Markus 16 - Kálar Nzyɛ̌m : Ejwán é Sáá

Pahá sóo mé Yésʉs

¹ Jɔ̌ʼ móhó sábat, wé á sil elaa yɨ́, Maria, silě Magdalâ, le Maria nyɔ̌ŋ mé Jacques ti e Salóme, bé ntɔ̂ʼ tó bwâm lɔbína ó, bé ótó lœ̌m múú mé Yésʉs.

² Ɨ́ mɛ́n sóno, ɨ́ megbɔa me dʉ́o, bê nzě tô nko sóo.

³ Bé á tʉtô le edíila páʼ nyɔ́ɔ́ ó: «Nzé nyɨɛ ngá bíŋle gá mɨná ekóʼ e dí ɨ́ num sóo lɨ́?»

⁴ Bé ká dwɛ̂ʼ nɛ́ɛ: bee ó, ánɨ̂nɨ̂n ekóʼ laá, lé osí bíŋlɔɔ, lé mû lɨ́ empah.

⁵ Bê nzě nî ɨ́ soo, tó kœb yʉ́ʉ́ loʼo ndîndǐl ɨ́ páʼ mbó éjʉ̂m le kán ɨ́ pumo pumo ɨ́ nyʉ̂l. Bé ntɔ̂ʼ buú jóʼo bʉ́á.

⁶ Nó ó yé á lɛ́ɛ e bé ó: «Ayɨ́ jóʼo gá bʉ́á. Bɨ̌n sáá ó, Yésʉs, mʉr Nazarɛ̂t, waá bé á bomlo ɨ́ kolôs kʉ́ nyá. Nyɨ́ pah. Nyé akǎ be wâ. Paá bee gâ: súm bé á dɨl múú wé yɨ́ ó yɨ̂!

⁷ Tóʼ gâ. Tó lɛ́ɛ gá ompʉ́n bé ndu e Pétrus ó: “Nyɨ́ sámle, lɨ́ etô bóno bɨ́n ɨ́ sí Galilê! Gʉ̂ʼ ó bɨ́n ngá bee nyê mpʉ nyé á boo lɛ́ɛ bɨ̌n yɨ́.”»

⁸ Nó ó bé á duho ɨ́ soo, ntɔ̂ʼ kpɛ́ɛ e mikám, ebě, bé á be ó lɨ́ ejóʼo bʉ́á le ekɛ̂n. Bé á be yɨ́ɛ ó, alɛ́ɛ mʉ̂r sɔ̂ʼ, ebě, bé á be ó lɨ́ ejóʼo bʉ́á.

[Yésʉs lɨ́ elɛ̂ʼle nyʉ̂l nyé píe pahá sóo wé]

⁹ [Ɨ́ mpʉ̌ Yésʉs á be, nye mû sí pah ɨ́ soo ɨ́ mɛ́n móhó sóno yɨ́, nye á nyɛɛ nyɨ̂n ó, kwá mé Maria, silě Magdalâ, mʉmá nyé á so meleme nzaangbá ɨ́ nyʉ̂l nyá.

¹⁰ Nye ntɔ̂ʼ tô e mpáŋla, tó lɛ́ɛ bʉ̂r o bé e boo Yésʉs bé á bɨbe sɔ́má bá. Bé á be ó, bé dína lɨ́ ekúhó lé, le ejɨŋɔɔ médwê.

¹¹ Jɔʼ bé á jóʼo mpʉ mʉ́má waá á lɛ́ɛ bé ó, Yésʉs, nyɨ́ pah, nyɨ́ bee ntémé nye yɨ́, bé á bé abûʼla.]

¹² [Píe tɨ̂, Yésʉs nzě pyâl kwá bʉ́ʉ́ ómpʉ́n bé obá, nzě lɛ̂ʼle bé nyʉ̂l nyé, nye mû gúú mbi swîh. Bé á be ó nzɨ́ e nzɨ̌, lɨ́ etô kwár nyɔ́ɔ́.

¹³ Bɨ́ɛ ntémé ntɔ̂ʼ tô e lɔ́ɔ waá, tó lɛ́ɛ bʉ́ʉ́ ómpʉ́n, bɨ́ɛ njɨ lɨ́ esóŋlo.]

¹⁴ [Píe tɨ̂, ɨ́ mesíé, Yésʉs ntɔ̂ʼ lɛ̂ʼle ómpʉ́n kám e ngwár nyʉ̂l nyé, ɨ́ jɔʼ bé á be lɨ́ ede yɨ́. Nye á si dwe bé mebě, ebě, bé á bé abûʼla nyê. Ebě, ntémé, bé á be ó e miléme ɨ́ lele lele. Bé á bé abûʼla bʉ̂r o b'á to lɛ́ɛ bé ó, bé á si bee Yésʉs, nye lɨ́ ekubla bá.

¹⁵ Nó nyé á lɛ́ɛ e bé ó: «Tóʼ gá ɨ́ sí yɨ́yɛ̂h, lɨ́ etô le etúnǒ Mbɨambɨa Lɔ́ɔ ɨ́ mesí mɨ́mɛ̂h Nzyɛ̌m á kuho má.

¹⁶ Waá ngá dyɛ̂ʼwo e me, ntɔ̂ʼ duŋɔɔ nyá, ótiʼe. Waá ngá be, adyɛ̂ʼwo e me nyá, nyɨ́haá ó ngá dweŋɔɔ bíntɨ́ʼá bi dí ɨ́ buú bébe bí.

¹⁷ Nó bʉr o ngá dyɛ̂ʼwo e me bá, bé ósâ mésimá mâ: Bé óso méleme ɨ́ bʉr e nzɨ̌ díé lâm. Bé ólwib báayogoyogo.

¹⁸ Bé ómɛ̂r ónyʉ́a e mebô. Bé ódě joʼo nó, adwe. Sɔ̂ʼ, yé ákóʼó sâ bé ebébe. Bé ókɛl mímbêl mebô, mimbêl myaá ntɔ̂ʼ tiʼe.»]

[Yésʉs lɨ́ ebére ɨ́ jʉ́o]

¹⁹ [Jɔ̌ʼ Tî Yésʉs á sil elwib e bé nó yɨ́, Nzyɛ̌m nzě nʉa nyé, tô e né ɨ́ jʉ́o kʉ́, tó dil nyé ɨ́ mbó éjʉ́m wé.

²⁰ Nó ó ómpʉ́n bé, bé á to le etúno Mbɨambɨa Lɔ́ɔ ɨ́ gúmó yɨ́yɛ̂h yɨ́. Píe lɔ́ɔ́ bé á túno wɨ́, Tî Yésʉs á ntɨntɨh mesimá ó, maá me dí eboʼlo ó, lɔ́ɔ́ wɔ́ɔ́, wé á kʉ be ó tyeetye má.]