Markus 10 - Kálar Nzyɛ̌m : Ejwán é SááEjwɨ́ɨ́ lé ébâ ( Matthieu 19.1-12 ) 1 Nó ó Yésʉs á duhǒ gúmo yaá, nzě tô sí Yʉ́da, ntɔ̂ʼ ntaa, tô ɨ́ pɨ̌n díbé Yɔrdên kɔ́m nkɛ́ɛ́. Entumo e bʉ̂r ntɔ̂ʼ báʼǎ mâʼlǎ gúmó nyé á be yɨ́. Nye nzě nyɛl édwe bé milɛ́ʼlá ɨ́ mpʉ nyé á pa boo sɨ̂sa yɨ́. 2 Nó ó bʉ́ʉ́ óFarizyɛ̂n, bé á nze ó, lɨ́ enzě bóblɔɔ nyê. Bé ntɔ̂ʼ dî e né ó: «Nzê metié gá mɨ́ná, mé kam ó, mʉr bírɨɨ mʉmá wé ɛ́?» 3 Nó nyé á yala e bé ó: «Moyɨ̂z á lɛ́ɛ bɨ̌n nyá ɛ́?» 4 Bé e né ó: «Moyɨ̂z á si tíʼe ó, mʉr cɛ́maa mekaná mé éjwɨ́ɨ́ lé ébâ, dwe myɛ́l. Jɔʼ yaá ó nyé dí bɛ̌m bwóolo nyé yɨ́.» 5 Nó ó Yésʉs á lɛ́ɛ e bé ó: «Moyɨ̂z á tyeele bímpám gá bíná etié énɨ̌ ó, lɨ́ esú lɨ́n, ebě, bɨ̌n bé ɨ́ buú lele míléme. 6 Sâ gwár, ɨ́ metááré, “ɨ́ jɔ̌ʼ Nzyɛ̌m á komlo sá yɨ́yɛ̂h yɨ́, nye á komlo bé ó: nyâ, mʉrʉ̂m; nyʉ́ʉ́, mʉmá. 7 Sá tɨ̂ʼ ó mʉ́rʉ̂m ólíʼe sɔ́ŋ e nyɔ̌ŋ, tó nara e mʉmá wé yɨ́. 8 Bɨ́bɛ̂h obá, bé óbe ó, ebɔ̂b e nzyeŋle, pʉ́m le ebo. Bé akǎ be óbá, njɨ púnó gwár. 9 Mʉ̌r sá adɛ́ɛ̌ sá Nzyɛ̌m mû sí nɛr yɨ́.» 10 Jɔʼ bé le ompʉ́n bé, bé á be, bé mû tʉ́ŋlʉ̌ mbɛ̌r yɨ́, bê nzě báʼǎ dî nyé tíá ɨ́ lɔ̌b waá. 11 Nó nyé á lɛ́ɛ e bé ó: «Mʉ̂r bwóóló mʉ́má wé, bâ waá swîh nó, nyɨ́ sâ médyɛ̂n ɨ́ nkǒ pâʼ mʉ́má esôʼ wé. 12 Mʉ́má óbɔ́ʼa e njʉ̂m wé, tô lɨ́ ebá éswîh nó, nyɨ́ sâ médyɛ̂n ntémé ó nɨ̌.» Yésʉs lɨ́ esʉ bwá ó ntwǒm metyɛʼ me mpóm ( Matthieu 19.13-15 ; Luc 18.15-17 ) 13 Bʉr ntɔ̂ʼ nze nyé e bwán bɔ́ɔ́, ó nye kɛ́lɨɨ bé mebô. Ompʉ́n bé bɨ́ɛ kʉ́ nzě beně syɛ́ɛla yaá, ntɔ̂ʼ dweŋɔɔ bé mebě. 14 Mpʉ̌ Yésʉs á bee nó yɨ́, nye ntɔ̂ʼ jóʼǒ syɛ́ɛla yaá ebébe. Nye e bé ó: «Bírɨ́ɨ́ gá bwá ó ntwǒm, bé ntâʼ nko mé dí yɨ́. Ayɨ́ so gá bê, ebě, Mpóʼo mé Nzyɛ̌m, nye tyélá ó, lɨ́ esú é bʉ̂r o dí enwɨɨla e bé bá. 15 Mě lɛ́ɛ́ bɨ́n lɨ́ otyeetye ó, mʉr nyɨnyɛ̂h dí anî ɨ́ Mpóʼo mé Nzyɛ̌m mpʉ mâ ntwǒm nyá, nye ákóʼó nî tɨ̂.» 16 Nye nzě beŋle bwá baá bɨ́bɛ̂h, kɛl bé mebô, le esʉ bé metyɛʼ me mpóm. Kúmá sohó ( Matthieu 19.16-30 ; Luc 18.18-30 ) 17 Mpʉ nyé á be, nye mû lɨ́ eja nzɨ́ yɨ́, nyʉ́ʉ́ mʉ̂r nzě swǐm kám, bɨʼ mébóó sí ɨ́ mpǒm nyé, ntɔ̂ʼ dî e né ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?» 18 Yésʉs nzě yala e né ó: «Go lɨ́ ejébe mé mbɨambɨa mʉr ɨ́ yé? Yé abe e mʉr dí ɨ́ mbɨa, njɨ Nzyɛ̌m nye omér. 19 Gʉ́ gʉ́a métié mé Nzyɛ̌m. Mé lɛ́ɛ́ ó: “Ajʉ̂ mʉ̂r. Asâ médyɛ̂n. Adíbe. Ayala ɨ́ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h. Anʉa mʉ̂r sɔ̂ʼ e mikóo. Dwéʼ sʉ́ŋ e nyʉ̌ŋ dúu.”» 20 Mʉ̌r nɨ̌ nzě lɛ́ɛ e né ó: «Lɛ̂ʼla, mɨ́ baʼle métié ménɨ̌ mɨ́mɛ̂h, táare lɨ́ ontwǒm wâm, kumo mûh.» 21 Yésʉs nzě dwɛ̂ʼ nyê, kpɛl ntémé nye. Nye e né ó: «Yé lɨ́ esáa gó sâ gwár. Tóʼ. Tó bɛ́mǎ bím bísá gó dí e byé bí. Go e dwé míndyêbndyéb mɔnɨ́ yaá. Jɔʼ yaá ó gó ngá bi ókúm le ogbaa ɨ́ buo buo ɨ́ jʉ́o kʉ́, kwá mé Nzyɛ̌m yɨ́. Píe tɨ̂, go e nzé dû mê!» 22 Njóʼá mʉ̂r waá á jóʼo yalá yaá yɨ́, nye kʉ́ nzě tyɛʼ nyʉ̂l, ntɔ̂ʼ búla ɨ́ twíaaa, ebě, nye á bě e okúm le ogbaa le ombeʼ o nyʉ̂l. 23 Yésʉs nzě dwɛ̂ʼ ómpʉ́n bé, bé á bɔma nye ɨ́ nká, tyɛ̂b bǎʼ e né bá. Nye ó: «Yé ɨ́ buú kɔbla lɨ́ enî ɨ́ Mpóʼo mé Nzyɛ̌m ɨ́ jɔʼ gó dí le okúm le ogbaa ɨ́ buo buo yɨ́!» 24 Ompʉ́n bé, kʉ́ nzě kâm lwǐb yé! Yésʉs ntɔ̂ʼ báʼǎ lɛ́ɛ e bé ó: «Bwán bâm, yé ɨ́ kɔbla lɨ́ enî ɨ́ Mpóʼo mé Nzyɛ̌m! 25 Mpʉ yé dí ɨ́ kɔbla ó, chameau láŋaa lɨ́ egʉ́á é ntʉ́á yɨ́, jwɨʼ gwár e gwár yaá ntémé ó dí ɨ́ buú kɔbla ó, kúmá mʉr níʼee ɨ́ Mpóʼo mé Nzyɛ̌m.» 26 Bé ntɔ̂ʼ kâm lwǐb yé, minum mimběʼ, laǎ mpʉ bé á nyɛɛ kɨkâm yɨ́. Bé ntɔ̂ʼ díila páʼ nyɔ́ɔ́ ó: «Yé bé nó wá, nzé nyɨɛ ngá koʼo lɨ́ enî ɨ́ twǐʼ njʉ̌m dǐ?» 27 Yésʉs dwɛ̂ʼ bê, ntɔ̂ʼ lɛ́ɛ e bé ó: «Bʉr, bé ákóʼó nî tɨ̂ʼ ɨ́ lɔ̌b ménkul mɔ́ɔ́, bé bʉr o tɨ̂. Sâ gwár, Nzyɛ̌m ó dí e nkul esâ bísá bíbyɛ̂h.» 28 Pétrus nzě nʉǎ lwǐb. Nye e né ó: «Paá bee: bɨ̌h bɨ́ líʼe bísá bíh bíbyɛ̂h, njɨ lɨ́ edû gô.» 29-30 Yésʉs, nye e né ó: «Mě lɛ́ɛ́ bɨ́n lɨ́ otyeetye ó, yé abe e mʉr dí, sí líʼě mbɛ̌r wé, bɨ́ɔɔ́ bé, okɛ́l bé, nyɔ̌ŋ wé, sɔ́ŋ wé, bwán bé, le bipemé byé ɨ́ lɔ̌b nyé dí edû mé le ebúʼlǎ Mbɨambɨa Lɔ́ɔ nyá, mʉr tɨ̂ʼ di, abáʼǎ bi byé nzɔʼ nter báánâ. Nye óbi mímbɛ̌r e bipemé. Nye ókœb bɨ́ɔɔ́ le okɛ́l, le onyɔ̌ŋ, le bwân. Nye ósia ntémé e mitúú ɨ́ lɔ̌b Mbɨambɨa Lɔ́ɔ waá. Nó ɨ́ jɔʼ éswéhlɨ́ é sí yɨ̂ʼ ngá pyâl yɨ́, mʉr waá óbǐ twǐʼ njʉ̌m dǐ. 31 Sâ gwár, bʉr ɨ́ buo buo o dí esôʼ bá, bé ódi épíhe. Baá dí epíhe bá, bé ódi ésôʼ.» Yésʉs lɨ́ eboó lɛ́ɛ̌ pô eswie lé ndu e pahá sóo wé ( Matthieu 20.17-19 ; Luc 18.31-34 ) 32 Nó bé á be ó, bé mû lɨ́ ebére ɨ́ nzɨ̌, lɨ́ etô Yerʉ́zalɛm, Yésʉs esôʼ, ompʉ́n bé lɨ́ ebɔma nyê, bɨ́ɛ e miléme tyelá kʉ́ ɨ́ bʉ́á. Bʉ́ʉ́ bʉ̂r o b'á be lɨ́ edû bé bá, lɨ́ ejóʼo ntémé bʉ́á. Yésʉs nzě jébe ómpʉ́n bé kám le obá lɨ́ empah, nzě lɛ́ɛ bé sá múo nzě pyâl nyé yɨ́. 33 Nye ó: «Paá bee gâ: mɨná mû ó lɨ́ ebére gá Yerʉ́zalɛm. Mwân mé Mʉr óbɛ́mɔɔ kwá ojwɨ́ɨ o mpáh Nzyɛ̌m le olɛ̂ʼla o métié. Bé ótíʼě lɔ̌b wé ó, nye dwêʼ. Nye óbɛ́mɔɔ kwá bʉr o bíkûl e biloo. 34 Bé ópya nyé le esyɛɛ nyé metyéelé ɨ́ mîh. Bé óŋmɛ̂h nyé mingáhá, jʉ̂ nyê. Elú élɛ̂l píe tɨ̂, nye ópah ɨ́ soo.» Tíá mé Jacques bé e Yʉánɛs ( Matthieu 20.20-28 ) 35 Píe tɨ̂, Jacques bé e Yʉánɛs, bwán mé Zebedê, nzě sîhlě bǎʼ e Yésʉs. Bé e né ó: «Lɛ̂ʼla ɛ̌, bɨ̌h gwɨ́m ó, sá yɨ́yɛ̂h bɨ́h ngá dî gó yɨ́, go dwêʼ bɨ̌h yǎ.» 36 Nó ó Yésʉs á dî e bé ó: «Bɨ̌n kpɛl ó, me sâʼ bɨ̌n yé?» 37 Bê nzě yala e né ó: «Ɨ́ jɔʼ gó óbe, go mû ɨ́ diá kûm yô yɨ́, kamaa ó, bɨ̌h díʼee bǎʼ e go: nyâ, ɨ́ mbó éjʉ̂m; nyʉ́ʉ́, ɨ́ mbó émyɛ̌l.» 38 Nó ó Yésʉs á lɛ́ɛ e bé ó: «Bɨ̌n bé agʉ́ǎ sá bɨ́n dí edî yɨ́. Nzê bɨ̌n bé e nkul enkɛ́ɛ mítúú mé mû lɨ́ enzě nkɛ́ɛ mî, nkʉ̂ duŋɔɔ̌ ndubó mítúú mé ngá duŋɔɔ tɨ̂ʼ wɨ́ ɛ́?» 39 Bê nzě yala e né ó: «Bɨ̌h bé e nkul esâ.» Yésʉs, nye e bé ó: «Yé ó nó: bɨ̌n bé ónkɛ́ɛ mítúú mé ngá nkɛ́ɛ mí, le eduŋɔɔ̌ ndubó mé ngá duŋɔɔ wɨ́. 40 Sâ gwár, ɨ́ páʼ édi ɨ́ mbó éjʉ́m wâm, nkʉ̂ ɨ́ mbó émyɛ̌l wâm, ntʉ mɛ̂m tíʼé wɨ́nɨ̌ lɔ̌b. Bidiá byaá, byé bónó ó baá Nzyɛ̌m á boo komlo byé lɨ́ esú lɔ́ɔ́ bá.» 41 Nó ɨ́ jɔʼ bʉ́ʉ́ ómpʉ́n kám, bé á jóʼo lɔ̌b waá yɨ́, bê nzě jóʼǒ Jacques bé e Yʉánɛs ebébe, nzě dweŋɔɔ bé mebě. 42 Yésʉs nzě jébe bɨ́bɛ̂h. Nye ó: «Bɨ̌n bɨ́ gʉ́a ó, bʉr o dí enyɨ̂n ó, bé ó minjwɨ́ɨbʉr bá, bé jwɨ́ɨ́ ó e cére. Bʉr onɨ́nɨ́ɨ́ baá, bé kpɛl ó, bé lɛ̂ʼlaa bʉr mpél yɔ́ɔ́. 43 Sâ gwár, mbǐ syɛ́ɛla waá, wé ajala le esyɛ́ɛlɨ páʼ nyɨ́n. Mʉ̂r ngwár ɨ́ sɔ́má yɨ́n sí kpɛl édi njwɨ́ɨ nó, nye díʼee syɛ̂l mesâ wɨ́n. 44 Ntémé, mʉ̂r ngwár ɨ́ sɔ́má yɨ́n ókpɛl édi ésôʼ nó, nye díʼee túʼǎ yɨ́n, bɨ̌n óbɛ̂h. 45 Ebě, Mwân mé Mʉr mʉr tɨ̂ʼ á bé anze ó, bʉr séaa e né. Nye á nze ó, nyɨɛ séaa e bʉr, le edwě twiʼ yé, lɨ́ enzě táǎ góo, le edwih bʉ̂r ɨ́ buo buo ɨ́ mpila mísyóm, pɛʼ bé ɨ́ fá.» Yésʉs lɨ́ etǐʼ Bar-Timê ( Matthieu 20.29-34 ; Luc 18.35-43 ) 46 Nó ó bé á to pyâl ɨ́ Yerikô. Mpʉ bé á di tɨ̂ʼ ɨ́ di di di yɨ́, píe tɨ̂ʼ nɛ́ɛ: Yésʉs, bé le ompʉ́n bé le entumo e bʉ̂r, bê nzě duho ɨ́ nkana yaá. Tɨ̂ʼ lɨ́ eníŋlɨ́ é nkana, yé á be ó e nyʉ́ʉ́ ántím, Bar-Timê, mwân mé Timê, nyɨɛ ndîndǐl ɨ́ nkpâh nkpǎʼ, lɨ́ egwâm bísâ e milaa-nkpǎʼ. 47 Jɔʼ nyé á jóʼo, ó Yésʉs, mʉr Nazarɛ̂t ó nɨ̌ yɨ́, nye nzě bʉ̂ bítím ó: «Yésʉs, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!» 48 Bʉr ɨ́ buo buo, nzě nkáŋla e nye. Bé ó, nye díblaa num. Nyɨɛ kʉ́ báʼǎ bʉ́lwǎ bʉ́lwáa. Nye e né ó: «Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!» 49 Yésʉs nzě tyɛ̂b. Nye e né ó: «Jébáá gá nye.» Bê nzě jébe ántím. Bé e né ó: «Talaǎ léme. Gbɔlwáa. Nye lɨ́ ejébe gô!» 50 Nye ntɔ̂ʼ myah kʉ̂r wé, ntɔ̂ʼ gbɔlwa sí ɨ́ bʉ̂b, tô nkǒ Yésʉs á be yɨ́. 51 Yésʉs nzě dî e né ó: «Gǒ gwɨ́m ó, me sâʼ go yé?» Ántím nzě yala e né ó: «Lɛ̂ʼla, pʉgʉ́ sâ ó, me báʼa bee ʉ!» 52 Yésʉs ntɔ̂ʼ lɛ́ɛ e né ó: «Tóʼ. Búʼó yô, yɨ́ tiʼ gô!» Tyé e tyé yaá, nye ntɔ̂ʼ bánǎ bee, nzě nî ɨ́ sɔ́má mé Yésʉs. |