Bìoball air-loidhne

Lʉkas 17 - Kálar Nzyɛ̌m : Ejwán é Sáá

Mebɔ̌ʼ mé óbɨma bʉ̂r ɨ́ miléme má

¹ Nó ó Yésʉs á nze lɛ́ɛ le ompʉ́n bé ó: «Yé óbe ɨ́ jɔʼ yɨ́yɛ̂h ó e mebɔ̌ʼ mé óbɨma bʉ̂r ɨ́ miléme ó, bé sâʼ ebébe má. Nkoó, nye ó e mʉr ngá gbâ bʉ́ʉ́ bʉ̂r mebɔ̌ʼ maá nyá!

² Yé á gwa mbɨa ɨ́ páʼ wé ó, bé tyéelaa nye nkoʼ ɨ́ twíí, ntɔ̂ʼ guhɔɔ nyé ɨ́ mâŋ, laa ó, nye gbâʼ ebɔ̌ʼ ɨ́ nzɨ̌ ngá bɨma mʉ̂r ngwár ɨ́ bwán bâm lɨ́.

³ Gwá di gá le ocwóó. Mɨ́ɔɔ́ gǒ sá ébébe nó, dwéʼ nyé mebě. Nyé túmó koo le ebébe lé, le edwirǎ léme nɛ́ɛ: pɛʼɛɛ̌ baa ébébe gô láá nyé yɨ́.

⁴ Nyé sá syóm ɨ́ páʼ gô nzɔʼ nzaangbá ɨ́ móhó ngwár nó, jɔʼ yɨ́yɛ̂h nyé ngá báʼǎ lɛ́ɛ e go ó: “Mɨ́ túmǒ koo e misyóm myâm! Mɨ́ dwirǎ léme” yɨ́, pɛʼɛɛ bíbaa bí ébébe gô laá nyé tɨ̂ʼ bí.»

Búʼó

⁵ Bʉr o mílʉ́mlʉ́ mé Tî Yésʉs, bé á lɛ́ɛ e né ó: «Bulɨɨ bɨ́h búʼó yɨ́h.»

⁶ Tî Yésʉs ntɔ̂ʼ yala ó: «Búʼó yɨ́n, yé damá twâʼwo mpʉ dîh é nyʉ́ó, yé bé yé ó mpǎŋ búʼó nó, bɨ̌n bé e nkul elɛ́ɛ e lɨ́ yɨ̂ʼ ó: “Duhaa wâ, go e tó tyɛ̂b ɨ́ mâŋ,” yé ntémé ntɔ̂ʼ sâ bɨ́n mejóʼo.»

Syɛ́ɛ́ mé syɛ̂l mesâ

⁷ «Mɨná páa jwɨʼ gá ó, mʉr ɨ́ sɔ́má yɨ́n, nyě e lóbila yé dí elî nyé bipemé, nkʉ̂ pála nyé bitab yɨ́. Jɔʼ nyé dí ebee yé lɨ́ eduho ɨ́ bisyɛ́ɛ́ yɨ́, nzê nyě e nkul elɛ́ɛ e yé ó: “Kpáhwá di sí ɨ́ téble, go dêʼ!”

⁸ Heʼé, nye ólɛ́ɛ e né ó: “Jámáá mé mede, gó océne míkán, gó oka mé mede jɔʼ mé dína lɨ́ ede méde le menyoʼ yɨ́. Píe tɨ̂, gó okǎ de.”

⁹ Nzê nye sí dwe syɛ̂l mesâ wé nzyǒo, ebě, nye sí sâ bísá bíbyɛ̂h nyé á lómo nye ó, nye sâʼ bí ɛ́? Heʼé!

¹⁰ Damá jóʼo bɨ́n, jɔʼ bɨ́n ósîl ésâ mílʉ́mlʉ́ mímyɛ̂h yɨ́, lɛ́yɨ́ɨ́ gá páʼ nyɨ́n ó: “Mɨná gá bé ó baántéʼenteʼe ósyɛ̂l o mésâ. Mɨná bé á jaa séa gá ó, njɨ bím syɛ́ɛ́ nyé á líʼe ó, mɨná séaa gá yɨ́.”»

Minzɨ̂nzǎm kám

¹¹ Ɨ́ tyěn Yésʉs á be lɨ́ etô Yerʉ́zalɛm yɨ́, nye á be ó lɨ́ edû njɨ dí ebɛ̂ʼ páʼ sí Samarî le sí Galilê wɨ́.

¹² Jɔʼ nyé á pyâl ɨ́ nyʉ́ʉ́ kwár yɨ́, minzɨ̂nzǎm kám, nzě bɔma e né. Myé á tyɛ̂b ó e bá e ncɛrá,

¹³ bɨ́nɔɔ métyêl kʉ́. Bé ó: «Yésʉs ɔ́, lɛ̂ʼla ɔ́, jɨ́ʼɨ́ɨ́ bɨ́h nkoó ɔ̌!»

¹⁴ Yésʉs nzě bee bê. Nye ó: «Tó lɛ̂ʼle gá opara mé Nzyɛ̌m menyʉ́l mɨ́n ɔ̌.» Bé dína lɨ́ etô nó nɛ́ɛ: menyʉ́l mɔ́ɔ́ ntɔ̂ʼ sâ ɨ́ deŋé.

¹⁵ Nyʉ́ʉ́ mʉ̂r ɨ́ sɔ́má yɔ́ɔ́, jɔʼ nyé á bee ó, nyɨ́ tiʼe yɨ́, nye ntɔ̂ʼ bwóolo ntúʼó, lɨ́ egúmlǒ Nzyɛ̌m le etyêl kʉ́kʉ́.

¹⁶ Nó nyé á nze kúrwo sí, píʼe mpóm ɨ́ bibwǎh ɨ́ mpǒm mé Yésʉs, lɨ́ edwe nyé nzyǒo. Mʉr waá á be ó mʉr Samarî.

¹⁷ Yésʉs ntɔ̂ʼ lɛ́ɛ ó: «Bʉr kám bɨ́bɛ̂h, bé á bě sí tiʼe, yé abe nó? Á bʉ́ʉ́ bʉ̂r ebǔ bɨ́ɛ, bé mû wó ɛ́?

¹⁸ Nzê nyʉ́ʉ́ mʉ̂r ɨ́ sɔ́má yɔ́ɔ́, nyé abá jwɨʼ ébúla, ó nye ntáa nzě dwě Nzyɛ̌m nzyǒo, njɨ njwóo nyâʼ nye omér ɛ̌?»

¹⁹ Nó ó Yésʉs á lɛ́ɛ e né ó: «Gbɔlwaa sí. Bʉŋláa. Búʼó yô, yɨ́ tiʼ gô.»

Mpóʼo mé Nzyɛ̌m

²⁰ Ɨ́ yʉ́ʉ́ jɔʼ, oFarizyɛ̂n, bé á nze dî e Yésʉs ó: «Ɨ́ yáǎ jɔʼ Nzyɛ̌m ngá tyêl Mpóʼo nyé ɨ́ sɨŋ yɨ́ ɛ́?» Nye ntɔ̂ʼ yala e bé ó: «Nzyɛ̌m, nye átyêl Mpóʼo nyé ɨ́ mbi dí ó, míh mé bʉ̂r, mé óbee nyé wɨ́.

²¹ Bé álɛ́ɛ ó: “Beyɨɨ gá nye ɛ̌! Nye ó nyɨ̂!” Nkʉ̂ ntémé ó: “Nye ó dí kâʼ nyɨ̂!” Ebě, bɨ̌n bé ɨ́ jala le egʉ́a ó, Mpóʼo mé Nzyɛ̌m, nye mû ó mbeá ɨ́ milémé mín tʉ́ŋlʉ̌.»

²² Nó nyé á lɛ́ɛ le ompʉ́n bé ó: «Yé ópyâl jɔʼ bɨ́n ngá jóʼǒ dwéh édi e Mwân mé Mʉr sɔ́má yɨ́, damá bě móhó ngwár. Sâ gwár, yé ákǎ bána.

²³ Bʉ̂r, bé ólɛ́ɛ e bɨ̌n ó: “Jwɛ́ʼɛ́ɛ́ gá kâ”, nkʉ̂ ntémé ó: “Jwɛ́ʼɛ́ɛ́ gá wâʼ” nó, mʉ̌r sá atô gʉ̂, nkʉ̂ dû bê.

²⁴ Mpʉ̌ ndweh dí edweh ɨ́ jʉ́o, pǎn myɛ́n ɨ́ mipáʼ mí jʉ́ó mímyɛ̂h yɨ́, ó Mwân mé Mʉr ósâ ɨ́ jɔʼ nyé ngá báʼǎ nze yɨ́.

²⁵ Yé jala ó, nye páa nyɛɛ́ sia e mitúú ɨ́ buo buo. Bʉr ó myǎ wɨ̂, bé óbene nyé ntémé.

²⁶ Mpʉ bísɔ̂ʼ byé á syɛ́ɛ ɨ́ jɔʼ mé Nóe yɨ́, jwɨʼ gwár e gwár yaá ntémé ó ngá syɛ́ɛ ɨ́ jɔʼ Mwân mé Mʉr ónze yɨ́.

²⁷ Bʉr bé á si de mede le menyoʼ, ɨ́ de de de. Bé á si bâ bʉbá, ɨ́ bâ bâ bâ. Tyenɔɔ mísile ɨ́ mebâ, tó pyâl ɨ́ dʉ́ó Nóe á nî ɨ́ byɛ̂l tʉ́ŋlʉ̌ yɨ́. Mpɨɨ̌ nɨ́nɨ́ɨ́ ntɔ̂ʼ mamle, jʉ̂ bɨ́bɛ̂h.

²⁸ Jwɨʼ gwár yaá, ɨ́ melú mé Lôt, bʉr bé á si de mede le menyoʼ. Bé á si bwâm bisɔ̂ʼ le ebɛ́ma. Bé á be ó lɨ́ elî bípemé le esumo mímbɛ̌r.

²⁹ Ɨ́ móhó Lôt á duho Sodôm wɨ́, siʼe ti e pir, byé á si duho ɨ́ jʉ́o kʉ́, swɨɨ bɨ́bɛ̂h ɨ́ menyʉ̂l mpʉ métó mé mpíé, dímle bɨ́bɛ̂h.

³⁰ Nó ntémé ó yé ngá syɛ́ɛlɨ ɨ́ móhó Mwân mé Mʉr ngá nze wɨ́.

³¹ «Ɨ́ móhó waá, mʉr óbe kʉ́ mié mbɛ̌r nyá, nye ákǎ jala le etô mbɛ̌r, tó kaale bísá byé. Jwɨʼ gwár e gwár e mʉr óbe ɨ́ pemé nyá: nyě sá abúla, tô mbɛ̌r wé.

³² Paá símsa gá mʉmá mé Lôt!

³³ Mʉr ósáa ékamle e twiʼ yé nyá, ódímle yê. Waá dí ekam édímlě twiʼ yé nyá, nyɨ́haá ó ngá baʼle yê.

³⁴ Mě lɛ́ɛ́ bɨ́n ó: ɨ́ pum waá, bʉr obá, bé óbe ɨ́ joó gwár: nyʉ́ʉ́ ónʉŋɔɔ; nyʉ́ʉ́ lîʼ.

^35-36 Lɨ́ bʉbá obá ngá be lɨ́ esie méde ɨ́ nkoʼ mpwár bá, nyʉ́ʉ́ ónʉŋɔɔ; nyʉ́ʉ́ lîʼ.»

³⁷ Nó ó ómpʉ́n bé, bé á dî e né ó: «Dâ ɛ̌, sâ yaá, yé ósyɛ́ɛ wó?» Nye ntɔ̂ʼ yala ó: «Gúmó múu dí yɨ́, tɨ̂ʼ ntémé ó ómpele dí eswâl yɨ́.»

« Roimhe

Air adhart »

Lean sinn:

Ceanglaichean taic

Sanasan