Filipi 2 - Kálar Nzyɛ̌m : Ejwán é Sáá

Jɔrɨɨ gá menyʉ́l mɨ́n páʼ nyɨ́n

¹ Búʼó bɨ́n dí ebúʼlǎ Yésʉs-Krîst yɨ́, yé así gbâ bɨ̌n nkul ɨ́ miléme ɛ̌? Kpɛ̌l yé, yé así dwe bɨ́n nkul ɨ́? Nzê bɨ̌n bɨ́ pûhla e Sísǐm mé Nzyɛ̌m? Bɨ̌n bé así kpɛla le ejɨ̂ʼ nkóó páʼ nyɨ́n? Mpʉ yé dí nó yɨ́,

² diʼee gá e lwǐb gwár. Kpɛlaa gá páʼ nyɨ́n. Diʼee gá e léme ngwár, twíí mpwár. Bɨ́n sá nó wá, yé óbuú dwe mé bisʉhʉʉ.

³ Apɨra gá páʼ nyɨ́n. Ankɛ́ɛ gá menyʉ̂l páʼ nyɨ́n. Mʉr nyɨnyɛ̂h, nye dwêʼ bʉ́ʉ́ bʉ̂r dúu, laǎ mpʉ nyé dí ebee nyé mʉr tɨ̂ʼ yɨ́.

⁴ Mʉr nyɨnyɛ̂h ɨ́ sɔ́má yɨ́n, nyě sá agwɨ̂m sá yé óbe nyé e nyɔm yɨ́. Mʉr nyɨnyɛ̂h ɨ́ sɔ́má yɨ́n, nye tóŋlaa ntémé sá bʉ́ʉ́ bʉ̂r, bé ódirǎ nyɔm e tɨ̂ʼ yɨ́.

⁵ Diʼee gá e lémé kpɛ̌l, mpʉ̌ Yésʉs-Krîst á kpɛl bɨ̌n yɨ́!

⁶ Nye á boo be ó, mbi mʉ̂r wé á be jwɨʼ gwár e gwár e Nzyɛ̌m wɨ́. Nó, nye á bé abee ó mpʉ bé e Nzyɛ̌m, bé á be mityé yɨ́, nye á dɛn dǐ tyé Nzyɛ̌m yé yaá ó, dɛnɨ́ɨ.

⁷ Líʼe nó, nye á si dwih nyʉ̂l ɨ́ tyé mbi mʉ̂r waá ɨ́ menzɨ̌ mɨ́mɛ̂h, kǎ sûʼlǎ dǐ tyé túʼǎ mʉ̂r. Náǎ yé ó, nye á be ó, nye mû mʉr mpʉ mɨ́ná gâ.

⁸ Ɨ́ twiʼ mʉ̂r nyé á nʉa yɨ́, nye á si jɔr nyʉ̂l nyé. Nye á si sâ Nzyɛ̌m mejóʼo, damá jóʼo nyé á lómo nye ó, nye ntáa dwě bébebébe eswie ɨ́ kolôs kʉ́.

⁹ Sá tɨ̂ʼ ó Nzyɛ̌m á bu bɨ̂n nye kʉ́, dwe nyé nkul jwɨ́ɨ ɨ́ bisá bíbyɛ̂h yɨ́.

¹⁰ Nye á dwe nye byǎ ó, mʉr nyɨnyɛ̂h bɨ́ʼɨɨ nye mebóó sí, dwe nyé kûm. Bisá bíbyɛ̂h, byé ódwě Yésʉs kûm, táare e bisá bíbyɛ̂h bi dí ɨ́ jʉ́o kʉ́ bí, kala e byaá bi dí ɨ́ sí yɨ̂ʼ bí, dumlo e byaá bi dí tʉ́ŋlʉ̌ bwǎh bí.

¹¹ Nó ntémé ó mʉ̂r nyɨnyɛ̂h ókam ó, Yésʉs-Krîst ó dí Tî yɨ́. Nye ósâ nó ó, lɨ́ ebeʼ kûm mé Nzyɛ̌m Sɔ́ŋ.

Obûʼla, bé ó mimbah mi dí epǎn myɛ́n ɨ́ sí yɨ̂ʼ mí

¹² Nó, osó bâm ɛ̌, bɨ̌n bé á be ó sí sâ Nzyɛ̌m mejóʼo ɨ́ jɔʼ mɨ́ná bé á be gá gúmo gwár yɨ́. Nó ɨ́ báánâ, ɨ́ mpʉ mé dí akǎ be kwá nyɨ́n yɨ́, bɨ̌n bé ɨ́ jala le etô dóló le esâ nó. Nzyɛ̌m, nyɨ́ tiʼ bɨ́n. Nó, séáá gá e bʉ́á le osâʼsâʼ lɨ́ esú ó, bɨ̌n dúʼoo kʉ̌ tyen waá.

¹³ Ebě, Nzyɛ̌m ó dí edwe bɨ́n gwɨ́má édû nzɨ́ mpâ nyaá. Nye ntémé ó dí edwe bɨ́n nkul ó, bɨ̌n jánaa tɨ̂ʼ mbɨ̂mbɨá.

¹⁴ Sáʼ gá sá yɨ́yɛ̂h abe e ntʉ̌, nkʉ̂ mpɨ̌r!

¹⁵ Sá tɨ̂ʼ ó bɨ́n óbe, abe e mebě yɨ́. Bɨ̌n bé óbe ó e miléme ɨ́ sɔ́ɔ́ɔ́, kwahaá bwán mé Nzyɛ̌m. Bɨ̌n bé ábe e sá ébébe bé ónwâhle bɨ́n e tɨ̂. Témé memɔ́ʼ mé ónzyɛ́h ó bʉ̂r o b'á dîm bá, bɨ̌n bé óbuú pǎn myɛ́n mpʉ ócwícwén ɨ́ jʉ́o kʉ́.

¹⁶ Bɨ̌n bé ólɛ̂ʼle bé milɔ̌b mí twiʼ. Nó ó mé óbe e sá énkʉ́na tɨ̂ʼ ɨ́ móhó Krîst óbáʼǎ nze wɨ́. Me ógʉ́a ɨ́ jɔʼ yaá ó, lelelelě syɛ́ɛ́ mé á séa yɨ́, yé á bé adwě ntuʼ.

¹⁷ Bɨ̌n mû ó lɨ́ esâ Nzyɛ̌m sá nyé dí egwɨ̂m yɨ́, duho ɨ́ búʼó yɨ́n. Bɨ̌n bé lɨ́ ekɛha bítwiʼ bín ɨ́ nzɨ̌ búʼó nyaá e bisʉhʉʉ ɨ́ miléme, lɨ́ ekʉ mɛɛla ebe míndwéá mín myaá. Me lɨ́ esoho e bɨ̌n, metié mâm lɨ́ eswɨɨ̌ si ntémé, ó mé pûhlaa e mindwɛ́á mín.

¹⁸ Jwɨʼ gwár e gwár yaá ntémé e bɨ̌n, bɨ̌n bé lɨ́ esoho e me ɨ́ jɔʼ mé ndɨ́ ɨ́ bisʉhʉʉ yɨ́.

Timotɛ̂, bé e Epafrɔ́ditɔs

¹⁹ Tî Yésʉs, nye lɨ́ egbâ mé mpûʼla ɨ́ léme ó, me mû ó kúno elómlo bɨ́n Timotɛ̂. Me óbuú soho ɨ́ jɔʼ mé ójóʼǒ lɔ́ɔ́ wé óduho gʉ̂, dumo e sɔ́má yɨ́n wɨ́ yɨ́.

²⁰ Mé abe e mʉr swîh mpʉ mé Timotɛ̂. Bisyɛ́ɛla bi dí edwɛ̂ʼ nyɔm wɨ́n bí, byé lɨ́ ekʉ́ pálwo nyé ɨ́ léme.

²¹ Ebě, bʉ́ʉ́ bʉ̂r bɨ́ɛ sáá ó, njɨ minyɔm myɔ́ɔ́. Bé ójóʼǒ sá dí edumo e Yésʉs-Krîst yɨ́ nó, bé anʉa yé, gbâ ɨ́ nkɔb.

²² Bɨ̌n bʉr o tɨ̂, bé lɨ́ egʉ́ǎ mbɨambɨa kʉ̌ tyěn Timotɛ̂ á dû wɨ́ le mpʉ nyé dí me mpʉ mwân yɨ́, ebě, nyɨ́ dûhwǒ syɛ́ɛ́ bɨ́h e né dí eséa lɨ́ etúnǒ Mbɨambɨa Lɔ́ɔ yɨ́.

²³ Nó ó, nye ó waá mé dí ebúʼla ó, me óntɨh bɨ́n nyǎ ɨ́ jɔʼ mé óbeě mpʉ mílɔ̌b myâm ngá tíʼɔɔ yɨ́.

²⁴ Tî Yésʉs, nyɨ́ gbâ mé mpûʼla ɨ́ léme ó, me ntémé ónzě bee bɨ́n kám e kám.

²⁵ Nó ó, yé á jɨ ó, me bwóolaa bɨ̌n Epafrɔ́ditɔs, mɨ́ɔɔ́ gá wɨ́ná. Bɨ̌h e nɔ́ɔ́ ó dí eséǎ syɛ́ɛ́ le elwímla ɨ́ lɔ̌b mé Yésʉs-Krîst. Bɨ̌n bé á ntɨh me nyǎ ó, ɨ́ lʉ́mlʉ́ wɨ́n, ó nye ntáa nzě súʼo mé e bisá byé á sâ me sɔ́ɔlʉ bí.

²⁶ Nye lɨ́ ekpɛl ébee bɨ́n óbɛ̂h. Nye á be ntémé ó, lɨ́ esyɛ̌l bá ɨ́ léme, ebě, bɨ̌n bé á si jóʼo ó, nye á be ó mbêl.

²⁷ Nye á si kʉ bíle! Nye á duho ó ɨ́ ka sóo. Sâ gwár, Nzyɛ̌m á si jɨ̂ʼ nye nkoó. Abe nyé e nye, ndu e mɛm mʉr tɨ̂ʼ ntémé. Nye á tiʼ nye ó, ebě, nye á si kamle e me. Nye á bé akam ó, me báʼa kǎ buú jóʼo ébúʼ, ntaǎ njɨ.

²⁸ Nó ó, léme, wê me ɨ́ báná báná ó, me bwóolaa bɨ̌n nyǎ, bɨ̌n nkʉ̂ báʼǎ soho ɨ́ buo buo ɨ́ jɔʼ bɨ́n óbee nyé yɨ́. Mɛm ntémé, me ákǎ buú syɛ̌l bá ɨ́ páʼ wɨ́n.

²⁹ Nó ó, jɔʼ nyé ópyâl ɨ́ sɔ́má yɨ́n yɨ́, bɨ̌n e nʉ́á nyé e bisʉhʉʉ bíbyɛ̂h ebe nyé dí mɨ́ɔɔ́ gá wɨ́ná ɨ́ mpúhlá e Tî Yésʉs. Dwéʼ gá mbi bʉ̂r o dí mpʉ mé Epafrɔ́ditɔs bá dúu.

³⁰ Ebě, nye á be ó sí gwá dwe ɨ́ lɔ̌b syɛ́ɛ́ mé Krîst. Nye á gwa dwe ó, lɨ́ enzě kɛm mê, lɨ́ enze mé e mingúlá bɨ́n á be abe e nkul edwe mé mí.