Ebrœ̂ 5 - Kálar Nzyɛ̌m : Ejwán é Sáá

¹ Ebě, bé pɨ́pɛ́h njwɨ́ɨ opara nyɨnyɛ̂h ó, tʉ́ŋlʉ̌ bʉr. Nye tyélá ɨ́ dǐ yaá ó, nye tyɛ́bɨɨ ɨ́ medilá me bʉ̂r ɨ́ páʼ bísâ bi dí edwɛ̂ʼ Nzyɛ̌m bí. Nye ó mʉr dí etɨtáa mébyaʼ mɔ́ɔ́ nyá, le edîʼ Nzyɛ̌m mindwéá.

² Para nyɨnyɛ̂h, nyě e nkul ekɛm bígʉʼlʉgʉ́ le bʉr o mû sí dîm bá, ebě, ɨ́ mipáʼ mímyɛ̂h, etyɛʼ lé, lé lɨ́ enyɨ̂n ɨ́ míh mé.

³ Sâ yaá ó nyé dí ejala le etáa mébyaʼ mé ɨ́ lɔ̌b mísyóm myé jwɨʼ gwár e gwár e mpʉ nyé jálá le etáa mébyaʼ me bʉ́ʉ́ bʉ̂r yɨ́.

⁴ Mʉr, nyé abe e nkul egbân dǐ pára, nkʉ̂ dúú tɨ̂. Bʉr ó Nzyɛ̌m á jébe bá ó dí ejala e dǐ yaá. Yé ó jwɨʼ gwár mpʉ̌ Nzyɛ̌m á nyɛɛ jébe Árɔn, tyêl nyé ɨ́ dǐ pára yɨ́.

⁵ Jwɨʼ gwár e gwár yaá ntémé e Krîst. Nye á bé agbân dǐ njwɨ́ɨ opara, nkʉ̂ sáa kûm dí tɨ̂ʼ nyɨ́. Nye á si tyélɔɔ ɨ́ dǐ yaá. Mʉr á tyêl nye nyá, á lɛ́ɛ ó: «Go ó mwân wǎm. Mɨ́ byâ gó mûh.»

⁶ Ɨ́ yʉ́ʉ́ péh Mékaná mé Nzyɛ̌m swîh, Nzyɛ̌m á lɛ́ɛ ntémé ó: «Go ódidi para wǎm ó, ɨ́ melú mé mpóʼo mɨ́mɛ̂h. Go ó mbi párǎ Mɛlkisédɛk á be wɨ́.»

⁷ Jɔ̌ʼ Krîst á títíʼe ɨ́ sí yɨ̂ʼ yɨ́, nye á bɨbe lɨ́ ejɨʼla e mʉr á be e nkul epɛʼ nyé lɨ́ eswie nyá. Nye á si bʉ̂ bitím, jɨ kʉ́kʉ́, Nzyɛ̌m ntɔ̂ʼ jóʼo nyé ntémé ɨ́ lɔ̌b méjóʼǒ Yésʉs á sâ nye má.

⁸ Damá bě mpʉ nyé á be Mwân mé Nzyɛ̌m yɨ́, nye á be ó si jɨ̂ʼ ésâ Nzyɛ̌m mejóʼo. Nye á jɨ̂ʼ mejóʼo maá ó, ɨ́ nzɨ̌ mitúú nyé á sia e myé mí.

⁹ Píe mitúú myé myaá ó nyé á ka be, nye mû lwɨ́ŋlá ɨ́ nkʉ́ŋ wé yɨ́. Nye á be ó, nye mû sá ngá kǎ dwe bʉ̂r twǐʼ njʉ̌m dǐ yɨ́. Bʉr bɨ́bɛ̂h ngá sâ nyé mejóʼo bá, bé óbǐ twiʼ yaá.

¹⁰ Nó ó Nzyɛ̌m á tyêl nye njwɨ́ɨ opara ɨ́ mpʉ mé Mɛlkisédɛk yɨ́.

Aduma gâ

¹¹ Bɨ̌h bé ɨ́ buo mílɛ́ʼlá mí édwe ɨ́ lɔ̌b wɨ̂. Sâ gwár, yé ɨ́ buú kɔbla lɨ́ edwe bɨ́n myǎ, ɨ́ lɔ̌b élele e mílémé mín lɨ́ enʉa mílɛ́ʼlá myaá.

¹² Yɨ́ boó laǎ jɔʼ bɨ́n á jala le epyâl ólɛ̂ʼla yɨ́. Yé jɨ ó, bé báʼa nzě lɛ̂ʼle bɨ́n bisá bí ésôʼ bɨ́n á nyɛɛ lɛ̂ʼlɔɔ ɨ́ milɔ̌b mé Nzyɛ̌m bí. Bɨ̌n dína ó mpʉ bítyéé bi dí ede ébêl bí. Bɨ̌n bé apǎ dyɛnwa e mede mé ótɔ́má bʉ̂r.

¹³ Yé ó nó, ebě, mʉr dína lɨ́ ede ébêl nyá, nyé apǎ dyɛnwa le milɛ́ʼlá mi dí edumo le otîtyěl gá wɨ́ná mí, ebě, nye dína ó mâ tyéé.

¹⁴ Otɔ́má bʉ̂r bɨ́ɛ ó dí ejala e mpǎŋ mede. Bɨ́ɛ e bɨ́ɛ ó dí e pɨʼ dí ó, bé gʉ́ŋaa ebɛ̂ʼ páʼ ébébe le embɨa nyɨ́. Bé bi pɨ̂ʼ nyaá ó, ɨ́ lɔb nzyéé bé dí egbâ lɨ́ egʉ́a ébɛ̂ʼ bísâ byaá nyɨ́.