Ebrœ̂ 11 - Kálar Nzyɛ̌m : Ejwán é Sáá

Búʼó, yê yé?

¹ Búʼó, yé ó sá gó dí ebúʼla ó, yé ósyɛ́ɛ, yɨ́ɛ dína apǎ syɛ́ɛlɨ yɨ́. Búʼó, yé ó sá gó dí egʉ́a ɨ́ léme ó, yé ó tɨ̂, yɨ́ɛ apǎ nyɨ̂n yɨ́.

² Nzyɛ̌m á sêʼle bʉr o mélú mé épíhe ó, ɨ́ lɔ̌b búʼó yɔ́ɔ́.

³ Ɨ́ nzɨ̌ búʼó gá yɨ́ná ó mɨ́ná dí egʉ́a gá ó, Nzyɛ̌m ó b'á kuho kʉ́ e sí ɨ́ nzɨ̌ lwǐb yé yɨ́. Nó ó, sá yɨ́yɛ̂h dí enyɨ̂n yɨ́, yé á duho ó, ɨ́ yaá dí anyɨ̂n yɨ́.

⁴ Búʼó mé Ábɛl ó b'á sâ ó, nye dwêʼ Nzyɛ̌m mpǎŋ ndwéá, laa waá mé Kayɨ̂n. Nzyɛ̌m á si sêʼle nye ɨ́ lɔ̌b búʼó yé, le elɛ́ɛ ó, nye ó tîtyěl mʉr, le ekam ntémé ndwéá wé. Ɨ́ búʼó yé, Ábɛl dína ó lɨ́ elwib e mɨná gâ, damá jóʼo ó, nyɨ́ dwe.

⁵ Búʼó mé Énɔk ó b'á sâ ó, nye ayɨ́ dwe. Nye á si bana bɨ́nɔɔ kʉ́, kumo ɨ́ kwár mé Nzyɛ̌m. Yé á bé abe e mʉr á baʼa bee nye, ebě, Nzyɛ̌m á si nʉa nye. Yê cɛmá ó, Énɔk apǎ bére kʉ́, Nzyɛ̌m á si boo bee nye mbɨ̂mbɨá.

⁶ Nzyɛ̌m ákóʼó kpɛl mʉ̂r dí abe e búʼó nyá. Búʼó ó dí esâ ó, mɨná gʉ́ŋaa gá ó, Nzyɛ̌m, nye ó tɨ̂ʼ tyeetye. Búʼó ntémé ó dí elɛ̂ʼle mɨ́ná gá ó, nyě dwé myɛ́na mé émbɨa ó, njɨ bʉr o dí edû nyé bá. Abe e búʼó yaá nɛ́ɛ: lɛ́ɛ́, yé abe e mʉr ngwár ngá sîhlě nkǒ Nzyɛ̌m dí yɨ́.

⁷ Ɨ́ lɔ̌b búʼó, Nóe á si jóʼo Nzyɛ̌m jɔʼ nyé á cɨ̂l nye ɨ́ lɔ̌b sá yé á be ó, yé ósyɛ́ɛ yɨ́. Nye dína apǎ bee yé e dîh, nye nzě gbâ lwǐb mé Nzyɛ̌m yaá ɨ́ dúu, ntɔ̂ʼ kpaʼ byɛ̂l, dû mpʉ̌ Nzyɛ̌m á tɨ́e ó, nye sâʼ yɨ́. Nye nzě nî tɨ̂, bé e mbɛ̌r bʉ̂r wé, bɨ́bɛ̂h ntɔ̂ʼ tíʼe. Ɨ́ lɔ̌b búʼó yé ó nyé á lɛ̂ʼle ó, syɛ́ɛla bʉ́ʉ́ bʉ̂r, bé á sâ yɨ́, yé á be ɨ́ bébe yɨ́. Bɨ́ɛ bé á bé adyɛ̂ʼwo e Nzyɛ̌m. Nye á bi nkam ó, tâŋ nkɔb nyé, ɨ́ lɔ̌b búʼó yé.

⁸ Ɨ́ lɔ̌b búʼó, Abraham á si sâ Nzyɛ̌m mejóʼo ɨ́ jɔʼ nyé á jébe nye ó, nye tôʼ di ɨ́ sí Nzyɛ̌m á be ó, nyě dwé ó nye yɨ́. Nye á tô ó, apʉgʉ́ gʉ́ǎ titii gúmó nyé á be ó, nye tôʼ di yɨ́.

⁹ Ɨ́ lɔ̌b búʼó yé ó nyé á tíʼe ɨ́ sí Nzyɛ̌m á kɛʼ nye yɨ́, damá jóʼo ó, nye á tíʼe tɨ̂ʼ ó mpʉ njwóo. Nye á didi tɨ̂ʼ ó, ɨ́ mbɛ̌r kán. Isaac, bé e Yákɔb, bʉr o bé e boo nɔ́ɔ́ bé á kɛʼɔɔ sí yaá bá, bé á di ntémé ó, ɨ́ mbi mímbɛ̌r myé á be ɨ́ nwɨɨla e wɨ́haá mí. Bɨ́bɛ̂h, bé á si bóno ebi mémbɨǎ Nzyɛ̌m á kɛʼ Abraham má. Mé ó b'á be nkɔb líʼe nyɔ́ɔ́.

¹⁰ Abraham ntémé á sâ nó ó, nyɨɛ lɨ́ ebóno ó, nye ódi ɨ́ mpǎŋ nkanǎ Nzyɛ̌m á bono le esumo, dí e melele yɨ́.

¹¹ Ɨ́ lɔ̌b búʼó, Abraham á si dwe Sara ebum, nyé osí laǎ jɔʼ nyé á be ó, nye díʼee sɔ́ŋ mwân yɨ́. Sara ntémé kǔn mʉ́má. Abraham á bě e búʼó ó, Nzyɛ̌m ókʉ́ bánǎ lóŋlo nkɛ́ʼ nyé.

¹² Nzyɛ̌m nzě dwě Abraham nkul ebono mpóʼo dí ɨ́ buú buo bʉ̂r nyɨ́, damá jóʼo ó, nye á be ó mpʉ ndwê. Bʉr o mpóʼo nyé, bé óbuǒ mpʉ ócwícwén, nkʉ̂ osɨ́ǎ o mâŋ, abe e tólɔ́ɔ.

¹³ Bʉr baá bɨ́bɛ̂h, bé á dwe ó, bɨ́ɛ lɨ́ edyɛ̂ʼwo e Nzyɛ̌m. Jɔʼ bé á dwidwe nó yɨ́, bé á bé apǎ bǐ sá nyé á kɛʼ bé yɨ́. Sâ gwár, bé á bee nkɛ̌ʼ nyaá ó, nye dína ká ká lɨ́ ejaa. Bê nzě soho nyê. Bé bʉr o tɨ̂, bé á si gʉ́a lɨ́ otyeetye ó, bé ó ojwóo ti e milaa-nkpǎʼ ɨ́ sí yɨ̂.

¹⁴ Bʉr o dí elɛ́ɛ nó bá, bé lɛ́ʼlé tɨ̂ʼ ó, bé sáá ó, mpóʼo nyɔ́ɔ́ bé bʉr o tɨ̂.

¹⁵ Yé bé bé á be lɨ́ esímsa mpóʼo bé á duho tɨ̂ʼ nyɨ́ nó, mpa bé á si búla, swîʼ, tô píhe.

¹⁶ Sâ gwár, bé á be ó e dwéh édi ɨ́ mpǎŋ mpóʼo, nyaá dí ɨ́ jʉ́o kʉ́ nyɨ́. Sá tɨ̂ʼ ó Nzyɛ̌m dí ajóʼo sôn ɨ́ jɔʼ bé dí egbân nyé yɨ́. Nyɨ́ komlo bé mpǎŋ nkana yaá.

¹⁷ Ɨ́ búʼó, Abraham á si kam ɨ́ jɔ̌ʼ Nzyɛ̌m á bóblo nye yɨ́. Abraham nzě sâ ó, nyě jʉ́ ó nye Isaac, tâŋ ndwéá. Nyɨɛ Abraham ó b'á bi menkɛ̌ʼ ménɨ́nɨ́ɨ́ mé Nzyɛ̌m. Nye ntémé ó b'á be ɨ́ cǎr ó, nye díʼɨɨ nye etíʼé é mwân lé laá tâŋ ndwéá,

¹⁸ damá jóʼo ó, Nzyɛ̌m á si boo lɛ́ɛ Abraham ó: «Go óbono mpóʼo nyǒ ó, cɨɨ le Isaac.»

¹⁹ Nye á jwɨʼ ó, Nzyɛ̌m óbɛ̌m pɛ̌ʼ Isaac lɨ́ odwe. Mɨná bé óbɛ̌m lɛ́ɛ gá ó, nye á si baʼa nʉa Isaac píe nyé á dwe yɨ́.

²⁰ Ɨ́ búʼó, Isaac á si syɛɛ Yákɔb, bé le Esô metyéelé. Nye á si boo gwîh sá yé á be ó, yé ngá syɛ́ɛlɨ yɨ́.

²¹ Ɨ́ búʼó, Yákɔb, ɨ́ jɔʼ nyé á be, nye mû kúno edwe yɨ́, nye nzě syɛɛ bwán óbá mé Yóseb metyéelé. Nye nzě gbɔlwa sí, kúrwo ɨ́ ntúm wé, nzě dwě Nzyɛ̌m kûm.

²² Ɨ́ búʼó, Yóseb á si lɛ́ɛ bʉr o b'Ɨ́zraɛ̂l, lɨ́ esíé é twiʼ yé ó, bé óduhǒ sí Egɨ̂ptɛn, swîʼ. Nye nzě lɛ́ɛ bé ntémé sá bé ósâ e bidwehé byé yɨ́.

²³ Ɨ́ búʼó, obyɛ́l mé Moyɨ̂z, bé á si baʼle nye lɨ́ esǒ ongɔn olɛ̂l píe l'ebyɛ́l lé. Bé á bee ó, nye á be ó mbɨambɨa tyéé. Bé á si pɛʼ bʉ́á ɨ́ milémé myɔ́ɔ́, ntɔ̂ʼ ntaǎ lɛ́á mé njwɨ́ɨ Egɨ̂ptɛn.

²⁴ Ɨ́ búʼó mé Moyɨ̂z, ɨ́ jɔʼ nyé á be, nye mû tɔ́má mʉr yɨ́, nye nzě bene ékǎ sêʼlɔɔ ó, «mwân mé sile mé Faraɔ̂ŋ».

²⁵ Nye á kpɛl ó, nye síaa e túú, bé e bʉr o mé Nzyɛ̌m, laa ó, nye díʼee e bisʉhʉʉ tâŋ mâ jɔʼ, nyɨɛ lɨ́ esâ mísyóm.

²⁶ Nye á kpɛl ó, bé pyéhee bé e Krîst sɔ́má, laa ó, nye bíʼee okúm ɨ́ sí Egɨ̂ptɛn. Nye á si bee myɛ́na Nzyɛ̌m á komo nye má.

²⁷ Ɨ́ búʼó yé, nye á si duhǒ sí Egɨ̂ptɛn, akpɛ́ɛ ébúʼ mé njwɨ́ɨ Egɨ̂ptɛn. Nye á kʉ tyɛ̂b ó, ɨ́ píʼi, le esâ mpʉ̌ sá lɛ́ɛ́, nye á bɨbee ó Nzyɛ̌m, mʉr dí abeɔɔ nyá.

²⁸ Ɨ́ búʼó yé ó nyé á komlo nzɔɔ Páska, mimyɛʼ métié ɨ́ meníŋlɨ́ mébê yɨ́. Nye á sâ nó ó, éngeles sá ajʉ̂ médwéʼé mé bwán bɔ́ɔ́.

²⁹ Ɨ́ búʼó, Moyɨ̂z, bé e dyɛɛ́ yé, bé á si ntaa Mâŋ mé Ácʉʼ. Bé á ntaa ó e mekʉ̌ mɔ́ɔ́ mpʉ bʉ̂r dí etye ɨ́ nzwâh yɨ́. Mpʉ bʉ̂r o b'Egîpten bɨ́ɛ, bé á gwa ntaa nó yɨ́, medíbé nzě búblo bê. Bê nzě síe ɨ́ twíilɨ̌.

³⁰ Ɨ́ búʼó, bʉr o b'Ɨ́zraɛ̂l, bé á si lie Yerikô bijɔʼ bísaman, jɔʼ gwár ɨ́ móhó. Nó ó, ɨ́ móhó nzaangbá, bipǎb bí kóʼ Yerikô nzě duma sí.

³¹ Ɨ́ búʼó mé Rahâb, sadága mʉ́má, nye á bé adwe ɨ́ jɔʼ bʉ̂r oswîh, bé á jʉ́ŋɔɔ yɨ́. Bé á si sâ Nzyɛ̌m ebɨ̌h. Nyɨɛ ó b'á gʉ́a ebaʼle bʉr o b'á nze byamle sí Kanân bá.

³² Wáǎ lɔ́ɔ mé ókǎ báʼǎ lɛ́ɛ bɨ́n wɨ́? Yé kǎ sáa mé ó jɔʼ, ó me lɛ́yɨɨ bɨ̌n milɔ̌b mé Gedeyɔ̂n, bé e Barâk, ndu e Samsɔ̂n, Yɛftâ, David, Samuel, le ogwíha o mílɔ̌b mé Nzyɛ̌m.

³³ Ɨ́ nzɨ̌ búʼó yɔ́ɔ́ ó bé á lwímla e mesí meswîh, ntaŋɔɔ mé yɨ́. Bé á si tíʼe bʉr milɔ̌b lɨ́ otîtyěl ɨ́ nzɨ̌ búʼó yɔ́ɔ́. Bé á si bi nkɛ̌ʼ mé Nzyɛ̌m ɨ́ nzɨ̌ búʼó yɔ́ɔ́. Bé á si pɨr mingbampɨɨ minum ɨ́ nzɨ̌ búʼó yɔ́ɔ́.

³⁴ Bé á si díme medíʼe, le ekɨ̂ŋ ópasoŋ ebě búʼó yɔ́ɔ́. Bé á nyɛɛ be ɨ́ tyɛʼ, ntɔ̂ʼ bi pîm ɨ́ menyʉ̂l ebě búʼó yɔ́ɔ́. Bé á lwímla mɔm ntémé, le eso bísɔ́má bí mɔ̂m bíbyɛ̂h ó, ɨ́ nzɨ̌ búʼó yɔ́ɔ́.

³⁵ Bʉ́ʉ́ bʉ́bá, bé á baʼa nʉa bʉr bɔ́ɔ́ bé á nyɛɛ dwe, kǎ pah bá ó, ɨ́ nzɨ̌ búʼó yɔ́ɔ́. Bʉ́ʉ́ bʉ̂r, bé á si bɔma e bintɨ́ʼá ɨ́ lɔ̌b búʼó, akam ó, bé dwíhɔɔ lɨ́ okómó, ebě, bé á kpɛl ó, bé páhaa lɨ́ odwe, mbǐ pahá dí ɨ́ buú mbɨa wɨ́.

³⁶ Bʉ́ʉ́ bʉ̂r, bé á si kam elwɨ́ɔɔ le ebíŋɔɔ ɨ́ lɔ̌b búʼó yɔ́ɔ́. Bâʼ, bé á si káʼɔɔ e mikʉ̂kɔ̌b, tyenɔɔ lɨ́ okómó ɨ́ lɔ̌b búʼó yɔ́ɔ́.

³⁷ Bʉ́ʉ́, bé á si lúmɔɔ mekóʼ, jʉ́ŋɔɔ. Bâʼ, tíʼɔɔ bípéh bíbá e menziʼ; bʉ́ʉ́, jʉ́ŋɔɔ le opasoŋ; bʉ́ʉ́ bɨ́ɛ, bé á si soŋɔɔ ɨ́ mimbɛ̌r myɔ́ɔ́, didiŋɔɔ̌ kʉ̌l e kʉ̌l. Bé á jaa tyeele ó, njɨ bikʉ́r bítab lɨ́ odyɛ́m. Bʉr, bé á si bu tíble bé, le esáŋɔɔ bé jélé ɨ́ lɔ̌b búʼó yɔ́ɔ́.

³⁸ Bé á títye ó, ɨ́ lʉá e lʉá ndu e ɨ́ mecwɨ̂ʼ. Bé á jɨjâ ó, ɨ́ mekul ndu e bibáh mékóʼ, tó kœb ó, bé á be ɨ́ mbɨa bʉ̂r. Yé á bé ajala ó, bé díʼee ɨ́ bébe bébe sí yɨ̂.

³⁹ Nzyɛ̌m á si kam bʉr baá bɨ́bɛ̂h ɨ́ lɔ̌b búʼó yɔ́ɔ́, bɨ́ɛ yɨ́ɛ apǎ bǐ sá nyé á kɛʼ bé yɨ́.

⁴⁰ Mpʉ nyé á cwɨ́a e mɨná gá, laa bé yɨ́, nó nyé á lɛ́ɛ ó, nye ójaá komlo bícwiʼ byɔ́ɔ́ ɨ́ mipáʼ mímyɛ̂h ó, njɨ ɨ́ jɔʼ nyé ókomlo byaá gá bíná le onɔ́ɔ́ bíbyɛ̂h yɨ́.