Ebrœ̂ 9 - Kálar Nzyɛ̌m : Ejwán é Sáá

Mpáh Nzyɛ̌m, nyaá sí yɨ̂

¹ Saá Nzyɛ̌m á nyɛɛ tyêl páʼ nyɔ́ɔ́ e Moyɨ̂z nyɨ́, á be ó e metié e mempéné mé, mɨ́ɛ lɨ́ ejwɨ́ɨ̌ mbi mʉ̂r jálá le edwě Nzyɛ̌m kûm wɨ́. Nye á be ntémé ó e yʉ́ʉ́ gúmo ɨ́ sí yɨ̂ʼ lɨ́ esú é syɛ́ɛ́ yaá.

² Mbɛ̌r kán waá, wé á sumɔɔ ó, mbi wɨ̂: Ntɔ́ɔ esôʼ, nye á jébɔɔ ó «ntɔ́ɔ á be tí nyɨ́». Tɨ̂ʼ tʉ́ŋlʉ̌, yé á be ó e tyélátyéla éláma ndu e téble. Biblêr bé á dwidwe Nzyɛ̌m bí, byé á tyélɔɔ ó, kʉ́ téble waá.

³ Yé á be ó e gúú kán wé á be lɨ́ ela ébê wɨ́. Wɨ́haá kán ébê, wé ó waá mbá pára dí ebɔma e wé ɨ́ jɔʼ nyé ní ɨ́ mpáh Nzyɛ̌m yɨ́ wɨ́. Nko píhe kán ébê waá, yé á bě e ntɔ́ɔ mbá, nyaá bé á jébe ó «ntɔ́ɔ dí ɨ́ buú buǒ tí nyɨ́.»

⁴ Alatâr á be ó tɨ̂, waá á sáŋɔɔ ɨ́ gʉ̂l nyá. Bé á si titira duró tɨ̂ʼ kʉ́, lɨ́ edidîʼ ótú ó dúu. Yé á be ntémé ó e mpɔra sáá. Mpɔra yaá, yé á si gbáŋɔɔ gʉ̂l ɨ́ mipáʼ mímyɛ̂h. Ɨ́ mpɔra tʉ́ŋlʉ̌, bé á si komo mpɨ̌ á sáŋɔɔ ɨ́ gʉ̂l nyɨ́. Nye á be ó lwɨ́ŋlá e manne. Ɨ́ mpɔra sáá yaá, yé á be ntémé ó e ntúm mé Árɔn wé á pâh biká wɨ́. Mpɔra yaá, yé á be ntémé ó e bipéh mékóʼ bíbá. Metié mé Njʉ̌m sáá, mé á be ó mɨtilá ɨ́ mekóʼ maá.

⁵ Yé á be ntémé ó e mbúrá mpɔ́ra sáá, súm bé á mi-myɛʼ metié mé á lɨleʼe kpaa mé Nzyɛ̌m yɨ́. Ɨ́ mbúrá waá kʉ́, yé á be ó, le okerʉ̂b obá. Mempabaá mɔ́ɔ́, mé á be ó mɨsyɛ́má, lé esâ dúʼwó ɨ́ nkǒ páʼ mbúrá. Bé ó w'á be lé elɛ̂ʼle ó, Nzyɛ̌m, nye ó tɨ̂ʼ sûm yaá. Mé abe le epʉ́la ɨ́ báánâʼ ó, me lɛ́yɨɨ bisâ byaá bíbyɛ̂h.

⁶ Jɔʼ bé á sil ekomlo bisâ byaá bíbyɛ̂h, le ekomo byé ɨ́ bijá byɔ́ɔ́ yɨ́, opara bɨ́ɛ nzě táare éninî ɨ́ ntɔ́ɔ esôʼ ɨ́ ti ti ti, lɨ́ etô le elóŋlǒ syɛ́ɛ́ yɔ́ɔ́.

⁷ Sâ gwár, njwɨ́ɨ opara nye omér ó b'á ninî ɨ́ ntɔ́ɔ mbá. Nye á jaa ninî tɨ̂ʼ ó, njɨ jɔʼ gwár ɨ́ mbû. Nye á tʉ̂to gʉ̂ʼ ó e sʉ́á métié mé ótír, ó Nzyɛ̌m pɛ́ʼɛɛ bibaa bí ébébe nyé á pa niʼe bí, byaá ɨ́ lɔ̌b ébébe lé nye mʉr tɨ̂, ti e laá e bʉ̂r oswîh, bé á sâ, bɨ́ɛ l'agʉ́a lɨ́.

⁸ Sísǐm mé Nzyɛ̌m lɛ́ʼlé mɨ́ná gá ɨ́ lɔ̌b waá ó, jɔ̌ʼ mbɛ̌r kán mé Nzyɛ̌m dína tîtyěl yɨ́, mʉr, nyé abe e nkul edi e nzɨ̌ mběʼ dí ó, nye kúmaa ɨ́ ntɔ́ɔ á be ɨ́ buú buǒ tí nyɨ́.

⁹ Yɨ̂ʼ, yé ó mveʼle dí elɛ̂ʼle mɨ́ná gá ɨ́ jɔʼ yɨ̂ʼ ó, bʉ̌r damá tíʼe ótír, táǎ Nzyɛ̌m mebyaʼ mɔ́ɔ́ ɨ́ nzɨ̌ mindwéá myaá, myé abe e nkul epubo míléme mi bʉ̂r o dí edîʼ nyé myǎ bá. Myé abe lɨ́ esâ ntémé ó, mipahlá mílémé myɔ́ɔ́, myé díʼee ɨ́ pyɛɛɛ.

¹⁰ Nzyɛ̌m á tíʼe ɨ́ lémé wé ó, bʉr, bé ósɨsâ nyé mbǐ yébé nɨ̌ ó, tó pyâl ɨ́ jɔʼ nyé ókǎ tyêl bʉ̂r metié me dí tîtyěl má yɨ́. Metié le mempéné mé ésôʼ, mé á jaa dwɛ̂ʼ ó, njɨ ɨ́ páʼ nyʉ̂l mʉr. Metié maá, mé á jaa tɨ́e mʉr ó, njɨ mimbi méde le menyoʼ myé á jala ó, nye dêʼ mí, le mimbi míndubó myé á jala ó, nye dúŋɔɔ mí.

Metié mé Krîst

¹¹ Krîst, nye mû ó sí nʉǎ dǐ njwɨ́ɨ opara. Nye á nze ó, lɨ́ enzě kab mɨ́ná gá bisá bí émbɨa mɨ́ná mû kúno enʉa gá bí. Nyě séá ó ɨ́ mpǎŋ mpáh Nzyɛ̌m, nyaá dí ɨ́ buo kûm nyɨ́. Yé abe e sá dí esâ sɔ́ɔlʉ tɨ̂. Nye á bé asumɔɔ e mebô. Nye ntémé, nyé abe lɨ́ egúmo e sí yɨ̂. Nye lɨ́ elaa mpáh nyé á nyɛɛ be nyɨ́ ɨ́ mpwaʼ.

¹² Jɔ̌ʼ Yésʉs á nî mpáh Nzyɛ̌m nyaá yɨ́, nye á bé anʉa sʉ́á métié mé óntamakǎ, nkʉ̂ maá bíntœœ. Metié nyé á nʉa, nî e mé má, mé á be ó maá mé nye mʉr tɨ̂. Nye nzě tó nî ɨ́ ntɔ́ɔ á be ɨ́ buú buǒ tí nyɨ́. Nye á nî ó, jɔʼ gwár lɨ́ esú é bíjɔʼ bíbyɛ̂h, ó nye nkʉ̂ táa góo, le edwih mɨ́ná gá ɨ́ mpila ébébe, ó mɨná díʼee gá onzyɛh o bʉ̂r, njʉ̌m dǐ e njʉ̌m dǐ.

¹³ Bʉr o b'á pa syel biti bá, bé á ka pubɔɔ ɨ́ páʼ ményʉ̂l ó e metié. Metié bíntœœ ndu e maá mé óntamakǎ, le meswií bwá bíntœœ, pǎ nyɛɛ́ pubo mʉ̂r,

¹⁴ á dwɛʼra e metié mé Krîst! Nye ókʉ́ pubo mípahlá mílémé gá míná, e nzɨ̌ Sísǐm mé Nzyɛ̌m dí edǐ njʉ̌m dǐ e njʉ̌m dǐ wɨ́. Mɨná damá sâ gá Nzyɛ̌m bisyɛ́ɛla bi dí mpʉ mímúu bí, mɨná bé ógwá pubɔɔ gá tɨ̂ʼ ó e metié mé, ánta nye, maá nyé mʉr tɨ̂ʼ á nkɛ́ɛ, tó dwě Nzyɛ̌m Sɔ́ŋ má. Nye á be ntémé ó, abe e sâ gwár bʉ̂r, bé á gwa dwe nye mebě tɨ̂. Ɨ́ tɨ̂ʼ ó mɨ́ná bé ókǎ sâ gá Nzyɛ̌m dí kublakúbla nyá gwɨ́hlá óbûʼla mpâ yɨ́.

¹⁵ Mpʉ̌ Krîst á sâ nó yɨ́, nye mû ó mesaádɔm dí etyɛ̂b páʼ gá nyɨ́ná e Nzyɛ̌m nyá. Nye á tyɛ̂b nó ó, lɨ́ esâ édwán é sáá páʼ gá nyɨ́ná e Nzyɛ̌m. Saá nyaá, nye tɨ̂ʼ ó, lɨ́ esú é bʉ̂r ó Nzyɛ̌m á jébe bá, ó bé bíʼee twǐʼ njʉ̌m dǐ, jala e nkɔb líʼe nyɔ́ɔ́. Yé ó sá Nzyɛ̌m á kɛʼ bé yɨ́, ebě, Krîst á si dwe, lɨ́ enzě táǎ góo, le edwih mɨ́ná gá ɨ́ mpila ébébe, pɛʼ mɨ́ná gá ɨ́ fá. Mɨná bé á be gá ɨ́ mpila yaá ó, tɨ̂ e bisyɛ́ɛla bí ébébe mɨ́ná bé á sâ gá ɨ́ jɔʼ mɨ́ná bé á be gá ɨ́ saá esôʼ yɨ́.

¹⁶ Mʉ̂r sí cɛma mékaná mé líʼe, nzě dwe nó, bʉr, bé ókabla bílíʼe byé byaá ó, bé osí pǎ nyɛɛ́ beě jwɨʼ dí elɛ̂ʼle ó, mʉr á pa cɛma mekaná maá nyá, nyé akǎ be ɨ́ twiʼ yɨ́.

¹⁷ Yé bé mʉr á cɛma mekaná mé líʼe nyá, nye dína ɨ́ twiʼ nó, mekaná maá, mé ápǎ gbáŋɔɔ ɨ́ nkɔb. Mé ójaá kǎ gbáŋɔɔ ɨ́ nkɔb ó, njɨ píe l'eswie lé.

¹⁸ Saá esôʼ Nzyɛ̌m á tyêl páʼ bé e bʉr nyɨ́, á taare enʉa nkul ó, ɨ́ jɔʼ métié mé ótír, mé á swɨɨ sí yɨ́.

¹⁹ Jɔ̌ʼ Moyɨ̂z á be, nye mû sí láa bʉ̂r o b'Ɨ́zraɛ̂l bɨ́bɛ̂h metié mé Nzyɛ̌m mɨ́mɛ̂h yɨ́, nye á si tíʼe bwá bíntœœ le ontamakǎ, nʉa métié mɔ́ɔ́, nzě pûhla mé e medíbé. Nye nzě sâ ébúhó é bíká bí lɨ́ ésɔp ndu e myě bínteme, mé á dubɔɔ ɨ́ bikaá má, nzě nʉa ébúho laá, dubo lé ɨ́ metié, nzě pupubo mekaná métié maá, ndu e bʉr baá bɨ́bɛ̂h.

²⁰ Nye á lɛ́ɛ e bé ó: «Mâʼ, mé ó metié mû lɨ́ eswɨɨ, sâ sáá páʼ gá nyɨ́ná le Nzyɛ̌m má.»

²¹ Moyɨ̂z á be ntémé ó, sí pubǒ mbɛ̌r kán mé Nzyɛ̌m e metié maá, pubo ntémé bisá bíbyɛ̂h nyé á bibi ɨ́ bijɔʼ nyé á dwe Nzyɛ̌m kûm bí.

²² Metié mé Nzyɛ̌m, mé lɛ́ɛ́ ó, bé púbaa bɛ̌m bě sá yɨ́yɛ̂h e metié mé ótír. Jɔʼ métié me tɨ̂ʼ dína apǎ swɨɨ sí yɨ́, Nzyɛ̌m, nyé abe lɨ́ epɛʼ mʉ̂r bibaa bí ébébe nyé á niʼe nye bí.

Ndwéá mé Krîst, wé ó dí epɛʼ ébébe

²³ Yé á kʉ jala ó, bʉr púbaa bisá bí sí yɨ̂ʼ e metié mé ótír, ebě, byaá bí sí yɨ̂ʼ, byé ó bimveʼle, lɨ́ emveʼle byaá bimpâ bi dí ɨ́ jʉ́o kʉ́ bí. Nó ó, bisâ bimpâ byaá bíɛ, byé ɨ́ jala le epubɔɔ ó, ɨ́ nzɨ̌ mpǎŋ ndwéá métié. Wɨ́haá ndwéá, wé lɨ́ esyɛ́ɛla e waá ésôʼ. Wé ntémé ó dí ɨ́ buú buo ódimé.

²⁴ Ebě, Krîst á bé anî mbɛ̌r kán bʉ̂r, bé á sumo Nzyɛ̌m wɨ́, waá dí enwɨɨla e mpǎŋ mpáh Nzyɛ̌m wɨ́. Mbɛ̌r waá, wé ó njɨ mveʼle, lɨ́ enwɨɨla e mpáh mpâ. Nye á nî ó, ɨ́ jʉ́o kʉ́. Nye mû ó lɨ́ etyɛ̂b ɨ́ jʉ́o kʉ́ ɨ́ míh mé Nzyɛ̌m lɨ́ elwib ɨ́ nkɔ̌m gá nyɨ́ná.

²⁵ Njwɨ́ɨ oparǎ nʉnʉa métié, ninî e tɨ̂ʼ ɨ́ ntɔ́ɔ dí ɨ́ buú buǒ tí nyɨ́ ó, mbú wɨ́wɛ̂h. Nye átô e metié mé, ánta nye. Krîst nyɨɛ á bé anî ɨ́ jʉ́o nzɔʼ nzɔʼ, lɨ́ etó dwě Nzyɛ̌m nyʉ̂l nyé.

²⁶ Yé bé nye á dwidwe ndwéá wé ó, nzɔʼ nzɔʼ nó, mpa nye á sia ntémé e mitúú ó, nzɔʼ nzɔʼ, táare ɨ́ jɔ̌ʼ Nzyɛ̌m á kuho kʉ́ e sí yɨ́. Nye á jaa nyɨ̂n ɨ́ sí yɨ̂ʼ ó, njɨ jɔʼ gwár ɨ́ kpɔ́ŋ. Yé á be ó, ɨ́ jɔʼ éswéhlɨ́ é sí yɨ̂, lé á pyâl ɨ́ mɨná gá yɨ́. Nye nzě dwě Nzyɛ̌m nyʉ̂l nyé, lɨ́ epɛʼ bʉ̂r misyóm myɔ́ɔ́ lɨ́ esú é bíjɔʼ bíbyɛ̂h.

²⁷ Sâ Nzyɛ̌m á komo lɨ́ esú é mʉ̂r nyɨnyɛ̂h yɨ́, yé ó, nye dwêʼ jɔʼ gwár. Píe tɨ̂, mʉr waá ótô kwá mé Nzyɛ̌m, ó nye tôʼ pahlɔɔ.

²⁸ Jwɨʼ gwár e gwár e Krîst. Nye á si dwe jɔʼ gwár, ó nye búraa le misyóm lɨ́ esú é bʉ̂r ɨ́ buo buo. Ɨ́ jɔʼ mbá nyé ókǎ nze yɨ́, nye ákǎ báʼǎ nze ɨ́ lɔ̌b ébúra e misyóm. Nye ónze ó, lɨ́ enzě tíʼ bʉ̂r o dí ebóno nyé bá.