Éfɛsɔs 5 - Kálar Nzyɛ̌m : Ejwán é Sáá

¹ Baŋaa gá Nzyɛ̌m, ebě, bɨ̌n mû ó bwân nyé dí ekpɛl bá.

² Kpɛlaa gâ, mpʉ̌ Krîst á kpɛl mɨná gá yɨ́. Nye á si syɛ́ɛla twiʼ yé lɨ́ esú é bícwiʼ gá bíná. Nye á dwe twiʼ yé ó, nye díʼee mpʉ tír bé dí etíʼě Nzyɛ̌m tâŋ ndwéá nyá. Ndwéá waá, wé e menumó Nzyɛ̌m dí ɨ́ buú kpɛl má.

³ Sâ gwár, mʉ̌r sá ajóʼo lʉ́ʉ́ dʉ́o ó, yé e nyʉ́ʉ́ mʉ̂r sɔ́má yɨ́n dí esâ bímolá nyá, nkʉ̂ byúú bísyɛ́ɛla bi dí edulo mpîr ɨ́ nyʉ̂l bí. Yé sá abe ntémé e mʉr dí etyěn lémé wé ɨ́ nzɔ́ɔ́ bísâ nyá. Bibɨ́bla bísyɛ́ɛla byaá, byé ajala e bʉr o dí egúmo e Nzyɛ̌m bá.

⁴ Yé ajala ntémé ó, bɨ̌n lwíbɨɨ mekǎn mé ésɔ́m, nkʉ̂ lwǐb ógʉ̌, nkʉ̂ lwǐb bíswóólʉ́. Yé ajɨ ó, bɨ̌n sâʼ nó. Yé mbɨa ó, bɨ̌n dwêʼ Nzyɛ̌m nzyǒo.

⁵ Gʉ́ŋáá gá ó, mʉr dí elœʼ nyʉ́l nyé ɨ́ nzɨ̌ bijoó nyá, le waá dí edulo mpîr ɨ́ nye mʉr tɨ̂ʼ nyá, le waá dí egbâ mîh ɨ́ bisá byé onkán bá, mʉr dí e mbi bísyɛ́ɛla byaá nyá, nye ákóʼó bi nkɔ̂b ɨ́ Mpóʼo mé Krîst, dí nyaá mé Nzyɛ̌m nyɨ́. Ɨ́ jɔʼ mʉ̂r gbá mîh ɨ́ bisá byé onkán yɨ́, syɛ́ɛla yaá kʉ́ lɛ̂ʼle ó, mʉr waá, nye lɨ́ edwe bíkpɛʼkpɛ̂ʼ bí ónzyɛ̌m kûm.

⁶ Mʉ̌r sá adímle bɨ́n e nzɨ̌ lwǐb dí abe e nyɔm yɨ́. Bisyɛ́ɛla bí ébébe bínɨ̌ ó ngá sâ ó, Nzyɛ̌m lɛ̂ʼlaa nkpaa nyé kwá bʉr o dí egbɔba e né bá.

⁷ Nó, anʉa gá ntœ̌b ɨ́ bisyɛ́ɛla bi bʉ̂r ónɨ̌.

⁸ Ɨ́ mimbú mí píhe, bɨ̌n bé á bɨbe ó, lɨ́ edúrʉ́ʉ́. Nó ó, ɨ́ báánâ mpʉ bɨ́n mû sí pûhla e Tî Yésʉs yɨ́, bɨ̌n mû ó ɨ́ myɛ́n. Nó ó, dúʼóó gá kʉ̌ tyen dí ejala e bʉr o dí ɨ́ myɛ́n bá wɨ́.

⁹ Mě lɛ́ɛ́ nó ó, ebě, bʉr o dí ɨ́ myɛ́n bá bɨɛ, bé lɨ́ egúmo mímbi mi mpúmó mímyɛ̂h: membɨa, otîtyěl, le otyeetye.

¹⁰ Gʉ́ŋáá gá sá Tî Yésʉs dí ebeě mbɨ̂mbɨá yɨ́.

¹¹ Mʉ̌r sá akǎ báʼǎ nʉa ntœ́b ɨ́ bisyɛ́ɛla bí édúrʉ́ʉ́. Bisyɛ́ɛla byaá, byé abe e nyɔm. Tinaa gá nkɔb nyɨ́n nyaá. Bɨ̌n a gwíh syóm dí tɨ̂ʼ wɨ́.

¹² Yé ɨ́ buú sâ mɨ́ná gá sôn lɨ́ etwóolo bísyɛ́ɛla bé dí esâ ɨ́ mesǒ bí, damá be ó, mɨná jaá túbo gá ó, njɨ míe!

¹³ Jɔʼ mɨ́ná pyél gá bisyɛ́ɛla byaá ɨ́ mesǒ, tyen byé ɨ́ myɛ́n yɨ́, njʉl, wé lɨ́ enzě kʉn byê.

¹⁴ Ebě, sá yɨ́yɛ̂h njʉl dí ekʉn yɨ́, yé mû ó lɨ́ epan mímbah. Sá tɨ̂ʼ ó bé dí elɛ́ɛ ó: «Gua mʉr dí ɨ́ jô nyá, jɨmáa. Duhaa ɨ́ sɔ́má ódwe. Krîst pánaa go mimbah, tyen gó ɨ́ myɛ́n» yɨ́.

¹⁵ Nó gwá dwɛ̂ʼ gá kʉ̌ tyen bɨ́n dí edû wɨ́. Atiʼe gá mpʉ bígʉʼlʉgʉ́. Tiʼaa gá mpʉ mípɨpɨ́ʼ.

¹⁶ Séáá gá mbɨ̂mbɨá ɨ́ mpǎŋ bijɔʼ bi dí epyâl bɨ́n bí, ebě, melú mɨ́ná dí etiʼe gá mâ, mé ɨ́ bébe.

¹⁷ Mʉ̌r sá agʉʼla. Sáŋáá gá ó, bɨ̌n jɨ́ʼɨɨ bisyɛ́ɛla Tî Yésʉs á tíʼe ɨ́ lémé wé ó, bɨ̌n sâʼ bí.

¹⁸ Mʉ̌r sá apuro ményoʼ, ebě, mʉr dí elɔ̂ʼwa lɨ́ ede ményoʼ nyá, nyě dímlé ó lʉ́ wé. Diʼee gá lwɨ́ŋlá e Sísǐm mé Nzyɛ̌m.

¹⁹ Jyɛyɨɨ gá meswɨ̂ʼlʉ lɨ́ esú é Nzyɛ̌m, le mejéme, ndu e mejémé Sísǐm wé dí elɛ̂ʼle bɨ́n ó, bɨ̌n dyɛ́yɨɨ má. Jyɛyɨɨ gá mé lɨ́ esêʼle Tî Yésʉs, e milémé mín mímyɛ̂h.

²⁰ Ɨ́ jɔʼ yɨ́yɛ̂h, dwéʼ gá Nzyɛ̌m Sɔ́ŋ nzyǒo ɨ́ sá yɨ́yɛ̂h, le epɨr e díé mé Tî gá wɨ́ná, Yésʉs-Krîst.

²¹ Sɨ́sáʼ gá mejóʼo páʼ nyɨ́n, ebě, bɨ̌n bé lɨ́ edwáawǒ Krîst.

Bʉbá le ojʉ̂m

²² Bɨ̌n bʉbá, sáʼ gá mejóʼo le ojʉ́m bɨ́n mpʉ bɨ́n dí esâ Tî Yésʉs mejóʼo yɨ́.

²³ Ebě, mʉrʉ̂m, nye ó lʉ́ mʉ́má wé, mpʉ̌ Krîst dí lʉ́ Mbɛ̌r-Nzyɛ̌m yɨ́. Krîst mʉr tɨ̂ʼ ó dí Tiʼbʉr ɨ́ pâʼ Mbɛ̌r-Nzyɛ̌m, dí nyʉ̂l nyé wɨ́.

²⁴ Nó ó, jwɨʼ gwár mpʉ̌ Mbɛ̌r-Nzyɛ̌m dí esâ Krîst mejóʼo yɨ́, bʉbá, bé ɨ́ jala le esâ ójʉ́m bɔ́ɔ́ mejóʼo ɨ́ sá yɨ́yɛ̂h.

²⁵ Bɨ̌n bʉrʉ̂m, mʉr nyɨnyɛ̂h, nye kpɛ́lɨɨ mʉmá wé mpʉ̌ Krîst á kpɛl Mbɛ̌r-Nzyɛ̌m yɨ́. Nye á si dwe twiʼ yé, lɨ́ ebúra e Mbɛ̌r-Nzyɛ̌m.

²⁶ Nye á sâ nó ó, wé nkʉ̂ gúmo e Nzyɛ̌m, nyé osí jwɨɨ wé e medíbé ti e lwǐb yé.

²⁷ Ebě, nye á kpɛl ó, nye tyélɨɨ wé ɨ́ míh mé ɨ́ nkɛ́lɛm: abe le ebar, nkʉ̂ milur, nkʉ̂ yʉ́ʉ́ sɔ̂ʼ dí ɨ́ bébe yɨ́. Wé ójaá gúmo ó, njɨ e né, abe e sá ébébe nyé ónwâhle wé e tɨ̂.

²⁸ Nó, ɨ́ páʼ ójʉ̂m, bé kpɛ́lɨɨ bʉbá bɔ́ɔ́ jwɨʼ gwár e gwár e mpʉ bé dí ekpɛl bé bʉr o tɨ̂ʼ yɨ́. Waá nyɨnyɛ̂h kpɛ́l mʉ́má wé nyá, nyě kpɛ̌l ntémé ó nyʉ̂l nyé nye mʉr tɨ̂.

²⁹ Abe e mʉr dí enwim nyʉ̂l nyé, nye mʉr tɨ̂. Nye lɨ́ edwidwe nyʉ̂l nyé mede le ebaʼle nyê. Mbi ngwár waá ó Krîst dí ebaʼlě Mbɛ̌r-Nzyɛ̌m yɨ́.

³⁰ Ebě, mɨná gá bɨ́bɛ̂h, bé ó bitíl bí nyʉ̂l byé.

³¹ Yê cɛmá ó: Sá tɨ̂ʼ ó mʉ́rʉ̂m óbɔ́ʼa e sɔ́ŋ, bé e nyɔ̌ŋ wé, tó pûhla e mʉmá wé yɨ́. Bé e nɔ́ɔ́ obá, bé ójaá kǎ sûʼla ó, ebɔ̂b e nzyeŋle, pʉ́m le ebo, púno gwár.

³² Wâm mbeá, mɛm Pɔ̂l ó wɨ̂: mɛ̌m bee ó, lwǐb ódîm nɨ̌ lɛ́ʼlé mɨ́ná gá ó, mveʼlě sá nɨ́nɨ́ɨ́ yɨ̂: lɔ̌b ébâ, wé mveʼle ó, Krîst, bé e Mbɛ̌r-Nzyɛ̌m.

³³ Yé ntémé, yê ɨ́ páʼ wɨ́n ó: mʉrʉ̂m nyɨnyɛ̂h, nye ɨ́ jala le ekpɛl mʉ́má wé ánta nye mpʉ nyé dí ekpɛl nyé mʉr tɨ̂ʼ yɨ́. Mʉmá, nye dwáawaa njʉ̂m wé.