Ebrœ̂ 6 - Kálar Nzyɛ̌m : Ejwán é Sáá

¹ Nó, mɨná gwáʼaa edwe gá milɛ́ʼlá bé dí enyɛɛ́ jɨ̂ʼ ésôʼ, myaá mi dí edumo e Krîst mí. Mɨná dwéelaa gá myaá mi dí esâ ó, mʉr tɔ́maa ɨ́ pɨʼ mí. Bɨ̌h bé ákǎ báʼǎ lɛ̂ʼle bɨ́n milʉ́ mékǎn mâ: etúmǒ koo e bibol bísyɛ́ɛla, edwirǎ léme, edyêʼ koo e Nzyɛ̌m,

² milɛ́ʼlá mi dí edwɛ̂ʼ míndubó mí, myaá mi dí edwɛ̂ʼ kɛlá mébô mí, nkʉ̂ ɨ́ lɔ̌b pahá ódwe, nkʉ̂ ɨ́ tíʼá mílɔ̌b, waá mésíé.

³ Nzyɛ̌m ókpɛl nó, mɨná bé ókʉ́ dweela gá milɛ́ʼlá mi dí edwe bʉ̂r pɨʼ otɔ́má bʉ̂r mí.

⁴ Nó ó, bʉr o b'á nyɛɛ kʉnɔɔ mimbah bá, bé á be lɨ́ enyɛɛ́ bibi míndwéá mi dí eduho ɨ́ jʉ́o kʉ́ mí. Ɨ́ jɔʼ yaá, Sísǐm mé Nzyɛ̌m bé e boo nɔ́ɔ́ ó b'á bɨbe.

⁵ Bé á be lɨ́ ebibi ntémé lɔ́ɔ́ mé Nzyɛ̌m dí ɨ́ buú mbɨa wɨ́, jóʼo ménwǎn me tɨ̂. Bɨ́ɛ, bé á si nyɛɛ dweŋɔɔ mbi nkûl ngá dweŋɔɔ ɨ́ mpóʼǒ Nzyɛ̌m ngá tyêl nyɨ́ wɨ́.

⁶ Ɨ́ jɔ̌ʼ mbi bʉ̂r baá ká dímlě búʼó yɔ́ɔ́ yɨ́, yé abe e yʉ́ʉ́ sá swîh dí e nkul ekǎ sâ ó, mʉr báʼa túmǒ koo le mebébe mé, le edwirǎ léme. Ebě, bé bʉr o tɨ̂, bɨ́ bomlo Mwân mé Nzyɛ̌m e binzâŋ, bɨ́nɔɔ nyé ɨ́ kolôs kʉ́ ɨ́ jɔʼ mbá, lɨ́ esâ ó, nye búu pyaŋɔɔ ɨ́ kpɛŋlɛm.

⁷ Gʉ́ŋáá gá ó, pemé ómpíé dí enwɨ́ɨ tɨ̂ʼ jɔʼ yɨ́yɛ̂h, dí egúmo mpúmó lɨ́ esú é mépwaʼ mé óbel o tɨ̂ʼ yɨ́, yé óswɨɨ métyɛʼ me mpóm mé Nzyɛ̌m.

⁸ Yé sí kǎ be yɨ́ɛ ó, pemé yaá, yé páh ó, mbɨ́ biká mpʉ míndwínɨ́nɨ́ le ntʉ̌msakpɛl nó, go ó, pemé yaá, yé abe e nyɔm. Yé ókǎ lîʼ ó, tyé médwíne mé nyâ ó, nye syɛ́mɨɨ yê. Bé ójaá kǎ dîʼ yé ó, díʼɨ́ɨ.

⁹ Bʉr ó kpɛ̌l bâm, bɨ̌h damá lwib nó, mě e mpûʼla ɨ́ léme ɨ́ lɔ̌b wɨ́n ó, sá dí mbɨa, laa méswomlʉ le medíʼe yɨ́, yé ó bɨ̌n dóló. Sâ yaá, yé ó twǐʼ njʉ̌m dǐ.

¹⁰ Ebě, Nzyɛ̌m, nyé abe waá onzyɛ́h ónzyɛ́h. Nye ájɨ́há syɛ́ɛ́ bɨ́n dí eséa nyé yɨ́. Nye ntémé, nyé abe e nkul ejɨhǎ kpɛ̌l bɨ́n dí elɛ̂ʼle nyé yɨ́. Yé á si nyɨ̂n ɨ́ ponó ɨ́ jɔʼ bɨ́n á be lɨ́ ekɛm bʉ̂r bé yɨ́. Bɨ̌n ntémé dína ó lɨ́ etô e menkɔ̌m maá dóló.

¹¹ Bɨ̌h gwɨ́m ó, mʉr nyɨnyɛ̂h sâʼ sɨ́n lɨ́ eséǎ syɛ́ɛ́ yaá, tó kumo lɨ́ odumo, akâr. Jɔʼ yaá ó lémé wé ngá lóno ɨ́ mpûʼla yɨ́.

¹² Bɨ̌h bé akpɛl ó, bɨ̌n díʼee mipwɨ́pwɨ̂h mí ósyɛ̂l o mésâ. Bɨ̌h jaá gwɨ̂m ó, njɨ bɨ̌n sâʼ mpʉ bʉ́ʉ́ óbûʼla mé Nzyɛ̌m dí eboó sɨsâ yɨ́: bé e búʼó ndu e bíhwó. Bɨ́ɛ ntémé ó ngá nʉǎ sá Nzyɛ̌m á kɛʼ bé yɨ́, jala e nkɔb líʼe nyɔ́ɔ́.

Nkɛ̌ʼ mé Nzyɛ̌m

¹³ Yé á be ó, ɨ́ jɔ̌ʼ Nzyɛ̌m á kɛʼ Abraham bisá bí émbɨa yɨ́, nye á si ntaa minkâl. Mpʉ yé dí ó, yé abe e mʉr dí elaǎ Nzyɛ̌m yɨ́, nó ó nyé á gbâ díé lé nye mʉr tɨ̂ʼ ɨ́ minkâl yɨ́.

¹⁴ Nye á lɛ́ɛ ó: «Lɨ́ otyeetye, me ósʉ gó metyɛʼ me mpóm, le edwe gó bwân mebɨ̂ʼ mepǎm.»

¹⁵ Abraham á si dûhwo mpʉ̂n. Sá tɨ̂ʼ ó nyé á bi sâ Nzyɛ̌m á kɛʼ nye yɨ́.

¹⁶ Jɔʼ bʉ̂r ntɨ́ntáá mínkâl yɨ́, bé ntɨntaa myé ó, lɨ́ egbâ díé é mʉ̂r dí entaa bé ɨ́ dúu nyá ɨ́ minkâl. Minkál myɔ́ɔ́ myaá, myé lɨ́ egbâ nkǎ-tí ɨ́ mesónó.

¹⁷ Nzyɛ̌m á tíʼe ɨ́ lémé wé ó, nyě sá ó bʉr gʉ́ŋaa lɨ́ otyeetye ó, nye ábîr mbɨambɨa nkɛ̌ʼ nyé. Nó yaá ó nyé á ntaa minkâl ɨ́ jɔʼ nyé á kɛʼ bʉr membɨa mé yɨ́. Minkál myé myaá ó b'á lɨl nkɛ̌ʼ nyé. Bʉr o jálá le ebi nkɛ́ʼ nyaá bá, bé ogʉ́ǎ tyeetye ó, bé ókʉ́ bi nyê.

¹⁸ Yé e bisá bíbá bi dí abe e nkul ecénɔɔ bí: bisâ byaá, byé ó nkɛ̌ʼ ti e minkál mé Nzyɛ̌m. Mɨná nʉa gá pîm ɨ́ búʼó ó, duho tɨ̂. Nzyɛ̌m, nyé abe e nkul elɛ́ɛ bíbɛr ɨ́ sí, tɔʼ e bá tîtííǎ. Mɨná gá bé ó bʉr o mû sí bîr sá yɨ́yɛ̂h, lɨ́ esú lé édi e mpûʼla ɨ́ milémé gá míná bá. Mpûʼla nyaá, nye ó kwahaá ɨ́ ponó ɨ́ míh gá mɨ́ná.

¹⁹ Mpûʼla nyaá, nye lɨ́ esúʼo míléme gá míná e nkul. Nyé abá tyɛ̂b. Nyě súʼó mílémé gá míná ó, ɨ́ kpɨ́ɨ́ɨ́ mpʉ̌ kǒl dí emɛ̂r byɛ̂l ɨ́ sʉ̌m díbé wɨ́. Mpûʼla nyaá, nye ó mpʉ̌ kǒl dí entaǎ kán ébê dí tyelá ɨ́ mpáh Nzyɛ̌m wɨ́. Wɨ̂ʼ ódumo ó kǒl waá, wê tyeelá ó, ɨ́ mɨná gâ. Gúú ódumo wɨ́ɛ, wé ó ɨ́ gúmó dí tí yɨ́, ɨ́ mpáh Nzyɛ̌m tʉ́ŋlʉ̌.

²⁰ Tɨ̂ʼ ó Yésʉs á nî yɨ́. Nye á nî ó, esôʼ e mɨná gâ. Nye mû ó njwɨ́ɨ opara gá wɨ́ná, mpʉ̌ Mɛlkisédɛk á be yɨ́. Nye ódi ntémé ó njɨ nó, njʉ̌m dǐ e njʉ̌m dǐ.