Lʉkas 18 - Kálar Nzyɛ̌m : Ejwán é Sáá

Kɨkɛna me kúhó mʉ́má, bé e tîʼ milɔ̌b

¹ Yésʉs ntɔ̂ʼ báʼǎ sâ bé kɨkɛna yɨ̂ʼ lɨ́ elɛ̂ʼle bé ó, bé ɨ́ jala le ejɨʼla e Nzyɛ̌m jɔʼ yɨ́yɛ̂h, akâr túú.

² Nye á lɛ́ɛ e bé ó: «Yé á be ɨ́ yʉ́ʉ́ nkana ó e nyʉ́ʉ́ tîʼ milɔ̌b á be abe lɨ́ edwáawǒ Nzyɛ̌m, nkʉ̂ ntémé mʉr nyá.

³ Tɨ̂ʼ ntémé, yé á be ó e gúú kúhó mʉ́má. Wé á be lɨ́ enzɨnzě jɔʼ yɨ́yɛ̂h kwá nyé, lɨ́ elɛ́ɛ ó: “Lwibɨɨ mé lɔ̌b páʼ nyɨ́h e mʉr dɔm wǎm!”

⁴ Nye á si nyɛɛ bene. Sâ gwár, nye á ka lɛ́ɛ ɨ́ lémé wé ó: “Damá jóʼǒ mpʉ mé dí adwáawǒ Nzyɛ̌m, nkʉ̂ dwe mʉ̂r dúu yɨ́,

⁵ me ótíʼe yɨ́ɛ kúhó mʉ́má wɨ̂ʼ lɔ̌b wé, ebě, wé lɨ́ enzě ntɨntɨ̂ʼ mê. Lɔ̌b wé, wé lɨ́ ebʉ̂ mé lʉ̂, ebě, nye ɨ́ buo nála.”»

⁶ Nó ó Tî Yésʉs á lɛ́ɛ ó: «Tîʼ milɔ̌b á dwidwe bʉr mebě me mpéne nyá, paá jôʼlo gá sá nyé dí elɛ́ɛ yɨ́.

⁷ Nó ó, mbeá wɨ́n, wê nyá? Nzê Nzyɛ̌m ódi l'akamle e bʉr bé nyé á twâr bá ɛ́? Bé lɨ́ ejɨʼla e né móhó e pum. Nzê nye ósâ táb lɨ́ enzě kɛm bé ɛ̌?

⁸ Mě lɛ́ɛ́ bɨ́n ó: nye ókpâhwǎ dwe bé nkam ɨ́ milɔ̌b myɔ́ɔ́. Sâ gwár, ɨ́ jɔʼ Mwân mé Mʉr ónze yɨ́, nzê nye ókǎ kœb ó, bʉr ó sí yɨ̂, bé dína lɨ́ edyêʼ koo e né ɛ́?»

Kɨkɛnǎ Farizyɛ̂n, bé e nwɨa mɔnɨ́ tœ́a

⁹ Yésʉs ntɔ̂ʼ kɛ̌n kɨkɛna yɨ̂, lɨ́ emveʼle bʉ́ʉ́ bʉ̂r. Bʉr baá, bé á bubûʼla ó, bé ó dí otîtyěl o bʉ̂r ɨ́ míh mé Nzyɛ̌m. Bé ntémé lɨ́ epyêh bʉ́ʉ́ bʉ̂r.

¹⁰ Nye á lɛ́ɛ ó: «Bʉr obá, bé á be ó ɨ́ mpáh Nzyɛ̌m lɨ́ esâ mínjɨʼla. Nyâʼ, Farizyɛ̂n; nyʉ́ʉ́, nwɨa mɔnɨ́ tœ́a.

¹¹ Farizyɛ̂n waá ntɔ̂ʼ tyɛ̂b, nzě jɨʼlǎ mbi wɨ̂: “Dâ Nzyɛ̌m, me lɨ́ edwe gó nzyǒo, ebě, mé abě mpʉ bʉ́ʉ́ bʉ̂r. Bâʼ, bé lɨ́ edɛn bímɔnɨ́ byé onkán; bʉ́ʉ́, bé ó osyɛ̂l o mísyóm; bʉ́ʉ́ ntémé, osyɛ̂l o médyɛ̂n. Me lɨ́ edwe gó nzyǒo, ebě, mé abě mpʉ nwɨ́a mɔnɨ́ tœ́a nyâ.

¹² Me lɨ́ eti méde ɨ́ sóno ngwár bijɔʼ bibá. Me lɨ́ edwe gó yô pêh ɨ́ mebi mâm mɨ́mɛ̂h mé dí ebi má, jala e nkɔb mpwár ɨ́ menkɔb kám.”

¹³ Sâ gwár, nwɨa mɔnɨ́ tœ́a, nye á tîtyɛb sá yé ó ɨ́ pɨ́nʉ́ʉ́. Nye á bé akpɛl ébá bɨ̂n mîh kʉ́. Nye á gbâ ó, njɨ mebô kʉ́ lʉ̂, le elɛ́ɛ ó: “Dâ Nzyɛ̌m, Dâ Zyɛ̌m, sáʼ ó, ebúʼ lô, lé tálaa lɨ́ esú lâm, ebě, me ó syɛ̂l misyóm.”»

¹⁴ Yésʉs ntɔ̂ʼ lɛ́ɛ e bé ó: «Mě lɛ́ɛ́ bɨ́n ó: nwɨa mɔnɨ́ tœ́a waá á ka tô mbɛ̌r wé ó, nyé osí bi nkâm ɨ́ míh mé Nzyɛ̌m, abě mpʉ̌ Farizyɛ̂n, ebě, mʉr nyɨnyɛ̂h dí ebɨ̂r nyé mʉr tɨ̂ʼ kʉ́ nyá, ósulɔɔ sí. Waá nyɨnyɛ̂h dí ejɔr nyʉ̂l nyé nyá, óbɨ́nɔɔ kʉ́.»

Yésʉs lɨ́ esʉ bwá ó ntwǒm metyɛʼ me mpóm

¹⁵ Bʉr, bé á si nze kwá mé Yésʉs le bwá bítyéé, ó nye kúnaa e bê. Jɔʼ ómpʉ́n bé, bé á bee nó yɨ́, bê nzě dwe bé mebě.

¹⁶ Nó ó Yésʉs á nze jébe bê, nzě lɛ́ɛ ó: «Bírɨ́ɨ́ gá bwá ó ntwǒm, bé ntâʼ kwá nyǎm. Ayɨ́ so gá bê, ebě, Mpóʼo mé Nzyɛ̌m, nye tyélá ó, lɨ́ esú é bʉ̂r o dí mpʉ bé bá.

¹⁷ Mě lɛ́ɛ́ bɨ́n lɨ́ otyeetye ó, mʉr dí aja Mpóʼo mé Nzyɛ̌m mpʉ mâ ntwǒm nyá, nye ákóʼó nî tɨ̂.»

Kúmá mʉr

¹⁸ Nyʉ́ʉ́ njwɨ́ɨ oYúden á be ɨ́ dî e Yésʉs ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?»

¹⁹ Yésʉs nzě yala e né ó: «Go lɨ́ ejébe mé mbɨambɨa mʉr ɨ́ yé? Yé abe e mʉr dí ɨ́ mbɨa, njɨ̌ Nzyɛ̌m nye omér.

²⁰ Gʉ́ gʉ́a métié mé Nzyɛ̌m. Mé lɛ́ɛ́ ó: “Asâ médyɛ̂n. Ajʉ̂ mʉ̂r. Adíbe. Ayala ɨ́ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h. Dwéʼ sʉ́ŋ e nyʉ̌ŋ dúu.”»

²¹ Mʉ̌r nɨ̌ nzě lɛ́ɛ e né ó: «Mɨ́ baʼle métié ménɨ̌ mɨ́mɛ̂h, táare lɨ́ ontwǒm, kumo mûh.»

²² Jɔ̌ʼ Yésʉs á jóʼo nó yɨ́, nye nzě lɛ́ɛ e né ó: «Yé lɨ́ esáa gó sâ gwár. Tóʼ, tó bɛ́ma bísá bíbyɛ̂h gó dí e byé bí. Go e dwé míndyêbndyéb mɔnɨ́ yaá. Jɔʼ yaá ó gó ngá bi ókúm le ogbaa ɨ́ buo buo ɨ́ jʉ́o kʉ́ kwá mé Nzyɛ̌m yɨ́. Píe tɨ̂, go e nzé dû mê.»

²³ Njóʼá mʉ̂r waá á jóʼo yalá yaá yɨ́, nye kʉ́ nzě tyɛʼ nyʉ̂l, ntɔ̂ʼ búla ɨ́ twíaaa, ebě, nye á be ó le okúm le ogbaa le ombeʼ o nyʉ̂l.

²⁴ Jɔ̌ʼ Yésʉs á bee nó yɨ́, nye ó: «Bʉr o dí le okúm le ogbaa bá, bé lɨ́ enî ɨ́ Mpóʼo mé Nzyɛ̌m e mekɔbla ɨ́ buo buo.

²⁵ Mpʉ yé dí ɨ́ kɔbla ó, chameau láŋaa lɨ́ egʉ́á é ntʉ́á yɨ́, jwɨʼ gwár e gwár yaá ntémé ó dí ɨ́ buú kɔbla ó, kúmá mʉr níʼee ɨ́ Mpóʼo mé Nzyɛ̌m.»

²⁶ Nó ó bʉ̂r o b'á jʉjóʼo nye bá, bé á nze díila páʼ nyɔ́ɔ́ ó: «Yé bé nó wá, nzé nyɨɛ ngá koʼo lɨ́ enî ɨ́ twǐʼ njʉ̌m dǐ ɛ̌?»

²⁷ Yésʉs ntɔ̂ʼ yala e bé ó: «Bisá bʉ̂r dí akoʼo bí, Nzyɛ̌m ó dí e nkul esâ byê.»

²⁸ Pétrus ntɔ̂ʼ lɛ́ɛ ó: «Paá bee: bɨ̌h bɨɛ bɨ́ líʼe bíh bísâ, njɨ lɨ́ edû gô.»

²⁹ Nó ó Yésʉs á lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, yé abe e mʉr dí elíʼě mbɛ̌r wé, mʉmá wé, bɨ́ɔɔ́ bé, obyɛ́l bé, le bwán bé, ebě, Mpóʼo mé Nzyɛ̌m,

³⁰ dí abáʼǎ bi byé nzɔʼ ɨ́ buo buo ɨ́ báánâ. Nó ɨ́ jɔʼ éswéhlɨ́ é sí yɨ̂ʼ ngá pyâl yɨ́, mʉr waá óbǐ twǐʼ njʉ̌m dǐ.»

Jɔʼ lɛ̂l Yésʉs lɨ́ egwîh éswie lé

³¹ Yésʉs nzě nʉa ómpʉ́n bé kám le obá, nye e bé ó: «Jóʼláá gâ: mɨná múo nzě bére gá ɨ́ Yerʉ́zalɛm. Bisá bíbyɛ̂h ógwíha o mílɔ̌b bé á cɛma ɨ́ lɔ̌b mé Mwân mé Mʉr bí, byé ódira.

³² Nye óbɛ́mɔɔ kwá bʉr o bíkûl e biloo. Bé ópya nyê, sáŋɔɔ nyé cére, syɛɛ nyé metyéelé ɨ́ mîh,

³³ ŋmɛ̂h nyé mingáhá, ntɔ̂ʼ jʉ́ŋɔɔ nyê. Ɨ́ móhó lɛ̂l, nye ópah.»

³⁴ Nó ompʉ́n bé, bé á bé ajóʼǒ sâ gwár ɨ́ milɔ̌b myaá. Ekǎn laá, lé á be bé ó, mpʉ̌ lwǐb ódîm. Bé á bé ajóʼǒ sɔ̂ʼ ɨ́ lɔ́ɔ waá wɨ́wɛ̂h.

Yésʉs lɨ́ etiʼ ántím

³⁵ Jɔ̌ʼ Yésʉs á be, nye mû lɨ́ ekúnwo e Yerikô yɨ́, nyʉ́ʉ́ ántím á be ó ɨ́ nkpâh nkpǎʼ, lɨ́ egwâm bísâ e bʉr o b'á lɨlaa bá.

³⁶ Jɔʼ nyé á jóʼo sɔ́má bʉ̂r lɨ́ elaa yɨ́, nó ó nyé á dî sâ yé á be lɨ́ esyɛ́ɛ yɨ́.

³⁷ Nó bé á lɛ́ɛ e né ó: «Yésʉs, mʉr Nazarɛ̂t, ó dí elaǎ nɨ̌.»

³⁸ Nye nzě bʉ̂ tím. Nye e né ó: «Yésʉs, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!»

³⁹ Lɨ́ entumo e bʉ̂r laá, bʉr o b'á be dóló bá, bê nzě nkáŋla e nye. Bé e né ó, nye díblaa num. Nyɨɛ jaá báʼǎ bʉ́lwǎ bʉ́lwáa, ó: «Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!»

⁴⁰ Yésʉs nzě tyɛ̂b, ntɔ̂ʼ lɛ́ɛ ó, bé tôʼ e né. Jɔʼ bé á pyâl e né yɨ́, Yésʉs ntɔ̂ʼ dî e né ó:

⁴¹ «Gǒ gwɨ́m ó, me sâʼ go yé?» Nye ntɔ̂ʼ yala ó: «Dâ ɛ̌, pʉgʉ́ sâ ó, me báʼa bee ʉ!»

⁴² Yésʉs ntɔ̂ʼ lɛ́ɛ e né ó: «Beyɨ́ɨ. Búʼó yô, yɨ́ tiʼ gô!»

⁴³ Tyé e tyé yaá, nye ntɔ̂ʼ bánǎ bee, nzě nî ɨ́ sɔ́má mé Yésʉs, le egúmlǒ Nzyɛ̌m. Bʉr baá bɨ́bɛ̂h, ɨ́ jɔʼ bé á bee syɛ́ɛla yaá yɨ́, bé ntɔ̂ʼ gúmlǒ Nzyɛ̌m.