Éfɛsɔs 2 - Kálar Nzyɛ̌m : Ejwán é Sáá

Pahá sóo

¹ Ɨ́ mimbú mí píhe, bɨ̌n bé á be ó odwe nkǒ páʼ sísǐm, tɨ̂ ɨ́ bidyɛʼ bín, le misyóm bɨ́n á sâ mí.

² Bɨ̌n bé á be lɨ́ edudû kʉ̌ tyen ébébe bʉ̂r ó sí yɨ̂ʼ bɨ́bɛ̂h. Bɨ̌n bé á dudû ɨ́ bíi yaá ó, sísǐm édúrʉ́ʉ́ dí tyélá ɨ́ diá jwɨ́ɨ́ yé páʼ jʉ́o le ejwoo wɨ́. Sísǐm waá ó dí etyɛ̂b bʉ̂r ɨ́ miléme ɨ́ báánâʼ ó, bé bénaa edyɛ̂ʼwo e Nzyɛ̌m.

³ Mɨná bɨ́bɛ̂h, bé á nyɛɛ dudû gá ó, kʉ̌ tyen ngwár e ngwár waá. Mɨná bé á jaa gwɨgwɨ̂m gá ó, njɨ elóŋlo bísyɛ́ɛla njwɨr myâ gá wɨ́ná, wé á kʉ bu gwɨ̂m ó, mɨná sâʼ bí. Bigwɨ́má byaá ó b'á jaa bu pɨpálwo mɨná gá ɨ́ miléme. Sá yé á kʉ jala e bɨ̌h oYúden yɨ́, yé á be ó, bɨ̌h jâʼraa e nkpaa mé Nzyɛ̌m, jwɨʼ gwár e gwár e mpʉ bʉ̂r o dí abe óYúden bá, bé á jala le ejaʼra e nye yɨ́.

⁴ Tó kœb ó, Nzyɛ̌m, nye ɨ́ buú jɨ̂ʼ mɨ́ná gá nkoó. Nó nyé á nze lɛ̂ʼle mɨná gá mpʉ nyé á bu kpɛl mɨná gá kpɛ̌l ápurapúra yɨ́.

⁵ Mɨná bé á si gbah gá metié mé Nzyɛ̌m, ntɔ̂ʼ dwe lɨ́ ejala e syóm waá. Damá jóʼo nó, nye á si bana tiʼ mɨná gá ɨ́ lɔ̌b mpúhlá gá nyɨ́ná e Krîst. (Bɨ̌n bé á bi twiʼ ó e nzɨ̌ ncwɨ́ncwɨ́ǎ Nzyɛ̌m á lɛ̂ʼle bɨ̌n nyɨ́.)

⁶ Nzyɛ̌m á si pɛh mɨná gá e Yésʉs-Krîst, ntɔ̂ʼ dil mɨ́ná gá le onɔ́ɔ́ ɨ́ mecwɨ́ɨ́ ɨ́ jʉ́o kʉ́, e nzɨ̌ mpúhlá gá nyɨ́ná e Krîst.

⁷ Nye á cwɨ́a e mɨná gá nó ó, lɨ́ esú lé élɛ̂ʼle mímyǎ mímyɛ̂h mi dí ebyɛ̂l mí, kpɛ̌l yé dí ápurapúra, dí elaa byúú bíkpɛ̌l bíbyɛ̂h yɨ́. Nye á sâ mɨná gá embɨa laá ó, ɨ́ mpúhlá gá nyɨ́ná e Yésʉs-Krîst.

⁸ Ebě, mpam mé Nzyɛ̌m ó b'á tiʼ bɨ̌n, lɨ́ nzɨ̌ búʼó. Twiʼ yaá, yé aduho kwá nyɨ́n, bɨ̌n bʉr o tɨ̂. Yé ó ndwéá mé Nzyɛ̌m.

⁹ Nye á bé acwɨ́a e bɨ̌n ɨ́ lɔ̌b yʉ́ʉ́ syɛ́ɛla mpâ yɨ́n. Nó ntémé, yé ajala ó, mʉr nkʉ́naa ɨ́ nye mʉr tɨ̂.

¹⁰ Mɨná gá bé ó bʉr ó Nzyɛ̌m á sâ e mebó mé nye mʉr tɨ̂ʼ bá. Nye á komlo mɨná gá ɨ́ nzɨ̌ mé Yésʉs-Krîst ó, mɨná díʼee gá bʉr o dí esâ nyé bisyɛ́ɛla bimpâ bá. Nzyɛ̌m mʉr tɨ̂ʼ ó b'á boo tíʼe ɨ́ lémé wé ó, mɨná sâʼ gá nye byǎ.

Mɨná mû gá ó, mʉr ngwár ɨ́ Krîst

¹¹ Símsáá gá mpʉ bɨ́n á byɛ̂l yɨ́: bɨ̌n, bʉr o bíkúl bíswîh, bé ó baá óYúden dí ejébe ó, «bʉr o dí atíʼɔɔ mpʉ́n bá». (Náǎ yé ó, bʉr o jébé bɨ́n nó bá, bé jɨ́jébé bé bʉr o tɨ̂ʼ ó, «baá bé á tíʼɔɔ mpʉ́n ɨ́ bipúnó bíh bá». Tó kœb ó, sá yé á sâ ó, bé tíʼɔɔ mpʉ́n nyaá yɨ́, yé á be ó bʉr.)

¹² Símsáá gá ntémé mpʉ bɨ́n á nyɛɛ bɨbě dǐ gwár yɨ́. Bɨ̌n e Krîst, bé á bé apǎ pûhla. Bɨ̌n bé á si pɨ́mɔɔ ɨ́ kúl bʉ̂r o b'Ɨ́zraɛ̂l. Ɨ́ nkǒ páʼ sáá Nzyɛ̌m á sâ nyɨ́, ti e menkɛ̌ʼ mé, bɨ̌n bé á be ó, bʉr o bíkúl bíswîh, abe e bá nkɔ̂b tɨ̂. Ɨ́ jɔʼ yaá yɨ́yɛ̂h, bɨ̌n bé á bé abe e mpûʼla ɨ́ miléme. Ɨ́ sí yɨ́yɛ̂h, bʉr o bíkúl bín, bé á bé agʉ́ǎ Nzyɛ̌m.

¹³ Tó kœb ó, ɨ́ báánâ, bɨ̌n mû ó sí pûhla e Yésʉs-Krîst. Bɨ̌n bʉr o b'á nyɛɛ be e ncɛrá e Nzyɛ̌m bá, bɨ̌n mû ó bǎʼ e né, cɨɨ ɨ́ nzɨ̌ metié mé Krîst.

¹⁴ Ebě, Krîst mʉr tɨ̂ʼ ó b'á nze gbâ mɨná gá mepyɛbla ɨ́ miléme. Nye ó b'á sâ ó, oYúden ti e baá o dí abe óYúden bá, bé díʼee kûl gwár. Mpʉ nyé á bîr nyʉ̂l nyé ó, nye dwêʼ yɨ́, tɨ̂ʼ ó nyé á búʼo kóʼ wé á bɨbɛ̂ʼ mɨná gá ó, mɨná nwímlaa gá páʼ gá nyɨ́ná wɨ́.

¹⁵ Nye á gbâ mepyɛbla páʼ gá nyɨ́ná ó, ɨ́ jɔʼ nyé á pɛʼ metié mé Moyɨ̂z, le mempéné ti e mityeelá mímyɛ̂h yɨ́. Nye á pɛʼ byé ó, nye nkʉ̂ nʉa bíkúl bíbá gá bíná, ntɔ̂ʼ syɛŋ byé ɨ́ nye mʉr tɨ̂, byé nkʉ̂ sûʼla édwán é kûl, nwɨɨla e mʉr ngwár.

¹⁶ Ɨ́ jɔʼ nyé á bomlɔɔ ɨ́ kolôs kʉ́ yɨ́, nye á si sâ saá páʼ gá nyɨ́ná e Nzyɛ̌m, le esâ ó, bʉr o bíkúl bíbá gá bíná byaá, díʼee mpʉ mʉ̂r ngwár. Mɨná bé á ka gwâʼ enwimla páʼ gá nyɨ́ná ó, ɨ́ jɔʼ nyé á dwe yɨ́.

¹⁷ Krîst á nze ɨ́ sí yɨ̂ʼ ó, nye ntáa nzě túno bɨ́n, bʉr o b'á be e ncɛrá e né bá, lɔ́ɔ́ wɨ̂: Nzyɛ̌m, nyɨ́ gbâ mépyɛbla páʼ nyɨ́n le onɔ́ɔ́. Nye á túno lɔ́ɔ́ mépyɛbla ngwár e ngwár waá ntémé ó, kwá nyɨ́h, oYúden, bʉr o b'á bɨbě bǎʼ e Nzyɛ̌m bá.

¹⁸ Krîst ó b'á kar nzɨ̌ ó, bikúl bíbá gá bíná sîhlaa bǎʼ e Nzyɛ̌m Sɔ́ŋ, lɨ́ ecɨɨ e nzɨ̌ mʉr ngwár e ngwár: Sísǐm mé Nzyɛ̌m.

¹⁹ Nó yé lɛ́ʼlé ó, bɨ̌n bé akǎ be bʉ̂r o bíkûl e biloo, nkʉ̂ ojwóo. Bɨ̌n mû ó bʉr o mpóʼo mé Nzyɛ̌m jwɨʼ gwár e gwár e bʉr o b'á nyɛɛ gúmo e né, duho myâ bá. Bɨ̌n mû ó bʉr ó mbɛ̌r bʉ̂r mé Nzyɛ̌m ntémé.

²⁰ Bɨ̌n bé ó mpʉ̌ poro bé á lúmo ɨ́ mbɛ̌r yɨ́. Nkan mbɛ̌r nyɨɛ, nye ó bʉr o mílʉ́mlʉ́ mé Yésʉs, bé le ogwíha o mílɔ̌b mé Nzyɛ̌m. Yésʉs-Krîst mʉr tɨ̂ʼ ó dí medwii me sɔ́ŋ.

²¹ Nye ntémé ó dí esumǒ mbɛ̌r waá, lɨl wê, le ebeʼ wê. Nyě sá nó ó, wé díʼee ti lɨ́ esú ó, Tî Yésʉs nkʉ̂ kœ̌b mpǎŋ mbɛ̌r édi tɨ̂.

²² Tî Yésʉs ó dí esâ ntémé ó, bɨ̌n tyélɔɔ ɨ́ bityé bín tɨ̂, misumá lɨ́ odiá Nzyɛ̌m ngá di tɨ̂ʼ wɨ́. Sísǐm wé ó dí elɛ̂ʼle bígúmó bɨ́n jálá le etyɛ̂b ɨ́ nzumó mbɛ̌r waá bí.