Bìoball air-loidhne

Markus 3 - Kálar Nzyɛ̌m : Ejwán é Sáá

Yésʉs lɨ́ etiʼ mʉ̂r ɨ́ móhó sábat

¹ Yésʉs ntɔ̂ʼ báʼǎ nî ɨ́ nyʉ́ʉ́ mpáh minjɨʼla. Tɨ̂ʼ, yé á be ó e nyʉ́ʉ́ mʉ̂r á be e mbô ɨ́ swâm swâm nyá.

² Nó bʉr o b'á be tɨ̂ʼ bá, bé á be ó lɨ́ etirwǒ Yésʉs, lɨ́ edwɛ̂ʼ nkʉ̂ nye ótiʼ mʉ̂r waá ɨ́ móhó sábat, bé nkʉ̂ pur nyé ɨ́ lɔ̌b syɛ́ɛla yaá.

³ Yésʉs nzě lwib e mʉr á be e mbô ɨ́ swâm swâm nyá. Nye e né ó: «Gbɔlwaa sí témé bʉr bâ!»

⁴ Nye ntɔ̂ʼ dî e bé ó: «Le embɨa, le ebébe, etié gá lɨ́ná, lé kam ó, mʉr sâʼ yé ɨ́ móhó sábat? Le etiʼ mʉ̂r, le ejʉ̂ mʉ̂r: lé kam yé?» Bɨ́bɛ̂h ɨ́ gubʉ́.

⁵ Nó mpʉ nyé á to le edwɛ̂ʼ bɨ́bɛ̂h yɨ́, lémé wé ntɔ̂ʼ lóno ɨ́ nkpaa, ebě, milémé myɔ́ɔ́, myé á be ɨ́ buú lele lɨ́ ebúʼla. Nye e mbêl ó: «Syɛ́mɨ́ɨ́ mbó gô.» Mbêl ntɔ̂ʼ syɛ̂m mbô. Mbô, wé ntɔ̂ʼ sâ nyé mbɨ̂mbɨá.

⁶ Nó oFarizyɛ̂n, bé e bʉr o nkɔ́m mé Erôd, bé á nze tô kʉ̌l, tó sáa pɨ̂ʼ ó, bé jʉ́ʼoo Yésʉs.

Sɔ́má bʉ̂r lɨ́ etô kwá mé Yésʉs

⁷ Yésʉs, bé le ompʉ́n bé ntɔ̂ʼ sɔlwǎ gúmo yaá, tô ɨ́ nkpâh mâŋ, entumo e bʉ̂r nzě dû nyê. Bâʼ bʉ̂r lɨ́ eduhǒ sí Galilê; bʉ́ʉ́ duhǒ sí Yʉ́da;

⁸ bʉ́ʉ́ Yerʉ́zalɛm; bʉ́ʉ́ ntémé sí Idumê; bʉ́ʉ́ duho pɨ̌n díbé Yɔrdên kɔ́m nkɛ́ɛ́; bʉ́ʉ́ ntémé duho ɨ́ mekwár me dí bǎʼ e Tîr e Sidɔ̂n má. Bé á be ɨ́ buú buo bʉ̂r. Bé á si jóʼo lɔ́ɔ́ bísyɛ́ɛla nyé á sâ bí. Nó ó bé á tô kwá nyé ɨ́ buo buo.

⁹ Nye ntɔ̂ʼ lɛ́ɛ le ompʉ́n bé ó, bé sáŋaa nye byɛ̂l nyé ngá di tɨ̂ʼ nyá, lɨ́ ekpɛ́ɛ ó, entumo e bʉ̂r, lé ámû jaá tyéele nyê.

¹⁰ Ebě, nye á si bu tiʼ bʉr. Nó, mimbél mímyɛ̂h, myé á be lɨ́ ekpɛl ékúna e né.

¹¹ Bʉr o mímbɨ́a mísísǐm, myé á nzɨnzamra bá, ɨ́ jɔʼ bé á bɨbee nye yɨ́, bé á bɨbe ó, lɨ́ ebɨʼ mébóó mɔ́ɔ́ sí ɨ́ mpǒm nyé, le ebʉ́ŋɔɔ bítím kʉ́kʉ́ ó: “Go ó Mwân mé Nzyɛ̌m!”

¹² Nó nyé á gbâ bé mpéné ó, bé l'anyamlě lɛ́ɛ mʉ̂r mbi mʉ̂r nyé dí wɨ́.

Yésʉs lɨ́ epɛ̂h bʉ̂r o mílʉ́mlʉ́ bé
( Luc 6.12-15 )

¹³ Yésʉs nzě bére lɨ́ ecwɨ̂ʼ kʉ́, ntɔ̂ʼ jébe bʉ̂r o nyé mʉr tɨ̂ʼ á twâr bá, bé ntɔ̂ʼ tô nko nyé á be yɨ́.

¹⁴ Píe tɨ̂, nye nzě twâr ɨ́ sɔ́má yɔ́ɔ́, bʉr kám le obá, tyêl bé ɨ́ dǐ bʉ̂r o mílʉ́mlʉ́ bé. Nye á twâr bé ó, bé díʼee bǎʼ e né,

¹⁵ nye nkʉ̂ lʉlómo bé ó, bé tôʼ le etúnǒ Mbɨambɨa Lɔ́ɔ, le eso méleme ɨ́ bʉr e nkul nyé á dwe bé nyɨ́.

^16-17 Nye á twâr ó, Simon, mʉr á jwɨrɔɔ “Pétrus” nyá, bé e Jacques, mwân mé Zebedê, bé e mɨ́ɔɔ́ wé, Yʉánɛs. Nye á jwɨr bɨ́bɛ̂h obá ó: “Bɔanɛrgɛ̂s.” Díe laá, lé páʼlɔ́ɔ́ ó, “Bwá mé nkɛ̂l jʉ́o.”

¹⁸ Nye á twâr ntémé ó André, Philippe, Barthélemy, Matthieu, Thomas, Jacques (mwân mé Alfê), Tadê, Simon “Kɔmlʉ kwár”,

¹⁹ bé e Yʉ́das Iskariôt, mʉr á bɛ́ma Yésʉs nyá.

Yésʉs, nyé abe ɨ́ nkɔ̌m mé Sátan

²⁰ Yésʉs nzě báʼǎ búlǎ mbɛ̌r, entumo e bʉ̂r ntɔ̂ʼ swâl tɨ̂. Bé le ompʉ́n bé, bé á bé abe le epʉ́la dí ó, bé dêʼ.

²¹ Nó ó bɨ́ɔɔ́ bé, bé á nze, duho ɨ́ mimbɛ̌r myɔ́ɔ́, lɨ́ edǐ tó nʉa nyé e nkul. Bé á kpɛl ó, bé búlaa e né, dil nyé sí, ebě, bé á lɨlɛ́ɛ ó: «Pɨʼ, nyɨ́ dîm nyé ɨ́ lʉ̂.»

²² Bʉ́ʉ́ ólɛ̂ʼla o métié, bé á duhǒ Yerʉ́zalɛm bá bɨ́ɛ, bé á baʼa lɛ́ɛ ó: «Nyě e Béelzébul ɨ́ nyʉ̂l.» Bé ntémé, bé á lɛ́ɛ ó: «Nyě so méleme ó e nkul nyé á pa nʉa le njwɨ́ɨ meleme nyɨ́.»

²³ Nye ntɔ̂ʼ jébe bé nko nyé á be yɨ́, nzě sâ bé kɨkɛna ó: «Sátan, nyě e nkul edwǐh Sátan nyá?

²⁴ Kúl bʉ̂r yɨ́yɛ̂h dí ebɔ́ʼa témé tɨ̂, wɨ̂ʼ pâʼ lwímla e gúú wɨ́, yé ákóʼó johlo.

²⁵ Mbɛ̌r bʉ̂r dí ebɔ́ʼa témé, wɨ̂ʼ pâʼ lwímla e gúú wɨ́, wé ábéá le esíe ɨ́ twíilɨ̌.

²⁶ Sátan sí lwímla e nye mʉr tɨ̂, mpóʼo nyé bɔ́ʼa ménkɔ̌m mebá nó, mpóʼo nyé nyaá ábea le edîm. Nye ókpâhwǎ síe!

²⁷ «Mʉr, nyé abe e nkul enî mbɛ̌r mé njɨ́h mʉ̂r, díbe nyé bisá byé, alaa ó, nyé osí pǎ nyɛɛ́ kâʼ nyé nkará mebó mé nʉ̌n. Nyé óbe, nye mû sí kâʼ nyé nó, ɨ́ jɔʼ yaá ó nyé dí e nkul ekǎ dɛn bísá byé bíbyɛ̂h, alíʼe nyé tɔʼ e sâ gwár.

²⁸ «Mě lɛ́ɛ́ bɨ́n lɨ́ otyeetye ó, misyóm bʉ̂r dí esâ mí, le nkěh bé dí esâ Nzyɛ̌m nyɨ́, Nzyɛ̌m óbɛ̌m pɛʼ bíbaa nyé dí eniʼe ɨ́ lɔ̌b bísyɛ́ɛla byaá bí.

²⁹ Sâ gwár, mʉr ngá sâ Sísǐm mé Nzyɛ̌m nkěh nyá, nye ákóʼó pɛʼɔɔ̌ baa ébébě Nzyɛ̌m óniʼe nyé ɨ́ lɔ̌b syóm yaá yɨ́. Yé ójaá didi ó, kɔ́m ti e kɔ́m.»

³⁰ Yésʉs á lɛ́ɛ nó ó, ebě, bé á lɛ́ɛ ó: «Nyě e mbɨ́ǎ sísǐm.»

Nyɔ̌ŋ e bɨ́ɔɔ́ mé Yésʉs

³¹ Bé dína náǎ nɛ́ɛ: nyɔ̌ŋ, bé e bɨ́ɔɔ́ mé Yésʉs, bê nzě pyâl, tyɛ́bɔɔ̌ kʉ̌l. Bé ntɔ̂ʼ lómo mʉ̂r ó, nye tôʼ jébě Yésʉs.

³² Entumo e bʉ̂r, lé á be ó ndîndǐl, lɨ́ ebɔma nyé ɨ́ nká. Bé e Yésʉs ó: «Paá bee: nyʉ̌ŋ, le bɨ́ʉ̌, le okɛ́l bô, bé ó kâʼ kʉ̌l lɨ́ esáa gô!»

³³ Yésʉs ntɔ̂ʼ yala e bé ó: «Nzé dí nyɔ̌ŋ wǎm? Onzé dí bɨ́ɔɔ́ bâm le okɛ́l bâm?»

³⁴ Nye ntɔ̂ʼ dwɛ̂ʼ bʉ̂r o b'á be mindîndǐl, bé á bɔma nye ɨ́ nká bá. Nye ó: «Beyɨɨ gá, bâʼ ó dí nyɔ̌ŋ wǎm, le bɨ́ɔɔ́ bâm le okɛ́l bâm!

³⁵ Mʉr nyɨnyɛ̂h dí esâ sá Nzyɛ̌m dí ekpɛl yɨ́ nyá ó dí wǎm mɨ́ɔɔ́, wǎm kɛ́l ndu e wǎm nyɔ́ŋ.»

« Roimhe

Air adhart »

Lean sinn:

Ceanglaichean taic

Sanasan