Lʉkas 24 - Kálar Nzyɛ̌m : Ejwán é Sáá

Yésʉs, nyɨ́ pah ɨ́ soo

¹ Ɨ́ dwiné mɛ́n kúnó ɨ́ móhó sóno, bʉbá baá nzě nkɛ́ɛ, tóŋɔɔ̌ nko sóo. Bé á be ó e múló mé élɔma ndu e lɔbína, bisá bé á to komlo bí.

² Jɔʼ bé á pyâl yɨ́, bé ntɔ̂ʼ kœb ó, ekóʼ, lé á si bíŋla lé omér, lé mû lɨ́ empah é num sóo!

³ Bé ntɔ̂ʼ nî ɨ́ soo tʉ́ŋlʉ̌. Sâ gwár, bé á bé akœ̌b múú mé Tî Yésʉs tɨ̂.

⁴ Mpʉ bé á be, bé mû miléme ɨ́ mo ɨ́ nzamá yɨ́, bé kǎ twɨra ó, bʉr obá, bé mû ó tɨ̂ʼ e mikán ɨ́ pan pan ɨ́ menyʉ́l mɔ́ɔ́.

⁵ Nó ó mpʉ bé á bee bʉr ónɨ̌ yɨ́, bʉ́á nzě mɛ̂r bé ɨ́ miléme, bé ntɔ̂ʼ bɨʼ mémpǒm sí. Bʉr baá ntɔ̂ʼ lɛ́ɛ e bé ó: «Bɨ̌n bé lɨ́ enzě sáa mʉ̂r dí etiʼe nyá páʼ odwe ɨ́ yé?

⁶ Nyé akǎ be wâ. Nyɨ́ pah ɨ́ soo. Símsáá gá mpʉ nyé á lwib e bɨ̌n ɨ́ jɔʼ nyé á be, nye dína ɨ́ sí Galilê yɨ́. Nye á lɛ́ɛ ó:

⁷ “Yé jala ó, bé bɛ́maa Mwân mé Mʉr, tímle nyé ɨ́ mebó mé ósyɛ̂l o mísyóm. Bé óbomlo nyé ɨ́ kolôs kʉ́. Nye ódwe, debe ɨ́ soo. Nye ójâ ɨ́ soo melú mébá. Lɨ́ elú élɛ̂l, nyé opah.”»

⁸ Jɔʼ bé á jóʼo nó yɨ́, bé ntɔ̂ʼ kǎ símsa mékǎn mé Yésʉs á boo lɨlɛ́ɛ bé má.

⁹ Bé ntɔ̂ʼ tô kʉ̌l, búlɔɔ, tó lɛ́ɔɔ bʉ̂r o mílʉ́mlʉ́ kám e ngwár, bé e bʉ́ʉ́ bʉ̂r bɨ́bɛ̂h, sá yɨ́yɛ̂h á syɛ́ɛ yɨ́.

¹⁰ Bʉbá baá, bé á be ó: Maria, silě Magdalâ, le Yʉána, le Maria, nyɔ̌ŋ mé Jacques ti e bʉ́ʉ́ bʉ́bá, bé e boo nɔ́ɔ́, bé á be bá. Bé á si baʼa lɛ́ɛ bʉr o mílʉ́mlʉ́ mé Yésʉs lɔ́ɔ ngwár waá.

¹¹ Sâ gwár, bʉr o mílʉ́mlʉ́ mé Yésʉs, bé á gʉ́a ó, yé ó baántéʼenteʼe o mílɔ́ɔ. Bé á bé akǎm lɔ́ɔ waá.

¹² Damá jóʼo nó, Pétrus á si mɔa sí ɨ́ bʉ̂b, tô kám, ntɔ̂ʼ pyâl ɨ́ soo, kúrwo sí, déŋle tʉ́ŋlʉ̌, beě njɨ mimyɔʼ bé á dyɛl ɨ́ múu mí. (Mimyɔʼ myaá, myé á be ó misɛ́á e ndɔ́má kán ɨ́ pumopumo.) Nye ntɔ̂ʼ búla, le ekʉ́ kâm sá nyê bee yɨ́.

Bʉr obá, bé lɨ́ etô ɨ́ nzɨ̌ Emáʉs

¹³ Ɨ́ móhó ngwár waá, bʉ́ʉ́ bʉ̂r obá ɨ́ sɔ́má yɔ́ɔ́ nzě duho ɨ́ Yerʉ́zalɛm, lɨ́ etóŋɔɔ kwár á be e díe ó, Emáʉs nyɨ́. Páʼ Yerʉ́zalɛm le Emáʉs, yé ó kúnókúno le okíloméra kám e ngwár.

¹⁴ Nzɨ́ e nzɨ̌, bé á be ó lɨ́ elwib bísá bíbyɛ̂h byé á be, alúno syɛ́ɛ̌ Yerʉ́zalɛm bí.

¹⁵ Mpʉ bé á lɨlɛ́ɛla le edíila métíá nó yɨ́, Yésʉs mʉr tɨ̂ʼ ntɔ̂ʼ dû bê, tó kœb bê. Bé e boo nɔ́ɔ́ ntɔ̂ʼ syɛŋǎ sɔ́má gwár.

¹⁶ Jɔʼ bé á be lɨ́ etô yɨ́, bé á be lɨ́ ebee nyé; sâ gwár, adweʼe yɨ́ɛ nye.

¹⁷ Nó ó Yésʉs á nze dî e bé ó: «Bɨ̌n pʉgʉ́ lab yé ɨ́ nzɨ̌ nyɨ̂ʼ mûh?» Bé ntɔ̂ʼ tyɛ̂b, mempǒm milwaará le ebúʼ.

¹⁸ Nyʉ́ʉ́ mʉ̂r tɨ̂ʼ á be e díe ó, Kleopâs nyá, nzě lɛ́ɛ e né ó: «Yê nyá? Nzê go ó njɨ njwóo wâʼ ɨ́ Yerʉ́zalɛm, lɨ́ esú ó, go jéʼaa sá dí esyɛ́ɛ ɨ́ melú mâʼ yɨ́ ɛ̌!»

¹⁹ Yésʉs ntɔ̂ʼ dî e bé ó: «Yê ba syɛ́ɛ́ gʉ̂?» Bé ntɔ̂ʼ yala e né ó: «Bɨ̌h lwib ó, sá dí edumo e Yésʉs, mʉr Nazarɛ̂t yɨ́. Nye á be ó ngwíha milɔ̌b mé Nzyɛ̌m. Nye á be ó, le ánɨ̂nɨ̂n nkul ɨ́ melab mé le ɨ́ bisyɛ́ɛla nyé á sɨsâ bí. Damá jóʼǒ Nzyɛ̌m, nkʉ̂ ntémé bʉr, bé á si bee nó, bɨ́bɛ̂h.

^20-21 Bɨ̌h bɨɛ á jwɨʼ ó, nye ó b'á duho kwá mé Nzyɛ̌m, ó nye ónzě táǎ góo, le edwǐh sí gá yɨ́ná Ɨ́zraɛ̂l ɨ́ mpila ébébe. Tó kœb ó, ojwɨ́ɨ o mpáh Nzyɛ̌m gá wɨ́ná, le ojwɨ́ɨ́ ó sí gá yɨ́ná, bé á si bɛ́ma nye, le esâ ó, bé dwêʼ nye mebě me jálá le eswie má. Nó ó bé á bomlo nye ɨ́ kolôs kʉ́ yɨ́. Ntémé, gúú lɔ̌b swîh, wé ó wɨ̂: gbaa yé á syɛ́ɛ nó, elú élɛ̂l ó dí kʉ́ lɨ̂.

²² Píe tɨ̂, bʉ́ʉ́ bʉ́bá ó sɔ́má yɨ̂h sí lɛ́ɛ bɨ́h sá ékâm: mpʉ bê kúnó, tó dwɛ́ʼɔɔ̌ múú wé ɨ́ soo yɨ́,

²³ bê bé abee wê. Sâ gwár, bê ka nze lɛ́ɛ́ bɨ́h ó, beéngeles, bê sí pyâl bê, ntɔ̂ʼ lɛ́ɛ ó, Yésʉs, nyɨ́ pah.

²⁴ Bʉ́ʉ́ bʉ̂r ó sɔ́má yɨ̂h jóʼó nó bá, bé ntémé, bê sí tô ɨ́ soo, tó dwɛ́ʼɔɔ, tó kœbɔɔ̌ jwɨʼ gwár mpʉ bʉ́bâ lɛ́ɛ́ yɨ́. Sâ gwár, bê bé apǎ beě kuó mé Yésʉs mʉr tɨ̂.»

²⁵ Nó ó Yésʉs á nze lɛ́ɛ e bé ó: «Bɨ̌n bigʉʼlʉgʉ́, bɨ̌n bé ɨ́ buo mésónó, alɨ̌ bûʼlǎ lɔ́ɔ́ ógwíha o mílɔ̌b bé, bé á cɛma wɨ́.

²⁶ Bé á si lwib, dumo e Mʉ̌r Nzyɛ̌m á lœm múló mé jwɨ́ɨ nyá. Bé á cɛma ó, yé jala ó, nye síaa e mitúú nó, mpʉ̌ Nzyɛ̌m á kpɛl yɨ́, ó nye tôʼ di ɨ́ diá kûm nɨ́nɨ́ɨ́ yé.»

²⁷ Nye nzě nyɛl épâʼlǎ sá yɨ́yɛ̂h yé á be cɛmá ɨ́ Mekaná mé Nzyɛ̌m, dumo e né yɨ́, táare lɨ́ mekaná mé Moyɨ̂z, kumo e maá ógwíha o mílɔ̌b bé, bé á cɛma má.

²⁸ Jɔʼ bé á be, bé mû bǎʼ e kwár bé á tô nyɨ́ yɨ́, Yésʉs ntɔ̂ʼ sâ mpʉ̌ sá lɛ́ɛ́, nye ótô nzɨ́ dóló.

²⁹ Mpʉ bé á bee nó yɨ́, bé ntɔ̂ʼ lɛ́ɛ e né ó: «Mɨná díʼee gá wâ. Dʉ́o mû ó lɨ́ enzě jâ; pum lɨ́ edwíne.» Bé e nɔ́ɔ́ nzě nî mbɛ̌r tʉ́ŋlʉ̌.

³⁰ Jɔʼ bé á be ɨ́ téble lɨ́ edǐ de yɨ́, nó ó Yésʉs á nze nʉa blêr, ntɔ̂ʼ dwě Nzyɛ̌m nzyǒo. Nye ntɔ̂ʼ pɛ̂ʼ yê, dwe bé yǎ.

³¹ Jɔʼ yaá ó míh mɔ́ɔ́, mé á ka bee ɨ́ sɔ́ɔ́ɔ́, bé ntɔ̂ʼ dweʼe nyê. Le bé á dweʼe nye, le ntɔ̂ʼ nyé á dîm bé ɨ́ mîh.

³² Bé ntɔ̂ʼ lɛ́ɛla páʼ nyɔ́ɔ́ ó: «Jɔʼ mɨ́ná le onɔ́ɔ bé gá nzɨ́ e nzɨ̌ yɨ́, milémé míná bê sí kʉ́ buú soho lɨ́ ejóʼǒ mbi nyê lwilwǐb e mɨná, le mbǐ lɛ́ʼlá nyê dwé mɨ́ná, duho ɨ́ Mekaná mé Nzyɛ̌m wɨ́.»

³³ Tyé e tyé yaá, bé ntɔ̂ʼ mɔa, báʼǎ swíʼɔɔ, tóŋɔɔ̌ Yerʉ́zalɛm, kœbɔɔ̌ sɔ́má bʉ̂r kám e ngwár, bé e bɨ́ɔɔ́ bɔ́ɔ́ tɨ̂ʼ gúmo gwár.

³⁴ Bé dína pyâl nɛ́ɛ: bé kœb ó, bʉ́ʉ́ ómpʉ́n lɨ́ elɛ́ɛla páʼ nyɔ́ɔ́ ó: «Yê tyeetye ó, Dâ, nyɨ́ pah! Simon bê sí kʉ́ bee nyê!»

³⁵ Bɨ́ɛ ntémé ntɔ̂ʼ lɛ́ɛ bɨ́haá ómpʉ́n, sâ laa nzɨ́ e nzɨ̌ yɨ́, le elɛ́ɛ̌ mpʉ bê ka dweʼě Yésʉs ɨ́ pɛ́ʼá nyê pɛ́ʼ bé blêr yɨ́.

Yésʉs lɨ́ elɛ̂ʼle ómpʉ́n bé ó, nye sí kʉ́ pah ɨ́ soo

³⁶ Bʉr obá baá dína lɨ́ elɛ́ɛ bé nó, kǎ saʼ nɛ́ɛ: Yésʉs mʉr tɨ̂ʼ lɨ́ etyɛ̂b tîtyěl páʼ nyɔ́ɔ́. Nye ó: «Mepyɛbla, mé díʼee bɨ̌n ɨ́ miléme!»

³⁷ Bé ntɔ̂ʼ jóʼo ékɛ̂n, ebě, bé á jwɨʼ ó, bɨ́ beě ndîm.

³⁸ Nye ntɔ̂ʼ dî e bé ó: «Yé dí etɨ̂l bɨ́n mekʉ̌ sí? Bɨ̌n bé lɨ́ esóŋlo ɨ́ miléme ɨ́ yé?

³⁹ Jwɛ́ʼɛ́ɛ́ gá mebô ndu e mekʉ̌ mâm. Gʉ́ŋáá gá ó, yé ó me. Bóbáá gá me. Bɨ̌n gʉ́ŋaa tyeetye ó, yé ó me. Ndîm, wé abe e bipúno e bidwehé, bisá bɨ́n dí ebee mé e byé bî.»

⁴⁰ Jɔʼ nyé á sil elɛ́ɛ bé nó yɨ́, nye nzě lɛ̂ʼle bé mebô e mekʉ̌ mé.

⁴¹ Bisʉhʉʉ, byé á be bé ɨ́ miléme ó, lwɨ́ŋlá. Bé ntémé lɨ́ ebuú kâm nyê. Nó, bé á be, alɨ̌ bûʼla nyê. Nye ntɔ̂ʼ báʼǎ dî e bé ó: «Nzê bɨ̌n bé abe e sá éde wâʼ ɛ̌?»

⁴² Bé ntɔ̂ʼ dwe nyé péh mbubá sû.

⁴³ Nye ntɔ̂ʼ nʉa, de, bɨ́bɛ̂h lɨ́ ebee.

⁴⁴ Nye nzě lɛ́ɛ e bé ó: «Bisyɛ́ɛla bî, byé ó byaá mé á boo lɛ́ɛ bɨ̌n ó, byé ósyɛ́ɛ bí. Mɨná dína lɨ́ etye gá sɔ́má, me á boo lɛ́ɛ bɨ̌n ó, sá yɨ́yɛ̂h dí cɛmá ɨ́ Mekaná mé Nzyɛ̌m, lɨ́ mekaná métié mé Moyɨ̂z, le maá mé ógwíha o mílɔ̌b, le lɨ́ oSâm mé David, dumo e me yɨ́, yé ódira nó.»

⁴⁵ Nye ntɔ̂ʼ dib bé nzɨ̌ egʉ́ǎ sá Mekaná mé Nzyɛ̌m dí elɛ́ɛ yɨ́,

⁴⁶ Nye ó: «Mekaná mé Nzyɛ̌m, mé lɨ́ elɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ɨ́ jala le esia e mitúú, dwe, nzě pah ɨ́ soo lɨ́ elú élɛ̂l.

⁴⁷ Yé á boo be cɛmá ntémé ó, bʉr, bé ótô ɨ́ lʉ́mlʉ́ wé, le etúnǒ Mbɨambɨa Lɔ́ɔ. Bé ótô le elɛ́ɛ bʉ̂r ó, bé túmaa mikoo e misyóm myɔ́ɔ́, le edwira míléme, Nzyɛ̌m pɛ́ʼɛɛ bé bibaa bí ébébe byɔ́ɔ́. Lɔ́ɔ waá, wé ónyɛɛ́ túnɔɔ ó, ɨ́ Yerʉ́zalɛm, tó túnɔɔ ntémé kwá bikúl bíbyɛ̂h.

⁴⁸ Bɨ̌n ó dí oboʼlo ó lɔ̌b waá.

⁴⁹ Nó ó, me ótáare éntɨh bɨ́n sá Sɔ́ŋ wǎm á kɛʼ bɨ̌n yɨ́. Diʼee gá wâʼ ɨ́ nkana yɨ̂, lɨ́ ebóno dʉ́ó nyé ngá sul bɨ́n nkul ngá duho ɨ́ jʉ́o kʉ́ nyɨ́ yɨ́.»

Yésʉs lɨ́ ebére kʉ́

⁵⁰ Yésʉs nzě duhǒ nkana, nye ntɔ̂ʼ tô le ompʉ́n bé bǎʼ e Bétanî. Nye ntɔ̂ʼ bɨ̂n mébô, sʉ bé metyɛʼ me mpóm.

⁵¹ Nye dína lɨ́ esʉ bé metyɛʼ me mpóm nɛ́ɛ: nye ntɔ̂ʼ duhǒ gúmó bé á tyɛ̂b yɨ́, nzě bɨ́nɔɔ ɨ́ jʉ́o kʉ́.

⁵² Ompʉ́n bé bɨ́ɛ lîʼ náǎ, lɨ́ edweŋɔɔ nyé kûm. Píe tɨ̂, bê nzě swîʼ, tóŋɔɔ̌ Yerʉ́zalɛm; bisʉhʉʉ, byé mû bé ɨ́ miléme lwɨ́ŋlá.

⁵³ Nó bé á be melú mɨ́mɛ̂h ó, tʉ́ŋlʉ̌ mpáh Nzyɛ̌m, lɨ́ edweŋɔɔ nyé kûm.