Éfɛsɔs 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pɔ̂l, mʉr milʉ́mlʉ́ mé Yésʉs-Krîst ɨ́ lɔ̌b gwɨ́má mé Nzyɛ̌m ó dí ecɛma bɨ́n mekaná mâ. Mě cɛmá ó, bɨ̌n, bʉr o dí egúmo e Yésʉs-Krîst, baá o dí bʉr o bé ébûʼlɔɔ, o dí [Éfɛsɔs] bá.

² Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

Mepwǎʼ Nzyɛ̌m dí edwe bʉ̂r bé má

³ Mɨná gúmlaa gá waá dí Nzyɛ̌m mé Tî gá wɨ́ná, Yésʉs-Krîst, waá dí Sɔ́ŋ wé nyá. Nzyɛ̌m, nyɨ́ sʉ mɨ́ná gá metyɛʼ me mpóm ɨ́ mpúhlá gá nyɨ́ná e Krîst. Nyɨ́ kam ntémé ó, mɨná bíʼee gá mimbi métyɛʼ me mpóm mé Sísǐm mé Nzyɛ̌m mɨ́mɛ̂h me dí eduho ɨ́ jʉ́o kʉ́ má. Nyě sá mɨ́ná gá nó ó,

⁴ mɨná gúmlaa gá nye, ebě, nye á si boo twâr mɨná gâ, táare ɨ́ jɔ̌ʼ kʉ́ e sí, byé á be apǎ bě kuhá yɨ́. Nye á twâr mɨná gá ó, mɨná gúmaa gá e né, ɨ́ nzɨ̌ mé Krîst, abe e sá ébébe nyé ónwâhle mɨ́ná gá e tɨ̂.

⁵ Nye á be ɨ́ kpɛl mɨ́ná gâ, nye nzě tíʼe ɨ́ lémé wé ó, nyě tyél ó mɨná gá ɨ́ tyé bwán bé ɨ́ nzɨ̌ mé Yésʉs-Krîst. Nye á sâ nó ó, ɨ́ kpɛ̌l yé ti e mitíʼá myé nye mʉr tɨ̂.

⁶ Mɨná dwêʼ gá nye dúu ndu e kûm ɨ́ lɔ̌b mpâm nyé! Nyɨ́ buú cwɨ́a e mɨná gá e nzɨ̌ Mwâ kpɛ̌l wé.

⁷ Mwân waá ó b'á pyêl metié mé, ntɔ̂ʼ búra e mɨná gâ. Nye á sâ nó ó, nye táŋaa góo, ó nye dwíhɨɨ mɨná gá ɨ́ mpila ébébe. Nye ó b'á sâ ntémé ó, Nzyɛ̌m pɛ́ʼɛɛ bibaa bí ébébe nyé á niʼe mɨná gá bí. Nzyɛ̌m á sâ mɨná gá bisyɛ́ɛla byaá ó, lɨ́ elɛ̂ʼle mɨ́ná gá mpwaʼ mpam nyé.

⁸ Nye á lɛ̂ʼle mɨná gá mpam nyé nyaá ó e nzɨ̌ ocwóó wé wɨ́wɛ̂h le pɨʼ nyé.

⁹ Nyě títyɛ́b mɨ́ná gá ɨ́ miléme ó, mɨná gʉ́ŋaa gá mitíʼá mí lémé wé, myaá myé á boo lɛ́ɔɔ ɨ́ lwǐb ódîm mí. Yé ó sá nyé á nyɛɛ jwɨʼ, kǎ sâ ɨ́ kpɛ̌l yé nye mʉr tɨ̂ʼ yɨ́.

¹⁰ Bijwɨʼ byé byaá, byé á nze ka gwíhɔɔ ó, píe bijɔʼ byé á jala le elaa bí, byé á sil elaa yɨ́. Nzyɛ̌m á boo tíʼe ɨ́ léme ó, bisâ bi dí ɨ́ jʉ́o, le ejwoo, le ɨ́ sí yɨ̂ʼ bí, bíbyɛ̂h, byé ɨ́ jala le eswâl ó, ɨ́ jwɨ́ɨ́ mʉ̂r ngwár, Krîst.

¹¹ Mɨná bɨ́ pûhla gá e Yésʉs-Krîst ɨ́ twárá Nzyɛ̌m á twâr mɨná gá yɨ́. Nye á boo twâr mɨná gâ ó, kʉ́ e sí dína apǎ bě kuhá. Yé á be ó mpʉ nyé á boo jwɨʼ yɨ́, nyɨɛ mʉr dí egbâ nkûl ɨ́ sá yɨ́yɛ̂h, le esâ ó, bijwɨʼ le mitíʼá mí lémé wé, byé lwɨ́ŋlɨɨ nyá.

¹² Nye á kpɛl ó, bʉr dwêʼ nye dúu e kûm ɨ́ lɔ̌b syɛ́ɛla nyé á sâ ɨ́ sɔ́má gá yɨ́ná, mɨná gá bɨɛ, bʉr o nyé á nyɛɛ gbâ mpûʼla ɨ́ miléme ɨ́ nzɨ̌ mé Krîst bá yɨ́.

¹³ Bɨ̌n ntémé, táare ɨ́ jɔʼ bɨ́n á túnɔɔ lɔ́ɔ dí tyeetye wɨ́ yɨ́, bɨ̌n nzě táare ébûʼla wê, kumǒ kumáa mûh, gʉ́a ntémé ó, wé ó Mbɨambɨa Lɔ́ɔ dí etiʼ bɨ́n wɨ́. Le bɨ́n á bûʼla Mbɨambɨa Lɔ́ɔ waá, lě Nzyɛ̌m ntɔ̂ʼ á ntɨh bɨ̌n Sísǐm wé nyé á boo kɛʼ wɨ́. Sísǐm wé waá ó dí dweʼle kwá nyɨ́n, sá dí elɛ̂ʼle ó, bɨ̌n bé ó bʉr bé, ánta nye yɨ́.

¹⁴ Nyě ntɨ̌h mɨ́ná gá Sísǐm waá ó, mpʉ̌ jwɨʼ dí elɛ̂ʼle mɨ́ná gá mepwǎʼ Nzyɛ̌m ngá dwe mɨ́ná gá, jala e nkɔb líʼe gá nyɨ́ná má yɨ́. Mɨná bé óbi gá mé ó, ɨ́ jɔʼ nyé óbe, nye mû sí dwih bʉ̂r o dí egúmo e né bá ɨ́ mpila ébébe yɨ́. Mɨná dwêʼ gá nye dúu e kûm ɨ́ syɛ́ɛla yé yaá.

Minjɨʼla mé Pɔ̂l

^15-16 Sá tɨ̂ʼ ó mé dí edwě Nzyɛ̌m nzyǒo ɨ́ lɔ̌b wɨ́n yɨ́. Mɨ́ boó jóʼǒ mpʉ bɨ́n dí edyɛ̂ʼwo e Tî Yésʉs le ekpɛl bʉ̂r ó Mbɛ̌r-Nzyɛ̌m yɨ́. Mé agwâʼ édwe nyé nzyǒo ɨ́ jɔʼ yɨ́yɛ̂h mé dí esímsa bɨ́n, me ntémé lɨ́ ejɨʼla e né yɨ́.

¹⁷ Me lɨ́ ejɨʼla e Nzyɛ̌m dí e kûm, waá dí Sɔ́ŋ mé Tî gá wɨ́ná, Yésʉs-Krîst nyá, ó nye tyɛ́bɨɨ bɨ̌n ɨ́ miléme, ó bɨ̌n twólwaa, le ntémé ó, nye gwíhɨɨ bɨ̌n misolá mílɔ̌b myé. Myé óbe bɨ́n e nyɔm, lɨ́ esú ó, bɨ̌n gʉ́ŋaa nye.

¹⁸ Nye bɛ́yɨɨ bɨ̌n mîh me dí ɨ́ milémé mín tʉ́ŋlʉ̌ má, ó bɨ̌n gʉ́ŋaa metʉ́m bʉ̂r ó Nzyɛ̌m á jébe bá, dí ebóno e né má. Bɨ̌n gʉ́ŋaa ntémé kûm nɨ́nɨ́ɨ́ bɨ́n ngá nʉa, jala e nkɔb líʼe nyɨ́n nyɨ́. Nyě komó ékʉ̌m laá ɨ́ buo buo ó, lɨ́ esú lé édwe bʉ̂r bɨ́bɛ̂h o dí egúmo e né bá.

¹⁹ Mě jɨʼlá ntémé ó, bɨ̌n gʉ́ŋaa nkǔl nɨ́nɨ́ɨ́ nyé, nyaá dí entaǎ sá yɨ́yɛ̂h nyɨ́. Bɨ̌n gʉ́ŋaa ntémé mpʉ nyé dí enze mɨ́ná gá ɨ́ nkɔ̌m e nkǔl nɨ́nɨ́ɨ́ nyaá yɨ́. Nyě gbɨ́gbá nkûl nyé nyɨnyɛ̂h ó, lɨ́ esúʼo mɨ́ná gâ, bʉr o b'á dyêʼ koo e né bá.

²⁰ Nkul nyé, nye lɨ́ eséa ɨ́ mɨná gâ mpʉ nyé á séa ntémé ɨ́ Krîst ɨ́ jɔʼ Sɔ́ŋ á pɛh nye lɨ́ odwe, dil nyé ɨ́ jʉ́o kʉ́ ɨ́ mbó éjʉ́m wé yɨ́.

²¹ Nzyɛ̌m á dil nye ɨ́ mecwɨ́ɨ́ mé jwɨ́ɨ yaá ó, kʉ́ misísǐm mí édúrʉ́ʉ́ mi dí milʉ̂ mí, le myaá mi dí e nkul jwɨ́ɨ mí, le myaá mi dí e pîm mí, le myaá mi dí e menkul ménɨ́nɨ́ɨ́ mí. Krîst ó dí e díe e dí ɨ́ buú gúmlɔɔ lɨ́. Díe laá ó dí elaa míé mɨ́mɛ̂h bʉ̂r dí ekɛn ɨ́ mpóʼo sí yɨ̂ʼ má, le maá bé ókɛn ɨ́ mpóʼo ngá tyélɔɔ nyɨ́ má.

²² Nzyɛ̌m á si gbâ sá yɨ́yɛ̂h ɨ́ jwɨ́ɨ́ yé. Nye ntémé á si nʉa nye, dwě Mbɛ̌r-Nzyɛ̌m ó, nye díʼee lʉ̂.

²³ Mbɛ̌r-Nzyɛ̌m, wé ó nyʉ̂l mé Krîst. Krîst, nye ó lwɨ́ŋlá ɨ́ Mbɛ̌r-Nzyɛ̌m ɨ́ gúmó yɨ́yɛ̂h. Krîst ngwár e ngwár waá ntémé ó dí elóno ɨ́ mpóʼo nyɨnyɛ̂h nyá.