Ebrœ̂ 4 - Kálar Nzyɛ̌m : Ejwán é Sáá

Lwǐb mé Nzyɛ̌m

¹ Nzyɛ̌m á líʼe nkɛ̌ʼ e mɨná gá ó, nye ódib nzɨ́ egbalá lɨ́ esú gá lɨ́ná. Sâ gwár, gwá di gá le ocwóó, lɨ́ ekpɛ́ɛ ó, mʉr ngwár ɨ́ sɔ́má yɨ́n ámû sû myɛ́na maá, nye ntɔ̂ʼ akǎ nî lɨ́ egbalá laá.

² Mɨná bé á be gá ó, sí jóʼǒ Mbɨambɨa Lɔ́ɔ jwɨʼ gwár e gwár e bimpám gá bíná. Sâ gwár, wé á bé abe byé e nyɔm, ebě, byé á bé abûʼla ɨ́ jɔʼ byé á jóʼo wé yɨ́.

³ Mɨná gá bɨɛ obûʼla ó dí egbala gâ, ebě, Nzyɛ̌m á lɛ́ɛ, dumo e bé ó: Ɨ́ nkpaa nyǎm nyaá, me á si káale ó: «Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!» Nzyɛ̌m damá lwib nó, syɛ́ɛ́ yé, yé á síe tyeetye ó, jɔʼ nyé á sîl ebono sí yɨ̂ʼ yɨ́.

⁴ Ebě, yê cɛmá ɨ́ yʉ́ʉ́ péh Mékaná mé Nzyɛ̌m, dumo e móhó nzaangbá ó: «Nzyɛ̌m á gbala syɛ́ɛ́ yé yɨ́yɛ̂h ó, ɨ́ móhó nzaangbá.»

⁵ Yúú péh Mékaná mé Nzyɛ̌m, yé ó: «Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!»

⁶ Ebě, lɔ̌b, wɨ́ tɨ̂ʼ tyeetye ó, bâʼ bʉ̂r, bé ógbala, bé e boo Nzyɛ̌m sɔ́má. Nó ó, bʉr o b'á nyɛɛ bi Mbɨambɨa Lɔ́ɔ, ó bé níʼee ɨ́ gúmó égbalá yaá bá, bé á bé agbala, ebě, bé á si sâ ebɨ̌h e Nzyɛ̌m.

⁷ Sá tɨ̂ʼ ó Nzyɛ̌m á ka baʼa tyêl gúú móhó nyé dí ejɨjébe ó, «mûh» wɨ́ yɨ́. Nye á si boo sâ nó, nye nzě lɛ́ɛ mɨ́ná gá lɔ̌b waá ɨ́ num mé David mpʉ bɨ̂h nyɛɛ cɛma yɨ́ ó: «Bɨ́n jóʼó twíí mé Nzyɛ̌m múh nɛ́ɛ: mʉr alelě léme.»

⁸ Yé bé Josué á si tô e bʉr bé, tó níŋle bé ɨ́ gúmó égbalá nó, lɛ́ɛ́, Nzyɛ̌m á bé akǎ lwib ɨ́ lɔ̌b móhó égbalá swîh.

⁹ Lɔ̌b, wɨ́ tɨ̂ʼ ntémé ó, bʉr o mé Nzyɛ̌m, bé ónî lɨ́ egbalá, laá e dʉ́ó é sábat.

¹⁰ Ebě, mʉr dí enî lɨ́ egbalá lé nyá, nyě gbalá bísyɛ́ɛ́ ó, jwɨʼ gwár e gwár e mpʉ̌ Nzyɛ̌m á gbala byaá byé ntémé yɨ́.

¹¹ Nó mɨná gbâʼ gá nkul lɨ́ esú lé énî ɨ́ gúmó bʉ̂r dí egbala yɨ́. Gwá di gá le ocwóó, ó mʉ̌r sá asâ ébɨ̌h e Nzyɛ̌m, nkʉ̂ duma sí mpʉ bímpám gá bíná byé á duma yɨ́.

¹² Lwǐb mé Nzyɛ̌m, yé ó sá dí kublakúbla yɨ́. Yé e nkul! Yé ntémé, yé ɨ́ bábla, laa pâsoŋ dí njebá myoo mipáʼ mímbá yɨ́. Ɨ́ jɔ̌ʼ Nzyɛ̌m dí elwib yɨ́, lwǐb yé, yé lɨ́ ekʉ́ bánǎ syɛ̂h bípúno, tó kumo ɨ́ mebɨ̌l, ntɔ̂ʼ pin bítíl bí nyʉ̂l ɨ́ mebʉó. Yé lɨ́ ekpâhlǎ gúmó léme ndu e sísǐm dí edira yɨ́. Yé lɨ́ epahle le egbâ mbɔ́ʼ ɨ́ miléme ndu e bijwɨʼ gá bíná.

¹³ Yé abe e yʉ́ʉ́ kwihá sɔ̂ʼ dí solá ɨ́ míh mé Nzyɛ̌m. Sá yɨ́yɛ̂h nyé á komlo yɨ́, yé ɨ́ ponó, ɨ́ nkɛŋlɛ̂m ɨ́ míh mé. Bíbyɛ̂h, byé ókar mínkar myɔ́ɔ́ ó, ɨ́ mpǒm nyé.

Yésʉs, ánɨ̂nɨ̂n njwɨ́ɨ opara gá wɨ́ná

¹⁴ Mɨná gá bé e ánɨ̂nɨ̂n njwɨ́ɨ opara: Yésʉs, Mwân mé Nzyɛ̌m. Nye á si ntaa jʉ́o, le ejwoo le baántɛ́n, tó di ɨ́ jʉ́o kʉ́. Nó, mɨná tôʼ gá dóló le ekǎm búʼó gá yɨ́ná.

¹⁵ Ebě, njwɨ́ɨ opara gá wɨ́ná, nye ó waá dí e nkul ejɨ̂ʼ nkóó e mɨná gá ɨ́ jɔʼ nyé dí ebee étyɛʼ gá lɨ́ná yɨ́ nyá. Nye á si bóblɔɔ mimbi mímyɛ̂h, jwɨʼ gwár e gwár e mɨná gâ; sâ gwár, nyɨɛ l'aduma, nkʉ̂ sâ syóm.

¹⁶ Nó, mɨná sîhlaa gá bǎʼ e né, tó pyâl pyáláa ɨ́ mecwɨ́ɨ́ mé jwɨ́ɨ́ yé. Mɨná pyálaa gá ɨ́ mpǒm nyé, abáawǒ sɔ̂ʼ, le ebúʼla ó, nyě dǐ ɨ́ mecwɨ́ɨ́ maá ó, lɨ́ esú ó, nye sâʼ bʉr mpam, le ejɨ̂ʼ bé nkoó. Mɨná bi gá mpam nyé ó, ɨ́ jɔʼ mɨ́ná dí ebuú jɨ gá nkɔ̌m nyé yɨ́.