Kolosi 3 - Kálar Nzyɛ̌m : Ejwán é Sáá

¹ Yé bé yê tyeetye ó, bɨ̌n e Krîst, bé á be ó sí duho lɨ́ eswie, báʼǎ bǐ twiʼ nó, sáŋáá gá bé ebi bísâ bi dí ɨ́ jʉ́o kʉ́ bí. Byé ó, ɨ́ gúmó Krîst dí ɨ́ mbó éjʉ́m mé Nzyɛ̌m yɨ́.

² Bisyɛ́ɛla bi dí epálwo bɨ́n ɨ́ miléme bí, byé díʼee njɨ byaá bí jʉ́o kʉ́, abe byaá bí sí yɨ̂.

³ Ebě, bɨ̌n bɨ́ dwe. Twiʼ yɨ́n mû ó lɨ́ esǒ kwá mé Krîst. Sá tɨ̂ʼ ó bícwiʼ bín e Nzyɛ̌m mû mpúhlá yɨ́.

⁴ Krîst ó dí edwe mɨ́ná gá mpǎŋ twiʼ. Jɔʼ nyé óbáʼǎ nyɨ̂n bʉ̂r ɨ́ mîh ɨ́ kpɛŋlɛm yɨ́, bɨ̌n le onɔ́ɔ́, bé ónyɨ̂n sɔ́má e kûm nyɨnyɛ̂h.

Twiʼ myâ le edwán é twiʼ

⁵ Sá dí ɨ́ bɨ̌n, yaá dí eduho ɨ́ sí yɨ̂ʼ yɨ́, jʉ́ʼóó gá yê. Yé ó dí: bimolá, bisyɛ́ɛla bi dí edulo mpîr ɨ́ nyʉ̂l bí, gwɨ́má ékœkœb bʉ́bá, gwɨ́má ésâ bísâ bi dí ɨ́ bébe bí, le nzɔ́ɔ́ bísâ. Ebě, mʉr dí e yé nyá, nye ó jwɨʼ gwár e gwár e waá dí edwě yɨŋayɨ̌ nzyɛ̌m kûm nyá.

⁶ Bisyɛ́ɛla bí ébébe byaá ó ngá sâ ó, Nzyɛ̌m lɛ̂ʼlaa nkpaa nyé.

⁷ Ɨ́ mimbú mí píhe, ɨ́ jɔʼ bɨ́n á jaa titiʼe njɨ lɨ́ esâ syóm yɨ́, kʉ̌ tyen bɨ́n á dudû wɨ́, wé á be ntémé ó njɨ nó.

⁸ Nó ó, ɨ́ báánâ, paá kǎ bîr gá bé bisyɛ́ɛla byaá bíbyɛ̂h: nkpaa, ebúʼ, ebébe é léme, melwɨ́ɨ le mekǎn mé ésɔ́m. Byé sá aduho ɨ́ num wɨ́n.

⁹ Asâ gá bibɛr páʼ nyɨ́n, ebě, bɨ̌n bɨ́ boó bîr métum me myâ mɨ́n ti e bisyɛ́ɛla bi tɨ̂.

¹⁰ Bɨ̌n bɨ́ bwâr métum medwân. Bɨ̌n mû ó medwán mé bʉ̂r ó Nzyɛ̌m Kwihbʉr. Nye lɨ́ etô le eliŋ bɨ́n medwán, abe e léné mpʉ nyé mʉr tɨ̂. Nyě sá nó ó, bɨ̌n gwâ gʉ́a nyé mbɨ̂mbɨá.

¹¹ Ɨ́ twiʼ dwân yaá, adû gá bwá mímbɔ́ʼ bâ: Nyâʼ, nye ó Yúden; nyâʼ nyɨɛ, mʉr Grɛ̂s. Nyâʼ, nye ó tíʼá mpʉ́n; nyâʼ nyɨɛ, nyé abě tíʼá mpʉ́n. Nyâʼ, nye ó ayogoyogo. Nyâʼ, nye ó mʉr dí edweŋɔɔ nzóʼ nyá. Nyâʼ, nye ó túʼǎ; nyâʼ nyɨɛ, nye ó nzyɛh. Ebě, Krîst ó dí lʉ̂ sá yɨ́yɛ̂h. Sá yɨ́yɛ̂h, yé dyɛ́ʼwó ó e né.

¹² Bɨ̌n ó dí bʉ̌r Nzyɛ̌m á twâr, baá o dí egúmo e né, nyé dí ɨ́ buú kpɛl bá. Nó ó, sáʼ gá njɨ́ʼá nkóó páʼ nyɨ́n, le mpam. Sulɨɨ gá menyʉ́l mɨ́n sí. Diʼee gá bʉr o dí ɨ́ talǎ njwɨr bá, le bʉr o bíhwó.

¹³ Júhwáá gá ebébe páʼ nyɨ́n, alwib. Mʉ̂r bé e nyʉ́ʉ́ mbûʼla, bé e lɔ̌b nó, bʉr baá, bé ɨ́ jala le epɛʼla bíbaa bí ébébe bé á niʼla páʼ nyɔ́ɔ́ bí. Pɨpɛʼ gá bibaa bí ébébe páʼ nyɨ́n mpʉ Tî gá wɨ́ná á pɛʼ byaá nyé á niʼe mɨná gá bí.

¹⁴ Ɨ́ bisyɛ́ɛla byaá bíbyɛ̂h, sá dí tɨ̂ʼ yɨ́, yé ó, bɨ̌n kpɛ́laa, ebě, kpɛ̌l ó dí elar bɨ́n ɨ́ lídídí.

¹⁵ Krîst tyɛ́bɨɨ bɨ̌n ɨ́ miléme, ó bɨ̌n díʼee e miléme mi dí milwɨ́ŋlá ɨ́ mepyɛbla mí. Sá tɨ̂ʼ ó Nzyɛ̌m á jébe bɨ̌n ó, bɨ̌n pûhlaa ɨ́ nyʉ̂l mpwár yɨ́. Jwǐdwéʼ gá nye nzyǒo ɨ́ jɔʼ yɨ́yɛ̂h ɨ́ bisá nyé dí esâ bɨ́n bí.

¹⁶ Kamaa gá ó, lwǐb mé Krîst, yé lóŋlaa milémé mín. Milémé mín, myé díʼee ekʉ̌m lɨ́ esú é lwǐb yé yaá. Jwidweelaa gá páʼ nyɨ́n milɛ́ʼlá mi dí le ocwóó mí. Jwidweelaa gá metwɨ́ɨ́ páʼ nyɨ́n. Jyɛyɨɨ gá meswɨ̂ʼlɨ lɨ́ esú é Nzyɛ̌m, mejéme, ti e bidyɛɛ́ biswîh Sísǐm ngá lɛ̂ʼle bɨ́n bí. Mejéme maá, mé óduho ó, bɨ̌n ɨ́ miléme mi dí edwě Nzyɛ̌m nzyǒo mí.

¹⁷ Sá yɨ́yɛ̂h bɨ́n dí esâ, nkʉ̂ lɛ́ɛ yɨ́, yé díʼee pɨrá e díé mé Tî Yésʉs. Dwéʼ gá Nzyɛ̌m Sɔ́ŋ nzyǒo ɨ́ díé lé.

Twǐʼ mbɛ̌r bʉ̂r

¹⁸ Bɨ̌n bʉbá, sáʼ gá ojʉ́m bɨ́n mejóʼo, ebě, mpʉ́nʉ̌ ó bʉ̂r o mû sí pûhla e Tî Yésʉs bá, jálá le esâ yɨ́.

¹⁹ Ojʉ̂m, kpɛlɨɨ gá bʉbá bɨ́n. Asâ gá bé ebébe é léme.

²⁰ Bwân, sáʼ gá obyɛ̂l bɨ́n mejóʼo, ebě, Tî Yésʉs, nye lɨ́ ebeě syɛ́ɛla yaá mbɨ̂mbɨá.

²¹ Obyɛ́l ó bwân, asâ gá ó, bwán bɨ́n, bé jóʼaa túú ɨ́ miléme. Milémé myɔ́ɔ́, myé ámû jaá kwalwo.

²² Bitúʼǎ, sáʼ gá ojwɨ́ɨ́ bɨ́n mejóʼo ɨ́ sá yɨ́yɛ̂h. Asâ gá bé mejóʼo njɨ ɨ́ jɔʼ bé dí edwɛ̂ʼ bɨ́n yɨ́. Syɛ́ɛla yaá, yé lɨ́lɛ́ʼlé ó, bɨ̌n kolo bé ó, koláa. Bɨ̌n bʉr o dí edwáawo Tî Yésʉs bá, sáʼ gá nye mejóʼo e milémé mín mímyɛ̂h.

²³ Sáʼ gá sɨ́n lɨ́ eséǎ syɛ́ɛ́ yɨ́n yɨ́yɛ̂h mbɨ̂mbɨá. Séáá gá nó, lɨ́ esú é Tî Yésʉs, abe bʉ̂r.

²⁴ Gʉ́ŋáá gá ó, Tî Yésʉs ókʉ́ jána e bɨ̌n tɨ̂. Bɨ̌n bé óbi mémbɨa nyé dí ekomo bʉ̂r bé má. Mé óbe ó nkɔb líʼe nyɨ́n. Mpǎŋ njwɨ́ɨ bɨ́n dí eséa e né nyá ó dí Krîst.

²⁵ Syɛ̂l ebébe nyɨɛ óbǐ sá dí ejala le ebébe lé yɨ́, ebě, Nzyɛ̌m, nyé abe lɨ́ edwáawo bʉ̂r mempǒm.