Markus 5 - Kálar Nzyɛ̌m : Ejwán é Sáá

Yésʉs lɨ́ eso méleme

¹ Nó ó bé á to kumo ɨ́ lʉ́ʉ́ ébʉ́m é máŋ mé Galilê, lɨ́ ebʉ́m é kɔ́m nkɛ́ɛ́ ɨ́ sí Gerázen.

² Lě Yésʉs á sulo ɨ́ byɛ̂l, le ntɔ̂ʼ nyʉ́ʉ́ mʉ̂r á duhǒ pemé mésoo, nzě bɔma e né. Mʉr waá á be ó e mbɨ́ǎ sísǐm.

³ Nye á didi ó, ɨ́ mesoo maá. Mʉr á bé abe e nkul ekâʼ nyê, damá jóʼo ó e mikʉ̂kɔ̌b mí nkóho.

⁴ Jɔʼ yɨ́yɛ̂h bé á pɨpɨr nye mboʼó nkóho, le ekáʼɔɔ mébô le mikʉ̂kɔ̌b yɨ́, nye á bɨbe ó, lɨ́ ebúʼǒ mboʼó waá le etɨ̂ míkʉ̂kɔ̌b myaá. Abe e mʉr á be e nkul ekoʼo nyê.

⁵ Jɔʼ yɨ́yɛ̂h, le móhó le pum, nye á bɨbe ó, njɨ páʼ mesoo le kʉ́ mecwɨ̂ʼ, lɨ́ etô le ebʉ̂ bítím le ebáble nyʉ̂l nyé e mekóʼ.

⁶ Nó mpʉ nyé á dweʼe Yésʉs lɨ́ ejaa yɨ́, nye ntɔ̂ʼ swǐm kám, tó bɨʼ mébóó sí ɨ́ míh mé,

⁷ ntɔ̂ʼ bʉ̂ bítím kʉ́ kʉ́. Nye e né ó: «Gǒ sáá yé e me, Yésʉs, Mwân mé Nzyɛ̌m dí Lʉ́ bísá bíbyɛ̂h nyá? Me lɨ́ ejɨʼla e go ɨ́ díé mé Nzyɛ̌m: ayɨ́ dwe mé ntɨ́ʼá!»

⁸ (Nye á lwib nó ó, ebě, Yésʉs á si lɛ́ɛ e né ó: «Mbɨ́ǎ sísǐm, duhaa mʉ̂r nyâʼ ɨ́ nyʉ̂l!»)

⁹ Yésʉs ntɔ̂ʼ dî e né ó: «Díé lô, lê nzé?» Nye ntɔ̂ʼ yala e né ó: «Díé lâm, lé ó “Daa-e-méleme”, ebě, bɨ̌h bé ɨ́ buú buo.»

¹⁰ Nye ntɔ̂ʼ sâ sɨ́n lɨ́ esâ mínjɨʼla, lɨ́ elɛ́ɛ e Yésʉs ó, nye ayɨ́ tyen mímbɨ́a mísísǐm myaá ɨ́ sí swîh.

¹¹ Náǎ yé á be ó e daa lé ónkʉ̌ ɨ́ buo buo lɨ́ ede lɨ́ ecwɨ̂ʼ kʉ́.

¹² Meleme ménɨ̌, mé ntɔ̂ʼ jɨʼla e Yésʉs ó: «Tyenɨɨ bɨ́h yɨ́ɛ ɨ́ daa lé ónkʉ̌ lɨ̂ʼ ó, bɨ̌h tô nî bé ɨ́ menyʉ̂l.»

¹³ Nye ntɔ̂ʼ kam ó, yé syɛ́yɨɨ nó. Mimbɨ́a mísísǐm myaá, myé ntɔ̂ʼ duho mʉ̂r waá ɨ́ nyʉ̂l, myé ntɔ̂ʼ tó nî ɨ́ menyʉ̂l mé ónkʉ̌. Daa lé ónkʉ̌ nzě tulwa ɨ́ mbéʼé écwɨ̂ʼ kʉ́, ntɔ̂ʼ lʉ́ŋa ɨ́ mâŋ, ntɔ̂ʼ jɨ́bla, dwe. Bé á be ó onkʉ̌ otɔ́ɔ́sin obá.

¹⁴ Opála bé ónkʉ̌ ntɔ̂ʼ kpɛ́ɛ, tóŋɔɔ e lɔ́ɔ waá ɨ́ nkana, le bípemé e bípemé byɛ̂h. Bʉr nzě dua ɨ́ mekwár mɔ́ɔ́, lɨ́ enzě bee bísá byé á syɛ́ɛ bí.

¹⁵ Jɔʼ bé á pyâl gúmó Yésʉs á be yɨ́, bê nzě bee mʉ̂r méleme mé á nzɨnzamra nyá, nyɨɛ ndîndǐl ɨ́ kpa, le mikán mímpâ ɨ́ nyʉ̂l, le pɨʼ nyé nyɨnyɛ̂h. Bʉr o b'á nze bá, kʉ́ nzě kámɔɔ nyê.

¹⁶ Obea o bísyɛ́ɛla byaá, bê nzě lɛ́ɛ̌ sâ yé á pyâl ɨ́ mʉr méleme mé á nzɨnzamra nyá, le yaá yé á pyâl lɨ́ onkʉ̌ yɨ́.

¹⁷ Nó ó bé á nze jɨʼla e Yésʉs ó, nye pʉ́ʼaa ɨ́ sí yɔ́ɔ́.

¹⁸ Jɔ̌ʼ Yésʉs á kalwo ɨ́ byɛ̂l yɨ́, mʉr méleme mé á nzɨnzamra nyá, nzě jɨʼla e né ó, bé e boo nɔ́ɔ́, bé káa di.

¹⁹ Nó Yésʉs á bé akam tíá nyaá. Nye á jaa lɛ́ɛ nye ó: «Tóʼ kwár nyǒ, tʉ́ŋlʉ̌ mbɛ̌r bʉ̂r gô. Tó lɛ́ɛ̌ sá yɨ́yɛ̂h Dâ Nzyɛ̌m sá gó yɨ́, le mpʉ nyê jɨ́ʼ gó nkoó yɨ́!»

²⁰ Nó nyé á tô ɨ́ sí Dekapôl, tô le elɛ́ɛ bʉ̂r o bínkana bi tɨ̂ʼ sá yɨ́yɛ̂h Yésʉs á sâ nye yɨ́. Bʉr bɨ́bɛ̂h, bê nzě kâm lɔ́ɔ́ wé waá.

Yésʉs lɨ́ etiʼ mâ mʉmá mé Yárwis

²¹ Jɔ̌ʼ Yésʉs á baʼa búla ɨ́ lʉ́ʉ́ ébʉ́m é mâŋ yɨ́, entumo e bʉ̂r nzě bɔma nyé ɨ́ nká lɨ́ ebʉ́m é mâŋ laá.

²² Nyʉ́ʉ́ njwɨ́ɨ mpáh minjɨʼla, díé lé Yárwis, ntɔ̂ʼ pyâl. Jɔʼ nyé á bee Yésʉs yɨ́, nye nzě kúrwo sí, píʼe mpóm ɨ́ bibwǎh ɨ́ mpǒm nyé,

²³ nzě jɨʼla e né e nkoó nyɨnyɛ̂h ó: «Mwân wǎm, nye múo dwe. Nó me lɨ́ ejɨʼla e go ó, go ntâʼ. Mɨná tôʼ. Go tô kɛl nyé mebô ɨ́ nyʉ̂l, nye nkʉ̂ sâ mbɨ̂mbɨá, tiʼe.»

²⁴ Yésʉs ntɔ̂ʼ tô, bé e né. Bé le entumo e bʉ̂r, bé á be ó entúúnó-é-nkáá, bâʼ lɨ́ emána nyê.

²⁵ Ɨ́ bʉr baá, nyʉ́ʉ́ mʉ́má á be ó tɨ̂, metié lɨ́ esʉsolo ɨ́ nyʉ̂l. Nyé osí jâ le ekpaa laá mimbû kám e mimbá.

²⁶ Nye á be ɨ́ buú dûhwo mítúú lɨ́ esáǎ twiʼ kwá odɔ́bra ɨ́ buo buo, dímlě mɔnɨ́ yé yɨ́yɛ̂h lɨ́ esáa dʉ̂m. Sâ gwár, nye á bé atiʼe, ekpaa asíesie, bubwǎʼ bwaʼáa.

²⁷ Mpʉ nyé á si jóʼo bʉr lɨ́ elwilwib, dumo e Yésʉs yɨ́, nye ntɔ̂ʼ nî ɨ́ sɔ́má bʉ̂r, nzě pyâl Yésʉs kúnókúno píe koo wé, tyěn mbô, kúna e kán wé,

²⁸ ebě, mʉmá á be lɨ́ ejwɨʼ ó: «Mé kúná yɨ́ɛ e kán mʉ̂r nyâʼ nó, me tiʼe!»

²⁹ Tyé e tyé yaá, ekpaa e métié laá ntɔ̂ʼ gœ̂ʼ, nye ntɔ̂ʼ jʉ̂ʼra ɨ́ nyʉ̂l nyé ó, nyɨ́ tiʼe, le egʉ́a ó, nyé akǎ be le ekpaa!

³⁰ Ɨ́ tyé gwár yaá, Yésʉs ntɔ̂ʼ jʉ̂ʼra ɨ́ nye mʉr tɨ̂ʼ ó, nyʉ́ʉ́ nkûl bé ɨ́ duho nyé ɨ́ nyʉ̂l. Nye nzě dwira témé bʉr, ntɔ̂ʼ dî ó: «Nzê kúná e mikán myâm ɛ̌?»

³¹ Ompʉ́n bé, bé e né ó: «Gua yɨ́ɛ lɨ́ ebee ó, entumo e bʉ̂r, lé lɨ́ enyêhle gô. Gǒ kǎ báʼǎ dî ó: “Nzê kúná e me?” ɨ́ yé ɛ́?»

³² Nó ó Yésʉs á nze dwira, ntɔ̂ʼ tô le esáa mʉ́má á sâ syɛ́ɛla yaá nyá.

³³ Mʉmá waá nzě sâʼ ɨ́ ngba ngba ngba le ejóʼo bʉ́á, ebě, nye á be lɨ́ egʉ́ǎ sá yé á syɛ́ɛ nye ɨ́ nyʉ̂l yɨ́. Nye nzě bɨʼ mébóó sí ɨ́ mpǒm mé Yésʉs, nzě lɛ́ɛ nyé otyeetye wɨ́wɛ̂h.

³⁴ Nó ó Yésʉs á lɛ́ɛ e né ó: «Mwân wǎm, búʼó yô, yɨ́ tiʼ gô. Mepyɛbla, mé díʼee go ɨ́ léme. Ekpaa lô, lé síaa.»

³⁵ Yésʉs dína lɨ́ elwib nɛ́ɛ: bʉr o mílʉ́mlʉ́ ntɔ̂ʼ duhǒ mbɛ̌r mé Yárwis. Bé e njwɨ́ɨ waá ó: «Mónǒ, nyɨ́ dwe. Gǒ kǎ báʼǎ ntɨ̂ʼ lɛ̂ʼla ɨ́ yé?»

³⁶ Yésʉs nyɨɛ lɨ́ ekʉ́ jóʼo mékǎn bé á lɛ́ɛ má, nye á be yɨ́ɛ ó, anʉa mé, gbâ ɨ́ nkɔb. Nye nzě lɛ́ɛ e njwɨ́ɨ mpáh minjɨʼla ó: «Ayɨ́ jóʼo bʉ́á. Dyɛ́ʼwáá njɨ e me.»

³⁷ Nye nzě kamle bʉ̂r lɨ́ edû nyê. Nye á jaa kam ó, njɨ Pétrus, Jacques ndu e mɨ́ɔɔ́ wé, Yʉánɛs, ó bé e boo nɔ́ɔ́ tôʼ.

³⁸ Bé ntɔ̂ʼ nî mbɛ̌r me njwɨ́ɨ mpáh minjɨʼla. Yésʉs ntɔ̂ʼ bee ó, tɨ̂ʼ, yé á be ó, yé mû áleŋéleŋé, bʉr lɨ́ ejɨ médwê le ebʉ̂ bítím ɨ́ buo buo.

³⁹ Yésʉs nî mbɛ̌r, nzě lɛ́ɛ e bé ó: «Bɨ̌n kǎ sâ óleŋéleŋé mpʉ́nʉ̌ le ejɨ médwê ɨ́ yé? Mwân, nyé adwe. Nye ɨ́ jô.»

⁴⁰ Bê nzě pya nyê. Nye nzě pyêl bɨ́bɛ̂h kʉ̌l. Yé á jaa lîʼ tɨ̂ʼ ó, njɨ sɔ́ŋ e nyɔ̌ŋ mwân, le bʉr ó sɔ́má yé. Bê nzě nî ɨ́ ntɔ́ɔ, súm mwân á be yɨ́.

⁴¹ Nye ntɔ̂ʼ mɛ̂r mwân waá ɨ́ mbô. Nye e né ó: «Talita, kum!» (Nó ó yé lɛ́ɛ́ ó: «Mâ mʉmá, mě lɛ́ɛ́ gó ó: mɔáa.»)

⁴² Tyé e tyé yaá, mwân waá nzě gbɔlwa, ntɔ̂ʼ táarě tyen, ebě, nye á be ó, nye mû mimbû kám e mimbá. Bʉr baá nzě twɨrǎ syɛ́ɛla yaá ɨ́ buo buo.

⁴³ Yésʉs ntɔ̂ʼ gbâ bé mpéné ó, bé l'alɛ́ɛ mʉ̂r sâ syɛ́ɛ́ yɨ́. Nye nzě lɛ́ɛ bé ó, bé dwêʼ eséhe laá sá éde.