Ebrœ̂ 3 - Kálar Nzyɛ̌m : Ejwán é Sáá

Nkʉ́ŋ mé Yésʉs, le waá mé Moyɨ̂z

¹ Bɨ́ɔɔ́ bɨ́h le okɛ́l bɨ́h dí egúmo e Nzyɛ̌m bá, mɨná gá ó bé á bi gá nkɔb mpwár: njɨ́blɨ́ Nzyɛ̌m á ntɨh mɨná gá, duho ɨ́ jʉ́o kʉ́ wɨ́. Jwɛ́ʼɛ́ɛ́ gá sɔ̂ʼ njɨ Yésʉs mpʉ nyé dí yɨ́: nye ó mʉr milʉ́mlʉ́ mé Nzyɛ̌m, báʼǎ be ntémé njwɨ́ɨ opara gá wɨ́ná mpʉ mɨ́ná dí ekam gá yɨ́.

² Nzyɛ̌m ó b'á tyêl Yésʉs ɨ́ dǐ njwɨ́ɨ opara gá wɨ́ná. Yésʉs, nye ó mʉr ebúʼlɔɔ, ɨ́ mpʉ̌ Moyɨ̂z á bûʼlɔɔ, nzě tyélɔɔ ɨ́ dǐ yé tʉ́ŋlʉ̌ mbɛ̌r bʉ̂r mé Nzyɛ̌m yɨ́.

³ Yésʉs nyɨɛ ó dí ejala e kûm ɨ́ buo buo, laǎ Moyɨ̂z, jwɨʼ gwár e gwár e mpʉ swîm mbɛ̌r dí ɨ́ buú gúmlɔɔ, laǎ mbɛ̌r wé, wé mʉr tɨ̂ʼ yɨ́.

⁴ Abe e mbɛ̌r dí e nkul edi, abe e swim. Tó kœb ó, Nzyɛ̌m ó b'á sumo sá yɨ́yɛ̂h.

⁵ Ɨ́ páʼ mé Moyɨ̂z, nye á be ó mʉr ebúʼlɔɔ ɨ́ nkǒ páʼ bísá bíbyɛ̂h bi dí tʉ́ŋlʉ̌ mbɛ̌r bʉ̂r mé Nzyɛ̌m bí. Nye á tyélɔɔ syɛ̂l mesâ ó, nye bôʼlaa sá yɨ́yɛ̂h Nzyɛ̌m á be ó, nye ólɛ́ɛ bʉ̂r yɨ́.

⁶ Tó kœb ó, Krîst nyɨɛ á si tyélɔɔ ɨ́ dǐ Mwân á jala le edǐ lʉ́ mbɛ̌r bʉ̂r waá nyá. Mbɛ̌r bʉ̂r waá, wé gúmó ntémé ó e né. Mɨ́ná bé ódi gá e mpûʼla ɨ́ miléme, le ekʉ́ gʉ́ǎ sá mɨ́ná dí ebúʼla gá yɨ́, abáawǒ sɔ̂ʼ nó, lɛ́ɛ́, mɨná gá ó dí bʉ̂r ó mbɛ̌r bʉ̂r wé waá.

Lɨ́ enî ɨ́ gúmó égbalá mé Nzyɛ̌m

⁷ Sɨ́ǎ yaá ó, Sísǐm mé Nzyɛ̌m dí elɛ́ɛ ɨ́ Mekaná mé Nzyɛ̌m ó: «Bɨ́n sí jóʼo twíí mé Nzyɛ̌m mûh nɛ́ɛ:

⁸ mʉr asâ élele é lʉ̂ mpʉ bímpám bín á sâ ɨ́ jɔʼ byé á gbɔba e Nzyɛ̌m, lɨ́ ebóblo nyé ɨ́ lʉá yɨ́.

⁹ Bimpám bín, byé á si bóblo me gʉ̂, lɨ́ esáa égʉ́ǎ nkʉ̂ me ó dí mpǎŋ Nzyɛ̌m. Bé á si bee bisyɛ́ɛla byâm mimbû mekám ménâ.

¹⁰ Mpʉ bé á bóblo me nó yɨ́, me á si jóʼo ebúʼ e myǎ bʉ̂r waá. Nó ó mé á lɛ́ɛ ó: Bé lɨ́ eboó tô le edîm. Bé dína lɨ́ ekʉ́ jéʼe édû nzɨ́ mé dí etɨ́e bé nyɨ́.

¹¹ Ɨ́ nkpaa nyǎm, me nzě káale ó: Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!»

¹² Bɨ́ɔɔ́ bâm! Okɛ́l bâm! Gwá di gá le ocwóó, ó mʉr ɨ́ sɔ́má yɨ́n ayɨ́ be e lémé dí ɨ́ lele lɨ́ ebúʼla wɨ́. Nyě sá agbɔba e Nzyɛ̌m dí kublakúbla nyá.

¹³ Dyɛ́m bɨ́n dína mûh sɔ́má yɨ́, yé mbɨa ó, bɨ̌n dwîdweelaa melɨ́ páʼ nyɨ́n móhó wɨ́wɛ̂h. Sá tɨ̂ʼ ó mísyóm, myé óbe, alɨl bɨ́n miléme, nkʉ̂ dímle nyʉ́ʉ́ mʉ̂r ɨ́ sɔ́má yɨ́n ɨ́ nzɨ̌ mikóo yɨ́.

¹⁴ Sá dí tɨ̂ʼ yɨ́, yé ó: mɨ́ná ódi gá ɨ́ bidǐ gá bíná, apʉʼa tɨ̂, tó pyâl ɨ́ mesíé nó, go ó, mɨná gá be ó bʉr ó njoo mé Krîst ó tɨ̂ʼ yɨ́.

¹⁵ Ebě, yê cɛmá ó: «Bɨ́n jóʼó twíí mé Nzyɛ̌m mûh nɛ́ɛ: mʉr asâ élele é lʉ̂ mpʉ bímpám bín á sâ ɨ́ jɔʼ byé á gbɔba e Nzyɛ̌m yɨ́.»

¹⁶ Onzé bé á jóʼo twíí mé Nzyɛ̌m, nzě gbɔba e né bá? Yé á be ó bʉr bɨ́bɛ̂h bé á duhǒ sí Egɨ̂ptɛn ɨ́ sɔ́má mé Moyɨ̂z bá.

¹⁷ Ɨ́ mimbû mekám ménâ myaá, Nzyɛ̌m á jóʼo ebúʼ le onzé? Nye á jóʼo ebúʼ ó e bʉr o b'á sâ syóm bá. Bɨ́haá ó b'á dwe, ntɔ̂ʼ debe ɨ́ lʉá e lʉá wɛ̂h.

¹⁸ Nzyɛ̌m á káale ó: «Bʉr ópǎ bee gá nkʉ̂ bé ókǎ nî lɨ́ egbalá lâm!» Bʉr o nyé á lwib ɨ́ lɔ̌b wɔ́ɔ́ bá, bé onzé? Bé ó baá bé á sâ nye ebɨ̌h bá!

¹⁹ Sá tɨ̂ʼ ó mɨ́ná dí ebee gá ó, bé á bé anî lɨ́ egbalá lé yɨ́, ebě, bé á bé adyɛ̂ʼwo e né.