Markus 4 - Kálar Nzyɛ̌m : Ejwán é Sáá

Kɨkɛna bíbwǎh binâ

¹ Yésʉs á be ó ɨ́ pɨ̌n mâŋ. Nye nzě báʼǎ táare édwe bʉ̂r milɛ́ʼlá. Entumo e bʉ̂r nzě swâl bǎʼ e né, ɨ́ swâl swâl, nye ntɔ̂ʼ kalwo sá yé ɨ́ byɛ̂l, di sí, entumo e bʉ̂r lɨ́ɛ lîʼ náǎ tín, lɨ́ ebʉ́m é mâŋ.

² Nye nzě dwe bé milɛ́ʼlá ɨ́ buo buo ɨ́ nzɨ̌ bikɨkɛna. Nó, nye á dwe bé milɛ́ʼlá ó, mbi wɨ̂:

³ «Jóʼláá gâ: yé á be ó e nyʉ́ʉ́ mbêl mempeʼ á to le emyam mémpeʼ ɨ́ pemé yé nyá.

⁴ Jɔʼ nyé á be lɨ́ etô le emyam mémpeʼ maá pemé e pemé yɨ́, wɨ̂ʼ pâʼ mpeʼ nzě gɔ́na le ekur nzɨ́ e nzɨ̌. Binʉ̌n ntɔ̂ʼ sulo, nzě tor mémpeʼ maá mɨ́mɛ̂h.

⁵ Gúú pâʼ mpeʼ kur ɨ́ sí mékóʼ, bwǎh mpâ l'abuo tɨ̂. Mempeʼ ntɔ̂ʼ kpâhwǎ pâh, ebě, bwǎh yé á be tɨ̂ʼ yɨ́, yé á bé abuo.

⁶ Jɔʼ dʉ́o, lé á kah yɨ́, dwéhé nzě ŋmɛ́ha tɨ̂, nzě dîʼ mípáhá mémpeʼ myaá mímyɛ̂h, myé ntɔ̂ʼ swâh, ebě, myé á bé abe e mikaalé mimpâ.

⁷ Gúú pâʼ mémpeʼ ntémé nzě kur ɨ́ mindwínɨ́nɨ́. Mindwínɨ́nɨ́ nzě gwɨ́e, ntɔ̂ʼ kâʼ mípáhá mémpeʼ myaá, myé ntɔ̂ʼ líre, akǎ gúmo mpúmó.

⁸ Damá jóʼo nó, gúú pâʼ mémpeʼ tɨ̂ʼ wɨ́ɛ, wé á kur ó ɨ́ sí métyɛʼ. Mɨ́haá mɨ́ɛ ó b'á gwɨ́e, le ebwaʼ. Mê nzě gúmo mpúmó. Lɨ́ʼ étíne gúmo mpúmó mekám mélɛ̂l. Lʉ́ʉ́, mpumó mekám mésaman. Lʉ́ʉ́ ntémé, mpumó nter.»

⁹ Yésʉs nzě lɛ́ɛ ó: «Mʉr dí e megwǎl mé éjóʼo nyá, nye jóʼaa náǎ!»

Yésʉs jaá lwilwib e bʉr ɨ́ nzɨ̌ bikɨkɛna ɨ́ yé?

¹⁰ Jɔʼ bé á be, bé mû bé omér yɨ́, bʉ́ʉ́ bʉ̂r o b'á be ɨ́ sɔ́má yé bá, bâʼra e sɔ́má bʉ̂r kám le obá bá, bê nzě dî e né, sá bíkɨkɛna byaá dí elɛ́ɛ yɨ́.

¹¹ Yésʉs ntɔ̂ʼ lɛ́ɛ ó: «Bɨ̌n ó Nzyɛ̌m á gwîh bisá mésǒ bí Mpóʼo nyé. Sâ gwár, ɨ́ páʼ bʉ̂r oswîh bɨ́ɛ, bé kʉ́ gwá jóʼo ó, njɨ ɨ́ nzɨ̌ bikɨkɛna, lɨ́ esú ó,

¹² mekǎn me ngwíha o mílɔ̌b mé Nzyɛ̌m, mé díraa. Nye á cɛma ó: “Bé lɨ́ edwɛ̂ʼ e mîh mimběʼ, abee. Bé lɨ́ ejôʼlo e megwǎl, ajóʼo, agʉ́a ntémé, lɨ́ ebene ó, bé ámû jaá dwira míléme, Nzyɛ̌m ntɔ̂ʼ pɛʼ bé bibaa bí ébébe lɔ́ɔ́.”»

Pahlá kɨkɛna mbêl mempeʼ

¹³ Nye ntɔ̂ʼ dî e bé ó: «Bɨ̌n apǎ nyɛɛ́ jóʼo yɨ̂ʼ kɨkɛna. Bɨ̌n bé ójóʼo byaá byúú nyá?

¹⁴ Mʉr pemé, nyě myǎm ó, lɔ́ɔ́ mé Nzyɛ̌m.

¹⁵ Bâʼ bʉ̂r, bé ó mpʉ émpah e nzɨ́, gúmó lɔ́ɔ waá, wé á kur yɨ́. Bé lɨ́ ejóʼo wê. Píe tɨ̂, Sátan nzě kpâhwǎ pyâl, pɛʼ bé wǎ ɨ́ gúmó wé á kur yɨ́.

¹⁶ Bâʼ nwɨɨla e sí mékóʼ, gúmó mpeʼ, yé á kur yɨ́. Bʉr baá, bé lɨ́ ejóʼǒ Mbɨambɨa Lɔ́ɔ, ntɔ̂ʼ nʉa wé e bisʉhʉʉ.

¹⁷ Sâ gwár, Mbɨambɨa Lɔ́ɔ waá l'anî bé ɨ́ miléme tʉ́ŋlʉ̌. Bé jaá baʼle wé ó, njɨ ɨ́ mâ péh jɔʼ. Jɔ̌ʼ túú le tíblá mû sí pyâl ɨ́ lɔ̌b lɔ́ɔ waá yɨ́, wé ntɔ̂ʼ bɨma bé ebɔ̌ʼ ɨ́ léme, bé ntɔ̂ʼ gwâʼ.

¹⁸ Bʉ́ʉ́ nwɨɨla ó e mpeʼ yé á kur lɨ́ mindwínɨ́nɨ́ yɨ́. Bé á si jóʼo Mbɨambɨa Lɔ́ɔ.

¹⁹ Sâ gwár, mitúú mí sí le gwɨ́má ókúm le ogbaa, byé á si dímle bé ɨ́ nzɨ̌ mikóo myɔ́ɔ́. Bé lɨ́ ebuú tyel mílémé kʉ́ lɨ́ ebi e bísá bí sí yɨ̂. Bisâ byaá, byé ntɔ̂ʼ kâʼ Mbɨambɨa Lɔ́ɔ, wé l'akǎ gúm tô dóló.

²⁰ Bʉ́ʉ́ ntémé, bé nwɨɨla ó e mpeʼ yé á kur ɨ́ mpǎŋ sí métyɛʼ yɨ́. Bɨ́ jóʼǒ Mbɨambɨa Lɔ́ɔ, nʉa wé mbɨ̂mbɨá. Sá tɨ̂ʼ ó bé dí egúmo mpúmó ɨ́ bicwiʼ byɔ́ɔ́ yɨ́. Mâʼ métín gúmo mpúmó mekám mélɛ̂l. Mʉ́ʉ́, mpumó mekám mésaman. Mʉ́ʉ́ ntémé, mpumó nter.»

Kɨkɛna éláma

²¹ Yésʉs ntɔ̂ʼ lɛ́ɛ bé ó: «Bé abe lɨ́ enze le eláma ó, bé óbûr lé ɨ́ mpɨ̌, nkʉ̂ tó lâʼ lé sí joó. Yé jala ó, bé tyélɨɨ lé ɨ́ tyélátyéla éláma kʉ́.

²² Sá yɨ́yɛ̂h dí solá yɨ́, yé ógwíhǎ kʉ̌l. Sá dí lɨ́ esǒ yɨ́, yé ónyɨ̂n ɨ́ kpɛŋlɛm.

²³ Mʉr dí e megwǎl mé éjóʼo nyá, nye jóʼaa náǎ!»

²⁴ Nye ntɔ̂ʼ lɛ́ɛ bé ó: «Bɨ̌n a báʼ ɨ́ sá bɨ́n dí ejóʼo yɨ́. Nzyɛ̌m ójwɨʼ míndwéá nyé ngá dwe bɨ́n mí ó e jwɨʼa bɨ́n dí ejwɨʼ bʉ̂r oswîh yɨ́. Nyé okǎ báʼǎ kɛl bɨ́n myúú míndwéá tɨ̂.

²⁵ Ebě, mʉr dí e sâ gwár nyá, óbáʼǎ dweŋɔɔ byúú. Sâ gwár, waá dí tʉ̂toʼó, abe e sɔ̂ʼ nyá, ódɛ́ʼɔɔ̌ damá jóʼo mâ sâ gwár nyé dí e né nyá.»

Kɨkɛnǎ mpeʼ

²⁶ Yésʉs nzě báʼǎ lɛ́ɛ ó: «Mpóʼǒ Nzyɛ̌m dí etyêl nyɨ́, nyě nwɨɨlá ó e nyʉ́ʉ́ mʉ̂r á to myam mempeʼ ɨ́ pemé yé nyá.

²⁷ Mʉr waá damá tô ɨ́ jô, nkʉ̂ ntémé jɨma, mempeʼ mé, mé lɨ́ epâh, le egwɨ́e, nyɨɛ l'apʉgʉ́ gʉ́ǎ sá yé dí esyɛ́ɛ nó yɨ́.

²⁸ Bwǎh yé mʉr tɨ̂ʼ ó dí esâ ó, mpeʼ, yé páhaa, gúmo mpúmó, mpumó lɨl.

²⁹ Mpúmó óbe, nye mû sí lɨl nó, mʉr pemé, nyé okpɛm, ebě, swɨɨ ékpɛm, yɨ́ pyâl!»

Kɨkɛna mâ díh é nzɔ́m

³⁰ Yésʉs nzě dî ó: «Mɨná bé e nkul ejwɨʼ gá Mpóʼo mé Nzyɛ̌m e wáǎ mbǐ sɔ̂ʼ? Yáǎ kɨkɛna mé ókǎ báʼǎ sâ bɨ́n lɨ́ elɛ̂ʼle bɨ́n mpʉ nyé dí yɨ́?

³¹ Nyě nwɨɨlá ó e díh é nzɔ́m lé á be ɨ́ buú twâʼwo ɨ́ mempeʼ mɨ́mɛ̂h lɨ́.

³² Nó ɨ́ jɔʼ lé dí emyamɔɔ yɨ́, lé lɨ́ epâh, bánǎ sâ mpěʼ nɨ́nɨ́ɨ́, lɨ́ elaa mémpeʼ mɨ́mɛ̂h ɨ́ mpwaʼ. Lé lɨ́ entwoowo, pâh mílɔ́ɔ́ mínɨ́nɨ́ɨ́. Binʉ̌n bíbyɛ̂h nzě lʉ́o mɔ̂ʼ mɔ́ɔ́ ɨ́ dúʼwó lé.»

³³ Yésʉs á dwidwe bé milɛ́ʼlá ɨ́ milɔ̌b mé Nzyɛ̌m ó, ɨ́ nzɨ̌ bikɨkɛna ɨ́ buo buo mpʉ byaá nyé á nyɛɛ sâ bí. Nye á dwidwe bé myǎ ó, bím tyé bé á be e nkul ejóʼo yɨ́.

³⁴ Jɔʼ bé e bʉr bɨ́bɛ̂h, bé á bɨbe yɨ́, nye á lwilwib ó, ɨ́ nzɨ̌ bikɨkɛna. Nó ɨ́ jɔʼ bé le ompʉ́n bé, bé á bɨbe bé omér yɨ́, nye á lwilwib ó, pâʼla mékǎn.

Yésʉs lɨ́ enkáŋla e nkúo

³⁵ Ɨ́ móhó ngwár waá, ɨ́ jɔʼ dʉ́ó lé á léŋa yɨ́, Yésʉs, nye le ompʉ́n bé ó: «Ncʉ̂ʼ gâ. Mɨná ntáŋaa gá mâŋ, tô lɨ́ ebʉ́m é kɔ́m-nkɛ́ɛ́.»

³⁶ Jɔʼ bé á be, bé mû sí líʼe éntumo e bʉ̂r laá yɨ́, bé ntɔ̂ʼ tó kœ̌b Yésʉs ɨ́ súm nyé á be ɨ́ byɛ̂l tʉ́ŋlʉ̌ yɨ́. Bé le onɔ́ɔ́ ntɔ̂ʼ tô. Mʉ́ʉ́ mɛ̂l ntémé, mé á be ó súm byɛ̂l waá á be yɨ́.

³⁷ Nó nkúo á nyɛl ekwoolo ɨ́ buo buo. Obóʼó ó mâŋ, wê nzě swɨɨ ɨ́ byɛ̂l, byɛ̂l ntɔ̂ʼ táare élóno ɨ́ medíbé.

³⁸ Nyɨɛ á be ó ɨ́ byɛ̂l nkǒ píhe, lɨ́ ejâ jô, lʉ̂ kɛlá kʉ́ ebwóóló. Bé ntɔ̂ʼ jɨm nyê. Bé e né ó: «Lɛ̂ʼla, mɨná múo nzě dwe gâ! Nzê yé alɛ́ɛ gúa sɔ̂ʼ ɛ̌?»

³⁹ Yésʉs nzě mɔa, ntɔ̂ʼ nkáŋla e nkúo. Nye e mâŋ ó: «Diʼee ɨ́ puuu. Diʼee títîl.» Nkúo ntɔ̂ʼ tyɛ̂b. Sá yɨ́yɛ̂h mû ɨ́ puuu.

⁴⁰ Nye le ompʉ́n bé ó: «Bɨ̌n jóʼó bʉ́á ɨ́ yé? Bɨ̌n bé adyɛ̂ʼwo e Nzyɛ̌m ɨ́?»

⁴¹ Bê nzě bil bʉ́á, ntɔ̂ʼ lɛ́ɛla páʼ nyɔ́ɔ́ ó: «Wɨ̂ʼ mbi mʉ̂r, wê nzé, dí, nkúo e mâŋ, bánǎ sâ nyé mejóʼo wɨ́?»