Lʉkas 22 - Kálar Nzyɛ̌m : Ejwán é Sáá

Bʉm éswie mé Yésʉs

¹ Nó nzɔɔ biblêr bi dí abe e levure bí, nyaá bé jɨ́jébé Páska nyɨ́, á be ó, nye mû kúno ebwalɔɔ.

² Ojwɨ́ɨ o mpáh Nzyɛ̌m le olɛ̂ʼla o métié, bé á be ó lɨ́ esáa ménzɨ̌ mé éjʉ̂ Yésʉs. Sâ gwár, abee, ebě, bé á be ó lɨ́ ekpɛ́ɛ̌ sá mínzɨnzɨ mi bʉ̂r, myé ámû sâ bé yɨ́.

³ Yʉ́das á be ó nyʉ́ʉ́ mʉ̂r ɨ́ sɔ́má ómpʉ́n kám le obá mé Yésʉs. Nye ó b'á jɨjébɔɔ ntémé “Iskariôt” nyá. Nó ó Sátan á nze nî nye ɨ́ léme,

⁴ Yʉ́das ntɔ̂ʼ tô, tó bee ójwɨ́ɨ o mpáh Nzyɛ̌m, le ojwɨ́ɨ bé ódwéela o mpáh Nzyɛ̌m. Bé e boo nɔ́ɔ́ nzě tó sáa pɨ̂ʼ ɨ́ lɔ̌b wé ó, nye bɛ́maa bé Yésʉs.

⁵ Nó ó bé á nze bu soho. Bé ntɔ̂ʼ di twíí ó, bé ójána nyê, dwe nyé mɔnɨ́.

⁶ Yʉ́das ntémé ntɔ̂ʼ kam, nzě tô le esáǎ mpǎŋ jɔʼ ébɛ́ma bé Yésʉs, ebě, nye á kpɛl ó, nye bɛ́maa bé nyǎ, minzɨnzɨ mi bʉ̂r óYúden agʉ́a.

Nkomló méde mé Páska

⁷ Móhó nzɔ́ɔ bé á de biblêr bi dí abe e levure bí nyɨ́, ɨ́ dʉ́ó bé á jʉjʉ̂ bwá bínteme bí Páska lɨ́, wê nzě pyâl.

⁸ Yésʉs nzě lómǒ Pétrus, bé e Yʉánɛs. Nye ó: «Tó jâm gá mɨná mede mé Páska mɨ́ná ngá de gá má.»

⁹ Nó ó bé á nze dî e né ó: «Gǒ kpɛl ó, bɨ̌h tô komlo méde maá wó ɛ́?»

¹⁰ Yésʉs, nye e bé ó: «Paá bee gâ: bɨ̌n bé e tó nkana. Pyálá bɨ́n ngá pyâl nkana yɨ́, bɨ̌n bé óbɔma e mʉr lɨ́ enkɛ́ɛ̌ káʼ médíbé. Jɔʼ bɨ́n óbɔma e né yɨ́, dúʼóó gá nye, tó kumo ɨ́ mbɛ̌r nyé ngá nî tɨ̂ʼ wɨ́.

¹¹ Jɔʼ bɨ́n ngá pyâl ɨ́ mbɛ̌r waá yɨ́, bɨ̌n bé ólɛ́ɛ mʉ̂r mbɛ̌r ó: “Lɛ̂ʼla dí e go ó: Gúmó bɨ́h le ompʉ́n bâm ngá dě Páska yɨ́, yê wó ɛ́?”

¹² Nye ólɛ̂ʼle bɨ́n ntɔ́ɔ ɨ́ bwaʼ bwaʼ ɨ́ tólóm mbɛ̌r wé. Bɨ̌n bé ókœb ó, nye mû le otéble le bidiá. Tɨ̂ʼ ó bɨ́n ngá jâm méde mé Páska yɨ́.»

¹³ Bé ntɔ̂ʼ tô, kœ̌b sá yɨ́yɛ̂h mpʉ nyé á lɛ́ɛ bé yɨ́, ntɔ̂ʼ jámɔɔ méde mé Páska.

Mede Tî Yésʉs lɨ́ edwe ómpʉ́n bé má

¹⁴ Jɔʼ éwala bé á jala le ede méde maá, lé á pyâl yɨ́, Yésʉs, bé e bʉr o mílʉ́mlʉ́ bé, bê nzě diŋɔɔ sí.

¹⁵ Yésʉs ntɔ̂ʼ lɛ́ɛ e bé ó: «Me ɨ́ buú gwɨ̂m ó, mɨná dêʼ gá mede mé Páska mâʼ gúmo gwár jɔʼ mé dína apǎ sia e mitúú yɨ́,

¹⁶ ebě, mě lɛ́ɛ́ bɨ́n ó: me ákǎ báʼǎ de mé ndéá swîh, tó pyâl ɨ́ jɔ̌ʼ ndéá mû sí táare ɨ́ móhó wɨ̂, ngá lwɨ́ŋlɨ ɨ́ Mpóʼo mé Nzyɛ̌m yɨ́.»

¹⁷ Yésʉs ntɔ̂ʼ nʉǎ bélé ményoʼ, ntɔ̂ʼ dwě Nzyɛ̌m nzyǒo tɨ̂. Jɔʼ nyé á sil ejɨʼla e Nzyɛ̌m yɨ́, nye ntɔ̂ʼ lɛ́ɛ e bé ó: «Nʉaa gá bélé yɨ̂. Bɨ̌n e káblá ményoʼ me tɨ̂, bɨ̌n óbɛ̂h.

¹⁸ Ebě, me lɨ́ elɛ́ɛ bɨ́n lɨ́ otyeetye ó, me ákǎ de ményoʼ mâ, tó pyâl ɨ́ jɔ̌ʼ Nzyɛ̌m ngá tyêl Mpóʼo nyé ɨ́ sɨŋ yɨ́.»

¹⁹ Nye ntɔ̂ʼ nʉǎ blêr, báʼǎ dwě Nzyɛ̌m nzyǒo, nzě pɛ̂ʼ yé bipêh bipêh, kab bé byǎ. Nye e bé ó: «Blêr yɨ̂, yé ó nyʉ̂l nyǎm mû sí dweŋɔɔ lɨ́ esú lɨ́n nyɨ́. Bɨ̌n bé ótô le esɨ̂sǎ syɛ́ɛla yɨ̂ʼ bijɔʼ bíbyɛ̂h, le esîsimsa mé tɨ̂.»

²⁰ Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ báʼǎ dwe bé bélé ményoʼ. Nye ó: «Menyoʼ mâ, mé ó edwán é sáá Nzyɛ̌m mû lɨ́ etyêl páʼ nyɔ́ɔ́ e bʉr lɨ́. Nyě tyél nyé ó, ɨ́ nzɨ̌ metié mâm mû lɨ́ eswɨɨ lɨ́ esú lɨ́n má.

²¹ Beyɨɨ gá, mʉr bɛ́má mé nyá ó dí waá bɨ́h e nɔ́ɔ́ mû lɨ́ ede wâʼ ɨ́ téble nyâ!

²² Mwân mé Mʉr ódwě mpʉ̌ Nzyɛ̌m á boo tíʼe ɨ́ lɔ̌b wé yɨ́. Sâ gwár, nkoó, nye ó le mʉr ngá bɛ́ma nyé nyá!»

²³ Bê nzě tô le edíila métíá páʼ nyɔ́ɔ́, lɨ́ edǐ gʉ́a mʉ̂r á be e nkul esâ mbǐ syɛ́ɛla waá ɨ́ sɔ́má yɔ́ɔ́ nyá.

Jɔrɨɨ gá menyʉ́l mɨ́n páʼ nyɨ́n

²⁴ Bʉr o mílʉ́mlʉ́ mé Yésʉs ntɔ̂ʼ nyɛl épére mékǎn páʼ nyɔ́ɔ́, lɨ́ edǐ gʉ́a mʉ̂r á laa bʉ́ʉ́ bɨ́bɛ̂h ɨ́ mpwaʼ dǐ nyá.

²⁵ Yésʉs ntɔ̂ʼ lɛ́ɛ e bé ó: «Ojwɨ́ɨ o bʉ̂r ó sí yɨ̂ʼ jwɨ́ɨ́ bʉ̂r bɔ́ɔ́ ó e cére. Bʉr baá bɨ́ɛ lɨ́ ekʉ́ sêʼle bê, lɛ́ɔɔ ó, bé ó dí esúʼǒ sí yɨ́yɛ̂h.

²⁶ Sâ gwár, páʼ nyɨ́n, yé abe nó. Mʉr láá bɨ́n bɨ́bɛ̂h nyá, nye ɨ́ jala le ebe ó mpʉ mâ ntwǒm. Bʉr o dí ejwɨ́ɨ bɨ́n bá, bé ɨ́ jala le enyɨ̂n mpʉ baá o dí eka bʉ́ʉ́ mede bá.

²⁷ Le mʉr dí ede ɨ́ téble nyá, le waá dí eséa e né nyá, nzé láá nyʉ́ʉ́? Tó kœb ó, mɛm, me ɨ́ sɔ́má yɨ́n ó, waá dí eséa e bɨ̌n nyá.

²⁸ Bɨ̌n bé á bé abɔ́ʼa e me ɨ́ bijɔʼ mé á jɨjaʼra e mebʉ́blá bí.

²⁹ Mpʉ̌ Dâ á dwe me nkul jwɨ́ɨ ɨ́ páʼ Mpóʼo nyé yɨ́, mɛm ntémé, me mû ó lɨ́ ekab bɨ́n nkul jwɨ́ɨ ɨ́ Mpóʼo mpwár nyaá,

³⁰ lɨ́ esú ó, bɨ̌n dêʼ mede le menyoʼ ɨ́ téble wǎm, ɨ́ Mpóʼo mé ngá jwɨ́ɨ nyɨ́. Bɨ̌n bé ódi ɨ́ mecwɨ́ɨ́ mé ójwɨ́ɨ mɨ́n tɨ̂, lɨ́ etíʼe ménzweh mé Ɨ́zraɛ̂l kám e mebá milɔ̌b.»

Yésʉs lɨ́ elɛ́ɛ ó, Pétrus ókɛ́la nyê

³¹ Yésʉs ntɔ̂ʼ lɛ́ɛ̌ Pétrus ó: «Simon, Simon, paá bee: Sátan, nyɨ́ gbân bɨ́n! Nye óbóblo bɨ́n. Nye lɨ́ egwɨ̂m éntyeŋ bɨ́n le esyɛʼre bɨ́n mpʉ mʉ́má dí esyɛʼrě fufú blê yɨ́.

³² Sâ gwár, me á si jɨʼla e Nzyɛ̌m lɨ́ esú lô, ó búʼó yô, yé sá akur. Jɔʼ nyé ósâ nó, go ntémé sí báʼǎ nze kwá nyǎm yɨ́, go e súʼó bɨ́ɔɔ́ bô bibúʼó byɔ́ɔ́!»

³³ Pétrus ntɔ̂ʼ lɛ́ɛ e né ó: «Dâ ɛ̌, me ɨ́ cǎr ó, me tôʼ gúmó yɨ́yɛ̂h gó ótô yɨ́, mɨná damá tô ɨ́ mbʉʼ, nkʉ̂ ntémé dwe.»

³⁴ Yésʉs, nye e né ó: «Pétrus, mě lɛ́ɛ́ gó ó: mûh, njʉ́m kúo dína apǎ kwâʼ, go ókɛ́la mé bijɔʼ bilɛ̂l ó, gó agʉ́a mê.»

Mimyah méde, mpɨ́ʼ mɔnɨ́, le opasoŋ

³⁵ Nó ó Yésʉs á lɛ́ɛ e bé ó: «Símsáá gá jɔʼ mé á lómo bɨ̌n lɨ́ etô le etúnǒ Mbɨambɨa Lɔ́ɔ́ mé Nzyɛ̌m gúmó yɨ́yɛ̂h yɨ́. Bɨ̌n bé á tô ó, mʉr anʉǎ mpɨ́ʼ mɔnɨ́, nkʉ̂ myah méde, nkʉ̂ osípah. Jɔʼ yaá, nzê yʉ́ʉ́ sɔ̂ʼ, yé á si sâ bɨ̌n sɔ́ɔlʉ ɛ̌?» Bé ntɔ̂ʼ yala e né ó: «Heʼé, bɨ̌h bé á bé asáǎ sɔ̂ʼ.»

³⁶ Nó nyé á lɛ́ɛ e bé ó: «Jɔʼ yɨ̂ʼ, mʉr dí e myah nyá, nye nʉ́aa wê. Waá dí e kpɛɛ́ mɔnɨ́ nyá nʉ́aa. Mʉr dí abe e pasoŋ nyá, nye ɨ́ jala le ebɛ́ma kʉ̂r wé, nye e bwám pâsoŋ.

³⁷ Ebě, mě lɛ́ɛ́ bɨ́n ó: sá bé á cɛma ɨ́ páʼ wâm yɨ́, yé ɨ́ jala le esyɛ́ɛ. Yê cɛmá ɨ́ Mekaná mé Nzyɛ̌m ó: “Nye á si láŋɔɔ ɨ́ sɔ́má bʉ̂r o b'á gbɔba e Nzyɛ̌m bá.” Milɔ̌b bé á tile ɨ́ páʼ wâm mí, myé ódira.»

³⁸ Nó bé á lɛ́ɛ e né ó: «Dâ ɛ̌, paá bee: bɨ̌h bé le opasoŋ obá wâ.» Nó nyé á nze lɛ́ɛ e bé ó: «Bím nɨ̌, yɨ́ jala.»

Yésʉs lɨ́ ejɨʼla e Nzyɛ̌m

³⁹ Yésʉs nzě mɔa, tô lɨ́ ecwɨ̂ʼ bé jɨ́jébé ó, «Ecwɨ́ʼ lé ólivier» lɨ́, ebě, nye á be lɨ́ eboó sɨsâ nó ó ɨ́ ti ti ti. Ompʉ́n bé, nzě dû nyé gʉ̂.

⁴⁰ Jɔʼ nyé á pyâl gúmo yaá yɨ́, nye ntɔ̂ʼ lɛ́ɛ e bé ó: «Jɨʼlaa gá e Nzyɛ̌m, nye ayɨ́ bîr ó, Sátan bóblaa bɨ̌n.»

⁴¹ Nó nyé á líʼe bê, nzě bá tô dóló, tyé mʉ̂r dí e nkul eguho ébaalé yɨ́. Nye ntɔ̂ʼ bɨʼ mébóó sí, jɨʼla e Nzyɛ̌m.

^42-44 Nye e né ó: «Dâ ɛ̌, gó kam nó, pɛʼɛɛ mé ɨ́ mitúú mî. Damá jóʼo nó, yé díʼee abě mpʉ mɛ̂m dí ekpɛl yɨ́, njɨ mpʉ gúa dí ekpɛl yɨ́.»

⁴⁵ Jɔʼ nyé á sil ejɨʼla e Nzyɛ̌m yɨ́, nye nzě gbɔlwa, tô nko ómpʉ́n bé, bé á be yɨ́. Nyě kǎ kœb ó, bɨ́bɛ̂h mû ɨ́ bijô ɨ́ súgúgú ɨ́ lɔ̌b ébúʼ lé á be bé ɨ́ miléme lwɨ́ŋlá lɨ́.

⁴⁶ Nye ntɔ̂ʼ jɨm bê, le elɛ́ɛ e bé ó: «Bɨ̌n bé lɨ́ ejâ bíjô ɨ́ yé? Gbɔlwaa gá sí. Jɨʼlaa gâ, bɨ̌n ámû duma ɨ́ mebʉ́blá.»

Yésʉs, nyɨ́ mɛ́rɔɔ

⁴⁷ Yésʉs dína lɨ́ elwib, kǎ saʼ nɛ́ɛ: sɔ́má bʉ̂r, yɨ́ pyâl ɨ́ sulûm. Yʉ́das, mʉr ngwár á be ɨ́ sɔ́má bʉ̂r kám le obá nyá ó b'á tyɛ̂b bé dóló. Nye ntɔ̂ʼ sîhlě nko Yésʉs á be yɨ́, ó nyě dú ó koo ékœ̂h.

⁴⁸ Yésʉs ntɔ̂ʼ lɛ́ɛ e Yʉ́das ó: «Nzê ɨ́ ndwíá koo ékœ̂h ó gó bɛ́má Mwân mé Mʉr ɛ̌?»

⁴⁹ Jɔʼ ómpʉ́n mé Yésʉs, bé á gʉ́a sá múo pyâl bé yɨ́, bé ntɔ̂ʼ dî e né ó: «Dâ ɛ̌, nzê bɨ̌h sâʼ duʼó le opasoŋ ɛ̌?»

⁵⁰ Tyé e tyé yaá, nyʉ́ʉ́ mpʉ́n nzě gœ̂m pâsoŋ lɨ́ ebɔ́m, ntɔ̂ʼ kpar syɛ̂l mesâ njwɨ́ɨ opara, tíʼe nyé egwǎl lé éjʉ̂m ɨ́ pyâ.

⁵¹ Yésʉs ntɔ̂ʼ lɛ́ɛ ó: «Tyélɨ́ɨ́ gá duʼó. Yé díʼee bím nɨ̌.» Nye ntɔ̂ʼ mɛ̂r égwǎl e mʉ̂r waá, lé ntɔ̂ʼ sâ mbɨ̂mbɨá.

⁵² Yésʉs ntɔ̂ʼ lɛ́ɛ ójwɨ́ɨ o mpáh Nzyɛ̌m, le ojwɨ́ɨ bé ódwéela o tɨ̂, le otɔ́má bʉ̂r o b'Ɨ́zraɛ̂l, bé á mɛ̂r nye bá ó: «Bɨ̂n nzé le opasoŋ le mimbɨ́ŋ ó, nzê bɨ̂n jóʼó ó, me ó nzilngǎn ɛ́?

⁵³ Me á bɨbe dʉ́ó lɨ́lɛ̂h ó, témé sɔ́má yɨ́n ɨ́ mpáh Nzyɛ̌m, bɨ̌n l'akɛl mé mbô ɨ́ nyʉ̂l. Nó bɨ̌n ka mɛ́r mé ɨ́ báánâʼ ó, ebě, lɨ̂ʼ éwala mû ó laá lɨ́n e laá mpóʼo mé Sátan.»

Pétrus, nye lɨ́ ekɛ́lǎ Yésʉs

⁵⁴ Nó bé ntɔ̂ʼ mɛ̂r Yésʉs, tóŋɔɔ e né ɨ́ mbɛ̌r njwɨ́ɨ opara. Pétrus á be ó lɨ́ edû nyé e ncɛrá.

⁵⁵ Bé á be ɨ́ tira dúró témé ebɛhɛɛ. Bʉr nzě bɔma lé ɨ́ nká, lɨ́ edwáblɔɔ̌ siʼe. Pétrus ntémé ntɔ̂ʼ di sí ɨ́ sɔ́má yaá.

⁵⁶ Nyʉ́ʉ́ syɛ̂l mesâ nzě bee nyé lɨ́ epem e dúró. Mʉmá waá nzě siŋlě Pétrus ɨ́ tooobó. Nye e né ó: «Mʉr nyâʼ ntémé á be ó ɨ́ sɔ́má yé.»

⁵⁷ Pétrus nzě kɛ́la. Nye e mʉmá ó: «Mɛm, mé agʉ́a nyê.»

⁵⁸ Yé á si laa mâ jɔʼ. Nyʉ́ʉ́ mʉ̂r nzě bee ntémé nye. Mʉ̌r nɨ̌ ntɔ̂ʼ lɛ́ɛ ó: «Go ntémé, go ó mʉr ngwár ɨ́ sɔ́má yɔ́ɔ́.» Pétrus ntɔ̂ʼ yala e mʉr waá ó: «Wɛɛ, mé abe nyê.»

⁵⁹ Ewala egwár, lé osí laa, nyʉ́ʉ́ mʉ̂r ntɔ̂ʼ pyâl, nzě báʼǎ boʼlo nyê. Nye e né ó: «Lɨ́ otyeetye, mʉr nyâʼ á kʉ be ó ɨ́ sɔ́má yé, ebě, nye ntémé, nye ó mʉr Galilê.»

⁶⁰ Pétrus ntɔ̂ʼ lɛ́ɛ e né ó: «Mé apʉgʉ́ gʉ́ǎ sá gó dí elɛ́ɛ yɨ́.» Nyé dína lɨ́ elwib nó nɛ́ɛ: njʉ́m kúo nzě kwâʼ.

⁶¹ Nó ó Tî Yésʉs á nze dwira, tô le ebála. Bé e Pétrus ntɔ̂ʼ bɔma mîh. Pétrus ntɔ̂ʼ símsa mékǎn Tî Yésʉs á lɛ́ɛ nye má ó: «Mûh, njʉ́m kúo dína apǎ kwâʼ, go ókɛ́la nzɔ̂ʼ lɛ̂l ó, gó agʉ́a mê.»

⁶² Jɔʼ yaá Pétrus ntɔ̂ʼ tô kʉ̌l, nzě tô le ejɨ ɨ́ buo buo.

Bʉr, bé lɨ́ enzyɛ̌m Yésʉs

^63-64 Bʉr o b'á dwidwéele nye bá, bé á be ó lɨ́ ebuú nzyɛm nyê. Búblɔɔ nyé mîh e péh kán, ŋmɛ́hɔɔ nyê, lɛ́ɔɔ e né ó: «Yé bé go ó ngwíha milɔ̌b nó, twóóláá mʉ̂r ŋmɛ́h gó nyá díe.»

⁶⁵ Píe tɨ̂, bé ntɔ̂ʼ báʼǎ cɨŋɔɔ nyé mʉ́ʉ́ mékǎn mélwɨ́ɨ ɨ́ buo buo.

Yésʉs ɨ́ mpǒm bʉ̌m nɨ́nɨ́ɨ́

⁶⁶ Jɔ̌ʼ mɛ́n wé á lɔ́ma yɨ́, otɔ́má bʉ̂r o b'Ɨ́zraɛ̂l, bé le ojwɨ́ɨ o mpáh Nzyɛ̌m, le olɛ̂ʼla o métié, bé ntɔ̂ʼ syɛŋǎ gúmo gwár. Bé ntɔ̂ʼ nzeŋɔɔ e Yésʉs ɨ́ gwɨ́hlá yaá,

⁶⁷ nzě díŋɔɔ e né ó: «Lɛ́yɨ́ɨ́ bɨ́h nkʉ̂ go ó dí Mʉ̌r Nzyɛ̌m á lœm múló mé jwɨ́ɨ nyá, nkʉ̂ ó, ntʉ gó dí nye.» Nye ntɔ̂ʼ yala e bé ó: «Mé sí lɛ́ɛ bɨ́n nó, bɨ̌n ábûʼla.

⁶⁸ Mé dí bɨ́n tíá nó, bɨ̌n áyala mê.

⁶⁹ Damá jóʼo nó, mě lɛ́ɛ́ bɨ́n ó: táare ɨ́ báánâ, Mwân mé Mʉr ódi ndîndǐl ɨ́ mbó éjʉ́m mé Nzyɛ̌m nkul nyɨnyɛ̂h.»

⁷⁰ Nó ó bɨ́bɛ̂h bé á nze dî ó: «Go lɛ́ɛ́ yé? Nzê go lɛ́ɛ́ ó, go ó dí Mwân mé Nzyɛ̌m ɛ̌?» Nye ó: «Yé ó mpʉ bɨ́n dí elɛ́ɛ̌ nɨ̌: me ó dí nye.»

⁷¹ Bé ntɔ̂ʼ lɛ́ɛ ó: «Mɨná bé akǎ sáa gá bʉ́ʉ́ óboʼlo oswîh. Mɨná bʉr o tɨ̂ʼ bɨ́ jóʼo gá mekǎn mé nye mʉr tɨ̂.»