Ebrœ̂ 8 - Kálar Nzyɛ̌m : Ejwán é Sáá

Yésʉs, ánɨ̂nɨ̂n njwɨ́ɨ opara gá wɨ́ná

¹ Lʉ́ ékǎn e bísá bɨ́h dí elɛ́ɛ bɨ́n bí, wé ó wɨ̂: mɨná gá bé ó e mbi njwɨ́ɨ opara waá. Nye ó ndîndǐl ɨ́ jʉ́o kʉ́ ɨ́ mbó éjʉ́m mé Nzyɛ̌m Sɔ́ŋ nkul nyɨnyɛ̂h.

² Nyě séá syɛ́ɛ́ njwɨ́ɨ opara yé ó, ɨ́ gúmó dí ɨ́ buú buǒ tí yɨ́. Nó ó, nyě séá ó, ɨ́ mbɛ̌r kán mpâ, waá Dâ Nzyɛ̌m mʉr tɨ̂ʼ á sumo wɨ́. Wé abě sumá mébó mé bʉ̂r.

³ Njwɨ́ɨ opara nyɨnyɛ̂h, nye tyélá ɨ́ dǐ pára yé ó, nye táŋaa mebyaʼ me bʉ̂r le edwidwě Nzyɛ̌m mindwéá. Nó ntémé ó Yésʉs á be ɨ́ bi ó, nye tôʼ dwě Nzyɛ̌m yʉ́ʉ́ sɔ̂ʼ.

⁴ Yé bé syɛ́ɛ́ pára yé, yé á jala le eséɔɔ ó, ɨ́ sí yɨ̂ʼ nó, mpa Yésʉs á bé abe pára, ebě, yé le opara oswîh o dí edwě Nzyɛ̌m mindwéá, dû mpʉ métié mé Moyɨ̂z dí etɨ́e yɨ́ bá.

⁵ Opara bɨ́ɛ, bé sɨ́séá ó, ɨ́ mpáh Nzyɛ̌m, nyaá sí yɨ̂. Nye ó njɨ lɨ́ ebaŋa mpáh Nzyɛ̌m mpâ dí ɨ́ jʉ́o kʉ́ nyɨ́. Nó ɨ́ jɔ̌ʼ Moyɨ̂z á be ó, nyě sumó ó mbɛ̌r kán mé Nzyɛ̌m yɨ́, Nzyɛ̌m á lɛ́ɛ e né ó: «Gwá sumǒ sá yɨ́yɛ̂h lɨ́ edû mveʼlě mbɛ̌r gó á lɛ̂ʼlɔɔ lɨ́ ecwɨ̂ʼ kʉ́ yɨ́.»

⁶ Syɛ́ɛ́ pára Yésʉs dí eséa lɨ́ esú gá lɨ́ná ɨ́ báánâʼ yɨ́, yé e nyɔm ɨ́ buo buo, laǎ syɛ́ɛ́ pára yé á duho myâ yɨ́. Nye ó dí mesaádɔm dí etyɛ̂b páʼ gá nyɨ́ná e Nzyɛ̌m nyá. Saá dwân Nzyɛ̌m á tyêl páʼ nyɔ́ɔ́ e bʉr nyɨ́, nye ɨ́ buo nkûl ɨ́ lɔ̌b ménkɛ̌ʼ Nzyɛ̌m á sâ má. Menkɛ̌ʼ maá, mé ɨ́ mbɨa, laa maá me sáá esôʼ.

⁷ Saá esôʼ, nye á bé agwá jala. Yé bé nye á si jala nó, mpa Nzyɛ̌m á bé akǎ dila nyé e nyaá mbá.

⁸ Sâ gwár, Nzyɛ̌m á be ɨ́ kœb ó, bʉr, bé e bidyɛʼ. Sá tɨ̂ʼ ó nyé á lɛ́ɛ ó: «Dâ Nzyɛ̌m lɛ́ɛ́ ó: “Jɔʼ, yé ópyâl. Jɔʼ yaá ó mé ótyêl sáá swîh páʼ nyɨ́h e bʉr o b'Ɨ́zraɛ̂l yɨ́. Me ótyêl nyé ntémé ó, páʼ nyɨ́h e bʉr ó Yʉ́da.

⁹ Jɔʼ mé á mɛ̂r bimpám byɔ́ɔ́ ɨ́ mebô, pɛʼ bé ɨ́ sí Egɨ̂ptɛn yɨ́, me á si tyêl saá páʼ nyɨ́h le onɔ́ɔ́. Nó ó, edwán é sáá mé ókǎ báʼǎ tyêl lɨ́, lé ákǎ bě mpʉ nyɨ́haá. Bé á bé adû métié mé sáá esôʼ mé á tyêl páʼ nyɨ́h le onɔ́ɔ́ nyɨ́. Sá tɨ̂ʼ ó mé á túmo koo e bé yɨ́.”»

¹⁰ Ebě, Dâ Nzyɛ̌m lɛ́ɛ́ ó: «Píe melû maá, saá mé ngá tyêl páʼ nyɨ́h e kúl bʉ̂r o b'Ɨ́zraɛ̂l nyɨ́, nye óbe ó, mbi wɨ̂: Me ólíʼe métié mâm ɨ́ lʉ́ wɔ́ɔ́. Me ócɛma bé mǎ ɨ́ miléme. Me óbe ó Nzyɛ̌m wɔ́ɔ́. Bɨ́ɛ, bé óbe ó bʉr bâm.

¹¹ Yé ákóʼó kǎ be e mʉr ókǎ tó lɛ́ɛ só wé, nkʉ̂ mɨ́ɔɔ́ wé ó: “Wɛɛ, paá cɨ́! Me páa lɛ̂ʼle gó mpʉ mɨ́ná jálá le egʉ́ǎ Dâ Nzyɛ̌m yɨ́! Ebě, bɨ́bɛ̂h, bé óbánǎ gʉ́a mê, táare e bwá ó ntwǒm, kala le otɔ́má bʉ̂r.

¹² Me ójɨ̂ʼ bʉ̂r o b'á gbah metié mâm bá nkoó. Me ákǎ símsa mísyóm myɔ́ɔ́.”

¹³ Ɨ́ mpʉ̌ Nzyɛ̌m á jébe saá mbá «edwán é sáá» yɨ́, nye á si liŋ nyaá esôʼ mbǒr. Nó ó, sá mû mbǒr, nkʉ̂ yaá mû sí jwɨm yɨ́, yé mû ntémé ó kúno edîm yɨ́yɛ̂h!