Ebrœ̂ 12 - Kálar Nzyɛ̌m : Ejwán é SááNzyɛ̌m, nye lɨ́ etirwo e mɨná gâ 1 Ɨ́ páʼ gá wɨ́ná, mɨná gá bé ó tʉ́ŋlʉ̌ bʉr baá. Bé lɨ́ ebɔma mɨ́ná gá ɨ́ nká, lɨ́ eboʼlo mílɔ̌b mé Nzyɛ̌m. Nó ó, mɨná líʼaa gá mimbeʼ médile mímyɛ̂h le syóm dí ekwable mɨ́ná gá wɨ́ wɨ́wɛ̂h. Mɨná sâʼ gá bíhwó lɨ́ eswim míkám, tó pyâl ɨ́ súm Nzyɛ̌m á lyáŋle njɨ ésíé é kám yɨ́. 2 Míh gá mɨ́ná, mé dwɛ́ʼɛɛ sɔ̂ʼ njɨ Yésʉs, ebě, nye ó b'á kar nzɨ̌ búʼó. Nye ntémé ó b'á swâhle nye. Nye á kam ó, nye síaa e mitúú, nye tyélɔɔ ɨ́ lɨ́ kʉ́, jʉ́ŋɔɔ. Nye á si pyêh sôn mʉ̂r dí ebɛb ɨ́ mbi éswie laá nyɨ́. Nye á kam ó, nye dwêʼ nó ó, nye nkʉ̂ bi bísʉhʉʉ̌ Nzyɛ̌m á boo komo nye bí. Ɨ́ báánâ, nye mû ó ɨ́ mbó éjʉ́m mé Nzyɛ̌m Sɔ́ŋ ɨ́ mecwɨ́ɨ́ mé jwɨ́ɨ. 3 Símsáá gá nye. Bɨ̌n e símsá mpʉ ósyɛ̂l o mísyóm bé á cɨ nye mekǎn mé ébébe, nyɨɛ njɨ lɨ́ edûhwo bé yɨ́. Sísímsáá gá nó, bɨ̌n nkʉ̂ be, akâr mítúú, nkʉ̂ tyɛʼ. 4 Mpʉ bɨ́n dí elwímla e njwɨr ébébe wɨ́n yɨ́, bɨ̌n bé apǎ gwá lwímla e wé mbɨ̂mbɨá. Sá tɨ̂ʼ ó étó é métié lɨ́n, dína apǎ tɔ́ba sí yɨ́. 5 Paá bee gá yʉ́ʉ́ sɔ̂ʼ ó: bɨ̌n bɨ́ jɨha mélɨ́ Nzyɛ̌m á dwe mɨná gá má. Nye á dwe bɨ̌n melɨ́ maá ó, ebě, bɨ̌n bé ó bwán bé. Nye á lɛ́ɛ ó: Mwân wǎm, jɔ̌ʼ Dâ Nzyɛ̌m mû lɨ́ esɨ̂ʼ gó lʉ̂ yɨ́, sá asâ épɨ̂h. Jɔʼ nyé mû lɨ́ edwe gó mebě yɨ́, ajóʼo étyɛʼ e nyʉ̂l. 6 Ebě, Dâ Nzyɛ̌m sɨ́ʼ lʉ̂ ó, mʉr nyé dí ekpɛl nyá, waá nyɨnyɛ̂h nyé dí etɨ̂ʼ bɨr ó: «Nyâʼ, nye ó mwân wǎm» nyá. 7 Nó ó, dúhwáá gá bintɨ́ʼá byaá. Byé tɨ́aa bɨ̌n mpǎŋ twiʼ. Mpʉ̌ Nzyɛ̌m dí esâ bɨ́n nó yɨ́, yé ó ebe bɨ́n dí bwán bé. Sɔ́ŋ bé asɨ̂ʼ mwân lʉ̂ nó, go ó, nyɨ́haá, nyé abe mwân mpâ. 8 Nzyɛ̌m titirwo e bwán bé bɨ́bɛ̂h ó nó. Nyé bé asɨ̂ʼ bɨ́n milʉ̂ nó, go ó, bɨ̌n bé abe bwán bé ó tɨ̂ʼ yɨ́. Lɛ́ɛ́, bɨ̌n bé ó bwân o b'á byɛ̂l ɨ́ mbɛ̌r bá. 9 Yé e yʉ́ʉ́ sɔ̂ʼ: ɨ́ jɔʼ ósɔ́ŋ gá bɨ́ná, bé á byâ mɨná bá, sɨ́ʼ mɨ́ná gá milʉ̂ yɨ́, mɨná sɨ́sá ó, dwe gá bé dúu. Nó ó, Sɔ́ŋ gá wɨ́ná á tíʼ mɨná gá misísǐm nyá, nyé ósɨ̂ʼ mɨ́ná gá ntémé milʉ̂ nó, nzê mɨná bé ajala le edwe gá nye dúu ɨ́ buo buo ɛ̌? Mɨ́ná sí sâ gá nye mejóʼo nó, lɛ́ɛ́, mɨná bé ótíʼe gá ɨ́ nzɨ̌ mejóʼo maá. 10 Osɔ́ŋ gá bɨ́ná, bé á jaa sɨ̂ʼ mɨná gá milʉ̂ ó, njɨ ɨ́ mâ jɔʼ. Bé á si bee embɨa lɨ́ esâ mɨ́ná gá nó. Nó, Nzyɛ̌m Sɔ́ŋ gá wɨ́ná nyɨɛ, nyě jaá sɨ̂ʼ mɨ́ná gá milʉ̂ ó, njɨ lɨ́ esú é nyɔm gá wɨ́ná. Nyě sá nó ó, mɨná nwɨ́ɨlaa gá e né, le edi bʉ̂r o dí tí bá, mpʉ nyé dí yɨ́. 11 Jɔʼ mɨ́ná dí edweŋɔɔ gá bintɨ́ʼá byaá yɨ́, yé ɨ́ kpaa ɨ́ léme, anwɨɨla ó, yé ó sá ésoho. Jɔ̌ʼ túú waá ká laa yɨ́, bʉr o dí egʉ́ǎ sâ dí tɨ̂ʼ yɨ́ bá, bé ntɔ̂ʼ kǎ gʉ́a ó, nkúná wɨ́ komlo bé miléme. Bé mû kǎ lîʼ le esâ ó, njɨ bisyɛ́ɛla bi dí tîtyěl bí, bi ntémé mepyɛbla tɨ̂. 12 Yé bé nó wá, bɨ̌n e gwá lɨl mébó mɨ́n me mû sí jeʼe má. Bɨ̌n e dúhwó élɨl mébóó mɨ́n me mû mindyɛ́má má. 13 Bɨ̌n e gwá komlo ménzɨ̌, tyêl mé ɨ́ lîm, ó mekʉ̌ me dí e bidyɛ̂m má, mé sá akǎ piha. Bé tíʼaa yɨ́ɛ tíʼáa. 14 Sáʼ gá sɨ́n lɨ́ etíʼe ɨ́ mepyɛbla, páʼ nyɨ́n e bʉr bɨ́bɛ̂h. Sáʼ gá sɨ́n ntémé lɨ́ edi bʉ̂r o dí egúmo e Nzyɛ̌m, baá o dí tí bá. Mʉ̂r óbe, abě tí nó, nye ákóʼó beě Tî Yésʉs. 15 Gwá di gá le ocwóó, ó mʉ̌r sá abɔ́ʼa e Nzyɛ̌m dí e mpam nyá. Kaalé dí ɨ́ dwie dwie wɨ́, wé sá apâh bíntoʼdu, ntɔ̂ʼ lœʼ bʉ̂r ɨ́ buo buo ɨ́ míh mé Nzyɛ̌m. 16 Gwá di gá le ocwóó. Mʉr asâ bímolá. Mʉ̌r sá asâ nkěh ɨ́ nkǒ páʼ mílɔ̌b mé Nzyɛ̌m ɨ́ mpʉ̌ Esô á sâ yɨ́. Nye á si dwɛ́na dǐ tʉ́l yé, dwe ntwóm, lɨ́ esyɛ́ɛla yé lɨ́ esú lé énʉa mâ kǎr méde! 17 Píe tɨ̂, nye nzě kǎ kpɛl ó, sɔ́ŋ syɛ́yɨɨ nye metyéelé, ó nye líʼɨɨ e bilíʼé bí sɔ́ŋ wé. Bɨ̌n bé lɨ́ egʉ́a ó, sɔ́ŋ á si bene esâ syɛ́ɛla yaá. Esô mʉr tɨ̂ʼ á si kʉ jɨ ɨ́ jɨ jɨ jɨ, sâ gwár, nye á bé akǎ be e nkul edwirǎ léme, nkʉ̂ bi métyɛʼ me mpóm maá ɨ́ lɔ̌b myɛ́ɛlé mé maá. 18 Gúmó bɨ́n tyɛ́b ɨ́ míh mé Nzyɛ̌m yɨ́, yé abě mpʉ écwɨ̂ʼ e dí bɛ̌m mɛ́rɔɔ e mebô lɨ́, gúmó bʉ̂r o b'Ɨ́zraɛ̂l, bé á di mélú mé épíhe yɨ́. Bé á si bee siʼe yé á dúo tɨ̂ʼ yɨ́, bee ntémé edúrʉ́ʉ́ ɨ́ gúú pâʼ, lɨ́ɛ abe e bá myɛ́n tɨ̂. Bé á si bee ntémé nkúo lɨ́ ekwoolo. 19 Bé á si jóʼo lwǐb sébé ndu e twíí mé Nzyɛ̌m. Jɔʼ bé á jóʼo twíí nyé yɨ́, bê nzě jóʼo bʉ́á, bê nzě jɨʼla e né ó, nye ayɨ́ kǎ báʼǎ cɨ bé lʉ́ʉ́ ékǎn, 20 ebě, sá nyé á lɛ́ɛ bé yɨ́, yé á si ntaa bé ɨ́ nkul. Nye á lɛ́ɛ e bé ó, nkʉ̂ mʉr, nkʉ̂ tír kúná le ecwɨ̂ʼ laá nó, bé e lúmó nyé mekóʼ, nye e dwê. 21 Sá bé á bee yɨ́, yé á be ó sí gbâ bé ekɛ̂n ɨ́ nyʉ̂l. Moyɨ̂z, nye ó: «Me lɨ́ ebuú sâʼ le ejóʼo bʉ́á.» 22 Bɨ̌n bɨɛ, bé abe nó. Bɨ̌n mû ó sí sîhle kúnókúno le ecwɨ́ʼ é Síon. Yé ó gúmǒ nkana mé Nzyɛ̌m dí kublakúbla nyá dí yɨ́. Yé ó nkanǎ Yerʉ́zalɛm, yaá dí ɨ́ jʉ́o kʉ́ yɨ́. Beéngeles ɨ́ buo buo, bé ó tɨ̂, abe e tólɔ́ɔ. Bé ɨ́ nzɔɔ sʉhʉʉ. 23 Bɨ̌n mû ó bǎʼ e gwɨ́hlá médwéʼé mé bwán mé Nzyɛ̌m. Míé mɔ́ɔ́, mé ó micɛmá ɨ́ jʉ́o kʉ́. Bɨ̌n bé á si sîhle bǎʼ e Nzyɛ̌m Tîʼ milɔ̌b, mʉr ngá pahle bʉ̂r bɨ́bɛ̂h nyá. Bɨ̌n bé á si pyâl gúmó ótîtyěl o bʉ̂r dí yɨ́. Bé mû ó lɨ́ etíʼe mbɨ̂mbɨá, ntinɨ̂ e ntinɨ̂. 24 Bɨ̌n bé á si nze kwá mé Yésʉs, mesaádɔm á sâ edwán é sáá páʼ gá nyɨ́ná e Nzyɛ̌m nyá. Bɨ̌n bé á si pyâl, cɨɨ ɨ́ nzɨ̌ metié mé nyé á pubo bɨ̌n e mé má. Metié mé maá jaá lwilwib ó, njɨ mekǎn me dí ɨ́ mbɨa má, laa maá Ábɛl nyɨɛ á cɨ má. 25 Nó, gwá di gá le ocwóó, ó bɨ̌n sá abene mʉ̂r mû lɨ́ ecɨ̂l bɨ́n nyá. Ɨ́ mimbú mí píhe, bé á si bene ejóʼo mʉr á nze ɨ́ sí yɨ̂ʼ nyá, akpɛl éjóʼo ɨ́ jɔʼ nyé á boo lɛ́ɛ bé sá nyé óntɨh bé yɨ́. Jɔʼ yé á ka pyâl yɨ́, bé ntɔ̂ʼ sáa ékɨ̂ŋ ntɨ́ʼá. Yé á bé akǎ bána. Mʉr á nze ka lwib e mɨná gá nyá, nyɨ́haá, nyé twíí, nye á duho ó kʉ́. Mɨ́ná bé óbene gá lɔ́ɔ́ wé nó, nzê mɨná bé ókɨ̂ŋ gá ntɨ́ʼá tɨ̂ʼ yɨ́ɛ ɛ̌? Nzyɛ̌m pǎ nyɛɛ́ ntɨ̂ʼ bímpám gá bíná ɨ́ lɔ̌b ajóʼo wɔ́ɔ́, á dwɛʼra e mɨná gá bɨɛ! 26 Ɨ́ mimbú mí píhe, twíí nyé, nye á be ó sí pɨ̂ʼ sí. Nó ó, ɨ́ báánâ, nyɨ́ dwe nkɛ́ʼ. Nye ó: «Me óbáʼǎ pɨ̂ʼ sí, kala le jʉ́o, le ejwoo le baántɛ́n ɨ́ sʉʼ gwár.» 27 Mpʉ nyé á lɛ́ɛ ó, nye ópɨ̂ʼ byé ɨ́ sʉʼ gwár yɨ́, nó yé lɛ́ʼlé ó, bisá nyé á komlo bí, byé ópɨ̂ʼla; byé odîm. Sá dí ɨ́ píʼi, ɨ́ sɨ́ŋ, apɨ̂ʼla yɨ́, yɨ́haá ó ngá lîʼ. 28 Ɨ́ tɨ̂, mɨná lɛ́yɨɨ gá Nzyɛ̌m henárá, ebě, nyɨ́ níŋle mɨ́ná gá ɨ́ mpóʼo nyé dí ejwɨ́ɨ nyɨ́. Mpóʼo nyé, nyé abe e nkul epɨ̂ʼla. Mɨná dwêʼ gá nye kûm, dwáawo nyé, le ejóʼo nyé bʉ́á. Mɨná séaa gá e né mbǐ syɛ́ɛ́ nyé ngá buú kpɛl wɨ́. 29 Ebě, Nzyɛ̌m gá wɨ́ná, nye ó mpʉ̌ siʼe dí ɨ́ buú dúo yɨ́. |