Ebrœ̂ 1 - Kálar Nzyɛ̌m : Ejwán é Sáá

Nzyɛ̌m á ka lwib ó, cɨɨ ɨ́ nzɨ̌ Mwân wé

¹ Ɨ́ mimbú mí píhe, Nzyɛ̌m á lwilwib e bimpám gá bíná ó, cɨɨ ɨ́ nzɨ̌ ogwíha o mílɔ̌b. Nye á lwilwib e byé ó, mimbi mimbi, le ɨ́ bijɔʼ ɨ́ buo buo.

² Ɨ́ yɨ̂ʼ jɔʼ mpʉ mélú mé mpóʼo sí yɨ̂ʼ mû lɨ́ ekɔ́a yɨ́, nye mû kǎ lwib e mɨná gá ó, cɨɨ ɨ́ nzɨ̌ Mwân wé. Nye ó waá Nzyɛ̌m á kɛʼ ó, nye ónʉa bílíʼé bí sí yɨ̂ʼ bíbyɛ̂h nyá. Nzyɛ̌m á kuho kʉ́ e sí ndu e l'ekomlǒ sá yɨ́yɛ̂h dí tɨ̂ʼ yɨ́ ó, ɨ́ nzɨ̌ nyé.

³ Nye ó dí e mentyɛnwa ndu e kûm mé Nzyɛ̌m. Nye ó dí gulo dí elɛ̂ʼlě mpʉ̌ Nzyɛ̌m mʉr tɨ̂ʼ dí yɨ́ nyá. Nyě baʼlé sá yɨ́yɛ̂h ó, ɨ́ nzɨ̌ lwǐb yé, dí e nkul yɨ́. Nye á si sîl ekomlo nzɨ̌ epubo bʉ̂r misyóm myɔ́ɔ́. Nye nzě bɨ́nɔɔ ɨ́ jʉ́o kʉ́, tó di sí ɨ́ mbó éjʉ́m mé Nzyɛ̌m kûm nɨ́nɨ́ɨ́.

⁴ Sá tɨ̂ʼ ó Mwân wé mû mbɨ́ná kʉ́, laa bééngeles yɨ́. Sá tɨ̂ʼ ntémé ó Nzyɛ̌m á dwe nye dǐ nɨ́nɨ́ɨ́, yaá dí ɨ́ bwaʼ, laa yaá yɔ́ɔ́ yɨ́. Nye á nʉa dǐ yaá ó, jala e nkɔb nyé.

Mwân mé Nzyɛ̌m, nye lɨ́ elaa bééngeles ɨ́ jwɨ́ɨ

⁵ Kâr éngeles ngwár Nzyɛ̌m dí ɨ́ pǎ lɛ́ɛ e né ó: Go ó mwân wǎm. Mɨ́ byâ gó mûh! Nye ntémé, nyé apǎ lɛ́ɛ, dumo e nyʉ́ʉ́ éngeles ó: Me óbe ó sɔ́ŋ lɨ́ esú lé. Nyɨɛ óbe ó mwân lɨ́ esú lâm.

⁶ Jɔ̌ʼ Nzyɛ̌m á tyêl nye ɨ́ dǐ dí ɨ́ buú bwaʼ dúu yɨ́, nye á nze lɛ̂ʼle beéngeles bɨ́bɛ̂h nyǎ. Nye á lɛ́ɛ ó: Beéngeles bɨ́bɛ̂h ɛ̌! Bɨʼɨɨ gá nye mebóó sí lɨ́ edwe nyé kûm.

⁷ Nzyɛ̌m á lɛ́ɛ, dumo e beéngeles baá ó, Nyě sá bééngeles o mílʉ́mlʉ́ bé ó, bé díʼee mpʉ̌ pubó. Nye ó b'á sâ ó, osyɛ̂l o mésá bé baá, bé díʼee ntémé mpʉ mínjʉl mí siʼe.

⁸ Sâ gwár, nye á lɛ́ɛ, dumo e Mwân wé nyɨɛ ó: Nzyɛ̌m ɛ́! Go ó dí edi ɨ́ mecwɨ́ɨ́ mé jwɨ́ɨ́ yô njʉ̌m dǐ e njʉ̌m dǐ. Go ó dí ejwɨ́ɨ lɨ́ otîtyěl.

⁹ Gǒ kpɛl ó, sá dí tîtyěl yɨ́, bene yaá dí onzyɛ́h ónzyɛ́h yɨ́. Sɨ́ǎ yaá ó dí ó, Nzyɛ̌m ɛ̌! Nzyɛ̌m gǒ á si lœm go múló mé jwɨ́ɨ, lɨ́ edwe gó nkul jwɨ́ɨ, le elóŋlǒ lémé gô e bisʉhʉʉ, laa bʉ̂r ó njoo yô.

¹⁰ Yé ntémé, yê cɛmá, dumo e Mwân wé ó: Dâ ɛ̌, go ó b'á kuho sí yɨ̂. Le jʉ́o, le ejwoo, byé ó syɛ́ɛ́ mébó mô.

¹¹ Bisâ byaá bíbyɛ̂h, byé ódîm. Gua, go ódi ó, njɨ̌ njʉ̌m dǐ e njʉ̌m dǐ. Bisá bíbyɛ̂h bíɛ jwɨ̌m mpʉ míkán.

¹² Go óbâʼ byé mpʉ bé dí ebâʼ dur, nɛŋ yé lɨ́ empah yɨ́. Yé ó nó. Go ócéne bísá bíbyɛ̂h mpʉ mʉ̂r dí ecéne míkán myé yɨ́. Sâ gwár, ɨ́ gó pâʼ, gua go ójaá di ó, njɨ jwɨʼ gwár, ajwɨmjwɨm.

¹³ Nzyɛ̌m á bé alɛ́ɛ ɨ́ lʉ́ʉ́ dʉ́o, dumo e nyʉ́ʉ́ éngeles wé ó: Diʼee sí wâ, ɨ́ mbó éjʉ́m wâm. Bónáá ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.

¹⁴ Beéngeles bɨ́ɛ, bê onzé? Bɨ́bɛ̂h, bé ó misísǐm mi dí eséǎ Nzyɛ̌m syɛ́ɛ́ mí. Nyě lómló mɨ́ná gá bǎ ntémé ó, bé ntáa súʼo bʉ̂r o ngá bǐ twǐʼ njʉ̌m dǐ, jala e nkɔb líʼe nyɔ́ɔ́ bá.