Ebrœ̂ 7 - Kálar Nzyɛ̌m : Ejwán é Sáá

Mɛlkisédɛk, mʉr á be njwɨ́ɨ opara nyá

¹ Mɛlkisédɛk waá á be ó njwɨ́ɨ nkanǎ Salɛ̂m. Nye ntémé á be ó njwɨ́ɨ opara lɨ́ esú é Nzyɛ̌m dí Lʉ́ bísá bíbyɛ̂h nyá. Ɨ́ jɔ̌ʼ Abraham á tô ɨ́ dɔm lɨ́ etó lwímla e bʉ́ʉ́ ójwɨ́ɨ yɨ́, mpúla nyé á búla, nyé osí ntaa bé ɨ́ dɔm yɨ́, Mɛlkisédɛk ntɔ̂ʼ tô, tó bɔma e né, nzě syɛɛ nyé metyéelé.

² Ɨ́ bisá bíbyɛ̂h Abraham á nʉa ɨ́ dɔm laá bí, nye ntémé á si dwe Mɛlkisédɛk nkɔb mpwár ɨ́ menkɔb kám. Díé é «Mɛlkisédɛk», lé páʼlɔ́ɔ́ ɨ́ lwǐb ébrœ̂ ó: «njwɨ́ɨ dí tîtyěl mʉr nyá». Mpʉ nyé á be njwɨ́ɨ Salɛ̂m yɨ́, díé é Salɛ̂m lɨ́ɛ, lé páʼlɔ́ɔ́ ó, «mepyɛbla». Nó ó, nye ó b'á gbɨgbâ bʉr mepyɛbla ɨ́ miléme.

³ Yé abe e mʉr ngwár dí egʉ́a sɔ́ŋ, nkʉ̂ nyɔ̌ŋ mé Mɛlkisédɛk, nkʉ̂ ntán yé. Mʉr, nyé agʉ́ǎ mpʉ̌ Mɛlkisédɛk á byɛ̂l yɨ́, agʉ́a ntémé nkʉ̂ nye á si dwe. Nyě nwɨɨlá ó e Mwân mé Nzyɛ̌m. Nyě dǐ ɨ́ dǐ pára yé ó, njʉ̌m dǐ e njʉ̌m dǐ.

⁴ Paá dwɛ̂ʼ gá mpʉ nyé dí mpaŋ mʉ̂r yɨ́! Abraham, sɔ́ŋ kúl bʉ̂r o b'Ɨ́zraɛ̂l á dwe nye ɨ́ bisá nyé á búla e byé ɨ́ dɔm bí ó, nkɔb mpwár ɨ́ menkɔb kám.

⁵ Bʉr o bó ónzweh mé Levî, bé ó dí enʉǎ dǐ pára. Etié, lé dwé bé nkul ntémé ó, bé nʉ́aa péh bísá bíbyɛ̂h bʉ̂r o b'Ɨ́zraɛ̂l dí ebi bí, jala e nkɔb mpwár ɨ́ menkɔb kám. Bé bibi nkɔ̂b nyaá ó, ɨ́ mebó mé bɨ́ɔɔ́ bɔ́ɔ́, dí onta mé Abraham bá.

⁶ Tó kœb ó, Mɛlkisédɛk á bé abe mʉ̂r onzweh mé Levî. Damá jóʼo nó, Mɛlkisédɛk waá á be ó sí dî Abraham ó, Abraham dwêʼ nye nkɔb bisá bíbyɛ̂h nyé ngá bi bí, jala e nkɔb mpwár ɨ́ menkɔb kám. Mɛlkisédɛk ntɔ̂ʼ syɛɛ Abraham metyéelé, nyɨɛ mʉr á pa bi menkɛ̌ʼ mé Nzyɛ̌m nyá.

⁷ Yé abe e mʉr dí e nkul esóŋlǒ sá yɨ̂: le mʉr dí e dǐ nɨ́nɨ́ɨ́, le waá dí abe e yé nyá, waá dí e dǐ yaá nyá ó dí esyɛɛ nyʉ́ʉ́ metyéelé.

⁸ Ɨ́ wɨ̂ʼ pâʼ, mɨná bé á be ɨ́ bee gá mpʉ ónzweh mé Levî wé á nʉnʉa nkɔb mpwár ɨ́ menkɔb kám, bɨ́ɛ ntémé lɨ́ edwidwe nyé yɨ́. Ɨ́ gúú pâʼ, mɨná bé lɨ́ ebee gá ntémé mpʉ̌ Mɛlkisédɛk dí enʉa nkɔ̂b nyaá, nye yɨ́ɛ l'adwe nyʉ́ʉ́ mʉ̂r nyé nkɔ̂b yɨ́. Ebě, micɛmá, myé boʼlo ó nó.

⁹ Mɨná bé óbɛ̌m lɛ́ɛ gá ntémé ó, Mɛlkisédɛk waá á be ó sí tyêl Levî etié ó, nyɨɛ bíʼee péh bísá bíbyɛ̂h Levî ngá bibi bí, jala e nkɔb mpwár ɨ́ menkɔb kám. Ebě, Levî, mʉr dí enʉnʉa míndwéá mí bʉ́ʉ́ bʉ̂r nyá, á si dwe Mɛlkisédɛk wé ndwéá mpúhlá le waá Abraham á dwe Mɛlkisédɛk wɨ́.

¹⁰ Ebě, mpʉ̌ Levî á be apǎ byɛ̂l yɨ́, yé á be ó mpʉ̌ sá lɛ́ɛ́, nye á be ó, nye dína tʉ́ŋlʉ̌ nyʉ̂l mé sɔ́ŋ mpám wé Abraham, ɨ́ jɔʼ bé e Mɛlkisédɛk, bé á bɔma yɨ́.

Yésʉs, nye ó mpʉ̌ Mɛlkisédɛk

¹¹ Dǐ pára bʉ̂r o bó ónzweh mé Levî, bé á didi yɨ́, yé ó b'á be etín é métié mé á tyélɔɔ bʉr o b'Ɨ́zraɛ̂l má. Yé bé oLevît, bé á si lóŋlo syɛ́ɛ́ yɔ́ɔ́ mbɨ̂mbɨá nó, lɛ́ɛ́, yé á bé akǎ be e nyɔm ó, nyʉ́ʉ́ pára swîh dílaa bê, nwɨɨla e Mɛlkisédɛk. Nye ntémé á bé abyɛ̂l ɨ́ mpóʼo mé Árɔn.

¹² Yé bé syɛ́ɛ́ pára, yé mû ó sí céne nó, yé jɨ ntémé ó, metié mé ésôʼ, mé cénɔɔ, ó maá meswîh, mé tyélɔɔ.

¹³ Mɨná bé lɨ́ egʉ́a gá ó, mʉr dí elwibɔɔ ɨ́ lɔ̌b wé nyá, á bé abyɛ̂l lɨ́ onzweh mé Levî. Nye á byɛ̂l ó, ɨ́ waá oswîh. Tɔʼ e mʉr onzweh waá á tirwo e syɛ́ɛ́ édîʼ míndwéá lɨ́ alatâr.

¹⁴ Bʉr bɨ́bɛ̂h, bé lɨ́ egʉ́a ó, Tî gá wɨ́ná á byɛ̂l ó, lɨ́ onzweh mé Yʉ́da. Nó ó, Moyɨ̂z á bé alɛ́ɛ̌ sɔ̂ʼ, dumo le onzweh waá, ó nyʉ́ʉ́ mʉ̂r tɨ̂ʼ óbɛ̌m nʉǎ dǐ pára.

¹⁵ Sá bɨ́h dí elɛ́ɛ yɨ́, yé nyɨ́n ó, yé ó tyeetye, ebě, para swîh mû sí pyâl lɨ́ esú lé éséǎ syɛ́ɛ́ yaá nyá, nye ɨ́ buú nwɨɨla e Mɛlkisédɛk!

¹⁶ Nye á bé anʉǎ dǐ pára ɨ́ lɔ̌b mbyɛ́lá wé, nkʉ̂ ebe métié le mempéné. Nye á tyélɔɔ ɨ́ dǐ njwɨ́ɨ opara ó e nkul nyé nye mʉr tɨ̂, le twiʼ yé dí abe e nkul epɛʼɔɔ yɨ́.

¹⁷ Ebě, péh Mékaná mé Nzyɛ̌m, yé lɨ́ eboʼlo, dumo e né ó: Go ódidi pára ó, ɨ́ melú mé mpóʼo mɨ́mɛ̂h. Go ó mbi párǎ Mɛlkisédɛk á be wɨ́.

¹⁸ Nzyɛ̌m á si dyɛ̂ʼ metié mé ésôʼ lɨ́ empah, ebě, mé á bé abe e nkul. Mé ntémé, mé á bé abe bʉ̂r e bá mâ nyɔm.

¹⁹ Ebě, metié mé ésôʼ maá, mé á bé abe e nkul epubo syɛ̂l misyóm ɨ́ mipáʼ mímyɛ̂h. Nó ó, mpǎŋ sá dí elaa métié maá yɨ́, yɨ́ pyâl: mpûʼla mɨ́ná mû e nye ɨ́ léme nyɨ́. Nye ó dí esâ ó, mɨná sîhlaa gá bǎʼ e Nzyɛ̌m.

²⁰ Yʉ́ʉ́ sɔ̂ʼ ntémé ó yɨ̂: jɔ̌ʼ Nzyɛ̌m á tyêl Tî Yésʉs ɨ́ dǐ njwɨ́ɨ opara yɨ́, nye á ntaa ó minkâl. Sâ gwár, ɨ́ jɔʼ bʉ́ʉ́ bʉ̂r bɨ́ɛ, bé á nʉnʉa dǐ yaá yɨ́, nye á bé antaa myê.

²¹ Nzyɛ̌m á si ntaa minkâl ɨ́ lɔ̌b wé. Nye á lwib ó mbi wɨ̂: Dâ á si ntaa minkâl. Nye ácéně jwɨʼ yé. Nye á lɛ́ɛ ó: Go ódidi pára ó, ɨ́ melú mé mpóʼo mɨ́mɛ̂h.

²² Mpʉ̌ Nzyɛ̌m á ntaa minkâl nó yɨ́, yé á nze sâ ó, Yésʉs díʼee e mbeʼ ébaʼle sáá nyé á tyêl nyɨ́. Sá tɨ̂ʼ ó sáá nyaá dí ɨ́ mbɨa, laa nyaá esôʼ yɨ́.

²³ Opara bé ésôʼ, bé á be ɨ́ buo, ebě, bé á be ó, nyâʼ dwe, nyʉ́ʉ́ dila. Eswie ó b'á kamle nyʉ́ʉ́ mʉ̂r ɨ́ sɔ́má yɔ́ɔ́ lɨ́ edǐ dǐ yaá ɨ́ bea bea.

²⁴ Sâ gwár, mpʉ̌ Yésʉs dǐ njʉ̌m dǐ e njʉ̌m dǐ yɨ́, nyě baʼlé yé dǐ pára yaá ó, njɨ nye omér.

²⁵ Sá tɨ̂ʼ ntémé ó nyé dí e nkul etíʼ bʉ̂r o ngá sîhlě bǎʼ e Nzyɛ̌m, cɨɨ ɨ́ nzɨ̌ nyé bá. Nyě jaá pɛʼ mébébe mɔ́ɔ́ ó mɨ́mɛ̂h. Mpʉ nyé dí njʉ̌m dǐ e njʉ̌m dǐ yɨ́, nó ntémé ó nyé dí e nkul ejɨʼla e Nzyɛ̌m lɨ́ esú lɔ́ɔ́ ɨ́ jɔʼ yɨ́yɛ̂h yɨ́.

²⁶ Nye ó mbi njwɨ́ɨ opara wé á kʉ jala e mɨná gá wɨ́: nye ó mʉr dí tí, waá dí akúnwo e mpɨŋ nyá. Sá mébomo, yé abe ɨ́ nye. Nyé akúnwo bá le osyɛ̂l o mísyóm. Nye ntémé, nye ó mbɨ́ná kʉ́, laǎ jʉ́o le ejwoo le baántɛ́n.

²⁷ Nyé abě mpʉ bʉ́ʉ́ ójwɨ́ɨ bé ópara, bé á bɨbe yɨ́. Yé abe nyé bi ó, nye díʼɨɨ mindwéá melú mɨ́mɛ̂h lɨ́ etáǎ góo, táare e mebyaʼ mé, kumo e maá me bʉ́ʉ́ bʉ̂r, ebě, nye á jaa dwe Nzyɛ̌m ndwéá ó, njɨ jɔʼ gwár, lɨ́ misyóm gá míná mímyɛ̂h, ɨ́ jɔʼ nyé á dwe twiʼ yé nye mʉr tɨ̂ʼ yɨ́.

²⁸ Metié, mé á jaa tyêl ɨ́ dǐ njwɨ́ɨ opara ó, bʉr o b'á be ɨ́ tyɛʼ bá. Nó ó, píe metié maá, Nzyɛ̌m á si káale, nye mʉr tɨ̂ʼ ntɔ̂ʼ tyêl Mwân wé ɨ́ dǐ njwɨ́ɨ opara lɨ́ esú é bíjɔʼ bíbyɛ̂h. Mwân wé waá ó dí e nkul elóŋlǒ syɛ́ɛ́ yaá yɨ́yɛ̂h.