Bìoball air-loidhne

Kolosi 4 - Kálar Nzyɛ̌m : Ejwán é Sáá

¹ Bɨ̌n ojwɨ́ɨ, sɨ́sáʼ gá bitúʼǎ bín bisyɛ́ɛla bi dí tîtyěl, byaá bi dí ejala bí. Ajɨha gá ó, bɨ̌n ntémé, bé e wɨ́n njwɨ́ɨ, waá dí ɨ́ jʉ́o kʉ́ nyá!

Metwɨ́ɨ́

² Jɨjɨʼlaa gá e Nzyɛ̌m ɨ́ jɔʼ yɨ́yɛ̂h. Tirwaa gá syɛ́ɛ́ mínjɨʼla. Dwéʼ gá nye nzyǒo ɨ́ bisá nyé dí esâ bɨ́n bí.

³ Jɨʼlaa gá ntémé lɨ́ esú lɨ́h. Nzyɛ̌m díbɨɨ bɨ̌h nzɨ̌ ó, bɨ̌h túnaa Mbɨambɨa Lɔ́ɔ́ wé, ó bɨ̌h pâʼlaa lwǐb ódîm dí edumo e Krîst yɨ́. Me ó kɛ́ʼá ɨ́ mbʉʼ ɨ́ lɔ́ɔ waá mé dí eboó tutúno wɨ́.

⁴ Jɨʼlaa gá e Nzyɛ̌m, ó me túnaa wé, pâʼla mékǎn mpʉ yé dí ejala yɨ́.

⁵ Tiʼaa gá le ocwóó ɨ́ míh mé bʉ̂r o dí abe ókrǐsten bá. Yé díʼee bɨ̌n jɔʼ bɨ́n jálá le esâ nó yɨ́.

⁶ Mekǎn mɨ́n, mé ɨ́ jala le ebe ɨ́ jɔʼ yɨ́yɛ̂h ó, ɨ́ mbɨa mbɨa, lwɨ́ŋlá e nyɔm. Gwá yɨyala gá e mʉr nyɨnyɛ̂h mbɨ̂mbɨá.

Meswɨhlɨ

⁷ Mɨ́ɔɔ́ kpɛ̌l gá wɨ́ná Tisikôs ókǎ lɛ́ɛ bɨ́n sá yɨ́yɛ̂h dí edumo e me yɨ́. Nye ó syɛ̂l mesâ mé Nzyɛ̌m dí ebúʼlɔɔ nyá, mʉr njoo yâm bɨ́h e nɔ́ɔ́ dí eséǎ syɛ́ɛ́ mé Tî Yésʉs nyá.

⁸ Nye ó mʉr mé á lómo bɨ̌n nyá, ó nye tôʼ lɛ́ɛ bɨ́n mpʉ̌ twiʼ yɨ́h dí elaa yɨ́, le esul bɨ́n miléme sí.

⁹ Me lɨ́ ebwóolo ntémé mɨ́ɔɔ́ kpɛ̌l gá wɨ́ná Onezímos. Nye ó mʉr ebúʼlɔɔ, waá á nyɛɛ duho kwá nyɨ́n, nze wâʼ nyá. Bé ólɛ́ɛ bɨ́n sá yɨ́yɛ̂h mû lɨ́ esyɛ́ɛ kâʼ yɨ́.

¹⁰ Arîstark, mʉr bɨ́h e nɔ́ɔ́ dí mimbʉʼ wâʼ nyá, nye lɨ́ esoho bɨ́n. Marc, mɨ́ɔɔ́ mé Banabâs, nye lɨ́ esoho bɨ́n ntémé. (Bɨ̌n mû ó sí boó bi mékaná mé á cɛma, dumo e né má. Nyé sí tô gʉ̂ʼ kwá nyɨ́n nɛ́ɛ: bɨ̌n e kʉ́ gwá baʼle nyê.)

¹¹ Yésʉs, waá dí e lʉ́ʉ́ díe ó, «Yʉstʉ̂s» nyá, nye ntémé ó dí esoho bɨ́n. Bʉr olɛ̂l baá, bé ó dí oYúden o b'á bûʼla, baá bé á kɨkɛm me lɨ́ etúnǒ Mbɨambɨa Lɔ́ɔ, dumo e Mpóʼo mé Nzyɛ̌m bá. Bé á si bu gbâ me nkul ɨ́ léme.

¹² Epafrâs, mʉr á duho kwá nyɨ́n nyá, nye lɨ́ esoho bɨ́n. Nye ó syɛ̂l mesâ mé Krîst. Nye lɨ́ ejɨʼla e Nzyɛ̌m e nkul jɔʼ yɨ́yɛ̂h ɨ́ lɔ̌b wɨ́n ó, bɨ̌n tyɛ́bɨɨ mekʉ̌ sí ɨ́ sɨ́ŋ, bɨ̌n díʼee otɔ́má bʉ̂r ɨ́ mipáʼ mímyɛ̂h, le egʉ́a bísyɛ́ɛla bíbyɛ̂h Nzyɛ̌m dí ekpɛl bí ɨ́ pébébé.

¹³ Mě boʼlo ɨ́ wé pâʼ ó, nye lɨ́ ebuú nʉǎ túú lɨ́ esú lɨ́n, ti e bʉr ó Laodiséa, ndu e baá ó Ierápolî.

¹⁴ Luc, njomo bʉr mɨ́ná dí ekpɛl gá nyá, bé e Demâs, bé lɨ́ esoho ntémé bɨ̌n.

¹⁵ Sohaa gá me obûʼla dí Laodiséa bá, ti e Nɛmfâ, bé e bʉr ó Mbɛ̌r-Nzyɛ̌m o dí enzě bʉbɔma e bé ɨ́ mbɛ̌r wé bá.

¹⁶ Jɔʼ bɨ́n ósîl éláa mékaná mâʼ yɨ́, bɨ̌n e tyén mé ɨ́ Mbɛ̌r-Nzyɛ̌m dí Laodiséa wɨ́. Bé ntémé tô láa mé gʉ̂. Bɨ̌n bɨɛ bé okǎ láa maá mé óduhǒ Laodiséa má.

¹⁷ Lɛ́yɨ́ɨ́ gá ntémé le Arkípɔs ó, nye gbâʼ nkul ɨ́ syɛ́ɛ́ Tî Yésʉs á lómo nye ó, nye séaa yɨ́. Nye lóŋlaa yê.

¹⁸ Mě kʉ́ cɛma ékǎn lɨ̂ʼ ó e mbó wâm: Ajɨha gá ó, me ó ɨ́ mbʉʼ. Metyɛʼ me mpóm mé Nzyɛ̌m, mé díʼee e bɨ̌n.

« Roimhe

Air adhart »

Lean sinn:

Ceanglaichean taic

Sanasan