Filipi 4 - Kálar Nzyɛ̌m : Ejwán é Sáá

Lɔ́ɔ́ Pɔ̂l dí etúno lɨ́ obûʼla wɨ́

¹ Bɨ́ɔɔ́ bâm le okɛ́l bâm mé dí ekpɛl bá, me lɨ́ ebuú gwɨ̂m ébáʼǎ bee bɨ́n. Bɨ̌n ó dí edwe mé bisʉhʉʉ ɨ́ buo buo ɨ́ léme. Bɨ̌n ó ngá sâ ó, Nzyɛ̌m dwêʼ me myɛ́na, mpʉ̌ káráá dúu. Tyɛ́bɨ́ɨ́ gá mekʉ̌ sí ɨ́ sɨ́ŋ ɨ́ nzɨ̌ Tî Yésʉs dí etɨ́e bɨ́n nyɨ́.

² Me lɨ́ ejɨʼla e bɨ̌n, Evódia bé e Sʉntíke mpʉ bɨ́n mû sí pûhla e Tî Yésʉs yɨ́, diʼee gá ntémé twíí mpwár.

³ Me lɨ́ ejɨʼla ntémé e go, mpǎŋ mɨ́ɔɔ́ wǎm, ó go tôʼ komlo bʉ́bá ónɨ̌, ó bé díʼee twíí, ebě, bé ó bʉr o bɨ́h le onɔ́ɔ́ bé á sia e túú lɨ́ etúnǒ Mbɨambɨa Lɔ́ɔ bá. Bé e Klemâŋ ti e bʉ́ʉ́ bʉ̂r, bé á si séa ntémé nó. Míé mɔ́ɔ́, mé ó micɛmá ɨ́ mekaná mé twiʼ tʉ́ŋlʉ̌.

⁴ Diʼee gá jɔʼ yɨ́yɛ̂h ɨ́ bisʉhʉʉ ɨ́ mpúhlá nyɨ́n e Tî Yésʉs. Me lɨ́ ebáʼǎ lɛ́ɛ ó, sohaa gâ.

⁵ Mě kpɛl ó, bɨ̌n lɛ̂ʼlaa bʉr bɨ́bɛ̂h mpʉ bɨ́n dí e lémé mpâm yɨ́. Sáʼ gá nó, ebě, Dâ, nye mû ó kúno enze.

⁶ Asyɛl gá bá ɨ́ yʉ́ʉ́ sɔ̂ʼ. Jɨʼlaa gá e Nzyɛ̌m ɨ́ bijɔʼ bíbyɛ̂h, ɨ́ bisá bíbyɛ̂h bɨ́n dí ejɨ bí. Jwǐdwéʼ gá nye nzyǒo ɨ́ jɔʼ yɨ́yɛ̂h ɨ́ bisá nyé dí edwe bɨ́n bí.

⁷ Nzyɛ̌m óbaʼle mílémé mín ti e misísǐm mín ó e nzɨ̌ mepyɛbla mé. Milémé mín lónaa ɨ́ mepyɛbla ɨ́ mpúhlá nyɨ́n e Yésʉs-Krîst, ebě, mepyɛbla mé Nzyɛ̌m dí entaa ócwóó wɨ́wɛ̂h má, mé óbaʼle mílémé mín ti e misísǐm mín ɨ́ Yésʉs-Krîst.

⁸ Bɨ́ɔɔ́ bâm! Okɛ́l bâm! Me lɨ́ esûʼlǎ lɛ́ɛ bɨ́n ó nɛ́ɛ: pahlaa gá bisá bímpâ ndu e byaá bi dí e medile bí. Pahlaa gá bisâ bi dí tyeetye bí. Pahlaa gá bidimé bísɔ̂ʼ, le byaá bi dí tîtyěl bí. Pahlaa gá bisâ bi dí ɨ́ púpúpú le ebuú kpɛlɔɔ bí. Pahlaa gá milɔ̌b bʉ̂r dí egúmlo mí.

⁹ Gwá baʼle gá milɔ̌b mímyɛ̂h bɨ́n á jɨ̂ʼ ɨ́ me le ekam mí. Lɔ́ɔ́ wɨ́wɛ̂h bɨ́n á jóʼo me lɨ́ elɛ́ɛ, le sá yɨ́yɛ̂h bɨ́n á bee me lɨ́ esâ yɨ́, baʼlaa gá byê. Nzyɛ̌m, mʉr dí egbâ mɨ́ná gá mepyɛbla ɨ́ miléme nyá, ódi ɨ́ bɨ̌n.

Pɔ̂l lɨ́ edwe bʉ̂r ó Fílipi nzyǒo ɨ́ lɔ̌b ndwéá wɔ́ɔ́

¹⁰ Me lɨ́ ebuú soho bɨ́n ɨ́ mpǒm mé Tî Yésʉs, ebě, ɨ́ jɔʼ yɨ̂, bɨ̌n bɨ́ báʼǎ toŋlo mé ɨ́ mpʉ bɨ́n á boo tʉtoŋlo me yɨ́. Sâ gwár, bɨ̌n bé á nyɛɛ be ó, abe e nzɨ̌ dí ó, bɨ̌n lɛ̂ʼlaa me nó nyɨ́.

¹¹ Mé lwíb nó wá, yé alɛ̂ʼle ó, me lɨ́ egwɨ̂m sɔ̂ʼ, ebě, mɨ́ boó jɨ̂ʼ ó, me sóhaa sá mé dí e yé yɨ́.

¹² Me lɨ́ egʉ́a étiʼe lɨ́ edyêb. Me lɨ́ egʉ́a étiʼe ɨ́ twíha ntémé. Me á si jɨ̂ʼ lɨ́ edǐ mbɨ̂mbɨá ɨ́ bityé bíbyɛ̂h, ɨ́ diá yɨ́yɛ̂h mé dí edi yɨ́. Mě damá be e mede, nkʉ̂ ntémé di ɨ́ nza, mě damá bi bísâ ɨ́ buo buo, nkʉ̂ ntémé di le edyêb, me yɨ́ɛ ó mbɨ̂mbɨá.

¹³ Mě e nkul esâ bísá bíbyɛ̂h nó ɨ́ nzɨ̌ mé Krîst, mʉr dí edwe mé nkul nyaá nyá.

¹⁴ Damá jóʼo nó, bɨ̌n bé á si kʉ sâ embɨa lɨ́ enʉa nkɔ̂b ɨ́ mitúú myâm.

¹⁵ Bɨ̌n bʉr ó Fílipi, bɨ̌n bʉr o tɨ̂, bɨ̌n bé lɨ́ egʉ́a ɨ́ jɔʼ mé á duhǒ sí Masedónia, lɨ́ etáare étó túnǒ Mbɨambɨa Lɔ́ɔ yɨ́, bɨ̌n ó b'á be Mbɛ̌r-Nzyɛ̌m ngwár wé á susúʼo me wɨ́. Bɨ̌n omér ó b'á soho ɨ́ jɔʼ mé á bee embɨa yɨ́, nkʉ̂ súʼo mê ɨ́ jɔʼ mé á bɔma le ebébe yɨ́.

¹⁶ Ebě, ɨ́ jɔʼ mé á bě Tesaloníka yɨ́, bɨ̌n bé á si nze me e mingúlá, lɨ́ edwe mé sá mé á be lɨ́ egwɨ̂m yɨ́, laǎ jɔʼ gwár.

¹⁷ Mé apʉgʉ́ buú gwɨ̂m ndwéá wɨ́n, wé mʉr tɨ̂. Mě jaá gwɨ̂m ó, njɨ bɨ̌n díraa nyɔm, ɨ́ melû me dí enze má, ɨ́ lɔ̌b sá bɨ́n ngá dwe mé yɨ́.

¹⁸ Me á si bi sá yɨ́yɛ̂h bɨ́n á lómlo me yɨ́. Bím yaá, yé ɨ́ buo. Me mû ó, ɨ́ twíha ɨ́ lɔ̌b bísá Epafrɔ́ditɔs á nze e byé bí. Nzyɛ̌m, nye lɨ́ ebee míndwéá mín mbɨ̂mbɨá mpʉ míndwéá mi dí edíʼɔɔ nyé e mbɨambɨa menumó mí. Yé ó mbi míndwéá Nzyɛ̌m dí ekpɛl wɨ́.

¹⁹ Nó ó, Nzyɛ̌m wǎm, nye ólóŋlo bɨ́n bisá bɨ́n dí esáa bí, dwe bɨ́n byǎ ɨ́ buo buo, lɨ́ edû mpwâʼ okúm wé. Nye ósâ nó lɨ́ esú lɨ́n, bʉr o dí ɨ́ mpúhlá e Yésʉs-Krîst bá.

²⁰ Kûm díʼee e waá dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá, njʉ̌m dǐ e njʉ̌m dǐ. Amɛn.

Meswɨhlɨ

²¹ Sohaa gá me mʉr nyɨnyɛ̂h dí egúmo e Yésʉs-Krîst, waá á pûhla e né nyá. Bɨ́ɔɔ́ bâm le okɛ́l bâm bɨ́bɛ̂h bɨ́h le onɔ́ɔ́ dí wâʼ bá, bé lɨ́ esoho bɨ́n.

²² Bɨ́ɔɔ́ bɨ́n le okɛ́l bɨ́n bɨ́bɛ̂h dí kâʼ bá, bé lɨ́ esoho bɨ́n, kʉ́ buú be, baá o dí ɨ́ mbɛ̌r mé Njwɨ́ɨ Kɛ́ɛza bá.

²³ Ncwɨ́ncwɨ́a mé Tî Yésʉs-Krîst, nye díʼee e bɨ̌n óbɛ̂h.