Jacques 5 - Kálar Nzyɛ̌m : Ejwán é Sáá

Ecɨ̂l ókúmá ó bʉ̂r

¹ Bɨ̌n bʉr o dí okúmá ó bʉ̂r bá, jóʼlááá gá me: Jɨʼee gâ. Tímáá gá ɨ́ lɔ̌b mítúú mû lɨ́ enze kwá nyɨ́n mí.

² Okúm le ogbaa wɨ́n, wé ó bol. Mikán mín, mí dɨ́ɨ ósyôʼ.

³ Gʉ̂l ndu e mɔnɨ́ yɨ́n, yɨ́ bǐl myámnkɛ̂l. Myámnkɛ̂l waá, wé óboʼlo mébébe mɨ́n. Wé ntémé, wé ódîʼ bɨ́n mpʉ̌ siʼe, ebě, bɨ̌n bé á si komo okúm ɨ́ melú mé épíhé mâ.

⁴ Bɨ̌n bé á bé ajána e bilóbila byé á lilî bipemé bín bí. Jóʼláá gá bipurá byɔ́ɔ́. Dâ Nzyɛ̌m, dí Njwɨ́ɨ bisɔ́má bí mɔ̂m nyá, nyɨ́ jóʼo bítím bí ókpɛma bô.

⁵ Bɨ̌n bé á tíʼe ɨ́ sí yɨ̂ʼ ó, ɨ́ mepwaʼ, lɨ́ ejaá sáǎ njɨ elóŋlǒ gwɨ́má bísâ. Bɨ̌n ntémé bé á be ó sí buú de ɨ́ de de de, bwǎʼ mpʉ mímyáʼ ɨ́ tu, bɨ̌n bɨɛ lɨ́ ekʉ́ gwá gʉ́a ó, yé e dʉ́ó mímyáʼ ngá tíʼɔɔ lɨ́.

⁶ Bɨ̌n bé á si dwe bʉr o b'á be akúnwo e mpɨŋ bá mebě, le ejʉ̂ bê. Bé á bé akamle e menyʉ́l mɔ́ɔ́.

Bíhwó

⁷ Bɨ́ɔɔ́ bâm! Okɛ́l bâm! Diʼee gá e bíhwó, tó pyâl ɨ́ jɔʼ Tî gá wɨ́ná óbáʼǎ nze yɨ́. Diʼee gá e bíhwó mpʉ óbel o mémpeʼ dí e nye yɨ́. Ebě, bé lɨ́ edûhwo, ó bipemé bé á be bí, byé gúmaa mpumó mpâ. Bé dúhwó ó, ebóno ómpíé bé ésôʼ le baá bé épíhe.

⁸ Júhwáá gâ. Biʼee gá nkul ɨ́ miléme, ebě, Tî gá wɨ́ná mû ó kúno ebáʼǎ nze.

⁹ Bɨ́ɔɔ́ bâm! Okɛ́l bâm! Ayɨ́ sɛ́ɛla gá bipurá páʼ nyɨ́n, ebě, Nzyɛ̌m nkʉ̂ be, atíʼe bɨ́n lɔ̌b tɨ̂. Tîʼ milɔ̌b mû ó kúno enze.

¹⁰ Bɨ́ɔɔ́ bâm! Okɛ́l bâm! Ogwíha o mílɔ̌b bé á dûhwo mitúú e bíhwó bá, bé ó bɨ́n jálá le edû bá. Bé ó b'á kala mɨná gá lwǐb mé Dâ.

¹¹ Mɨná lɨ́lɛ́ɛ́ gá ó, mʉr á dûhwo mitúú e bíhwó nyá, nyě e metyɛʼ me mpóm. Bɨ̌n bé á be ó sí jóʼǒ mpʉ̌ Job nyɨɛ á dûhwo mitúú yɨ́. Bɨ̌n ntémé bé lɨ́ egʉ́ǎ mpʉ̌ Dâ Nzyɛ̌m á ka sâ nye mpam lɨ́ epíhé yɨ́, ebě, Dâ Nzyɛ̌m, nyě e njɨ́ʼá nkóó. Nye ɨ́ buú cwɨ́a e bʉr.

¹² Bɨ́ɔɔ́ bâm! Okɛ́l bâm! Kʉ́ buú syɛ̂hle gá entaa mínkâl. Akáale, gbâ díé é jʉ́o ɨ́ minkâl. Agbâ díé é sí ɨ́ minkâl. Lɛ́yɨ́ɨ́ gá jɔʼ yɨ́yɛ̂h ó: «Heʼé!» ɨ́ jɔʼ yé dí «Heʼé!» yɨ́, nkʉ̂ ó: «Eee!» ɨ́ jɔʼ yé dí «Eee!» yɨ́, lɨ́ ekpɛ́ɛ ó, bɨ̌n ámû jaá nʉa mébě ɨ́ tíʼá mílɔ̌b mé Nzyɛ̌m.

Minjɨʼla

¹³ Mʉ̂r sɔ́má yɨ́n bê sí bee ó, nye ɨ́ mitúú nó, nye jɨ̂ʼlaa e Nzyɛ̌m. Nyʉ́ʉ́ mʉ̂r bé ɨ́ bisʉhʉʉ nó, nye ɨ́ jala le edyɛɛ méjéme mé édwě Nzyɛ̌m kûm.

¹⁴ Waá nyɨnyɛ̂h dí ebíle ɨ́ sɔ́má yɨ́n nyá, nye jébaa otyɛ̂b bé ésôʼ ó Mbɛ̌r-Nzyɛ̌m. Bé onzě jɨʼla e Nzyɛ̌m lɨ́ esú lé, le elœm nyé múlo, le epɨr e díé mé Tî gá wɨ́ná.

¹⁵ Minjɨʼla myaá, myé sɨ́sáŋɔ́ɔ́ ó e búʼó. Nó yé ósâ ó, Nzyɛ̌m tíʼɨɨ mʉr waá yɨ́. Yé bé nye á be ó sí sâ syóm nó, Nzyɛ̌m ópɛʼ nyé baa ébébe nyé á pa niʼe ɨ́ lɔ̌b syóm waá yɨ́.

¹⁶ Jɔʼ bɨ́n dí ebíle yɨ́, mʉr nyɨnyɛ̂h, nye ɨ́ jala le egwîh ébébe lé. Bɨ̌n bé ɨ́ jala le ejɨʼla páʼ nyɨ́n, bɨ̌n bʉr o tɨ̂, ɨ́ jɨʼla jɨʼla, tó pyâl ɨ́ jɔʼ bɨ́n ngá tíʼe yɨ́, ebě, minjɨʼla mi mʉ̂r dí tîtyěl nyá, myé e nkul.

¹⁷ Elie á be ó mʉr mpʉ mɨ́ná gâ. Nye á si jɨʼla e nkul ó, mpíé sá akǎ nwɨ́ɨ, tó pyâl ɨ́ jɔʼ mpíé á bana tyɛ̂b, akǎ nwɨ́ɨ tâŋ mimbú mílɛ̂l e pêh yɨ́.

¹⁸ Píe tɨ̂, nye á si baʼa jɨʼla. Jʉ́o ntɔ̂ʼ sul mpíé. Sí yaá ntɔ̂ʼ táare égúmo méde.

¹⁹ Bɨ́ɔɔ́ bâm! Okɛ́l bâm! Mʉ̂r ɨ́ sɔ́má yɨ́n sí dû míkóo, bɔ́ʼa le otyeetye, nyʉ́ʉ́ mʉ̂r ntɔ̂ʼ nze e né ɨ́ nzɨ̌ twiʼ nó,

²⁰ gʉ́ŋáá gá ó, mʉr waá dí epɛʼ syɛ̂l misyóm ɨ́ nzɨ̌ misyóm myé, tyêl nyé ɨ́ nzɨ̌ mpâ nyá, nyɨ́ tǐʼ sísǐm me syɛ̂l misyóm waá. Nyɨ́ sâ ó, Nzyɛ̌m pɛ́ʼɛɛ nye bibaa bí ébébe ɨ́ buo buo.