Ebrœ̂ 2 - Kálar Nzyɛ̌m : Ejwán é Sáá

Nzyɛ̌m, nyɨ́ tíʼ mɨ́ná gâ

¹ Sɨ́ǎ yaá ó dí ó, milɛ́ʼlá bé á nyɛɛ dwe mɨná gá mí, mɨná díʼee gá ɨ́ puuu lɨ́ egwá jôʼlo myé, lɨ́ esú ó, mɨná sá akǎ tyenɔɔ gá díbé tíe, jɨ́bla.

² Mɨná bé lɨ́ egʉ́a gá ó, mpáŋla bééngeles, bé á nze e né nyɨ́, á be ó e nkul. Mʉr nyɨnyɛ̂h á gbah metié, le waá á sâ mé ajóʼo nyá, á si bi myɛ́na mé á jala le ebɨ̌h lé laá má.

³ Mɨná gá bɨɛ bé á be ó sí ntɨhɔɔ̌ lɔ́ɔ́ twiʼ dí elaa mpáŋla bééngeles bé á túno nyɨ́. Mʉr á nyɛɛ lɛ́ɛ lɔ́ɔ waá nyá, á be ó Tî Yésʉs mʉr tɨ̂. Ntémé, bʉr o b'á jóʼo nye bá ó b'á lɛ́ɛ mɨná gá ó, wé ó lɔ́ɔ dí e nkul wɨ́. Á nó, mɨ́ná ópyêh wé nó, mɨná bé okǎ swab gá nkoó?

⁴ Nzyɛ̌m, nyɨ́ nzě boʼlo ntémé ó, lɔ́ɔ waá, wé ó tyeetye, ebě, nye á si ntɨh bisyɛ́ɛla bi nkûl, le byaá bí ékâm, le mesimá mimbi mimbi, kumǒ kumáa e mindwéá Sísǐm wé dí entɨntɨh mɨ́ná gá mí, dû mpʉ wé dí ekpɛl yɨ́.

Mɨná kʉ́ dû gá ó, mebo mé Yésʉs

⁵ Mpóʼǒ Nzyɛ̌m ngá sûʼlǎ tyêl, nyaá bɨ́h dí elwib, dumo e nye nyɨ́, óbe ó ɨ́ jwɨ́ɨ́ nyʉ́ʉ́ mʉ̂r. Ntʉ bééngeles nyé á tyêl lɨ́ esú lé éjwɨ́ɨ mpóʼo nyaá.

⁶ Nyʉ́ʉ́ mʉ̂r á cɛma ɨ́ yʉ́ʉ́ péh Mékaná mé Nzyɛ̌m ó: «Mʉr, nye yé, ó go tóŋlaa nye? Mwân mé mʉr, nye yé, ó go tírwaa e né?

⁷ Ɨ́ mâ jɔʼ, go á si sul nye sí. Beéngeles, bé á si nyɨ̂n e dúu, laa nyé bá tîtííǎ. Píe tɨ̂, gʉ́ kǎ dil nyé káráá jwɨ́ɨ ɨ́ lʉ̂, lɨ́ edwe nyé kûm ndu e dúu.

⁸ Go á si gbâ sá yɨ́yɛ̂h ɨ́ jwɨ́ɨ́ yé, sí mebo mé.» Mpʉ̌ Nzyɛ̌m mû sí syɛŋ bísá bíbyɛ̂h, gbâ byé ɨ́ jwɨ́ɨ́ yé yɨ́, yé abe e sâ gwár dí abě sulá sí ɨ́ jwɨ́ɨ́ yé yaá. Tó kœb ó, ɨ́ báánâ, mɨná dína apǎ bee gá ó, bíbyɛ̂h, bí sîl égbáŋɔɔ ɨ́ jwɨ́ɨ́ yé.

⁹ Sá mɨ́ná dí ekʉ́ gwá bee gá yɨ́, yé ó: ɨ́ mâ péh jɔʼ, Nzyɛ̌m á si nyɛɛ sul Yésʉs sí, beéngeles bá laa nyé ɨ́ dúu. Píe tɨ̂, nyɨ́ kǎ dil nyé káráá jwɨ́ɨ ɨ́ lʉ̂, lɨ́ edwe nyé kûm ndu e dúu, ebě, Yésʉs á si sia e mitúú, ntɔ̂ʼ dwe. Ɨ́ mbi waá ó Nzyɛ̌m á cwɨ́a e bʉr bɨ́bɛ̂h yɨ́, lɨ́ esâ ó, Yésʉs dwêʼ lɨ́ esú lɔ́ɔ́.

¹⁰ Sá yɨ́yɛ̂h, yé duho ó kwá mé Nzyɛ̌m. Nzyɛ̌m á kuho sá yɨ́yɛ̂h ó, ɨ́ kpɛ̌l yé nye mʉr tɨ̂. Nzyɛ̌m á si gwɨ̂m etô e buobuo bwán bé, tô tóʼ, tó pyâl pyáláa ɨ́ diá kûm. Sá tɨ̂ʼ ó yé á jala ó, Yésʉs táaraa ekomlo bé nzɨ̌ ebǐ twiʼ, le ntémé ó, nye díʼee lwɨ́ŋlá e nkul etíʼ bé, duho ɨ́ mitúú nyé á sia e myé mí yɨ́.

¹¹ Yésʉs, mʉr dí epubo bʉ̂r nyá, bé e bʉr nyé dí epubo bá, bé e boo nɔ́ɔ́ bɨ́bɛ̂h, bé mû ó bʉr o b'á duhǒ gúmo gwár bá. Sá tɨ̂ʼ ó Yésʉs dí ajóʼo sôn lɨ́ ejébe bé «bɨ́ɔɔ́ bâm» yɨ́.

¹² Ɨ́ yʉ́ʉ́ jɔʼ, nye á lɛ́ɛ, cɨɨ ɨ́ nzɨ̌ ogwíha o mílɔ̌b ó: «Me ólɛ̂ʼle bɨ́ɔɔ́ bâm díé lô. Me ótyɛ̂b témé bʉr o gó á syɛŋ bá, mé odwe gó kûm ɨ́ mejéme.»

¹³ Nye ntémé, nye lɨ́ ebáʼǎ lɛ́ɛ ó: «Mɛm, me ódyɛ̂ʼwo e Nzyɛ̌m.» Nye ntémé, nye á lɛ́ɛ ó: «Me ó nyâ, bɨ̌h e bwán Nzyɛ̌m á dwe me bá.»

¹⁴ Bwán nyé dí elwib, dumo e bé bá, bé e bipúno ndu e bidwehé. Jwɨʼ gwár yaá ntémé ó Yésʉs á tíʼe yɨ́. Nye á si dwe lɨ́ esú ó, nye têʼlaa mʉr á bɨbe e nkul eswie nyá. Mʉr waá, nye ó sɔ́ŋ meleme.

¹⁵ Nye á dwe ntémé ó, nye pɛ́ʼɛɛ mɨná gá lɨ́ okómó. Ebě, mɨná bé á nyɛɛ lɛŋ gá bicwiʼ gá bíná ó, kɛ́ʼá lɨ́ okómó. Mɨná bé á didi gá ɨ́ menkara mé ókómó waá ó, ɨ́ kpɛ́ɛ́ éswie.

¹⁶ Ebě, lɨ́ otyeetye, nye á bé anze bééngeles ɨ́ nkɔ̌m. Nye á nze kɛm yɨ́ɛ ó, bwá bé ónta mé Abraham.

¹⁷ Sá tɨ̂ʼ ó yé á jala ó, nye díʼee kwahaá mpʉ bɨ́ɔɔ́ bé, ɨ́ mipáʼ mímyɛ̂h yɨ́. Nye á nwɨɨla e mɨná gá ó, lɨ́ esú ó, nye nkʉ̂ cwɨ́a e mɨná gá, le edi njwɨ́ɨ opara mɨ́ná ókʉ́ bûʼla gá nyá. Nye ó jálá le eséa ɨ́ páʼ bísâ bi dí edwɛ̂ʼ Nzyɛ̌m bí. Nye ó mʉr á dwe, búra le misyóm mí bʉ̂r bé, le eleʼě Nzyɛ̌m ɨ́ nkpaa nyé nyá.

¹⁸ Nyě e nkul ekɛm bʉ̂r ɨ́ bijɔʼ bé dí entaa mébʉ́blá bí, ebě, nye mʉr tɨ̂ʼ á be ó sí sia e mitúú ɨ́ jɔʼ nyɨ́ɛ á bóblɔɔ yɨ́.