Jacques 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Jacques, syɛ̂l mesâ mé Nzyɛ̌m le Tî Yésʉs-Krîst ó dí ecɛma bɨ́n mekaná mâ. Me lɨ́ esoho bɨ́n, bʉr o ménzweh kám e mebá mû mingbɛhá míngbɛhá ɨ́ sí yɨ́yɛ̂h bá.

Bisʉhʉʉ ɨ́ mebʉ́blá

² Bɨ́ɔɔ́ bâm! Okɛ́l bâm! Jɔʼ bé dí ebóblo bɨ́n mimbi mímyɛ̂h yɨ́, bɨ̌n e gʉ́á ó, yê bɨ̌n ó jɔʼ bísʉhʉʉ.

³ Ebě, bɨ̌n bé ɨ́ jala le egʉ́a ó, ɨ́ jɔʼ yaá, yé ónyɨ̂n ɨ́ ponó ɨ́ míh mé bʉ̂r, nkʉ̂ bɨ̌n bé lɨ́ edyɛ̂ʼwo e Nzyɛ̌m lɨ́ otyeetye. Búʼó yɨ́n, yé ódwe bɨ́n bíhwó ɨ́ buo buo.

⁴ Kamaa gá bé edûhwǒ sá yɨ́yɛ̂h, ebě, bíhwó nyaá, nye óbe bɨ́n e nyɔm. Bɨ̌n bé otɔ́ma ɨ́ mipáʼ mímyɛ̂h. Bɨ̌n bé óbe ó e sá yɨ́yɛ̂h, abe e sá yé ósâ bɨ́n sɔ́ɔlʉ.

⁵ Nyʉ́ʉ́ mʉ̂r ɨ́ sɔ́má yɨ́n bé lɨ́ ejɨ ócwóó nó, nye jáʼaa Nzyɛ̌m wǎ. Nye ókʉ́ dwe nyé wǎ. Nzyɛ̌m dwídwé bʉ̂r ocwóó ó, dwě dwêʼ, abe e túú ɨ́ léme.

⁶ Sâ gwár, nye ɨ́ jala le ejɨʼla e Nzyɛ̌m ó, lɨ́ ekʉ́ dyɛ̂ʼwo e né. Nyě sá ó, alíʼa lɨ́ ejaʼ ócwóó waá, ebě, mʉr dí elíʼa lɨ́ ejaʼ míndwéá mé Nzyɛ̌m nyá, nyě nwɨɨlá ó, le obóʼó ó mâŋ pubó dí etíne, tyěn gúmó yɨ́yɛ̂h wɨ́.

⁷ Nó ó, mʉr dí e milémé mímbá nyá, nye ákóʼó bi yʉ́ʉ́ sɔ̂ʼ kwá mé Dâ ɨ́ lɔ̌b mínjɨʼla myé myaá.

⁸ Ebě, nye ó mekʉ̌ me kwɨ̂h. Kʉ̌ tyen wé ntémé, wé ó ɨ́ yéŋe yeŋé yéŋê.

Baántéʼenteʼe o bʉ̂r le okúmá

⁹ Mɨ́ɔɔ́ wɨ́ná ɨ́ Mbɛ̌r-Nzyɛ̌m dí ántéʼenteʼe mʉr nyá, nye ɨ́ jala le enkʉ́na ɨ́ lɔ̌b dǐ nɨ́nɨ́ɨ́ Nzyɛ̌m á tyêl nye tɨ̂ʼ yɨ́.

¹⁰ Nó ó, mɨ́ɔɔ́ gá wɨ́ná dí ɨ́ twíha nyá, nye ɨ́ jala le enkʉ́na ɨ́ dǐ nkóó Nzyɛ̌m á dil nye tɨ̂ʼ yɨ́. Nye ɨ́ jala le egʉ́a ó, nye ólaǎ mpʉ nzɔ́m bilɨ́.

¹¹ Dʉ́o, lé lɨ́ ekah; dwéhé, dîʼ nzɔ́m. Nye lɨ́ ekur sí; ojɔɔ́ wé bʉ̂r bé á bɨbee wɨ́, wé ntɔ̂ʼ síe. Yé lɛ́ʼlé ntémé ó mpʉ kúmá mʉr ngá dumlo yɨ́. Nye ódwě ntuʼ ɨ́ jɔʼ nyé óbe, nye dína lɨ́ elûhwa lɨ́ edû mílɔ̌b myé yɨ́.

Nzyɛ̌m ábóbló bʉ̂r

¹² Metyɛʼ me mpóm, mé díʼee e mʉr dí edûhwo mébʉ́blá nyá. Ebe mʉ̂r tɨ̂ʼ síl ébóblɔɔ nó, nye óbi myɛ́na me tɨ̂: twǐʼ Tî Yésʉs á kɛʼ bʉr o dí ekpɛl nyé bá yɨ́.

¹³ Jɔʼ mʉ̂r mû lɨ́ ekʉ́ bóblɔɔ yɨ́, nye sá alɛ́ɛ ó, Nzyɛ̌m ô lómó nyé ó, nye sâʼ ebébe. Nzyɛ̌m, nyé abe e nkul ebóblɔɔ ɨ́ nzɨ̌ ebébe. Nye ntémé, nye ábóbló mʉ̂r.

¹⁴ Bibébebébe bígwɨ́má bi dí ɨ́ léme bí, byé ó dí etíne mʉ̂r tɨ̂ʼ ó, nye sâʼ ebébe. Byé lɨ́ ekwâb nyê.

¹⁵ Bigwɨ́má mû lɨ́ etíʼe ɨ́ léme tʉ́ŋlʉ̌ bí, byé súʼlá ó, byâ mwân. Mwân waá, nye ó misyóm mɨ́ná dí esâ gá mí. Jɔʼ mísyóm gá míná, myé óbe, myé mû sí bwaʼ yɨ́, míɛ, myé okǎ byâ wé mwân: eswie.

¹⁶ Bɨ́ɔɔ́ bâm! Okɛ́l bâm, bʉr mé dí ekpɛl bá! Mʉ̌r sá ajéʼě sɨ̂:

¹⁷ bisá bíbyɛ̂h bi dí ɨ́ mbɨa bí, le mindwéá mi dí ɨ́ pémémé ɨ́ mipáʼ mímyɛ̂h mí, byé duho ó, ɨ́ jʉ́o kʉ́, kwá mé Nzyɛ̌m Sɔ́ŋ. Nzyɛ̌m ó b'á komlo ocwícwén, le dʉ́o ti e l'álomó. Nó ó, nyé abe lɨ́ ecéně mpʉ bísâ byaá dí ecéne bítyé byɔ́ɔ́ yɨ́. Nyé acéně mpʉ dʉ́o, sá dí edíme, kǎ líʼe bʉ̂r ɨ́ pyóo yɨ́.

¹⁸ Nye mʉr tɨ̂ʼ á byâ mɨná gá ó, ɨ́ lɔ̌b gwɨ́má yé, ɨ́ nzɨ̌ lwǐb yé dí tyeetye yɨ́. Nó ɨ́ bisá bíbyɛ̂h nyé á komlo bí, mɨná ó dí gá ɨ́ tyé ésôʼ.

Sáʼ gá Nzyɛ̌m mejóʼo

¹⁹ Bɨ́ɔɔ́ bâm! Okɛ́l bâm, bʉr mé dí ekpɛl bá! Gʉ́ŋáá gá ó: mʉr, nye ɨ́ jala le ekpâhwǎ jóʼo, sâ gwár, akpâhwǎ lwib, akpâhwǎ kpaa ébúʼ.

²⁰ Ebě, ɨ́ jɔ̌ʼ lémé mʉ̂r dí ɨ́ kpɔɔ kpɔɔ yɨ́, mʉr tɨ̂ʼ, nyé abe e nkul ekǎ sâ syɛ́ɛla dí tîtyěl ɨ́ míh mé Nzyɛ̌m yɨ́.

²¹ Pɛʼɛɛ gá mebomo dí ɨ́ sɔ́má yɨ́n má. Bɨ̌n e gwâʼ le esâ ébébe é léme, ntaa sʉ́ŋa. Bɨ̌n e nʉ́á lwǐb mé Nzyɛ̌m e miléme mi dí ɨ́ pyɛɛɛ mí. Lwǐb yé yaá, yé mû ó mbeá tʉ́ŋlʉ̌ milémé mín. Lwǐb yaá ó dí e nkul etíʼ bɨ́n.

²² Sá Nzyɛ̌m mû lɨ́ elɛ́ɛ bɨ́n yɨ́, bɨ̌n e sá yé mejóʼo. Ayɨ́ jóʼo gá njɨ e megwǎl. Bɨ́n jóʼó njɨ e megwǎl nó, lɛ́ɛ́, bɨ̌n kʉ́á ó bɨ̌n bʉr o tɨ̂.

²³ Ebě, mʉr dí ejóʼǒ lwǐb yaá, agbâ yé ɨ́ nkɔb nyá, nye ó mpʉ mʉ̂r dí edwɛ̂ʼ mpóm nyé lɨ́ enyɨ́n, beě mpʉ nyé á byɛ̂l yɨ́.

²⁴ Le nyé dwír koo, le ntɔ̂ʼ nyé jɨ́há mpʉ nyê bé yɨ́.

²⁵ Nó ó, mʉr waá dí esâ étié mé Nzyɛ̌m mejóʼo, le esâ sɨ́n lɨ́ ebaʼle lé nyá, nyɨ́haá ó Nzyɛ̌m ngá sʉ métyɛʼ me mpóm. Nye óswɨɨ métyɛʼ me mpóm ɨ́ syɛ́ɛla yé yɨ́yɛ̂h nyé ngá sâ yɨ́, ebě, nyé abě mbi mʉ̂r dí, le nyê jóʼó, le nyê jɨhá nyá. Nye lɨ́ esâ bísyɛ́ɛla bi tɨ̂. Etié laá, lé ó mbɨ̂mbɨá ɨ́ mipáʼ mímyɛ̂h. Lé e nkul etyêl mɨ́ná gá ɨ́ tyé ónzyɛh o bʉ̂r.

²⁶ Mʉ̂r láá ó, nye ó mbûʼla, nye l'amɛ̂r jɨ̂m yé nó, nyě kʉ́á ó nye mʉr tɨ̂. Búʼó mʉ̂r waá, yé ó dwêh.

²⁷ Mpǎŋ búʼó ɨ́ míh mé Nzyɛ̌m Sɔ́ŋ ɨ́ pémémé, yé ó nɛ́ɛ: mʉr tôʼ bwá bé ónyʉ̌l ɨ́ menɔɔlʉ. Nye súʼaa ntémé mikúho mi dí esia e mitúú mí. Nye díʼee e ncɛrá le bisá bí sí yɨ̂, lɨ́ esú ó, byé ayɨ́ kala nyé bilœ̌ʼ byɔ́ɔ́.