Éfɛsɔs 6 - Kálar Nzyɛ̌m : Ejwán é Sáá

Bwân, bé le osɔ́ŋ

¹ Bwân, sáʼ gá obyɛ̂l bɨ́n mejóʼo, ɨ́ mpúhlá nyɨ́n e Tî Yésʉs. Nó, yé ó tîtyěl.

² Etié e dí ó: «Dwéʼ sʉ́ŋ e nyʉ̌ŋ dúu» lɨ́, lé ó b'á nyɛɛ nze e menkɛ̌ʼ lɨ́ metié mɨ́mɛ̂h.

³ Lé á dumlo ó: «Yé nkʉ̂ bě mbɨ̂mbɨá ɨ́ páʼ gô. Melú mé twiʼ gó ótiʼe ɨ́ sí yɨ̂ʼ má, mé nkʉ̂ buo.»

⁴ Bɨ̌n osɔ́ŋ ó bwân, akóblokoblo gá bwán bɨ́n ebúʼ. Cɨ́lɨ́ɨ́ gá bê, lɨ́ edwe bé mpǎŋ lɛ́ʼlá mé Tî Yésʉs.

Bitúʼǎ le onzyɛh o bʉ̂r

⁵ Bitúʼǎ, bɨ̌n bé ɨ́ jala le esâ ójwɨ́ɨ bɨ́n, baá o dí bʉr ó sí yɨ̂ʼ bá, mejóʼo. Jwááwáá gá bê, le edwe bé dúu. Séáá gá bé e milémé mímyɛ̂h, mpʉ̌ sá lɛ́ɛ́, bɨ̌n séá ó Krîst syɛ́ɛ́.

⁶ Mʉr aséa gá syɛ́ɛ́ njɨ ɨ́ jɔʼ bé dí epála nyé yɨ́. Mʉ̌r sá aséa lɨ́ esú é méswɨ̂ʼlʉ me bʉ̂r. Mpʉ bɨ́n mû osyɛ̂l o mésâ mé Krîst yɨ́, séáá gá bé syɛ́ɛ́, lɨ́ elóŋlǒ gwɨ́má mé Nzyɛ̌m, e milémé mín mímyɛ̂h.

⁷ Séáá gá bé syɛ́ɛ́ e mpǎŋ gwɨ́má, mpʉ̌ sá lɛ́ɛ́, bɨ̌n séá ó Tî Yésʉs syɛ́ɛ́ yaá.

⁸ Gʉ́ŋáá gá ó, mʉ̂r séá mpǎŋ syɛ́ɛ́ nó, Tî Yésʉs ódwe nyé myɛ́na tɨ̂, nyě damá bě túʼǎ, nkʉ̂ mʉr dí nzyɛh nyá.

⁹ Bɨ̌n ojwɨ́ɨ, sáʼ gá bitúʼǎ bín bisyɛ́ɛla bimpwár bínɨ̌. Akǎ bɛ̂ŋ gá byê. Bɨ̌n bé ɨ́ jala le egʉ́a gá ó, njwɨ́ɨ wɨ́n le onɔ́ɔ́, bɨ̌n óbɛ̂h, nye ɨ́ jʉ́o kʉ́. Nye ádwááwó bʉ̂r mempǒm.

Dɔm lé ébébe

¹⁰ Ekǎn lé épíhé mé mû o nzě lɛ́ɛ bɨ́n lɨ̂, lé ó, bɨ̌n gbâʼ nkul ɨ́ mpúhlá nyɨ́n e Tî Yésʉs. Biʼee gá pîm nɨ́nɨ́ɨ́, duho e né.

¹¹ Bwáráá gá mimbór mí dɔ̂m Nzyɛ̌m dí edwe bɨ́n mí, mbi dí ó, jɔʼ sɔ́ŋ meleme ónzě sáa édímle bɨ́n ɨ́ nzɨ̌ mikóo myé yɨ́, bɨ̌n tyɛ́bɨɨ mekʉ̌ sí ɨ́ sɨ́ŋ.

¹² Ebě, yé abe ó, mɨná tɛ́l gá ó e bʉr ó sí yɨ̂. Mɨná lwímlá gá ó, le misísǐm mi dí milʉ̂ mí, le myaá mi nkûl, le myaá mi dí ejwɨ́ɨ ɨ́ mpóʼo edúrʉ́ʉ́ lɨ̂ʼ mí, le meleme me dí páʼ jʉ́o le ejwoo má.

¹³ Sá tɨ̂ʼ ó mé dí elɛ́ɛ bɨ́n ó, nʉaa gá bisá bí dɔ̂m ɨ́ mebó mé Nzyɛ̌m yɨ́. Bébebébe móhó, wé ópyâl bɨ́n nó, bɨ̌n bé óbe e nkul elwímla. Bɨ́n óbe, sí lwímla, ɨ́ lwímla lwímla, ntaǎ sá yɨ́yɛ̂h nó, bɨ̌n bé otyɛ̂b mekʉ̌ sí ɨ́ sɨ́ŋ, apɨ́ŋla ɨ́ jɔʼ ébébe yaá.

¹⁴ Nó, tyɛ́bɨ́ɨ́ gá ɨ́ tyé dɔ̂m, mekʉá ɨ́ binyâ. Bɨ̌n a dí le otyeetye. Wé óbe bɨ́n ó mpʉ káná dɔm, dí yémlá ɨ́ sɨ́ŋ lɨ́ odyɛ́m nyá. Diʼee gá ntémé otîtyěl o bʉ̂r. Otîtyěl waá, wé díʼee bɨ̌n mpʉ mímbór bínkóho bé dí ebwâr, myaá dí ekamle e bɨr mí.

¹⁵ Diʼee gá minkʉmsá lɨ́ esú ó, bɨ̌n túnaa Mbɨambɨa Lɔ́ɔ dí egbâ bʉ̂r mepyɛbla ɨ́ miléme wɨ́. Túnó waá, wé díʼee bɨ̌n mpʉ óngʉb.

¹⁶ Dyɛ́ʼwáá gá e Nzyɛ̌m. Ndyɛ́ʼwá waá, wé díʼee bɨ̌n mpʉ nkúo dɔm ngá dímě siʼe mékʉá me dɔ̂m mé Sátan nyɨ́.

¹⁷ Biʼee gá twǐʼ njʉ̌m dǐ. Yé díʼee bɨ̌n mpʉ̌ ntʉ́m dɔ̂m. Bɨ̌n e nʉ́á lwǐb mé Nzyɛ̌m. Yé díʼee bɨ̌n mpʉ pâsôŋ Sísǐm mé Nzyɛ̌m dí etímle bɨ́n nyá.

¹⁸ Sáʼ gá sâ yaá yɨ́yɛ̂h e minjɨʼla, le edî ó, Nzyɛ̌m súʼaa bɨ̌n. Jɨʼlaa gá ɨ́ jɔʼ yɨ́yɛ̂h ɨ́ mpʉ̌ Sísǐm mé Nzyɛ̌m dí etɨ́e bɨ́n yɨ́. Tɨ̂ʼ ntémé, atyɛʼ gá lɨ́ edi ɨ́ doho. Ɨ́ jɔʼ yɨ́yɛ̂h, tirwaa gá e syɛ́ɛ́ mínjɨʼla lɨ́ esú é bʉ̂r o mé Nzyɛ̌m bɨ́bɛ̂h.

¹⁹ Jɨʼlaa gá ntémé e Nzyɛ̌m ɨ́ lɔ̌b wâm, ó nye dwêʼ me mekǎn mé lwíbɨɨ ɨ́ hwɨ́m, abáawǒ sɔ̂ʼ má. Me pâʼlaa lwǐb ódîm dí edumo e Mbɨambɨa Lɔ́ɔ yɨ́, bʉr gʉ́ŋaa yê.

²⁰ Me, mʉr milʉ́mlʉ́, mû kɛ́ʼá ménkara ó, ɨ́ lɔ̌b Mbɨambɨa Lɔ́ɔ. Jɨʼlaa gá e Nzyɛ̌m, ó me pâʼlaa wé ɨ́ hwɨ́m mpʉ wé jálá le epâʼlɔɔ yɨ́.

Mekǎn mé ésúʼlá

²¹ Tisikôs, mɨ́ɔɔ́ kpɛ̌l gá wɨ́ná, dí diâkɔn ɨ́ Tî Yésʉs nyá, nye ntémé ó dí mʉr ebúʼlɔɔ. Nye ólɛ́ɛ bɨ́n sá yɨ́yɛ̂h dí edumo e me yɨ́, le ɨ́ lɔ̌b syɛ́ɛ́ mé mû lɨ́ eséa yɨ́.

²² Mě lómló bɨ́n nyǎ ó, nye tôʼ lɛ́ɛ bɨ́n milɔ́ɔ́ mí twiʼ yɨ́h, le enzě gbâ bɨ́n pîm ɨ́ búʼó.

²³ Nzyɛ̌m Sɔ́ŋ, bé e Tî Yésʉs-Krîst, bé gbâʼ bɨ̌n, bɨ́ɔɔ́ bɨ́h, mepyɛbla ɨ́ miléme, ti e kpɛ̌l ndu e búʼó.

²⁴ Nzyɛ̌m sʉ́ʼoo bʉr bɨ́bɛ̂h o dí ekpɛl Tî gá wɨ́ná Yésʉs-Krîst, kpɛ̌l ápurapúra bá metyɛʼ me mpóm.