Kolosi 2 - Kálar Nzyɛ̌m : Ejwán é Sáá

Gwɨ́má mé Pɔ̂l lɨ́ esú é búʼó bʉ̂r ó Kolósia

¹ Mě kpɛl ó, bɨ̌n gʉ́ŋaa bisyɛ́ɛ́ mé dí eséa lɨ́ esú lɨ́n bí. Yé ntémé, yé ó lɨ́ esú é bʉ̂r ó Laodiséa, ndu e baá bɨ́bɛ̂h dí apǎ bee mé mpǒm bá.

² Syɛ́ɛ́ mé dí eséa yɨ́, mě séá yé ó, me nkʉ̂ gbâ bɨ́n nkul ɨ́ miléme, le esâ ó, bɨ̌n kpɛ́laa, le egwá pûhla. Bɨ̌n nkʉ̂ gʉ́ǎ búʼó gá yɨ́ná ɨ́ pébébé, sá dí bɨ̌n e nyɔm ɨ́ buo buo yɨ́. Bɨ̌n gʉ́ŋaa ntémé Krîst, mʉ̌r Nzyɛ̌m á sol ɨ́ lwǐb ódîm nyá.

³ Ocwóó le ngwɨ́á wɨ́wɛ̂h, bɨ̌n bé ɨ́ jala le esáa byé ó ɨ́ Krîst tʉ́ŋlʉ̌. Byé ó Nzyɛ̌m á sol ɨ́ nye bí.

⁴ Mě lwib e bɨ̌n ɨ́ mbi wɨ̂ʼ ó, mʉ̌r sá akʉ́a bɨ́n ɨ́ nzɨ̌ mikóo dí ɨ́ buú kpɛlɔɔ mí.

⁵ Mě damá cɛra e bɨ̌n ɨ́ nkǒ páʼ nyʉ̂l, me yɨ́ɛ ó bǎʼ e bɨ̌n ɨ́ nkǒ páʼ sísǐm. Me lɨ́ ejóʼo bísʉhʉʉ lɨ́ ebeě mpʉ̌ sɔ́má yɨ́n dí ɨ́ kpɨ́ɨ́ɨ́ yɨ́. Me lɨ́ esoho ntémé mpʉ bɨ́n dí edyêʼ koo e Krîst yɨ́.

Kʉ̌ tyen bʉ̂r o mé Yésʉs

⁶ Mpʉ yê tyeetye ó, bɨ̌n bé á si bi Yésʉs-Krîst tâŋ Njwɨ́ɨ wɨ́n yɨ́, diʼee gá ɨ́ mpúhlá e né.

⁷ Búʼó bɨ́n dí e yé yɨ́, yé páhaa mikaalé. Yé tôʼ le egwɨ́e, le ebwaʼ. Dyɛ́ʼwáá gá e búʼó gá yɨ́ná ɨ́ dyɛʼwó mpʉ bé á lɛ̂ʼle bɨ̌n yɨ́. Tóʼ le edwe gá Nzyɛ̌m nzyǒo dóló ɨ́ bisá nyé dí esâ bɨ́n bí.

⁸ Akam gá mekǎn mé dí dwêh, maá me dí edímle bʉ́ʉ́ bʉ̂r ɨ́ nzɨ̌ mikóo myɔ́ɔ́ má. Ajóʼǒ sá bé dí ejébe ó, «ocwóó ó sí yɨ̂ʼ» yɨ́. Abîr gá ó, mʉr gbâʼ bɨ̌n lɨ́ okómó wé ɨ́ nzɨ̌ nyaá. Mekǎn ménɨ̌, mé duduho ó, ɨ́ metum me bʉ̂r ó sí yɨ̂, ndu e milɛ́ʼlá bʉ̂r ó sí yɨ̂ʼ dí ekûhlo mí. Milɛ́ʼlá myaá, myé aduho kwá mé Krîst.

⁹ Ebě, Nzyɛ̌m di ntinɨ̂ e ntinɨ̂ ó, ɨ́ nyʉ̂l mé Krîst.

¹⁰ Bɨ̌n bé á be ó sí dira mínyɔm mímyɛ̂h ɨ́ mpúhlá nyɨ́n e Krîst. Nye ó dí lʉ̂ kʉ́ misísǐm mí édúrʉ́ʉ́ mímyɛ̂h: le myaá mi dí milʉ̂ mí, le myaá mi dí e nkul jwɨ́ɨ mí.

¹¹ Ɨ́ mpúhlá nyɨ́n e Krîst, bɨ̌n bé á si tíʼɔɔ mpʉ́n dí eduho kwá mé Krîst nyɨ́. Mpʉ́n nyaá ó dí elɛ̂ʼle ó, bɨ̌n bɨ́ dwǐh njwɨr myâ gá wɨ́ná. Bɨ̌n bé á bé atíʼɔɔ mpʉ́n mpʉ bʉ́ʉ́ bʉ̂r dí etîtiʼɔɔ yɨ́.

¹² Ɨ́ ndubó bɨ́n á duŋɔɔ wɨ́, bɨ̌n bé á si debe, bɨ̌n e Krîst ɨ́ jɔʼ gwár. Bɨ̌n e né ntémé ó b'á pah, ebe bɨ́n dí ebúʼla nkûl nɨ́nɨ́ɨ́ mé Nzyɛ̌m. Nkǔl nɨ́nɨ́ɨ́ nyaá ó b'á pɛh nye.

¹³ Ɨ́ mimbú mí píhe, bɨ̌n bé á be ó odwe nkǒ páʼ sísǐm, tɨ̂ ɨ́ misyóm mín, le mpʉ bɨ́n á be apǎ teʼle nkûl njwɨr myâ gá wɨ́ná yɨ́. Nó ó, ɨ́ báánâ, Nzyɛ̌m, nyɨ́ sâ ó, bɨ̌n e boo Krîst, bé níʼee ɨ́ twiʼ mpâ sɔ́má gwár. Nzyɛ̌m, nyɨ́ pɛʼ bíbaa bí ébébe bíbyɛ̂h nyé á niʼe mɨná ɨ́ lɔ̌b mísyóm gá míná mímyɛ̂h.

¹⁴ Micɛmá myé á lɨlɛ̂ʼle mebě gá mɨ́ná mí, nyɨ́ pɛʼ myé ɨ́ mɨná gá, bomlo myé e binzâŋ ɨ́ kolôs. Micɛmá myaá, myé ó b'á lɨlɛ̂ʼle mempéné mé á lwîlwimla e mɨná gá má.

¹⁵ Nzyɛ̌m, nyɨ́ par mísísǐm mí édúrʉ́ʉ́ le meleme bisá bí dɔ̂m bé á be e byé bí. Nye á ntaa bé ó, ɨ́ jɔ̌ʼ Krîst á dwe ɨ́ kolôs yɨ́. Nyɨ́ líʼe mísísǐm myaá ɨ́ gœr gœ́r, lúʼo nkûl, ɨ́ míh mé bʉ̂r ɨ́ kpɛŋlɛm.

¹⁶ Abîr gá ó, mʉr dwêʼ bɨ̌n mebě ɨ́ sá bɨ́n dí ede yɨ́: nkʉ̂ menyoʼ, nkʉ̂ mede. Bé ayɨ́ pahle bɨ́n ɨ́ lɔ̌b mbwalá ménzɔɔ wɔ́ɔ́, nkʉ̂ ɨ́ lɔ̌b ébʉ́ʼ lé ébám lé álomó. Bé ayɨ́ pahle bɨ́n ntémé ɨ́ lɔ̌b mbaʼlá móhó sábat.

¹⁷ Milɔ̌b mínɨ̌ mímyɛ̂h, myé ó sisîm, dí elɛ̂ʼlě sâ mpâ dí enze yɨ́. Nó ó, otyeetye o tɨ̂ʼ wɨ́ɛ, wé ó Krîst.

¹⁸ Mpʉ bɨ́n di ajɔr ményʉ̂l ɨ́ míh bééngeles, nkʉ̂ dwáawo bé yɨ́, mʉ̂r dwé bɨ́n mebě me mpéne, duho tɨ̂ʼ nó, anʉa gá lwǐb yé, gbâ ɨ́ nkɔb. Bisá bé dí ebee lɨ́ esimá bí ó bé dí enʉa, gbâ ɨ́ nkɔb. Mimbi mi bʉ̂r myaá, myé ó lwɨ́ŋlá e nkɛ́á nyʉ̂l. Bé nkɨ́nkɛ́ɛ́ ményʉ́l mɔ́ɔ́ ó, dwêh, ebě, bijwɨʼ byɔ́ɔ́, byé jaá duho ó, njɨ ɨ́ nkul misyóm myɔ́ɔ́ tʉ́ŋlʉ̌.

¹⁹ Bé akǎ mɛ̂r Yésʉs-Krîst ɨ́ kpɨ́ɨ́ɨ́, nyɨɛ mʉr dí yɨ́ɛ lʉ̂, tíl nyʉ̂l dí ekab nkûl nyé ɨ́ bitíl bí nyʉ̂l biswîh yɨ́. Nye ó dí esyɛŋ byé, le elɛ̂ʼle byé mpʉ byé jálá le edira ɨ́ mebɨ̌l ndu e misihé yɨ́. Nye ntémé ó dí esâ ó, nyʉ̂l nyaá tôʼ le egwɨ́ě mpʉ̌ Nzyɛ̌m dí ekpɛl yɨ́.

Adû gá ocwóó ó bʉ̂r

²⁰ Bɨ̌n e Krîst, bé á si dwe eswie empwár. Sá tɨ̂ʼ ó mílɛ́ʼlá bʉ̂r ó sí yɨ̂ʼ dí ekûhlo mí, dí abe lɨ́ ekǎ jwɨ́ɨ bɨ́n yɨ́. Ɨ́ tɨ̂ʼ, mʉ̌r sá akǎ dû mémpéné mé dí eduho ɨ́ milɛ́ʼlá myaá má, nkʉ̂ báʼǎ tiʼě mpʉ̌ sá lɛ́ɛ́, bɨ̌n gúmó ó e sí yɨ̂.

²¹ Bé ó dí elɛ́ɛ ó: «Ade yɨ̂. Abóblo yɨ̂. Akúna e yɨ̂.»

²² Bʉr ó b'á tyêl mempéné maá, ti e milɛ́ʼlá myaá. Wɨ́nɨ̌ mbi mémpéné, wé jaá dwɛ̂ʼ ó, njɨ bisâ bi dí esíe ɨ́ jɔʼ bʉ̂r dí edira mínyɔm myɔ́ɔ́ e byé bí.

²³ Mempéné mɔ́ɔ́, mé ajala le edweŋɔɔ̌ dúu. Mé jaá sâ ó, njɨ mʉr lóŋlaa bigwɨ́má bí nyʉ̂l bipúno nyé. Metié maá, mé kʉ́ nyɨnyɨ̂n ó, mpʉ̌ sá lɛ́ɛ́, mê le ocwóó tʉ́ŋlʉ̌, ebě, mé ó dí elɛ́ɛ ó, mʉ̌r mbɨa ó, dû yébé nyé mʉr tɨ̂ʼ pa kúhló wɨ́, le ejɔr nyʉ̂l nyé, le edwe nyʉ̂l nyé bintɨ́ʼá.