Bìoball air-loidhne

Lʉkas 15 - Kálar Nzyɛ̌m : Ejwán é Sáá

Kɨkɛnǎ nteme, yé á be, yé mû sí dîm yɨ́
( Matthieu 18.12-13 )

¹ Onwɨa ó mɔnɨ́ tœ́a bɨ́bɛ̂h le osyɛ̂l o mísyóm, bé á be lɨ́ esîsihlě nkǒ Yésʉs á be yɨ́, lɨ́ etó jôʼlo nyê.

² Nó ó óFarizyɛ̂n le olɛ̂ʼla o métié, bé á nyimla páʼ nyɔ́ɔ́ ó: «Mʉr nyâ, nye lɨ́ enʉa ósyɛ̂l o mísyóm! Bé e boo nɔ́ɔ́ bánǎ pûhla mébô, de!»

³ Yésʉs nzě sâ bé kɨkɛna yɨ̂. Nye ó:

⁴ «Yé bé mʉr sɔ́má yɨ́n, nyě e binteme nter, nteme gwár ntɔ̂ʼ dîm nó, nye ólíʼe bínteme mekám ebǔ le ebǔ ɨ́ lʉá, ntɔ̂ʼ tó sáa yaá yé á dîm yɨ́. Nye ósáǎ nteme yaá, ɨ́ sáa, sáa, tó pyâl ɨ́ jɔʼ nyé ngá bee yé yɨ́. Yé abe nó?

⁵ Jɔʼ nyé óbee yé yɨ́, nye ósoho ɨ́ lémé wé ɨ́ buo buo. Nye ónzě nkɛ́ɛ̌ nteme yaá, kɛl yé ɨ́ mebɛʼ, búla, tó kœb byaá nyé á líʼe bí.

⁶ Mpúla nyé óbe, nye mû sí búla kwár nyɨ́, nye óbáŋle ósó bé ndu e bʉ́ʉ́ bʉ̂r o kwár, le elɛ́ɛ e bé ó: “Mɨná sóhaa gâ, ebě, mɨ́ bánǎ beě nteme yâm yé á dîm yɨ́!”

⁷ Mě lɛ́ɛ́ bɨ́n ó: jwɨʼ gwár yaá ntémé ó, bé óbuú soho ɨ́ jʉ́o kʉ́ ɨ́ jɔʼ syɛ̂l misyóm ngwár mû sí túmǒ koo e misyóm myé, le edwirǎ léme yɨ́. Bé óbuú soho nyê, laa bʉ̂r mekám ebǔ le ebǔ, baá o dí “otîtyěl”, dí adweʼe mísyóm myɔ́ɔ́, nkʉ̂ gʉ́a ó, bé lɨ́ ejala le etúmǒ koo e myé, le edwira míléme bá.»

Nzaŋ wé á dîm, báʼǎ nyɨ̂n wɨ́

⁸ «Nyʉ́ʉ́ mʉ́má á be ó e minzaŋ mí mɔnɨ́ kám. Nzaŋ ngwár nzě dîm. Nye nzě tumo éláma, gwámlě mbɛ̌r. Nye nzě gɔ́na le esáa wé twîtwǒʼ, twîtwǒʼ, tó pyâl ɨ́ jɔʼ nyé á ka bee wé yɨ́.

⁹ Jɔʼ nyé á bee wé yɨ́, nye nzě báŋle ósó bé ti e bʉr o kwár. Nye ó: “Mɨná sóhaa gâ, ebě, mɨ́ bánǎ beě nzǎŋ mɔnɨ́ wâm wé á dîm wɨ́.”

¹⁰ Mě lɛ́ɛ́ bɨ́n ó: jwɨʼ gwár yaá ntémé ó bisʉhʉʉ ngá bě gúmó bééngeles mé Nzyɛ̌m dí yɨ́, ɨ́ jɔʼ syɛ̂l misyóm ngwár mû sí túmǒ koo e misyóm myé, le le edwirǎ léme yɨ́.»

Mwân á dîm nzɨ̌ nyá

¹¹ Yésʉs á baʼa lɛ́ɛ ó: «Mʉr á be ó e bwá ó bʉrʉ̂m obá.

¹² Waá ntwóm ntɔ̂ʼ lɛ́ɛ e Sɔ́ŋ wé ó: “Dâ ɛ̌, dwéʼ mé nyǎm nkɔ̂b ɨ́ bisá byô, nyaá ngá gúmo e me nyɨ́.” Sɔ́ŋ nzě kab bísá byé, dwe bé e tʉ́l.

¹³ Abea nɛ́ɛ: ntwóm nzě bɛ́ma nyé nkɔ̂b bisâ, nzě nʉǎ mɔnɨ́ tɨ̂, tô ɨ́ yʉ́ʉ́ sí swîh, yé á be lɨ́ ejaa yɨ́. Gʉ̂ʼ, nye á titiʼe ó, sá twiʼ asiŋa, sîl ésǎm mɔnɨ́ yé yɨ́yɛ̂h ɨ́ pé.

¹⁴ Jɔʼ nyé á sil esam mɔnɨ́ yé nó yɨ́, ánɨ̂nɨ̂n nza ntɔ̂ʼ nyaŋla ɨ́ sí yaá. Bisá bí twiʼ bíbyɛ̂h, byé ntɔ̂ʼ sâ nyé sɔ́ɔlʉ.

¹⁵ Nye nzě tó nî ɨ́ syɛ́ɛ́ kwá nyʉ́ʉ́ mʉ̂r sí yaá. Mʉr waá á lʉlómo nye ó, nye tôʼ ɨ́ mebur, tó pála ónkʉ̌ bé.

¹⁶ Nye á be lɨ́ edǐ de bísá ónkʉ̌ bé á dɨde bí, sâ gwár, abe e mʉr á dwe nye byǎ.

¹⁷ «Nye zě tiʼe lɨ́ ogʉ̌ wé, ntɔ̂ʼ táare lɛ́ɛ ɨ́ lémé wé ó: “Osyɛ̂l o mésâ mé dâ, bé ɨ́ twíha mede. Mɛm lɨ́ enzě dwe nzâ wâ!

¹⁸ Me ómɔa wâ, búla kwá mé Dâ, tó lɛ́ɛ e né ó: Dâ ɛ̌, mɨ́ sâ syóm ɨ́ nkǒ páʼ mé Nzyɛ̌m, le ɨ́ waá gô.

¹⁹ Mé akǎ jala le ejébɔɔ mwánǒ. Nʉaa mé yɨ́ɛ ɨ́ sɔ́má bʉ̂r o dí eséa e go bá!”

²⁰ Nye ntɔ̂ʼ mɔa sí, búla kwá sɔ́ŋ wé. «Mpʉ nyé á be, nye dína lɨ́ ejaa yɨ́, sɔ́ŋ kǎ bee ó, nye lɨ́ enze. Sɔ́ŋ nzě jɨ̂ʼ nyé nkoó, ntɔ̂ʼ tô kám, tó dû nyé emúʼ ɨ́ swííá.

²¹ Mwân nɨ̌, nye e sɔ́ŋ ó: “Dâ ɛ̌, mɨ́ sâ syóm ɨ́ páʼ mé Nzyɛ̌m, le ɨ́ waá gô. Mé akǎ jala le ejébɔɔ mwánǒ.”

²² Nó ó sɔ́ŋ á nze lɛ́ɛ le osyɛ̂l o mésá bé ó: “Kpáhwá nze gá e mikán mí nyaŋá. Bórɨ́ɨ́ gá nye myǎ. Gbáʼ gá nye lɔná ɨ́ diné. Bórɨ́ɨ́ gá nye ntémé osípah ɨ́ mekʉ̌.

²³ Ntáʼ gá e mâ ntœœ, waá dí myáʼ nyá. Bɨ̌n a tíʼe. Mɨná tyélɨɨ gá nzɔɔ bisʉhʉʉ,

²⁴ ebě, mwân wǎm nyâʼ á be ó mpʉ ndwê. Nó nyɨ́ báʼǎ tiʼe. Nye á si boo dîm kɔ́m. Nó mɨ́ báʼǎ bee nyê!” Bé ntɔ̂ʼ nyɛl nzɔ́ɔ e bisʉhʉʉ ɨ́ buo buo.

²⁵ «Ɨ́ jɔʼ yaá, tʉ́l á be ó pemé. Jɔʼ nyé á ka búla, nye mû bǎʼ e mbɛ̌r yɨ́, nyě kǎ jóʼo ó, ntíne pɛ̂m pɛ́mɨ́ɨ, kûl e nkom dâʼ dáʼáa, le démé.

²⁶ Nye ntɔ̂ʼ jébe nyʉ́ʉ́ syɛ̂l mesâ, nzě dî e né ó: “Yé dí esyɛ́ɛ gʉ̂ʼ nɨ̌?”

²⁷ Syɛ̂l mesâ, nye e né ó: “Ntwómô, nyɨ́ búla. Nó sɔ́ŋ gǒ bé sí jʉ̂ mâ ntœœ, waá dí myáʼ nyá, ebě, mɨ́ʉ̌, nyɨ́ búla, nyʉ̂l mbɨ̂mbɨá!”

²⁸ Lémé tʉ́l ntɔ̂ʼ bɨ́lwa nyé ɨ́ mo, nye nzě bene énî mbɛ̌r. Sɔ́ŋ wé ntɔ̂ʼ tô kʉ̌l, tó jébe nyé ó, nye níʼee.

²⁹ Nó ó tʉ́l á nze lɛ́ɛ e sɔ́ŋ wé ó: “Paá bee: mɨ́ sâ gó bisyɛ́ɛ́ mimbû ɨ́ buo buo. Me dína ó, apǎ pyêh lɔ́ɔ́ gô. Damá jóʼo nó, gó apǎ dwe mé mâ tab, ó bɨ̌h le osó bâm sóhaa.

³⁰ Nó ɨ́ jɔʼ mwân gǒ nyâ, mû sí tó búla yɨ́, waá á sam bisá byô bíbyɛ̂h lɨ́ ebwâm bísadága bi bʉ́bá nyá, gʉ́ jʉ̂ nyé mâ myáʼ ntœœ!”

³¹ Sɔ́ŋ, nye e né ó: “Mwánǎm, mɨná e go ó dí ɨ́ jɔʼ yɨ́yɛ̂h. Sá yɨ́yɛ̂h dí egúmo e me yɨ́, yé ó yô ntémé.

³² Sâ gwár, yê kʉ jalá ó, mɨná tyélɨɨ gá nzɔɔ bisʉhʉʉ, ebě, ntwómô á pa be ndwe nyá, nyɨ́ pah. Nye á si boo dîm. Nyɨ́ kǎ beɔɔ.”»

« Roimhe

Air adhart »

Lean sinn:

Ceanglaichean taic

Sanasan