Filipi 3 - Kálar Nzyɛ̌m : Ejwán é Sáá

¹ Bɨ́ɔɔ́ bâm! Okɛ́l bâm! Me lɨ́ esûʼlǎ lɛ́ɛ bɨ́n ó, sohaa gá ɨ́ mpúhlá nyɨ́n e Tî Yésʉs. Yé akɔbla mé ó, me báʼa cɛmǎ sá mê nyɛɛ cɛmá bɨ́n yɨ́. Yé ntémé ó mé múo nzě sâ lɨ́ esú é nyɔm wɨ́n yɨ́.

Ebi nkâm ɨ́ míh mé Nzyɛ̌m

² Cɨ́áá gá bibɨ̂bla bílóbila byaá. Cɨ́áá gá ompyê baá. Cɨ́áá gá bʉr o dí etíʼe bʉ̂r mpʉ́n lɨ́ ebébe bá.

³ Mɨná gá bɨɛ ó dí e mpǎŋ tíʼá mpʉ́n, waá Nzyɛ̌m mʉr tɨ̂ʼ dí etíʼe wɨ́. Mɨná gá ó dí edwě Nzyɛ̌m kûm ɨ́ Sísǐm wé tʉ́ŋlʉ̌. Mɨná jaá nkʉ́na gá ó, njɨ ɨ́ Yésʉs-Krîst. Mɨná bé adyɛ̂ʼwo gá e bisyɛ́ɛla bi bʉ̂r ó sí yɨ̂.

⁴ Me óbɛ̌m bûʼla mɛ̂m mʉr tɨ̂. Yé bé yé e nyʉ́ʉ́ mʉ̂r dí e nkul egúmlo nyé mʉr tɨ̂ʼ ɨ́ lɔ̌b bípúnó byé nó, lɛ́ɛ́, me ó dí elaa nyê.

⁵ Me á byɛ̂l ó, ɨ́ kúl bʉ̂r o b'Ɨ́zraɛ̂l, ɨ́ mbɛ̌r bʉ̂r mé Benjamin, nyɛ̂r Ebrœ̂. Me á tíʼɔɔ mpʉ́n ó, me mû e melû mwom lɨ́ ebyɛ̂l lâm. Me á si nî ɨ́ sɔ́má óFarizyɛ̂n, lɨ́ esâ sɨ́n lɨ́ ebaʼle métié.

⁶ Me á si bu tíble Mbɛ̌r-Nzyɛ̌m. Ɨ́ nkǒ páʼ métié, me á be ó tîtyěl mʉr, abe le etié egwár lé á mɛ̂r me.

⁷ Me á dwɛ̂ʼ ɨ́ jɔʼ yaá ó, bisâ byaá. Me nzě kǎ bee ó, Krîst ó dí e nyɔm, laa byê. Bíɛ, byé ó tʉ̂toʼó.

⁸ Yé ó nó! Me mû lɨ́ ebee bísâ byaá bíbyɛ̂h ó, byé ó dwêh, ebě, sá dí ɨ́ buú mbɨa yɨ́, yé ó, me dúʼoo Yésʉs. Me á si gwa sû mpǎŋ bisɔ̂ʼ, ebě, sá dí ɨ́ buú mbɨa yɨ́, yé ó, me gʉ́ŋaa Tî wǎm Yésʉs-Krîst. Ebe mé dí edyɛ̂ʼwo e né, me á si bîr bisá bíbyɛ̂h byé á nyɛɛ be e nyɔm ɨ́ páʼ wâm bí. Nó ó, me mû bee byé ó, mpʉ̌ sá jálá le emyahɔɔ̌ dwǐʼ yɨ́. Mě bír byé nó ó, jáŋá me nkʉ̂ bi mâm myɛ́na. Mé óbe ó Krîst.

⁹ Mě gwɨ́m ó, yé nyɨ́nɨɨ mpʉ bɨ́h e Krîst mû ɨ́ mpúhlá yɨ́. Mé agwɨ̂m ébi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mě gwɨ́m ó, Nzyɛ̌m dwêʼ me nkam ɨ́ lɔ̌b búʼó mé dí ebúʼlǎ Krîst yɨ́.

¹⁰ Sá mé dí egwɨ̂m yɨ́, yé ó, me gwâ gʉ́ǎ Krîst. Mě gwɨ́m ntémé ó, Nzyɛ̌m séaa ɨ́ me mpʉ nyé á séa e nkul lɨ́ epɛ̌h Yésʉs-Krîst yɨ́. Me síaa e mitúú mímpwár Krîst á bi mí. Eswie lâm nkʉ̂ nwɨɨla ntémé e laá lé.

¹¹ Ebě, mpûʼla, nye me ɨ́ léme ó, me ntémé, me ópah, bǐ twiʼ.

Kám tó pyâl lɨ́ odumo

¹² Mé apǎ be e nkul elɛ́ɛ ó, me mû ó sí swim, pyâl lɨ́ odumo. Sâ gwár, me lɨ́ etô dóló le egbâ nkûl ó, me nkʉ̂ jala le myɛ́na mé kám, ebě, Yésʉs Krîst mû ó sí boó mɛ̂r mê.

¹³ Bɨ́ɔɔ́ bâm! Okɛ́l bâm! Mé apǎ bûʼla ó, mɨ́ nʉa myɛ́na mé dí egwɨ̂m má. Sá mé dí ejaá sœ̂ŋ yɨ́, yé ó, me jɨ́haa bisá bí píhe, kǎ tyěn lémě nko bísá dína me dóló bí.

¹⁴ Me lɨ́ egbâ nkûl lɨ́ etô dóló, tó pyâl lɨ́ odumo. Me lɨ́ egwɨ̂m ébi myɛ́na mé Nzyɛ̌m nyé dí ejébe mɨ́ná gá ó, mɨná tô bi gá, cɨɨ ɨ́ nzɨ̌ mé Yésʉs-Krîst má. Mé ó komá ɨ́ jʉ́o kʉ́.

¹⁵ Mɨná gá óbɛ̂h, bʉr o mû sí tɔ́ma bá, mɨná bé ɨ́ jala le edi gá e mbǐ jwɨʼ gwár nɨ̌. Nzyɛ̌m ntémé ó ngá lɛ̂ʼle bɨ́n jwɨʼ yaá.

¹⁶ Mɨná dúʼoo gá nzɨ̌ mpwár mɨ́ná dí gá tɨ̂ʼ ɨ́ báánâʼ nyɨ́, jɔʼ yɨ́yɛ̂h.

¹⁷ Bɨ́ɔɔ́ bâm! Okɛ́l bâm! Baŋaa gá me, bɨ̌n óbɛ̂h. Mɨ́ dwe bɨ́n mveʼle. Nó ó, bɨʼɨɨ gá míh mɨ́n ɨ́ bʉr o dí etiʼě mpʉ̌ mveʼle yaá dí yɨ́ bá. Bɨ̌n e dú bê.

¹⁸ Me lɨ́ eboó lɛ́ɛ bɨ́n sɨ̂ʼ yɨ̂ʼ jɔʼ yɨ́yɛ̂h. Me lɨ́ ebáʼǎ bâʼle yé ɨ́ báánâʼ e myɛ́ɛlé ɨ́ mîh: buobuo obûʼla, bé ó tɨ̂, baá dí edû bébebébě kʉ̌ tyen bá. Bé lɛ́ʼlé e nzɨ̌ nyaá ó, bé lɨ́ entémlě lɔ́ɔ́ mé Krîst, á dwe ɨ́ kolôs nyá.

¹⁹ Bɨ́haá, ndumló wɔ́ɔ́, wé ó edîm tyeetye. Bé lɨ́ ejaá gʉ́ǎ njɨ nzyɛ̌m ngwár ɨ́ sí yɨ̂: mimo myɔ́ɔ́. Bé gúgúmló ó, bisâ bi dí ɨ́ buú sámle bé bí. Sâ gwár dí etirwo bé ɨ́ miléme yɨ́, yé ó njɨ bisá bí sí yɨ̂.

²⁰ Ɨ́ páʼ gá wɨ́ná, mɨná gá bɨ́ɛ bé ó bʉr o dí egúmo e jʉ́o kʉ́ bá. Mɨná mû ó lɨ́ ebóno gá Tiʼbʉr gá wɨ́ná. Nye ó dí Tî Yésʉs-Krîst, ngá duho ɨ́ jʉ́o kʉ́, nze kâʼ ɨ́ sí yɨ̂ʼ nyá.

²¹ Nye ódwir bísá ményʉ́l gá mɨ́ná mâ. Menyʉ́l gá mɨ́ná, mé ókǎ nwɨɨla e nyʉ̂l nyé, dí e kûm nyɨ́. Nyě e nkul egbâ bísá bíbyɛ̂h ɨ́ jwɨ́ɨ́ yé. Nó ntémé ó nyé dí e nkul edwe mɨ́ná gá menyʉ̂l maá yɨ́.