lé á léŋa yɨ́, ompʉ́n bé ntɔ̂ʼ sîhlě súm nyé á be yɨ́, nzě lɛ́ɛ e né ó: «Mɨná gá bé wâʼ ó, gúmó bʉ̂r dí abe yɨ́. Pum múo nzě dwíne.

³⁶ Bírɨ́ɨ́ bʉ̂r bâ, bé tôʼ ɨ́ bipemé le mekwár me dí kúnókúno má. Bé tôʼ bwâm bé bʉr o tɨ̂ʼ sá éde.»

³⁷ Nó ó Yésʉs á lɛ́ɛ bé ó: «Bɨ̌n bʉr o tɨ̂, dwéʼ gá bé mede.» Bé ntɔ̂ʼ dî e né ó: «Bɨ̌h sâʼ nyá? Nzê bɨ̌h tô bwâm bé blêr e minzaŋ mí mɔnɨ́ minter mimbá, lɨ́ esú lé édwe bé sá éde ɛ̌?»

³⁸ Nye ó: «Bɨ̌n bé e biblêr bintíá? Tó dwɛ̂ʼ gâ.» Jɔʼ bé á sil eláa byé yɨ́, bê nzě lɛ́ɛ e né ó: «Bɨ̌h bé e biblêr bitɛ̂n, le osú óbá.»

³⁹ Nó ó Yésʉs á nze lɛ́ɛ e bé ó, bé dílɨɨ bʉr bɨ́bɛ̂h sí ɨ́ dáá laá, mentumo, mentumo.

⁴⁰ Bê nzě sâ nó. Bʉr nzě di sí, mimbɔŋ, mimbɔŋ. Mîʼ, bʉr nter; myúú, bʉr mekám métɛ̂n.

⁴¹ Nó ó Yésʉs á nʉa biblêr bitɛ̂n le osú óbá baá, ntɔ̂ʼ dwɛ̂ʼ kʉ́, nzě dwě Nzyɛ̌m nzyǒo, ntɔ̂ʼ pɛ̂ʼ blêr bipêh, tímle ómpʉ́n byǎ, ó bé dwêʼ bʉr byǎ. Nye nzě kab bʉ̂r bɨ́bɛ̂h osú óbá baá.

⁴² Bʉr bɨ́bɛ̂h nzě de, díle.

⁴³ Bipéh bíblêr le bipéh bí ósû byé á buʼo bí, byé á si lóŋlo mekwám kám e mebá ɨ́ jɔʼ bé á tœ̂ʼ byé yɨ́.

⁴⁴ Ɨ́ bím bʉ̂r o b'á de mede maá bá, bʉrʉ̂m, bé á be tɨ̂ʼ ó, otɔ́ɔ́sin otɛ̂n.

Yésʉs lɨ́ etye ɨ́ medíbé kʉ́

⁴⁵ Abea nɛ́ɛ: Yésʉs nzě tíne ómpʉ́n bé ó, bé kpâhwa kalwo ɨ́ byɛ̂l, bé e sámle, tô lɨ́ ebʉ́m é kɔ́m nkɛ́ɛ́, nkǒ Bétsɛ́da. Jɔʼ yaá, nyɨɛ ólîʼ lɨ́ ebwóolo éntumo e bʉ̂r.

⁴⁶ Jɔʼ nyé á sil ebwóolo entumo e bʉ̂r laá yɨ́, nye nzě bére lɨ́ ecwɨ̂ʼ kʉ́, tó jɨʼla e Nzyɛ̌m.

⁴⁷ Jɔ̌ʼ pum wé á dwíne yɨ́, Yésʉs, nye dína lɨ́ ebʉ̂m nye omér, byɛ̂l á be ó, nye mû témé mâŋ.

⁴⁸ Nyé bée nɛ́ɛ: ompʉ́n bé lɨ́ esia e túú lɨ́ edúʼo byɛ̂l, ebě, pubó, yé á duho ó, nko byɛ̂l á be lɨ́ etô yɨ́. Á dwií ɨ́ melɔ́ma mé mɛ́n nɛ́ɛ: nye nzě dû bê, lɨ́ etye ɨ́ medíbé kʉ́. Nye nzě sâ mpʉ̌ sá lɛ́ɛ́, nye ólaa bê.

⁴⁹ Mpʉ bé á bee nye lɨ́ etye ɨ́ medíbé kʉ́ yɨ́, bé á jwɨʼ ó, yé ó ndîm. Bé ntɔ̂ʼ bʉ̂ bítím.

⁵⁰ Ebě, bɨ́bɛ̂h, bé á si kʉ bee nye. Mepɨʼ nzě dîm bé ɨ́ milʉ̂. Tyé e tyé yaá, Yésʉs, nye e bé ó: «Talaa gá miléme. Yé ó me! Ayɨ́ kpɛ́ɛ gâ.»

⁵¹ Nó mpʉ nyé á to kalwo ɨ́ byɛ̂l yɨ́, pubó ntɔ̂ʼ síe, ompʉ́n bé, nzě buú kâm sâ yaá ɨ́ buo buo.

⁵² Ebě, bé á bé agwá jóʼǒ sá ésimá lé ébul bíblêr lé á pʉgʉ kpɛl elɛ́ɛ yɨ́, ebě, milémé myɔ́ɔ́, myé á be ɨ́ lele lɨ́ ebúʼla.

Yésʉs lɨ́ etiʼ mímbêl ɨ́ sí Genezarɛ̂t

⁵³ Nó ɨ́ jɔʼ bé á sil entaa mâŋ, pyâl ɨ́ sí Genezarɛ̂t yɨ́, bê nzě syel byɛ̂l wɔ́ɔ́ lɨ́ ebʉ̂m.

⁵⁴ Jɔʼ bé á sulo ɨ́ byɛ̂l yɨ́, bʉr nzě kpâhwǎ dweʼɔɔ̌ Yésʉs,

⁵⁵ bé ntɔ̂ʼ tô míkám ɨ́ sí yaá yɨ́yɛ̂h, tô le enkɛ́ɛ mímbêl myɔ́ɔ́ mímyɛ̂h ɨ́ mimyɛɛla, tóŋɔɔ e myé gúmó yɨ́yɛ̂h bé á jʉ̂ʼra nye yɨ́.

⁵⁶ Ɨ́ gúmó yɨ́yɛ̂h Yésʉs á tʉtô yɨ́, ɨ́ mekwár, le binkana ndu e mempɔ́ɔ́, bʉr, bé á be ó, lɨ́ enze e mimbél myɔ́ɔ́, dyéʼɔɔ myé ɨ́ mebɛhɛɛ, bɨ́ɛ lɨ́ ejɨʼla e né ó, nye kámaa ó, bé jáa kúna njɨ le empah é kán wé. Mʉr nyɨnyɛ̂h á kúna e né nyá, á si kʉ tiʼe.