Ebrœ̂ 13 - Kálar Nzyɛ̌m : Ejwán é Sáá

Mpʉ mɨ́ná jálá le esâ ó, Nzyɛ̌m kpɛ́lɨɨ mɨná gá yɨ́

¹ Mʉr akâr gá ekpɛla páʼ nyɨ́n, mbǐ kpɛ̌l dí páʼ bɨ́ɔɔ́ e bɨ́ɔɔ́ ɨ́ Krîst wɨ́.

² Mʉ̌r sá asâ épɨ̂h lɨ́ enʉa ójwóo o dí epyâl kwá nyɨ́n bá mbɨ̂mbɨá. Bʉ́ʉ́ bʉ̂r, bé á si nʉa ojwóo mbɨ̂mbɨá, bé ntɔ̂ʼ kœb ó, nkúná yé á be ó beéngeles, bɨ́ɛ l'agʉ́a.

³ Tʉtoŋlaa gá mimbʉʼ: diʼee gá mpʉ̌ sá lɛ́ɛ́, bɨ̌n le onɔ́ɔ́ bɨ́bɛ̂h ó dí ɨ́ mbʉʼ. Toŋlaa gá bʉr o dí esia e mitúú bá, ebě, bɨ̌n bé lɨ́ egʉ́ǎ mpʉ bíntɨ́ʼá dí ɨ́ kpaa ɨ́ nyʉ̂l yɨ́.

⁴ Bʉr, bé ɨ́ jala le edwe mímbɛ́á mí bʉ̂r dúu. Syɛ́ɛla mpîr, yé ajala le esyɛ́ɛlɨ̌ súm mímbɛ́á mí bʉ̂r dí esyɛŋa yɨ́. Gʉ́ŋáá gá ó, Nzyɛ̌m ótíʼe ósyɛ̂l o médyɛ̂n, bé le osyɛ̂l o bímolá milɔ̌b.

⁵ Mʉ̌r sá alâʼ nyʉ̂l nyé lɨ́ enkpɔɔ é mɔnɨ́. Sohaa gá bím bísá bɨ́n dí ebi bí, ebě, Nzyɛ̌m á lɛ́ɛ ó: «Mé abe e nkul ejɨha gô, nkʉ̂ líʼe gó ɨ́ ntɛ̂ʼ.»

⁶ Náǎ ntémé ó mɨ́ná dí elɨl gá búʼó ɨ́ miléme, ntɔ̂ʼ lɛ́ɛ ó: «Dâ ó dí kɛma wǎm. Me ákóʼó kpɛ́ɛ̌ sɔ̂ʼ. Yé mʉ̂r ósâ mé yɨ́?»

⁷ Sísímsáá gá otyɛ̂b bé ésôʼ bɨ́n, baá bé á lɨlɛ́ɛ bɨ̌n lɔ́ɔ́ mé Nzyɛ̌m bá. Símsáá gá kʉ̌ tyen wɔ́ɔ́ le ndumló bícwiʼ byɔ́ɔ́. Dyɛ́ʼwáá gá e Nzyɛ̌m mpʉ bé á sâ yɨ́.

⁸ Mpʉ̌ Yésʉs-Krîst á bě kʉ̌ʼ yɨ́, mpʉ yaá ntémé ó nyé dí mûh. Nye ódi ntémé ó njɨ nó, njʉ̌m dǐ e njʉ̌m dǐ.

⁹ Gwá di gá le ocwóó. Sá abîr gá ó, nyʉ́ʉ́ mʉ̂r mɛ́rɨɨ bɨ̌n lɨ́ okómó ɨ́ nzɨ̌ metwɨ́ɨ́ méswîh nyé dí edwe bɨ́n má. Ncwɨ́ncwɨ́a mé Nzyɛ̌m ó dí egbâ bʉ̂r pîm ɨ́ búʼó. Yé mbɨa ó, bɨ̌n bíʼee nkul tɨ̂. Mede bé dí elɛ́ɛ ó, mʉr, nye ɨ́ jala le ede lɨ́ esú lé édwě Nzyɛ̌m dúu tɨ̂ʼ má, mé abe e nyɔm ɨ́ páʼ bʉ̂r o dí ede mé bá.

¹⁰ Mɨná gá bɨɛ ó dí le alatâr mé Nzyɛ̌m. Bʉr o dí eséa ɨ́ mbɛ̌r kán mé Nzyɛ̌m bá, bé abe e nkul enze lɨ́ alatâr waá, nkʉ̂ de méde mû kɛlá tɨ̂ʼ má.

¹¹ Njwɨ́ɨ opara nyɨnyɛ̂h sɨ́sá ó, nî ɨ́ ntɔ́ɔ dí ɨ́ buú buǒ tí nyɨ́. Nyě ní tɨ̂ʼ ó e metié me tír nyé á tíʼe nyá. Kuó tír wé mʉr tɨ̂ʼ wɨ́ɛ, wé pɛʼɔɔ ó, nkana, tó díʼɔɔ ɨ́ nkanǎ kʉ̌l.

¹² Yésʉs á kʉ be ntémé ó nó. Nye á to sia e mitúú ó, ɨ́ nkanǎ kʉ̌l. Nye á sâ nó ó, nye púbaa kúl bʉ̂r yé e metié mé nye mʉr tɨ̂.

¹³ Sá tɨ̂ʼ ó mɨ́ná jálá le eduho tʉ́ŋlʉ̌ nkana yaá yɨ́. Mɨná dúhaa gá tɨ̂, tó pyâl nkǒ Krîst dí ɨ́ nkanǎ kʉ̌l yɨ́, mɨná gá le onɔ́ɔ́ nkʉ̂ pyaŋɔɔ̌ jwɨʼ gwár e gwár.

¹⁴ Ebě, ɨ́ sí yɨ̂, mɨná bé abe gá e nkana dí edǐ njʉ̌m dǐ e njʉ̌m dǐ yɨ́. Mɨná bé lɨ́ esáa gá nkana swîh, yaá dí enze yɨ́.

¹⁵ Mɨná dwêʼ gá Nzyɛ̌m kûm jɔʼ yɨ́yɛ̂h. Dwéʼ gá nye ndwéá waá, lɨ́ esímsǎ mpʉ̌ Yésʉs á dwe twiʼ yé yɨ́. Lɛ́yɨ́ɨ́ gá bʉr mpʉ díé lé dí e nkul yɨ́. Lɛ́á waá, wé ntémé, wé ó sá dí edwe nyé kûm yɨ́.

¹⁶ Sáʼ gá bʉr oswîh embɨa. Súʼáá gá bʉr e mebi mɨ́n. Mʉ̌r sá ajɨhǎ syɛ́ɛla yaá, ebě, yé ó ndwéá Nzyɛ̌m dí ebeě mbɨ̂mbɨá wɨ́.

¹⁷ Jóʼáá gá otyɛ̂b bé ésôʼ bɨ́n. Bɨ̌n e tyé ɨ́ jwɨ́ɨ́ yɔ́ɔ́. Ebě, bé ó dí ebaʼle mísísǐm mín. Bé ntémé ó ngá tó lɛ́ɛ̌ Nzyɛ̌m mpʉ bé á séa lɨ́ esú lɨ́n yɨ́. Bɨ́n sá bé mejóʼo nɛ́ɛ: bé oséǎ syɛ́ɛ́ yɔ́ɔ́ e bisʉhʉʉ. Yé bé abe nó wá, bé ójóʼo mébúʼ. Syɛ́ɛla yaá, abe bɨ́n e nyɔm.

¹⁸ Sáʼ gá sɨ́n ɨ́ minjɨʼla ɨ́ lɔ̌b wɨ́h. Ɨ́ wɨ́h pâʼ, bɨ̌h bé lɨ́ egʉ́a ó, bɨ̌h dú ó, kʉ̌ tyen dí tîtyěl wɨ́. Bɨ̌h bé lɨ́ ekʉ́ gʉ́a ntémé ó, mipahlá mílémé míh, myé ó njɨ myaá mi dí ɨ́ pyɛɛɛ mí.

¹⁹ Sá mé dí edî nɨ̌, yé ó, bɨ̌n jɨ̂ʼlaa e Nzyɛ̌m, ó nye kámaa ó, me báʼa nzě kœb bɨ́n kám e kám.

²⁰ Me lɨ́ ejɨʼla e Nzyɛ̌m, mʉr dí egbâ mɨ́ná gá mepyɛbla ɨ́ miléme, waá á pɛh «Mbɔʼlʉ bintemě nɨ́nɨ́ɨ́», Tî gá wɨ́ná Yésʉs nyá. Ɨ́ tɨ̂ʼ, Nzyɛ̌m á sâ ó, saá ngá dǐ njʉ̌m dǐ e njʉ̌m dǐ nyɨ́, ɨ́ nzɨ̌ metié mé.

²¹ Mě jɨʼlá e né ó, nye tyɛ́bɨɨ bɨ̌n ɨ́ miléme, ó bɨ̌n sâʼ syɛ́ɛla nyé dí ebeě mbɨ̂mbɨá yɨ́, mɨná nkʉ̂ lóŋlo gá gwɨ́má yé ɨ́ nzɨ̌ mé Yésʉs-Krîst, dí e kûm njʉ̌m dǐ e njʉ̌m dǐ nyá. Amɛn!

²² Bɨ́ɔɔ́ bâm! Okɛ́l bâm! Me cɛmá bɨ́n ó, bɨ̌n bíʼee nkul ɨ́ miléme. Me cɛmá ó, mekǎn abuo. Nó ó, mě jɨʼlá e bɨ̌n ó, bɨ̌n dûhwaa mekǎn maá lɨ́ ejóʼo!

²³ Gʉ́ŋáá gá ó, mɨ́ɔɔ́ gá wɨ́ná Timotɛ̂, nye mû ó sí pʉʼa ɨ́ mbʉʼ. Nó, nyé sí pyâl mé wâʼ nó, bɨ̌h e né, bé onze ɨ́ jɔʼ mé ónzě bee bɨ́n yɨ́.

²⁴ Sohaa gá otyɛ̂b bé ésôʼ bɨ́n bɨ́bɛ̂h, bé e bʉr o mé Nzyɛ̌m oswîh bɨ́bɛ̂h. Obûʼla ó sí Italî, bé lɨ́ esoho bɨ́n.

²⁵ Nzyɛ̌m sʉ́ʼoo bɨ̌n óbɛ̂h metyɛʼ me mpóm.