Markus 11 - Kálar Nzyɛ̌m : Ejwán é Sáá

Yésʉs lɨ́ enî Yerʉ́zalɛm

¹ Jɔʼ bé á be, bé mû bǎʼ e Yerʉ́zalɛm, bǎʼ e Bɛtfagée le Bétanî, lɨ́ Ecwɨ́ʼ lé ólivier yɨ́, Yésʉs nzě lómo ómpʉ́n bé obá.

² Nye ó: «Tóʼ gá kwár dí bɨ̌n lɨ́ empǒm nɨ̌. Bɨ́n ónî tɨ̂ʼ nó, bɨ̌n bé ókœb mâ kamntʉl tyeelá, yé dína, mʉr apǎ kalwo ɨ́ yê. Tiyɨɨ gá yê. Bɨ̌n a nzé mé e yé wâ.

³ Mʉ̂r sí dî e bɨ̌n ó: “Bɨ̌n sá mpʉ́nʉ̌ ɨ́ yé ɛ́?” nó, bɨ̌n e yálá e né ó: “Ebě, Dâ, nye lɨ́ egwɨ̂m yê.” Nyé okpâhwǎ lómlo yé kâʼ báánâ.»

⁴ Nó ó bé á tô, nzě tó kœbɔɔ mâ kamntʉl tyeelá kʉ̌l lɨ́ ebê ɨ́ nkpâh nkpǎʼ. Bé ntɔ̂ʼ tii yê.

⁵ Bʉ́ʉ́ bʉ̂r o bé á kœb tɨ̂ʼ bá, bê nzě dî bé metíá ó: «Bɨ̌n bé lɨ́ esâ yé? Bɨ̌n bé lɨ́ etii mâ kamntʉ̌l nɨ̌ ɨ́ yé?»

⁶ Bé ntɔ̂ʼ yala e bé mpʉ̌ Yésʉs á lɛ́ɛ bé yɨ́, bʉr baá ntɔ̂ʼ bîr bé ó, bé tôʼ e yê.

⁷ Bé ntɔ̂ʼ tô e mâ kamntʉl kwá mé Yésʉs. Bê nzě kɛl yé mikán myɔ́ɔ́ ɨ́ koo, Yésʉs ntɔ̂ʼ di kʉ́ tɨ̂.

⁸ Bʉr ɨ́ buo buo nzě jan míkán myɔ́ɔ́ nkpǎʼ e nkpǎʼ. Bâʼ janɔɔ mémpúho bílɨ́ bé á to le ebúʼo ɨ́ bipemé má.

⁹ Bʉr o b'á be nye dóló, le baá bé á dû nye píhe bá, bé á be lɨ́ ebʉ̂ bítím. Bé á lɨlɛ́ɛ ó: «Dwéʼ gá nye kûm. Mɨná gúmlaa gá waá dí enze ɨ́ díé mé Dâ nyá.

¹⁰ Mɨná gúmlaa gá Mpóʼo ngá tyélɔɔ, nyaá Sɔ́ŋ mpám gá wɨ́ná, David á boo bono nyɨ́. Bʉr o dí ɨ́ jʉ́o kʉ́ bá, bé dwêʼ nye kûm.»

¹¹ Yésʉs nzě pyâl ɨ́ Yerʉ́zalɛm, ntɔ̂ʼ tó nî mpáh Nzyɛ̌m. Jɔʼ nyé á sil edwɛ̂ʼ ɨ́ mempah mɨ́mɛ̂h yɨ́, nye ntɔ̂ʼ tô kʉ̌l, tô Bétanî, bé le ompʉ́n bé kám le obá, ebě, yé á be ó, yé mû páʼ bíí kʉ̌ʼ.

Yésʉs lɨ́ esyɛ̌m lɨ́ figyê

¹² Ɨ́ mɛ́n tɨ̂, ɨ́ jɔʼ bé á nkɛ́ɛ Bétanî yɨ́, Yésʉs á be ó, nye mû lɨ́ ejóʼo nzâ.

¹³ Mpʉ nyé á tyɛ̂b lɨ́ ejaa, beě lɨ́ figyê e biká yɨ́, nye nzě tó dwɛ̂ʼ nkʉ̂ nye óbɛ̌m kœb mpúmó tɨ̂. Jɔʼ nyé á ka kumo lɨ́ enzuʼ é lɨ́ yɨ́, nye á jaa kœb ó, njɨ biká e biká, ebě, yé á bé abě jɔ̌ʼ nkónó ófigyê.

¹⁴ Nó ó Yésʉs á nze lɛ́ɛ e lɨ́ figyê ó: «Mʉr, nye ákǎ báʼǎ de mpúmó nyǒ lʉ́ʉ́ dʉ́o.» Ompʉ́n bé, bé á si jóʼo sá nyé á lɛ́ɛ yɨ́.

Yésʉs lɨ́ eso óbɛ́ma o bísɔ̂ʼ ɨ́ mpáh Nzyɛ̌m

¹⁵ Nó bé á pyâl ɨ́ Yerʉ́zalɛm, nzě nî mpáh Nzyɛ̌m. Yésʉs ntɔ̂ʼ so bʉ̂r o b'á be lɨ́ ebɛ́ma, le baá bé á be lɨ́ ebwâm bá. Nye ntɔ̂ʼ nkɛŋ ótéble o bʉ̂r o b'á sisyɛ́ɛla bimɔnɨ́ bá sí, lôʼlo bídiá bi bʉ̂r o b'á bɨbɛ́ma mepɨbaa bá.

¹⁶ Nye á bé abá bîr ó, mʉr ntáŋaa epɛn e mpáh Nzyɛ̌m lɨ́ enkɛ́ɛ mímbeʼ.

¹⁷ Nye ntɔ̂ʼ dwe bé milɛ́ʼlá. Nye ntɔ̂ʼ dî e bé ó: «Bé á bé así cɛma ó: “Mbɛ̌r wâm, wé óbe ó mbɛ̌r mínjɨʼla lɨ́ esú é bíkúl bíbyɛ̂h” ɛ̌? Nó bɨ̌n bɨɛ̌ dwir wé ó, ekul e bínzilngǎn.»

¹⁸ Ojwɨ́ɨ o mpáh Nzyɛ̌m le olɛ̂ʼla o métié, ɨ́ mpʉ bé á jóʼo sá nyé á lɛ́ɛ yɨ́, bé ntɔ̂ʼ sáa ménzɨ̌ ó, bé jʉ́ ó nye. Bé á be yɨ́ɛ ó lɨ́ ekpɛ́ɛ nyê, ebě, entumo e bʉ̂r lɨ́lɛ̂h, lé á be ó lɨ́ ebuú kâm mbi mílɛ́ʼlá nyé á dwe mí.

¹⁹ Jɔʼ dʉ́ó lé á léŋa yɨ́, Yésʉs le ompʉ́n bé nzě duhǒ nkana.

Lɨ́ figyê, yɨ́ dwɛ̂hla

²⁰ Ɨ́ dwiné mɛ́n ntuʼkolo, ɨ́ jɔʼ bé á laǎ gúmo yaá yɨ́, bé á ka kœb ó, lɨ́ figyê yaá, yé mû sí dwɛ̂hla, táare ɨ́ mikaalé, tó pyâl ɨ́ biká.

²¹ Pétrus nzě símsǎ sá Yésʉs á lɛ́ɛ yɨ́. Nye e Yésʉs ó: «Lɛ̂ʼla, paá bee: lɨ́ figyê gó á syɛm yɨ́, yɨ́ bánǎ dwɛ̂hla!»

²² Yésʉs ntɔ̂ʼ lɛ́ɛ e bé ó: «Dyɛ́ʼwáá gá e Nzyɛ̌m!

²³ Mě lɛ́ɛ́ bɨ́n lɨ́ otyeetye ó, mʉ̂r ólɛ́ɛ le ecwɨ́ʼ lɨ̂ʼ ó: “Mɔaa náǎ. Tó nkaŋa ɨ́ mâŋ” nó, lé ósâ nó, ɨ́ lɔ̌b búʼó yé. Mʉ̂r waá óbe, asóŋlo ɨ́ nye mʉr tɨ̂, jaá bûʼlǎ sɔ̂ʼ ó, njɨ lɔ́ɔ́ wé, wé ódira nó, wé ókʉ́ bánǎ dirǎ tyeetye.

²⁴ Sâ yaá ó mé dí elɛ́ɛ bɨ́n ó, sá yɨ́yɛ̂h bɨ́n dí edî le minjɨʼla mín bûʼláá gá ó, bɨ̌n bɨ́ bi yê. Yé ódweŋɔɔ bɨ́n.

²⁵ Bɨ́n ótyɛ̂b mítîtyěl lɨ́ esâ mínjɨʼla, bɨ́n e bʉr dína e lɔ̌b nó, sáʼ gá ó, bɨ̌n nyɛ́ɛ pɛʼ bíbaa bí ébébe bɨ́n á niʼe bé bí. Nó ó Sɔ́ŋ wɨ́n dí ɨ́ jʉ́o kʉ́ nyá ngá pɛʼ ntémé bibaa bí ébébe nyé á niʼe bɨ̌n bí. [

²⁶ Bɨ́n sí kʉ́ láa bíbaa bí ébébe bɨ́n bé á niʼe bʉr nɛ́ʼɛ, Sɔ́ŋ wɨ́n dí ɨ́ jʉ́o kʉ́ nyá, nye ntémé óláa bíbaa nyé á niʼe bɨ̌n ɨ́ misyóm mín bí.]»

Jwɨ́ɨ́ mé Yésʉs, yê duho wó?

²⁷ Bé ntɔ̂ʼ báʼǎ tô Yerʉ́zalɛm. Jɔʼ nyé á to le etye tʉ́ŋlʉ̌ mpáh Nzyɛ̌m yɨ́, ojwɨ́ɨ o tɨ̂, le olɛ̂ʼla o métié, le otɔ́má bʉ̂r o b'Ɨ́zraɛ̂l, bê nzě tô gúmó nyé á be yɨ́.

²⁸ Bé e né ó: «Nzé á lómo go ó, go sâʼ mbi bísyɛ́ɛla gó dí esâ bî? Go ntémé pʉgʉ́ sâ byé e nkul jwɨ́ɨ mé nzé?»

²⁹ Nó ó Yésʉs á yala e bé ó: «Me múo nzě dî bɨ́n njɨ tíá mpwár. Bɨ́n sí kʉ́ gwá yala nó, ɨ́ jɔʼ yaá ó mé ngá twóolo bɨ́n díé é mʉ̂r dí edwe mé nkul ó, me sâʼ bisyɛ́ɛla bínɨ̌ nyá yɨ́.

³⁰ Nzé á pʉgʉ dwe Yʉánɛs nkul ó, nye tôʼ le edu bʉ̂r: nzê Nzyɛ̌m, nzê bʉr? Yalaa gá me!»

³¹ Nó ó bé á nze timle tíá nyé páʼ nyɔ́ɔ́. Bé ó: «Mɨ́ná yálá gá ó: “Nzyɛ̌m ó b'á lómo nye” nó, nye óbáʼǎ dî ó: “Á bɨ̌n bɨɛ bé á bé abûʼla nyé ɨ́ yé ɛ́?”

³² Mɨ́ná yálá gá ó: “Bʉr ó b'á lómo nye” nó,...» (Bé á be ó lɨ́ ekpɛ́ɛ mínzɨnzɨ mi bʉ̂r, ebě, bʉr bɨ́bɛ̂h, bé á be ɨ́ kʉ́ gʉ́a ó, Yʉánɛs á be ó ngwíha milɔ̌b mé Nzyɛ̌m.)

³³ Bé ntɔ̂ʼ yala e Yésʉs, lɨ́ elɛ́ɛ e né ó: «Bɨ̌h bé agʉ́a.» Yésʉs, nye e bé ó: «Yé bé nó wá, me ntémé, me ákóʼó lɛ́ɛ bɨ́n mʉr dí edwe mé nkul ó, me sâʼ bisyɛ́ɛla bínɨ̌ nyá.»