Bìoball air-loidhne

Jacques 4 - Kálar Nzyɛ̌m : Ejwán é Sáá

Atia gá esó e bʉr ó sí yɨ̂

¹ Bitɔm e melwímla dí esyɛ́ɛlɨ páʼ nyɨ́n bí, byé duhǒ nkoó? Byé duho ó, ɨ́ bigwɨ́má bɨ́n dí e byé jɔʼ yɨ́yɛ̂h ɨ́ menyʉ́l mɨ́n bí.

² Bɨ̌n bé lɨ́ egwɨ̂m bísɔ̂ʼ. Bɨ̌n bɨɛ abe e byê. Ɨ́ tɨ̂, bɨ̌n bé ɨ́ cǎr ó, bɨ̌n jʉ́ʼoo bʉr, le esíe bê. Sâ gwár, bɨ̌n bé abe e nkul ebi byê, ebě, bɨ̌n bé abe lɨ́ ejǎʼ Nzyɛ̌m.

³ Bɨ́n jáʼ nyé byǎ nó, bɨ̌n bé abe lɨ́ ebi yɨ́ɛ byê, ebě, bɨ̌n bé lɨ́ ejaʼ ɨ́ mbi dí ɨ́ bébe wɨ́. Sá bɨ́n dí egwɨ̂m yɨ́, bɨ̌n jaá kpɛl yé ó, njɨ lɨ́ esú lé élóŋlo bígwɨ́má bín e tɨ̂.

⁴ Bɨ̌n odûl bé ónzyɛ̌m oswîh, nzê bɨ̌n bé agʉ́a ó, jɔʼ bɨ́n tíá ésó e sí yɨ̂ʼ yɨ́, bɨ̌n kǎ lɛ̂ʼlě Nzyɛ̌m náǎ ó, bɨ̌n bɨ́ dwira e né, le edi óntɨ̂m le obɨn bé ɛ́?

⁵ Nzê bɨ̌n mû lɨ́ ebee ó, lwǐb mé Nzyɛ̌m, yé ó dwêh? Ebě, nye á si boo lɛ́ɛ ó: «Sísǐm Nzyɛ̌m á gbâ ɨ́ mɨná gá wɨ́, wé ɨ́ buú sâ mbɔʼ.»

⁶ Damá be nó, Nzyɛ̌m, nye lɨ́ esʉ mɨ́ná gá metyɛʼ me mpóm ɨ́ buo buo. Mekaná mé Nzyɛ̌m, mé lɨ́ elɛ́ɛ ó nó: «Nzyɛ̌m, nye lɨ́ elwímla e bʉr o dí enkɛ́ɛ ményʉ́l mɔ́ɔ́ bá. Baá dí ejɔr ményʉ́l mɔ́ɔ́ bá bɨɛ, nye lɨ́ esʉ bé metyɛʼ me mpóm.»

⁷ Ɨ́ tɨ̂, sáʼ gá Nzyɛ̌m mejóʼo. Lwímláá gá e sɔ́ŋ meleme. Nyé okpɛ́ɛ bɨ́n, tó di ɨ́ pɨ́nʉ́ʉ́.

⁸ Síhláá gá bǎʼ e Nzyɛ̌m. Nyé osîhlě nko bɨ́n dí yɨ́. Jwɨyɨɨ gá mebó mɨ́n, bɨ̌n osyɛ̂l o mísyóm. Sohlaa gá milémé mín, bɨ̌n bʉr o dí mekʉ̌ me kwɨ̂h bá.

⁹ Bɨ̌n bé ɨ́ jala le edi le ebúʼ, jɨŋɔɔ médwê, myɛ́ɛlé lóno mîh. Syɛ́ɛ́láá gá jo yɨ́n lɨ́ esú lé édwê. Syɛ́ɛ́láá gá sʉhʉʉ yɨ́n lɨ́ esú lé ébúʼ!

¹⁰ Jɔrɨɨ gá menyʉ̂l ɨ́ mpǒm mé Dâ Nzyɛ̌m. Nyé ogbɛl bɨ́n.

Adwe gá bʉr mebě

¹¹ Bɨ́ɔɔ́ bâm! Okɛ́l bâm! Asâ gá mesyɛ́ɛla páʼ nyɨ́n. Waá nyɨnyɛ̂h dí esâ mɨ́ɔɔ́ mesyɛ́ɛla, dwe nyé mebě nyá, nye mû ó mpʉ̌ sá lɛ́ɛ́, nyɨ́ bee étié mé Nzyɛ̌m e bigwǐh. Yé ntémé, yé ó mpʉ̌ sá lɛ́ɛ́, nyě dwé ó etié laá mebě. Nyé akǎ be mʉ̂r dí ebaʼle étié laá nyá. Nye mû ó lɨ́ edwe lé mebě.

¹² Nó ó, Nzyɛ̌m, nye omér ó dí etyêl métié. Nye ntémé ó dí etíʼe mílɔ̌b. Nye óbɛ̌m tíʼ mʉ̂r, nkʉ̂ jʉ̂ nyê. Gua, go nzé, gó dí edwe mɨ́ɔɔ́ gǒ mʉr mebě nɨ̌?

Ankɛ́ɛ gá menyʉ̂l

¹³ Jóʼláá gá me, bɨ̌n bʉr o dí elɛ́ɛ ó: «Mûh, nkʉ̂ ómɛ́n, bɨ̌h bé ótô nkana swîh, nkana kɛl, gúmó bɨ́h ngá lɛ̌ŋ mbû yɨ́, sâ mpɛ́ma, bi bímɔnɨ́» bá.

¹⁴ Bɨ̌n bé agʉ́ǎ mpʉ̌ twiʼ yɨ́n yé óbe ómɛ́n yɨ́, ebě, bɨ̌n bé ó mpʉ̌ dwiné dí enyɨ̂n ɨ́ mâ péh jɔʼ, ntɔ̂ʼ dîm ɨ́ mîh yɨ́.

¹⁵ Sá bɨ́n jálá le elɛ́ɛ yɨ́, yé ó: «Dâ Nzyɛ̌m sí kam nó, bɨ̌h bé ótíʼe. Bɨ̌h bé osâ sâ swîh, sâ kɛl.»

¹⁶ Sâ gwár, bɨ̌n mû ó lɨ́ esâ énkɛ́ɛ e nyʉ̂l ɨ́ jɔʼ bɨ́n sá jáálé nó yɨ́. Gʉ́ŋáá gá ó, mbǐ nkɛ́á nyʉ̂l wɨ́wɛ̂h, wé ɨ́ bébe.

¹⁷ Nó, waá dí egʉ́ǎ syɛ́ɛla mpâ nyé jálá le esâ, sâ gwár asâ yé nyá, mʉr waá kʉ́ sâ ó syóm.

« Roimhe

Air adhart »

Lean sinn:

Ceanglaichean taic

Sanasan